शक्ति काम 19
19
पावलगी एफिससदु खाबाते काम
1अपोल्लोस कोरिन्थदु ओते बेलाला पावलचेन समुन्द्रे लामला मोन्डोबा खाईन ठाउँ ठाउँला युगीन एफिससदु लेप्सुङ। थेरू लेप्नामेकी थेकी येशू चेला कोई कोईला ठेत्सुङ। 2थेमे थेकी थेबाला “ख्योकोनगी येशूला विश्वास खानामेई परमेश्वर आत्मा ङेत्सुङाना माङेत्सुङा?” सिन ठिजीन थेबेकी “परमेश्वर आत्मा ओत सिरच्येते बातनी ङ्योकोनगी थरिङकामा थोसुङ। थे बातनी थातासाक थोबाङ मेतान,” सिन सिदुक। 3लोईन पावलगी “थोक ईन्सीन ख्योकोनगी सुई बात ङेन्गीन बप्तिस्मा लाबाते ईन्दे ओना?” सिन ठिजीन थेबेकी “ङ्योकोनगी यूहन्नेकी लापाते बात ङेन्गीन बप्तिस्मा लाबाते ईन,” सिन सिदुक। 4थोक सिरजीन थेकी “यूहन्नेकीनी खोपरोङ पापी दुका सिन छ्या स्येकीन परमेश्वर छ्य्वापा लै खाबाते मिओनला छ्युला लुगीन बप्तिस्मा बिन्दा ओतान। थोक खित्जीनराङ थेकी मिओनला ‘दि ङे बातकामा ङेन्ला मेङगो। ख्योकोनगी था ङे तिरी ओङगीन ओताते मिकी साबाते ङेन्ला थेला विश्वास खिता फाप्क्यो। थेचेन येशूराङ ईन,’ सिन साबा ओतान,” सिन सिदुक। 5पावलगी दि बाततेबा लाप्कीन बिन्नामेकी थे मिओनला प्रभु येशू मिनगी छ्य्वापेई बप्तिस्मा बिन्सुङ। 6थेमे थेकी थेबे लाक्तु लाक्पा ज्यागीन प्रार्थना खानामेई थेबेकी परमेश्वर आत्मा ङेत्सुङ। परमेश्वर आत्मा ङेत्नामेई थेबेकी खोपरोङगी छ्या मास्येबाते खुदुक खुदुकते भाषाला बात खिताला स्यूसुङ, परमेश्वरगी सिर च्युताते बादोङ खासुङ। 7थेरू मेन्दा च्युन्ङीकी थोक खाईन परमेश्वर आत्मा ङेता ओतान।
8थेमे पावल थेरूङ यहूदीओनते मिटिङ खित्च्येते खाम्बादु गाल्गीन मिओनला लोपाला स्यूसुङ। थेबाताङ छ्याःङ ज्यीबा मिक्किता खाईन छलफल खिन परमेश्वरगी थे खोरोङ राज्य येशू छ्य्वापेकी जोच्येते ईन सिरच्येते बात थेबेकी मेन सिराराङ मुथुप्च्या खाईन लेमु खाईन लाप्कीन बिन्सुङ। दावा सुमसाक थे दोक खाला थेरू लोप्कीनराङ देत्सुङ। 9तर कोई कोईकीचेन थेकी लोप्च्येते येशू बात बान्दा माङेन्सुङ। मि गाङे दोन्दु थेबेकी दिकी लोप्च्येते बात सत्यते ईनराङ मेन, दि बात ङेन्दा मेङगो सिन सासुङ। थेबेकी थोक खानामेई थरिङमेई ङा दुरू लोपराङ मोलोबो सिन पावल थेरू येशू चेलाओनला टीकीन थे मिटिङ खित्च्येते खाम्बा ताङगीन गाल्सुङ। थेमे टिरान्नस सिराते मि स्कूलपा गाल्गीन थेरू जम्मा ओङाते मिओनला ङीमे ठाङमा येशू बात लाप्सुङ। 10लो ङिसाक थे थेरूराङ थोक खाला लोप्कीन देत्सुङ। थोक खाईन एशिये अञ्चल खाङ प्रभु येशू बात फैले खाईन थेङला ओताते यहूदी ईन्स्यीत, ग्रीक ईन्स्यीत गाङेकी थे बात थोसुङ।
11थोक खाला थे बात लोप्जीनराङ परमेश्वरगी पावलला आउदी अचम्बतेन्दे काम खित च्युत्सुङ। 12कोई कोई अचम्बते कामनी दोगोङ ओङा ओतान। चुक सासीन मिओनगी पावलगी चले खित्च्येते रूमालताङ स्यिल्गीन ख्याम्बाते खोलाक नाङ खाईन खेरगीन थे खोलाक नाबाते मि लाक ज्याक्नामेकी जस्तो रोग लै खाबाते मिङ दाक ठागीन ओतान। दोस्यिककामा मेन, ल्हन्डीक खोबाते मिओन लाक थे खोलाक ज्य्वाजीन ल्हन्डीकतेबाङ थे मिओनदुकी थेन्ला डुइन ओतान।
स्केवा सिराते मि फुज्युङबे बात
13थेमे थे बेले नाङपाराङ थेङला गाङेपा युला ल्हन्डीक तेन्ला तोङकान्ते यहूदीओनोङ ओतान। थेबेकीङ प्रभु येशू मिन लाला ल्हन्डीक खोबाते मिओन नाङदुकी ल्हन्डीक तेन्गीन तोङा चाल्सुङ। थोक खित्जीन थेबेकी “पावलगी लोप्च्येते येशू मिन लाला ङ्योकोन खोल्ला दि मिला ताङला ग्युक सिन कोत्क्यो,” सिन ओतान। 14थोक खित्कान्तेबे नाङ स्केवा सिराते छ्येते पूजारी फुज्युङ दुईनोङ ओतान। थेबेकी ङीमाई “पावलगी लोप्च्येते येशू मिन लाला ङ्योकोन खोल्ला दि मिला ताङला ग्युक सिन कोत्क्यो,” सिन ल्हन्डीक तेन्गीन तोङा चाल्सुङ। 15थेबेकी थोक सिरजीन थे मिला खोबाते ल्हन्डीककी “येशू सु ईन्दे सिन ङाला छ्या ओत। थेमे पावललाङ ङे ङो स्येबा ओत। तर ख्योकोनचेन सु ईन्दे?” सिन साकीन 16थे मिकी थेबालाराङ खाप खाप्कीन खोलाकतेबा राल्गीन भक्कुचूर दुसुङ। थोक ओङगीन थेबा गाङेराङ ठाकच्युर माकच्युर गाल्गीन पेर्दुङबाराङ थे खाम्बादुकी छ्य्वासुङ।
17थेबा पुनओनला ओङाते थे बात एफिससदु ओताते मि गाङेकी थोसुङ। थे बात थोनामेई यहूदी ईन्स्यीत, ग्रीक ईन्स्यीत गाङेला आउदी ज्यीबा लासुङ। थेमे प्रभु येशू आउदी छ्येते दुका सिन सिराला स्यूसुङ। 18थेमे येशूला विश्वास खित्कान्तेबे नाङ काल्बेईकी वाकीन ङ्योकोन थोरूमोङ स्युत्च्या फुत्च्या खिन ओतान साकीन खोपरोङगी खाबाते काम गाङे ङोन्दु लाःप्सुङ। 19थेमे थेबे नाङ खोपरोङताङ ओताते मन्तर तन्तर टिबाते किताबतेबा ओताते मिओनगीचेन थेबा खुलाकीन थेरू गाङे ङोन्दु स्येकीन क्युरसुङ। थे किताब मोल खित्जीन चाँदी डबल हजार खाल ङिताङ च्युताम्बा ओतान। 20थोक खाईन प्रभु येशू बात झन झन गाङेपा फैले खाईन मि काल्बेईकी ङेन्दाला स्यूसुङ।
21थेरूकी पावलगी म्यासिडोनियाताङ अखैये लुङबापेई खाला यरूशलेमपा डोच्ये टुङ्गो खासुङ। थेपा गाल्नामेई ङा रोम सारदु ड्वा फाप्क्यो सिरच्येते बादोङ थेकी खासुङ। 22थेमे थेकी थे खोरोङताङ येशू बात लोप्च्येते काम खित्कान्ते तिमोथीताङ इरास्तसला टिक्पी गोमा म्यासिडोनियापा ताङसुङ। थे खोरोङचेन टिक्पी दिन थेरू एशिये अञ्चल नाङलाराङ देत्सुङ।
एफिससदु हूलदङ्गा खित च्युताते
23थे बेलाला येशू बातकी खित्सादु एफिससदु ज्यीबा लाङच्याज्यीक हूलदङ्गा ओङसुङ। 24च्यिला सासीन थेरू चाँदी काम खित्कान्ते डेमेत्रियस सिराज्यीक ओतान। थेकी थेरू ओताते आर्तेमिस सिराते देवी मन्दिर नक्कल खाला टेक्टेतेन्दे चाँदी मन्दिरओन जोइन ओतान। थेमे थे च्वाला थेत्ताङ थे काम खित्कान्तेबेकी पैसा काल्बेई जोइन ओतान। 25थोगी ङीमाई डेमेत्रियसकी थेत्ताङ काम खित्कान्ते थेमे थे मन्दिर जोकान्ते ज्येनोङ गाङेला काताङगीन “आज्यो न्वावे, दि देवी मन्दिर जोला छोङजीन ङुरूङला थोई फाइदा ओङगीका सिन ख्योकोन गाङेला छ्याराङ ओत। 26तर दि पावल सिरातेकीनी मिकी जोबाते ल्हे मूर्ति ल्हा ईनराङ मेन साकीन दि सारदु थेमे एशिये अञ्चल खाङराङ मि काल्बा च्योक गाङेला थे खोरोङ छ्य्वापा लै खित च्युत्कीन सिन्सुङ। दोक दोक ओङगीन दुक सिन ख्योकोनगी छ्या मास्येबाते मेन। 27था दिकी खित्सादु ङुरूङ काम ङ्ये च्युत्ला ङुरूङते पैसा जोच्येते लामराङ तोरगीता सिराच्योक गाल्गीन सिन्सुङ। दिकामा मेन, था खोले खोलेनी ङुरूङते दोक छ्येते आर्तेमिस देवी मन्दिरला मिओनगी छ्याःङ मेन सिराच्योक खित्च्या दुक। थोक ओङगीन एशिये अञ्चलताङ लुङबा लुङबे मि गाङेकी माने खिन ओताते दि देवीला मानेराङ खिता ताङसीन चुक मेलेबा ओङगीते,” सिन बात खासुङ।
28डेमेत्रियस बात थोनामेई थेरू जम्मा ओङाते मि गाङेला स्येदाङगी मे बारसुङ। थेमे थेबा गाङेराङ “ङुरूङ एफिसीओन आर्तेमिस देवी छ्ये ईन, थेते जय जय ओङस्यीत,” सिनकामा आउदी खाईन छेरा खिताला स्यूसुङ। 29थेबेकी थोक खाला छेरा खित्जीन थे सारराङ थर्के खासुङ। थेमे च्यि ओङका सिन सार खाङ हल्ला खल्ला मच्चे खासुङ। थेमे थेरू मिओनगी पावलताङ र्वा खाईन ख्याम्बाते मेन्दा ङि मिला जुम्गीन ठुत्कीनकामा खेरगीन मि गाङेराङ जम्मा ओङला तेमु ताच्येते ठाउँदु क्याल्सुङ। थेबा ङिबोचेन म्यासिडोनिये लुङबे गायसताङ अरिस्तार्खस सिरातेबा ओतान। 30र्वातेबाला थोक खानामेकी पावल थेरू ड्वा चाल्सुङ। तर थेरू येशू चेलाओनगी थे मिओन दोन्दु थाल्ला ड्वा मेङगो सिन थेला थेपा ताङराङ माताङसुङ। 31पावलगी ङो स्येबाते एशिये अञ्चलते कोई कोई छ्येते मिकीङ थेला थे ठाउँदु मान्डो सिन लोन ताङसुङ।
32थेजीन थेरू साँच्चीराङ आउदी छ्येज्यीक होहल्ला ओङा ओतान। थेरू रूबाते मिबरी दोक्पोई बातज्यीक खाला छेरा खिन ओतान सासीन ज्येनज्यीकचेन ज्येनज्यीकराङ बात खाला छेरा खिन ओतान। काल्बा च्योक्ते मिलानी थेरू च्यिला थोक खाईन मि रूबाते ईन्दे सिनोङ छ्याःङ छ्या मेतान। 33थेबे नाङ कोई कोई यहूदीङ ओतान। थेरू थेबेकी खोपरोङ जातकी अलेक्जेन्डर सिरातेला थोङगीन थेला थे मिओनताङ बात खि सिन सासुङ। थेरू थोक मेलेबा खाईन हूलदङ्गा ओङाते खोपरोङ यहूदीओनगी खित्सादु मेन सिन सिराप सिन अलेक्जेन्डरगी गाङेला खाराक्पा देत सिन लाक्पेकी चाल खासुङ। 34तर थेङ यहूदीराङ दुका सिन छ्या स्येकीन थेरू रूबाते मिओनगी थेकी साबाते बात ङेनराङ मेङेन्दा खाईन “ङुरूङ एफिसीओन आर्तेमिस देवी छ्ये ईन, थेते जय जय ओङस्यीत,” सिन झन गाङेराङ घण्टा ङिजो आउदी खाईन छेरा खिन देत्सुङ।
35थेबा थोक खाला छेरा खित्जीन थे सारगी छ्येते मिकी थेबाला हल्ला माकेत सिन खाराक्पा देत च्युत्सुङ। थेबा खाराक्पा देत्नामेकी थेकी “एफिसी आज्यो न्वावे, दुरू छ्येते आर्तेमिस देवी मन्दिर ओत, दि देवी मूर्ति स्वर्गनेकी ल्हुम्बाते ईन सिन गाङेपा गाङेला छ्याराङ ओत। 36दि बात मेन सिन सुङगीङ सिरा मुथुबो। थोगी ख्योकोनगी छ्याःङ विचार मिक्किता खाला थाराङ बाजिईला स्येदाङ खाला सुइँदाला मेलेबा खिता लेमु मेन। 37दुरू ख्योकोनगी जुम्गीन खुलाबाते दिबा मेरा ङिकी च्यि खाला दुकारो? दिबेकी मन्दिरदु स्यूकीन छ्याःङ कुबा मिन्दुक। थेमे आर्तेमिस देवी विरोधला छ्याःङ साबाङ मिन्दुक। 38ख्योकोन नाङ डेमेत्रियस थेमे थेत्ताङ काम खित्कान्ते मिओनते सुइँदाताङ खइँदा स्येदाङ ओत्सीन ख्योकोनगी अड्डादु वाला सारगी छ्ये छ्ये मि दोन्दु उजूर खि। ख्योकोन बात च्यि ईन्दाका सिन थेबेकीराङ तेइओ। 39ख्योकोनते खइँदा ज्येनराङ बात ईन्सीन सारगी छ्ये छ्ये मि जम्मा ओङे बेलाला दाक छलफल खिता थुप्क्यो। 40थोगी थरिङ ख्योकोनगी थाराङ छेरा वारा खाला होहल्ला माकेत। रोमी गेल्बो मिओनगी दुरू च्यिला दोक खाईन हूलदङ्गा खाबे सिन ठिसीन ङुरूङगी च्यि सिरच्ये? दोक खाईन हूलदङ्गा खासीन ङुरूङ दाक्पोनलाराङ मेलेबा ओङगो,” सिन सिदुक। 41थोक साकीन च्याकीन थेकी मि गाङेला थेरूकी ताङसुङ।
Currently Selected:
शक्ति काम 19: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
