शक्ति काम 23
23
1थोक खाईन यहूदीओन छ्ये छ्ये मि गाङे दोन्दु क्याल्नामेकी छ्याःङ ज्यीबाराङ मिक्किता खाईन थेबा ओत्सापाला ताकीन पावलगी “आज्यो न्वावे, परमेश्वरते छ्याःङ विरोध मिक्किता खाईन ङे जुनी खाङ थेला लेमु खाईन माने खाबा ओत,” सिन बात खिताला स्यूसुङ। 2थेकी परमेश्वरला लेमु खाईन माने खाबा ओत सिरजीन गाङे भन्दा छ्येते पूजारी हननियेकी स्येदाङगी पावल खादु देता ओताते मिओनला “ए थे खे लाक्पा ग्योप,” सिन सिदुक। 3थे खोरोङला ग्याप्नामेई पावलगी हननियाला “खो चुकस्यिक ईन्दाका। खो ङाला च्यिला थाराङ दुङ ज्युत्कीते? खुई ङाला खाबा च्योकराङ परमेश्वरगी खोल्लाङ खिओ। खो दुरू न्याय खिताला वाबाते ईन्सीनोङ खुई ङाला दुङ च्युताते परमेश्वर नियमला खि साबाच्योक खाईन न्याय खाबाते मेन,” सिन सिदुक। 4थेकी थोक सिरजीन थे खादु देताते मिओनगी “खो थोरूम परमेश्वरते गाङे भन्दा छ्येते पूजारीला दोक खाला खा खिओ?” सिन ङारसुङ। 5थेमे पावलगी “आज्यो न्वावे, दि गाङे भन्दा छ्येते पूजारी ईन सिन ङाला छ्या मेतान। परमेश्वर बातला ‘ख्योकोनगी दाक्पोन छ्येते मि विरोध खिता मेङगो,’ सिन टिबाते बात ङालाङ छ्या ओत,” सिन सिदुक।
6थेरू जम्मा ओङाते यहूदीओन छ्ये छ्ये मि नाङ कोई सदुकी पाटी मि, कोईचेन फरिसी पाटी मि ओतान। थेरू पाटी ङि मि ओताते बात छ्या स्येकीन पावलगी गाङेकी थोच्या खाईन “आज्यो न्वावे, ङाङ फरिसी पाटी मि ईन। ङे आबाबा गोप्पोबाङ फरिसी पाटी मिराङ ओतान। ङा परमेश्वरगी स्याप्ते मिला तिरी सोम्बो लोइओ सिन पत्ते खित्कान्ते मि ईन्देकीराङ ङाला मुद्धा चले खाईन दोक खाईन थरिङ ख्योकोन गाङे दोन्दु खुलाबाते ईन,” सिन सिदुक।
7पावलगी थोक सानामेई फरिसी पाटी मिबरी छ्य्वाच्यीकपा सदुकी पाटी मिबरी छ्य्वाच्यीकपा गाल्गीन थेरू थेबे नाङ थोम्मु स्योरसुङ। 8च्यिला सासीन सदुकी पाटी मि गाङेराङ परमेश्वरगी स्याप्ते मिला तिरी सोम्बो लोइओ, परमेश्वर दूतओन ओत थेमे थे दूतओन च्योकराङ ज्येनोङ सुइँदा ओङगो सिरच्येते बात पत्तेराङ खिन मेतान। फरिसी पाटी मिओनचेन तिरी सोम्बो लोक्च्येते बात, परमेश्वर दूतओन थेमे थेबा च्योक्ते ज्येनोङ सुइँदा ओत सिरच्येते बात गाङे पत्ते खिन ओतान। 9थोक खाईन थेबे नाङ थोम्मु स्योरजीन थेरू आदोराङ हल्ला खल्ला ओङसुङ। थेमे फरिसी पाटी नाङ धर्मे गुरूओन कोई कोईकी देत्सादुकी जराक जुरूक लाकीन “ङ्योकोनगी दि मिते छ्याःङ गल्ती मोथोङदुक। दिकी गोमा साबा च्योकराङ दित्ताङ परमेश्वर दूतज्यीगी कि थोक्ते सुइँदेकी ठेत्कीन बात खाबाते पक्काराङ ईन्दा, दोक ओङाते मेन्दासीन सिन ङुरूङगी चुक खाला सिरा थुप्कीतेरो?” सिन सासुङ।
10थेबेकी थोक सानामेईनी थेबा झन जीङा जीङाराङ खिताला स्यूसुङ। थेरू थोक हल्ला खल्ला ओङा थोकीन थेबा जीला पावलला सेत्कीता सिन ज्यीबेकी थे मिल्टेरी छ्येते मिकी “मिमा गाल्ला थे मिला छिटो याङराङ देने लाला खोरच्योक,” सिन मिल्टेरीओनला लिन ताङसुङ। 11थे छोमु ग्वाका पावलगी प्रभु येशूला थे खोरोङ खादु वाबाते थोङसुङ। थेमे प्रभु येशूकी थेला “पावल, दुरू खोल्ला खइँदा मेलेबा ओङगीता सिन खो बान्दा ज्यीबा माकेत। खुई रोम सारदु गाल्ला दुरू च्योकराङ खाला थेरूङ ङे बात गाङे ज्येनला लोपा फाप्क्यो,” सिन बात खासुङ।
पावलला सेताला ठो खाबाते
12ङारो ङोमु च्योक्ते कोई कोई यहूदीकी डिगीन पावलला सेत्च्ये ठो खासुङ। थेबेकी थेला मासेतथुप खोपरोङ खाला छ्यु समेदोङ मुलुओ सिन ना क्याल्सुङ। 13थोक खाला थेला सेता छोल्कान्ते मिओन मेरा खाल ङि भन्दाङ ल्हाक्पा ओतान। 14ठो खाईन सिन्नामेई थेबेकी छ्ये छ्ये पूजारी थेमे यहूदीओनते ज्येनोङ छ्ये छ्ये मि ओत्सादु गाल्गीन “हजूरवे, पावलला मासेतथुप छ्यु समेदोङ खाला मुलुओ सिन ङ्योकोनबरीकी ना क्याला ओत। 15थोगी थेकी च्यि च्यि मेलेबा खाला दुका सिन लेमु खाला छ्या स्येबा फाप्सुङ सिरजुम खाला ख्योकोन थेमे यहूदीओनते ज्येनोङ छ्ये छ्ये मि गाङेराङ रूसादु थेला थोङ सिन थे मिल्टेरी छ्येते मिला बिन्ती खि। ताङनामेई ङ्योकोन थेला लामला ओङगीन ओङगीनलाराङ सेत्ला क्युरग्यो,” सिन सिदुक।
16थेबेकी थोक खाईन ठो खाईन पावलला सेता चालाते बात थे भानिजतेकी थोसुङ। थेमे थेकी ब्यारेकपा गाल्गीन पावलला थे बात लाःप्सुङ। 17थे बात थोनामेकी थेकी मिल्टेरी क्याप्टेनज्यीकला काताङगीन च्याकीन “दिला ख्योकोनते छ्येते मि ओत्सादु क्याल्ला बिन। दिते थेत्ताङ बात खिता फाप्च्या ओत्लो,” सिन सिदुक। 18थेमे थे क्याप्टेनगीङ पावल भानिजला थे छ्येते मि ओत्सादु क्याल्गीन “हजूर, दुरू ङुरूङगी किल्गीन ज्याक्पाते पावलगी दि मिला हजूरताङ ठेता खाला बिन सिदुक। दिते हजूरला सिरा फाप्च्येते बात ओत्लो,” सिन सिदुक। 19थेमे थे छ्येते मिकी थेला लाक्पाला जुम्गीन फजेकपा खेरगीन “खुई ङाला च्यि बात सिरा चाले, लो सि,” सिन सिदुक। 20थेमे थेकी “हजूर, कोई कोई यहूदीकी डिगीन आज्याङ पावलगी च्यि च्यि गल्ती खाका लेमु खाला ठिच्ये निउँ खाला ङारो थेला छ्ये छ्ये मि गाङेराङ रूसादु थोङ सिन हजूर खोल्ला बिन्ती खिताला मिओन तोङच्ये ठो खाला दुक। 21थेबे नाङ मेरा खाल ङि भन्दाङ ल्हाक्पाजो मिचेन थेला मासेतथुप छ्यु समेदोङ मुथुङो सिन ना क्याल्गीन देत्ला दुक। थोगी दुरू सुइँदा वाकीन थेला खेरच्ये बात खासीन हजूरगी थे बात माङेन। थेला दुरूकी तोङासात्तु सेताप सिन थे मिओन लामलाराङ ईप्ला देत्च्ये बात दुक,” सिन लाःप्सुङ। 22थेमे थे छ्येते मिकी “ङाला दि बात लाःपा ओत सिन खुई ज्येन सुङलाङ मासेरा,” सिन थेला थेरूकी ताङसुङ।
पावलला सिजरियापा ताङाते
23थेमे थे मिल्टेरी छ्येते मिकी क्याप्टेन ङिला काताङगीन “था आदोला ग्वाका नौ बजेला दुरूकी सिजरियापा तोङाला ख्योकोनगी बार्साताङ तरवार खुराते मिल्टेरी मेन्दा सय ङि, घोडाला जेला डोकान्ते मिल्टेरी मेरा खाल सुमताङ च्युताम्बा थेमे ज्येनतोक हतियार खुराते मिल्टेरी मेन्दा सय ङि ठीक खि। 24पावलला जेत्ला तोङालाङ घोडातेबा ठीक खि। थेला छ्याःङ मेलेबा ओङ मुज्युता खाला थेपा रोमी गेल्बो हाकिम फेलिक्स ओत्सादु केला फाप्क्यो,” सिन कोत्सुङ। 25थेमे थेकी हाकिम फेलिक्सला चिट्ठीज्यीगोङ टिसुङ। 26चिट्ठीलाचेन
“हाकिम फेलिक्स, हजूर खोल्ला ङा क्लौडियस लायसिअसते नमस्कार ओत। 27बात च्यि सासीन दि मिला खरचिङ यहूदीओनगी जुम्गीन दुकीन सेता खाबा ओतान। तर दि रोमी नागरिक दुका सिन छ्या स्येकीन ङे ङाराङ मिल्टेरीओन खेरगीन दिला थेबे लाःक्तुकी ठ्वाकीन खुलाबाप। 28थेमे दिकी च्यि मेलेबा खाका सिन छ्या स्येबाला ङे दिला छ्ये छ्ये पूजारी, धर्मे गुरूओन थेमे यहूदीओनते ज्येनोङ छ्ये छ्ये मि गाङेराङ जम्मा ओङसादु बात ठिर खेराप। 29दिला उजूर खित्कान्तेबेकी दिकी दिबा खोपरोङ धर्मे नियम माङेन्सुङ सिन साबा ओताक्वा। दिला सेताराङ फाप्च्येतेताङ जेलदु लुबा फाप्च्येते मेलेबा काम दिकी छ्याःङ खाबा मेताक्वा। 30थेबेकी थोरूमोङ दिला सेता चाल्ला दुक सिन थोबेकी ङे दिला हजूर खो ओत्सापा केल ताङा ओत। थेमे दिला उजूर खित्कान्ते मिओनलाङ हजूर ओत्सापाराङ गाल्ला बयान खि सिन साबा ओत,” सिन टिबा ओतान।
31थे छ्येते मिकी कोता च्योकराङ खाईन मिल्टेरीओनगी थे छोमु ग्वाकाराङ पावलला टीकीन एन्टिपाट्रिस सिरसासाक क्याल्सुङ। 32थेमे ङारो च्योक्ते थेला घोडे लाक्तु जेकीन गालातेबे जिम्मा लै खाईन ख्याम्गीन गालाते मिल्टेरीओनचेन खोपरोङ ब्यारेकपा ग्युरसुङ। 33पावलला टीला खेरकान्तेबेकी थेला सिजरियादु हाकिम फेलिक्स ओत्सादु क्याल्सुङ। थेमे थेला खोपरोङ छ्येते मिकी टिबाते चिट्ठीङ बिन्सुङ। 34थेमे चिट्ठी पढे खाईन सिन्नामेकी थेकी पावलला “खुई खाम्बा खापा ईन्दे?” सिन ठिजीन थेकी “ङे खाम्बा सिलिसिये अञ्चलपा फाप्क्यो,” सिन सिदुक। 35थेमे थे हाकिमगी थेला “था खोल्ला उजूर खित्कान्ते मिओन वानामेकीकामा खुई बयान लिन्ग्यो,” सिन साकीन थेला हेरोद गेल्बो दरवारदु खेरला फ्रोबा मुथुप्च्या खाला स्योक सिन थे खोरोङ मिल्टेरीओनला कोत्सुङ।
Currently Selected:
शक्ति काम 23: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
