शक्ति काम 21
21
पावलबा यरूशलेमपा ख्याम्बाते
1थेरूकी थेबाताङ ठाल्गीन पावलबा ङ्योकोन गाङेराङ पानीजहाजला जेकीन सरासर कोस सिरसापा गालाप। थेमे ङारो च्योक्ते रोडसपा लेपाप। थेरूकी याङराङ पटारापा गालाप। 2थेरू ङ्योकोनगी फोनिसियापा डोच्येते पानीजहाज थेप्कीन थे जहाजलाराङ जेकीन गालाप। 3थोक खाला डोजीन ङ्योकोनगी थारीलेई साइप्रस लुङबा थोङसुङ। थेमे थे लुङबे दक्षिण छ्य्वामेई खाईन ङ्योकोन सिरिये लुङबापा गालाप। थेरू टायरदु लेप्कीन सामानतेबा थेन्दाला थे पानीजहाज रोके खासुङ। 4ङ्योकोनोङ थेरूराङ फाप्कीन थेरू येशू चेलाओनला ठेताला गालाप। थेमे हप्ताईसाक थेबाताङराङ देताप। थेजीन थेबेकी परमेश्वर आत्मे छ्य्वापेकी पावलला यरूशलेमपा मान्डो सिन बिन्ती खासुङ। 5ईन्सीनोङ थेरूकी ख्याम्बे बेला लेप्नामेकी ङ्योकोन सारदुई थेन्गीन पानीजहाजला जेक्पाला समुन्द्रे खानामा गालाप। थेरूई डोजीन थेबा गाङेराङ खोपरोङ फेम्मे फिजातेबालाङ टीकीन थेस्साक ङ्योकोनला केल लिच्युङ। ङ्योकोन गाङेकी थेबाताङराङ थेरू खोबुकला देत्कीन परमेश्वरला प्रार्थना खाबाप। 6थेमे थेरूकी ठाल्गीन ङ्योकोनचेन पानीजहाजला जेबाप। थेबाङ खोपरोङ खोपरोङ खाम्बाला ग्युरगीन गाल्सुङ।
7टायरदुकी ख्याम्नामेई ङ्योकोन टोलेमाइस सिरसापा लेपाप। थेरूङ ङ्योकोन थेरू आज्यो न्वाओनला ठेता खित गालाप। थेमे थेबाताङ ङीमाई देताप। 8ङारो च्योक्ते ङ्योकोन थेबाताङ ठाल्गीन सिजरियापा गालाप। थेरू ङ्योकोन फिलिप खाम्बादु गाल्गीन देताप। थेचेन ठाउँ ठाउँला गाल्ला गा लाङच्येते बात लोप्कान्ते मि ओतान। गोमा यरूशलेमदु येशूला विश्वास खित्कान्तेबाला मद्धत तेराला छाने खाबातेबा मेरा दुईनगी नाङ थेङ दोक्पोई ओतान। 9थेते फाङमा मिक्किता खाईन देताते फुमु स्यी ओतान। थेबा स्यीकाराङ परमेश्वरगी सिर च्युताते बात खित्कान ओतान।
10ङ्योकोन आदोराङ थेरू देत्नामेई यहूदिये अञ्चलदुकी अगाबस सिराते परमेश्वर बात खित्कान्ते मि वादुक। 11ङ्योकोनताङ ठेत्नामेकी थेकी पावलगी च्यिबाते काराककी थे खोरोङ लाक्पा काम्बा ठाकीन “थाल्ला ङे लाक्पा काम्बा ठाबाते काराक जसकीते ईन थेला यरूशलेमदु यहूदीओनगी दोकराङ खाला जुम्ला ठाला ज्येन ज्येन जातकी मि लाःक्तु सोम्पे खिओ, दि परमेश्वर आत्मेकी साबाते बात ईन,” सिन सिदुक। 12थेकी थोक सानामेकी थेरू ओताते मिओन थेमे ङ्योकोन गाङेकी पावलला ओर्च्ये, खो यरूशलेमपा मान्डो सिन साबाप। 13ङ्योकोनगी थोक खित्जीन थेकी “ख्योकोन च्यिला दोक खाला ङुइन ङाला पीर लोङगीते? प्रभु येशू लाईदु ङानी यरूशलेमपा सुइँदेकी ठाइता सिननी च्यि थे लाईदु स्या फाप्सीनोङ नाइँ मिसिरो,” सिन सिदुक। 14थेला जति सिरजीनोङ छ्याःङ लै माक्याबेई प्रभु येशूकी जस्तो खिता चाल्ला दुक खोल्ला थोकराङ ओङस्यीत सिन ङ्योकोन खाराक्पा देताप। 15थेमे ङ्योकोन ङेराङते जेसुकै ठाक ठीक खाईन यरूशलेमने गालाप। 16सिजरियादु ओताते येशू चेलातेबाङ कोई कोई थेजीन ङ्योकोनताङ ङ्योम्बुराङ गाला ओतान। थेबेकी ङ्योकोनला मनासोन सिराते मि खाम्बादु खेरगीन ज्याक्सुङ। मनासोनचेन साइप्रस लुङबे मि ओतान। गोमा गोमाराङ येशूला विश्वास खिताला स्यूक्कान्ते मि नाङ थेङ दोक्पोई ओतान।
पावलला सल्लाह बिन्दाते बात
17यरूशलेमदु लेप्कीन थेरू आज्यो न्वाओनला ठेत्नामेई थेबेकी ङ्योकोनला आउदी लेमु खासुङ। 18थेमे थेरू ङारो च्योक्ते पावलताङराङ ङ्योकोन गाङेराङ याकूबला ठेताला गालाप। थेरू येशू ख्रीष्ट मिओनला ताकान्तेबाङ गाङेराङ वाबा ओतान। 19थेबा गाङेला ठेत्नामेई पावलगी थे खोरोङगी येशू बात लोप्जीन थे छ्य्वापेई परमेश्वरगी ज्येन ज्येन जातकी मिला चुक लेमु खासुङा सिन बातज्यीगोङ बाँकी मोज्योबा खाईन लाःप्सुङ। 20दि बातओन थोकीन थेरू जम्मा ओङातेबा गाङेकी गा खिन परमेश्वरते जय जय खासुङ। थेमे थेबेकी पावलला “भाइ पावल, दुरू येशूला विश्वास खिताला स्यूबाते यहूदी आउदी काल्बेई ओत सिन खोल्ला छ्याराङ ओत। थेबा गाङेकी मोशेकी टिबाते नियमओन थोरूमोङ आउदी खाला ङेन्गीदुक। 21खुई लुङबा लुङबाला ज्येन ज्येन जातकी मि नाङ देत्कान्ते यहूदीओनला मोशेकी टिबाते परमेश्वर नियम ङेन्दा ताङला ख्योओ फिजाओनला ज्वा फाप्च्येते खतकी चिनु ज्वा माफाबोत्लो थेमे ङुरूङ यहूदीओनगी माने खित्च्येते रीतिथितिङ छ्याःङ माने खिता माफाबोत्लो सिन लोप्कीदुक्लो सिन थोकीन थेबा खोत्ताङ स्येदाङ खाला दुक। 22था च्यि खित्च्ये, खो दुरू लेप्ला दुक्लो सिन थेबेकी दाक छ्या स्येक्यो। 23थोगी था खुई दोक खि। च्यि सासीन टिक्पी दिन ङा दोक दोक मिक्किओ सिन परमेश्वरला कोबोल खाईन देताते मेरा स्यी मि दुरू ओत। 24था थेबेते कोबोल खाईन देताते दिन सिन्गीन चोके खित्च्येते बेला लेप्नामेई खोङ थेबाताङराङ चोके खि। थेबाला चोके खित्जीन गोच्येते खर्चङ खुईराङ च्याल्ला बिन। थेमे थेबेकी खोपरोङ टा ठेक्पा थुप्क्यो। खो खोरोङगीङ थाल्ला ङ्योकोनगी साबा च्योकराङ खाबा थोङनामेई खुई मोशेकी टिबाते परमेश्वर नियम ङेन्दा ताङसीन ओङगोत्लो सिन लोप्कीदुक्लो सिन गोमा थोबाते बात साँचो मेन्दाक्वा बरू खोङ थे नियमराङ ङेन्च्याक्वा सिन गाङेकी छ्या स्येक्यो। 25येशूला विश्वास खित्कान्ते ज्येन ज्येन जातकी मिकी चुक खिता फाप्कीते सिन ङ्योकोनगी गोमाकाराङ साकीन सिन्दा ओत। थेबाला ङ्योकोनगी ल्हाला पूजा खाबाते छ्याःङ मासा, ठागोङ मासा, ठाक मेदेन्दा खाईन सेताते छ्याःङगीतेङ स्या मासा। थेमे रन्डीबाजी थेमे होदि च्योक्ते खिता मेङच्येते काम माकेत सिन टिकीन ताङा ओत,” सिन सिदुक।
26थेरू थेबेकी साबाते बात ङेन्गीन पावलगी ङारो च्योक्ते थेबा मेरा स्यीबोला टीकीन खेरगीन थेबाताङ ङ्योम्बुराङ चोके खासुङ। थेमे था दि छोमु ङ्योकोनते चोके खित्च्येते दिन सिन्ग्यो, थे छोमु खोपरोङ गाङेकी चढे खिता फाप्च्येतेबा खुरला ओङगो सिन लाःपाला पावल परमेश्वर मन्दिरदु गाल्सुङ।
पावलला पक्रे खाबाते
27थेमे थे ङीमा दुईन चोके खित्च्येते दिन छाङा खाबा ओतान। थे बेलालाराङ एशिये अञ्चलदुकी वाबाते यहूदीओनगी पावलला परमेश्वर मन्दिर नाङ थोङसुङ। थेमे थेबेकी पावलला जुम्गीन मि गाङेला उल्के खिन 28“ए आज्यो न्वावे, लो गाङेराङ छिटो स्योक। था दिला ठीक पारे खिता फाप्क्यो। गाङेपा युला ङुरूङ जातकी विरोध खित्कान्ते दिराङ ईन। गाङेपे मिला परमेश्वर नियम ङेन्दा थोङ सिन सिरकान्ते, परमेश्वर मन्दिर छ्याःङ मेन सिन लोप्कीन ख्याम्कान्ते दिराङ ईन। दोस्यिककामा मेन, दिकी आनाङ भर्खरकामा ग्रीकओनलाङ दि मन्दिर नाङ लुगीन मन्दिरराङ बिटुले खादुक,” सिन छेरा खासुङ। 29दोक ओङा भन्दा टिक्पी गोमाकामा थेबेकी एफिससपे त्रोफिमस सिरातेला पावलताङ सारगी नाङला युगीन ओता थोङा ओतान। थेकी थेला परमेश्वर मन्दिर नाङ लुक्पासीन सिन विचार खाईन थेबेकी दिकी ग्रीकओनला मन्दिरदु लुक्तुक सिन साबा ओतान। 30थोक खाईन थेबेकी सार खाङराङ हल्ला खल्ला मच्चे खासुङ। थेमे सारगी मिओन थेरू फुङ पुकीन दिला सेताराङ फाप्क्यो सिन पावलला जुम्गीन ठुत्कीनकामा मन्दिरदुकी फिनामा तेन्गीन मन्दिर गोचेन डाम डुम च्येत्सुङ।
31थेरू थेबेकी थेला दुकीन सेता खाबा ओतान। थे बेलालाराङ सार खाङ होहल्ला ओङसुङ सिन रोमी गेल्बो मिल्टेरी छ्येते मिकी थोसुङ। 32थे बात थोबाईताङ थे छ्येते मि कोई कोई क्याप्टेनताङ मिल्टेरीओन टीकीन तुरून्त थे हूलदङ्गा ओङसादु ख्योल्सुङ। थोक खाईन मिल्टेरी टीकीन छ्येते मि ओङा थोङगीन थेरू मिओनगी पावलला दुङा ताङसुङ। 33थेमे थे छ्येते मिकी “दि मिला जुम्ला लाक्पा ङिकारला नेल कोन,” सिन पावलला जिन च्युत्कीन थेरू मिओनला “दि मि सु ईन्दे? दिकी च्यि खासुङा?” सिन ठिसुङ। 34थोक सिन ठिजीन थे मिओनगी दोक्पोईकी बातज्यीक ज्येनज्यीगी बातज्यीक खिन छेरा खासुङ। थोक ओङजीन थे छ्येते मिकी पावलला च्यिला थोक खाईन दुबाते ईन्दाका सिन छ्याःङ छ्या मास्येसुङ। थोगी थेकी मिल्टेरीओनला “दिला ब्यारेक नाङने खेर,” सिन कोत्सुङ। 35थोक सानामेकी थेबेकी पावलला ब्यारेकने डोच्येते सिंढी खादु क्याला ओतान। थे मिबरी याङराङ फुङ पुकीन थेरू ओङा थोङगीन पावलला सेत्कीता सिन ज्यीबेकी थे मिल्टेरीओनगी थेला तेगीन खेरसुङ। 36“दिला सेताराङ फाप्क्यो,” सिन छेरा खिन थेबा गाङे थे तिरी तिरी गाला ओतान।
37थोक खाला नाङने लुबा खित्जीन पावलगी थे मिल्टेरी छ्येते मिला “हजूर, ङा खइँदा बात खिता थुप्क्यो?” सिन सासुङ। थेकी ग्रीक भाषाला थोक सिरजीन थे छ्येते मि छक्क परे खिन “खोनी ग्रीक बादोङ खिता थुप्च्याक्वा। 38ङेनी खो खरचिङका रोमी गेल्बो विरोधला दुरू हूलदङ्गा खित ज्युत्कान्ते मिश्रीका दुका साबाप। थेकीचेन हात हतियार खुराते हजार स्यी मि नेता ओङगीन थेबाला री नाङपा टीकीन खेरा ओतान,” सिन सिदुक। 39थेकी थोक सिरजीन पावलगी “ङा थे मि मेन हजूर। ङानी यहूदीका ईन। ङा सिलिसिये अञ्चलते टार्सस सारगी मि ईन। थे छ्येते सार ईन सिन गाङेपे मिला छ्या ओत। हजूर खुई ङाला दि मिओनताङ बातज्यीक बात ङि खिता नाङ,” सिन सासुङ। 40थेमे थे छ्येते मिकी “ओङगो खि,” सिन सिदुक। थेमे पावलगी ब्यारेकने डोच्येते सिंढीदु देत्कीन मि गाङेला खाराक्पा देत सिन लाक्पेकी चाल खानामेई थेबा गाङेराङ खाराक्पा देत्सुङ। थेमे थेकी थेबाला खोपरोङ हिब्रू भाषाला दोक सिन बात खिताला स्यूसुङ।
Currently Selected:
शक्ति काम 21: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
