शक्ति काम 16
16
पावलगी तिमोथीलाङ थे खोरोङताङ खेराते
1थोक खिन पावलबा डर्बीपा लेप्सुङ। थेमे थेरूकीङ लिस्त्रापा गाल्सुङ। लिस्त्रादु तिमोथी सिराज्यीक येशू चेला ओतान। थेते आमाते यहूदी थेमे आबाचेन ग्रीक ओतान। थे आमातेङ येशूला विश्वास खित्कान्ते मि ओतान। 2तिमोथीला लिस्त्राताङ आइकोनियम सारगी आज्यो न्वाओनगी लेमु मि ईन सिन मन परे खाबा ओतान। 3तिमोथीला ठेत्नामेकी पावलगी येशू बात लोपाला थेलाङ ङ्योम्बुराङ खेरा चाल्सुङ। तर तिमोथीबे आबा ग्रीक ईन्देकी तिमोथीला खतकी चिनु जोबा मेत सिन थे फेरो यहूदी गाङेला छ्या ओतान। थोगी पावलगी थेला खतकी चिनु जोकीन बिन्सुङ।
4थेरूई पावलबा सार सारला युगीन गाल्सुङ। थोक खाला युगीन डोजीन थेबेकी थे सार सारगी येशू ख्रीष्ट मिओनलाङ यरूशलेमदु ओताते येशू ख्रीष्टकी खटे खाबाते मिओन थेमे येशू ख्रीष्ट मिओनला ताकान्तेबेकी ताङाते चिट्ठी बात खाईन थेरू टिबाते बात ङेन सिन गाल्सुङ। 5थे बाततेबा थोनामेकी थे सार सारला ओताते येशू ख्रीष्ट मिओनगी स्येत थेप्कीन झन लेमु खाईन येशूला विश्वास खिताला स्यूसुङ। थोक खाईन थेबा झन ङीमे ठाङमा फेल्गीन ड्वाप्ला स्यूसुङ। 6थोक खाला युगीन डोजीन पावलबा एशिये अञ्चल नाङपा गा लाङच्येते बात लोप ड्वा चाल्सुङ। तर परमेश्वर आत्मेकी थेबाला थेङपा डोर माच्युत्सुङ। थोगी थेबा फ्रिगियाताङ गलातिये अञ्चल नाङपा खाईन गाल्सुङ। 7थेमे थेबा माइसिये अञ्चल खादु लेप्सुङ। थेरू लेप्नामेकी थेबा बिथिनिये अञ्चलपा ड्वा चाल्सुङ। तर गोमा च्योकराङ खाईन येशू आत्मेकी थेबाला थेपाङ डोर माच्युत्सुङ। 8थोक ओङनामेकी थेबा माइसिये अञ्चल लामराङ तुकीन त्रोआस सारनामा लेप्सुङ।
पावलला त्रोआसदु ओङाते बात
9त्रोआसदु लेपे छोमु ग्वाका परमेश्वरगी पावलला मिलाम खित ज्युताच्योक खित च्युत्तुक। थोक ओङजीन पावलगी म्यासिडोनिये लुङबे मिज्यीगी थे ओत्सादु वाकीन “ओर्च्ये, ङ्योकोन ओत्सापा वाला ङ्योकोनला मद्धत नाङ,” सिन सिरा थोङदुक। 10पावलला थोक ओङनामेकी था गा लाङच्येते बात लोपाला पावलबा ङ्योकोन गाङेला परमेश्वरगी म्यासिडोनियापा तोङा चालाते दुका सिन छ्या स्येकीन ङ्योकोन गाङेराङ थेपा ड्वाप्ला जेसुकै ठिक्क खाबाप।
पावलबा फिलिप्पीदु लेप्नामेई ओङाते बात
11थेमे त्रोआसदुकी ङ्योकोन पानीजहाजला जेकीन सामोथ्राके सिरसापा गालाप। थेमे ङारो च्योक्ते थेरूकी पानीजहाजलाराङ जेकीन नियापोलिस सिरसापा लेपाप। 12थेमे थेरूकी ख्याम्गीन म्यासिडोनिये लुङबे फिलिप्पी सारनापा लेपाप। थे सारचेन थे लुङबेते छ्येते सार ओतान। थेरू काल्बा च्योक्ते रोमीओन देत्कीन ओतान। ङ्योकोनोङ टिक्पी दिन थेरूराङ देताप। 13थेमे सन्चारी छोमु थे सारदुकी थेन्गीन थेङमा परमेश्वरला प्रार्थना खित्च्येते ठाउँ ओतासीन सिन ठाङके खानामा गालाप। थेरू ठाउँज्यीक्तु फेम्मे मिओन प्रार्थना खिताला जम्मा ओङगीन देता ओताक्वा। ङ्योकोनोङ थेरू गाल्गीन देत्कीन थे फेम्मे मिओनला येशू बात लोपाला स्यूबाप। 14थेबे नाङ परमेश्वरला माने खित्कान्ते लिडिया सिराज्यीगोङ ओताक्वा। थे थिआटीरा सिराते सारगी मि ओतान। थे मोर्मुते रंग ग्यापाते आउदी दामीते खोलाक बेपार खित्कान्ते मि ओतान। प्रभु येशूकी थे फेम्मे मिला पावलगी साबाते बातओन लेमु खाला ङेन्च्ये सेम बिन्देकी थेकी लेमु खाईन थे बात ङेन्सुङ। 15थेमे थे फेम्मे मित्ताङ थे खाम्बादु देत्कान्ते गाङेकी बप्तिस्मा लासुङ। थोक खानामेई थे फेम्मे मिकी “ङे पक्काराङ प्रभु येशूला विश्वास खिताला स्यूबाते ईन सिन ख्योकोन पत्ते खिओ सासीन ङे खाम्बापा देताला डुइ,” सिन ढिपी खाईन ङ्योकोनला थे मोरोङ खाँपा खेरसुङ।
पावलताङ सिलासला जेलदु लुक्पाते
16ङीमाई लोईन परमेश्वरला प्रार्थना खित्च्येते ठाउँनामा डोजीन ङ्योकोनगी फेम्मे फिजाज्यीकला ठेत्सुङ। थे फेम्मे फिजा योङमु ओतान। थेला खोबा ओताते ल्हन्डीक शक्तिकी खित्सादु थेकी ज्येनला तिरी ओङच्येते बात लाःपा थुप्कीन ओतान। थोगी मि काल्बेई थे ओत्सादु वाला खोपरोङला तिरी चुक चुक ओङच्या दुका सिन तार ज्युत्कीन ओतान। थोक खाईन थे फेम्मे फिजेकी जोबाते पैसाबरीचेन मालिकतेबेकी लिन्च्येते ईन्देकी थेबा आउदी छ्युक्पु गाला ओतान। 17पावलबा ङ्योकोनला ठेत्जीन ङ्योकोन तिङ ङ्योगीन थे फेम्मे फिजेकी छेरा खिन “दिबा गाङे भन्दा छ्येते परमेश्वर काम खित्कान्ते मिओन ईन। मि चुक खाला पापकी सजायदुकी थारगीते सिरच्येते बात दिबेकी लोप्क्यो,” सिन सासुङ। 18थे बातकामा खिन थे काल्बेई दिनसाक ङ्योकोन तिङ ङ्योइनराङ देत्सुङ। जहिलेङ थे थोककामा खिन ख्याम्जीन ङीमाई पावलगी स्येदाङ लाकीन ख्युर ग्युरगीन थे फेम्मे फिजाला खोबाते ल्हन्डीकला “ङा येशू ख्रीष्ट मिन लाला खोल्ला दि फिजादुकी थेन्ला ग्युक सिओ,” सिन सिदुक। थोक सिरासात्तु थे ल्हन्डीक दाक थे फेम्मे फिजाला ताङगीन गाल्सुङ।
19पावलगी थे ल्हन्डीकला तेन्गीन ताङनामेकी थे फेम्मे फिजेते पैसा जोच्येते लामराङ तोरसुङ। थोक ओङाते थाहा छ्येत्कीन थे फेम्मे फिजे मालिकतेबा पावलताङ आउदी खाईन स्येदाङ खासुङ। थेमे थेबेकी पावलताङ सिलासला जुम्ला ठुत्कीनकामा अड्डादु खेरसुङ। 20थेरू थे सारगी छ्ये छ्ये मि दोन्दु क्याल्गीन थेबेकी “दि मिओन ङुरूङ सारदु वाला होहल्ला खित ज्युत्कीदुक। दिबा यहूदी ईन। 21दिबेकी दुरू ङुरूङ रोमीओन नियम कानूनला मिडिक्च्येते बातओन लोप्कीदुक। ङुरूङगी दिबेकी लापाते बात ङेन्दा मेङगो, दिबेकी खि साबाच्योक खिताङ मेङगो,” सिन सासुङ। 22थोक सानामेई थेरू ओताते मिबरीङ दिबाला थोक खित ज्युता मेङगो सिन छेरा खिन फिराला स्यूसुङ। मि गाङेकी थोक खिताला स्यूनामेई थे सारगी छ्ये छ्ये मिकी थेबाला पेर्दुङबा सिली जोला डन्डीकी दु सिन कोत्सुङ। 23थोक खाईन डन्डीकी आउदी खाईन दुङ च्युत्नामेई थेबेकी थेबा ङिबोला जेलदु लु च्युत्कीन थे जेलगी हाकिमला “दिबा ङिबोला फ्रोबा मुथुप्च्या खाला लेमु खाला स्योगा,” सिन कोत्सुङ। 24थोक सानामेकी थे जेलगी हाकिमगी थेबाला गाङे भन्दा नाङगी कोठादु खेरगीन तुर्लुङला लुगीन ज्याक्सुङ।
25थे छोमु ग्वाका नुप फेतला पावलताङ सिलासचेन परमेश्वरला प्रार्थना खिन थेला छ्ये जोच्येते लु लिन्गीन ओतान। थेबेकी थोक खाबाते थेरू जेलदु ओताते ज्येन कैदीओनगीङ थोकीन ङेन्गीन देता ओतान। 26थेबा थोक खिन ओते बेलालाराङ सेदेर्मु जोदाई गाल्गीन थे जेल आउदी खोक्पो खाईन लीक्सुङ। थोक ओङजीन थेरू जेलगी गोतेबा गाङे फेत्सुङ थेमे कैदीओनला कोन्दाते नेलओनोङ गाङे ठोल्सुङ। 27थेमे थे जेलगी हाकिमोङ ख्यारगीन ङिक छेत्सुङ। ङिक छेत्जीन कैदीओन लुगीन ज्याक्पाते कोठे गोतेबा गाङे फेता थोङगीन थेबाबरी गाङे थेन्गीन छ्य्वाबासीन सिन थे आउदी खाईन ज्यीबा खासुङ। थेमे तरवार थेन्गीन थे खोरोङला थुपा छोल्जीन 28पावलगी थोङगीन छेरा खिन “ए हजूर, खो थोक माकेत। ङ्योकोन सुङ छ्य्वाबा मेत,” सिन सासुङ। 29थेकी थोक सिरजीन थे हाकिमगी बत्ती खोरच्योक साकीन ज्यीबेकी दारगीनकामा पावलताङ सिलास ओत्सादु छ्य्वाकीन गाल्गीन थेबे काम्बा तेगीन से खासुङ। 30थेमे थेबा ङिबोला फिनामा खेरगीन च्याकीन “हजूरवे, था ङे च्यि खासीन ङा पापकी सजायदुकी थारा थुबोङा?” सिन ठिसुङ। 31थेमे थेबेकी “खुई प्रभु येशूला विश्वास खि। दोक खासीन खोत्ताङ खुई खाम्बे मि गाङेला परमेश्वरगी पापकी सजायदुकी डेल्ग्यो,” सिन सिदुक। 32थेमे थेबा ङिबोकी थे हाकिमताङ थे खाम्बे मि गाङेला प्रभु येशू बात लाप्कीन बिन्सुङ। 33थेमे थे हाकिमगी थेबा ङिबोला ग्वाकाराङ खेरगीन थेबाला दुङजीन थोताते मातेबा टुकीन बिन्सुङ। थेमे थेत्ताङ थे खाम्बे मिओनगी बप्तिस्मा लासुङ। 34थोक थोक खानामेई थेकी थेबा ङिबोला खाम्बाने खेरगीन साप थुङाङ बिन्सुङ। परमेश्वरला विश्वास खिताला स्यूबेकी थेत्ताङ थे खाम्बे मि गाङेराङ आउदी गा खासुङ।
35थेमे ङोमु नाम लानामेकी सारगी छ्ये छ्ये मिकी थेबाला जेलदुकी थोङ सि सिन पुलिसओनला जेलगी हाकिम ओत्सापा ताङसुङ। 36थे लोन लाःप्नामेकी जेलगी हाकिमगी पावलला “हजूरवे, सारगी छ्ये छ्ये मिकी ख्योकोनला जेलदुकी थोङ सिन लोन ताङदुक। थोगी था ख्योकोन दुरूकी गाल्सीन ओङगो। लेमु खाला ग्युक,” सिन सिदुक। 37थोक सिरजीन पावलगी थे लोन खुलाङकान्ते मिओनला “ङ्योकोन रोमी नागरिक ईन। रोमी नागरिकला डन्डीकी दुङा मेङेदो सिरा ओत्सीनोङ सारगी छ्ये छ्ये मिकी ङ्योकोनला जुम्गीन छ्याःङ बयान मिलिन्दा खाईन मि गाङे ङोन्दु डन्डीकी दुकीन जेलला लुक्सुङ। ङ्योकोनला बिनाकारणला थोक खाबेकी था थेबेकी ग्युक सिरजीन ङ्योकोन खाराक्पा थेन्ला मोन्डोओ। थेबा खोपरोङराङ वाला ङ्योकोनला दुरूकी तेन्ला तोङा फाप्क्यो। थोक माक्याथुपनी ङ्योकोन थेन्ला डोराङ मोन्डो,” सिन सिदुक।
38थेबेकी थोक सानामेकी थे पुलिसओन गाल्गीन छ्ये छ्ये मिला थे बात लाःप्सुङ। थेबा ङिबो रोमी नागरिक दुका सिन छ्या स्येनामेई थे छ्ये छ्ये मि आउदी ज्यीबा खासुङ। 39थोगी थेबा खोपरोङराङ वाकीन खोपरोङगी थोक गल्ती खाबातेला स्येदाङ माकेत साकीन थेबाला जेलदुकी तेन्गीन च्याकीन “था दि सार ताङला ग्युक,” सिन बिन्ती खासुङ। 40थोक खानामेकी थेबा ङिबो जेलदुकी थेन्गीन लिडिये खाम्बापा गाल्गीन थेरू आज्यो न्वाओनला ठेता खासुङ। थेमे थेबाला जस्तोराङ ओङसीनोङ येशूला विश्वास खिन देता मातोङ सिन आँट बिन्गीन थेरूकी ख्याम्सुङ।
Currently Selected:
शक्ति काम 16: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
