शक्ति काम 14
14
आइकोनियमदु ओङाते बात
1आइकोनियमदु लेप्नामेकी पावलताङ बारनाबासकी ज्येन ठाउँला च्योकराङ खाईन यहूदीओनते मिटिङ खित्च्येते खाम्बादु गाल्गीन थेरूङ बात खिताला स्यूसुङ। थेबा ङिबोकी येशू बात आउदी लेमु खाईन लापेकी थेरू यहूदीओनताङ ज्येन ज्येन जातकी मि काल्बेईकी थे बात ङेन्गीन येशूला विश्वास खिताला स्यूसुङ। 2तर थे बात मेङेन्कान्ते यहूदीओनगीचेन येशूला विश्वास खित्कान्ते मिओन लेमु मि मेन सिन मेन्दा मेन्दे बात साकीन थेबाला मेलेबा खिताला ज्येन ज्येन जातकी मिला उल्के खासुङ। 3ईन्सीनोङ पावलताङ बारनाबासचेन मिओनला प्रभु येशूकी दया खाला पापकी सजायदुकी डेल्ग्यो सिन थे बातओन ज्यीबाराङ मिक्किता खाला लोप्कीन काल्बासाकराङ थे सारदु देत्सुङ। थेबेकी लापाते बात सत्यते बात ईन सिन मिओनगी छ्या स्येस्यीत सिन प्रभु येशूकी थेबाला छ्ये छ्येताङ अचम्बतेन्दे काम खित च्युत्सुङ। 4थोक ओङगीन ओङगीनलाराङ थे सारदु मिओन हूल ङि गाल्सुङ। थेबाचेन हूलज्यीक येशू बात मेङेन्कान्ते यहूदीओन छ्य्वापा थेमे ज्येनचेन येशू ख्रीष्टकी खटे खाबाते पावलताङ बारनाबास छ्य्वापा लै खासुङ। 5थेबे विरोध खित्कान्ते यहूदीओनताङ ज्येन ज्येन जातकी मिकीचेन खोपरोङ छ्ये छ्ये मित्ताङ डिगीन थेबा ङिबोला खइँदा माक्याबाला मेङगो सिन दोईकी ग्याप्ला सेताला ठो खासुङ। 6थेबेकी थोक खिता चालाते बात छ्या स्येकीन पावलताङ बारनाबासचेन थेरूकी फ्रोकीन लाइकाओनिया सिरसादु गाल्सुङ। थेमे थेरू लिस्त्राताङ डर्बी सिराते सारदु थेमे थे फेरोला ओताते युलगी नाङले मिओनला 7गा लाङच्येते बात लोपाला स्यूसुङ।
लिस्त्रादु ओङाते बात
8लिस्त्रा सारदु कुज्येज्यीक ओतान। थे केजीनमेईराङ कुज्ये ओतेकी नोमुङ ख्याम्बा थुप्कीन मेतान। 9थेरू पावलगी गा लाङच्येते बात लोप्जीन थे कुज्येकीङ थे बात ङेन्सुङ। थे खोरोङगी खिन ओताते बात लेमु खाईन ङेन्गीन देता ओता थोङगीन थे कुज्येकी प्रभु येशूकी थे खोरोङला ठाक्पा खिता थुप्क्यो सिन विचार खाला दुक सिन पावलगी छ्या स्येसुङ। 10थेमे थेकी गाङेकी थोच्या खाईन “लो खो काम्बा चुला खोक ल्वा,” सिन सिदुक। थोक सिराईताङ थे मि खोक लाकीन ख्याम्बाला स्यूसुङ। 11थेकी थोक खाईन थे कुज्येला ठाक्पा खाबा थोङगीन थेरू मि गाङेराङ खोपरोङ लाइकाओनिये बातला “ओहो, ल्हाओन मि जुनी लाकीन देमा वाबाते दुका,” सिन आउदी खाईन हल्ला खल्ला खिताला स्यूसुङ। 12थेबेकी बारनाबासला जिउस सिराते ल्हा थेमे पावललाचेन हर्मेस सिराते ल्हा ईन सिराला स्यूसुङ। जिउस ल्हे बात खित्कान्ते हर्मेस ईन्देकी थेबेकी पावलला हर्मेस सिराते ल्हा सिन साबा ओतान। च्यिला सासीन पावलचेन थेरू बात खिन ओतान। 13थे सारगी छेउदुराङ जिउस ल्हे मन्दिर ओतान। थेमे बारनाबासताङ पावलला ल्हा सिन पूजा खिताला थे मन्दिर पूजारी लाङतेबा टीकीन मेन्दोक माला खुरगीन थे मन्दिर गोदु लिच्युङ। थे पूजारीताङ मि गाङेकी थेरू थेबा ङिबोला सिन पूजा खिताला थे लाङतेबा ठीक खासुङ।
14थेबेकी थोक खिता छोल्जीनका येशू ख्रीष्टकी खटे खाबाते पावलताङ बारनाबासकी थेबा खोपरोङला ल्हा सिन पूजा खिताला ठीक खाबाते दुका सिन छ्या स्येसुङ। थेमे थोक खिता मेङगो सिराला थेबेकी खोपरोङगी लाक्तु खोन्दाते खोलाक रोल्गीनकामा थे मि हूलगी नाङपा स्यूइन 15“ए ख्योकोनगी दोक च्यि खिता चाले? ङ्योकोन ल्हा मेन। ङ्योकोनोङ ख्योकोन च्योक्ते मिराङ ईन। ङ्योकोननी दुरू ख्योकोनला गा लाङच्येते बात लोपालाका वाबाते ईन। च्यि सासीन ख्योकोनगी थातासाक ल्हा सिन माने खाबातेबाला माने खिता माफाबो। थेबा ल्हा मेन। थेबाला माने खिता ताङला बरू सोम्बोते परमेश्वर छ्य्वापा लै खाला थेला माने खि। थेकीराङ दि सा नाम, समुन्द्र थेमे ओतातेबरी जति गाङे जोबाते ईन। 16गोमा गोमाबाचेन थेकी लुङबा लुङबे मि गाङेला खोपरोङ खुशी खिन ख्याम्सीनोङ छ्याःङ माक्यासुङ। 17थेकी ख्योकोनला सधैँभरि लेमु खिनराङ देत्सुङ। खेतीपाती लै खिताला बेला बेलाला छ्यार्बा देक च्युत्ला बालीनाली ले ज्युत्कान्ते थेराङ ईन। थेमे मिओनला गोच्येते साप थुङा बिन्ला गाङेला गा खिन देत ज्युत्कान्तेङ थेराङ ईन,” सिन बात खासुङ। 18थेबा ङिबोकी थोक सानामेकीकामा थे मिओनगी बल्ल बल्ल थे पूजा माक्यासुङ।
19थे तिरी एन्टिओखियाताङ आइकोनियमदुकी कोई कोई यहूदी थेरू लेप्कीन थेरू मिओनला उल्के खाईन खोपरोङ छ्य्वापा लै खित च्युत्सुङ। थेमे थे यहूदीओनगी पावलला सेता फाप्क्यो सिन थेला आउदी खाईन दोईकी ग्याप्सुङ। थेमे थे स्याप्सीन सिन थेला सारदुकी ठुत्कीन खेरगीन पाङला क्युरसुङ। 20तर थेरू येशू चेलाओन थे फेरोला वानामेकी पावलचेन थेरूकी लाकीन च्याकीन लोईन सारनापा गाल्सुङ। थेमे ङारो च्योक्ते थेत्ताङ बारनाबास थेरूकी डर्बीपा गाल्सुङ।
पावलबा सिरिये लुङबे एन्टिओखियापा ग्युराते
21थेपा लेप्नामेकी थेरूङ थेबा ङिबोकी मिओनला गा लाङच्येते बात लाप्सुङ। थेबे बात ङेन्गीन थेरूङ मि काल्बेई येशू चेला ओङसुङ। तिरी थेबा ङिबो थेरूकी याङराङ लिस्त्राताङ आइकोनियमपाराङ खाईन पिसिदिये अञ्चल एन्टिओखिया सारनापा ग्युरसुङ। 22थेपा ग्युरला डोजीन थेबेकी गोमा खोपरोङ गालाते होथे सार सारला ओताते येशू चेलाओनला “जस्तोराङ ओङसीनोङ प्रभु येशूला विश्वास खिन देता मातोङ। परमेश्वर राज्यने ड्वाप्ला ङुरूङगी दुरू याङ याङ दुक्पा ङेत्क्यो सिरच्येते बात टोक माज्येत,” सिन आँट तेरगीन गाल्सुङ। 23थेबा ङिबोकी होथे सार सारला जम्मा ओङकान्ते येशू ख्रीष्ट मिओनला ताप्ला थेबे नाङदुईराङ कोई कोई मि छाने खाईन ज्याक्सुङ। थेमे बर्त देत्ला प्रार्थना खिनकामा थेबा ङिबोकी येशू मि गाङेला लेमु खाला तो सिन प्रभु येशू लाःक्तुराङ सोम्पे खासुङ।
24थे तिरी थेबा ङिबो पिसिदिये अञ्चलदुकी लोईन पामफिलिये अञ्चलपा गाल्सुङ। 25थेरू थेबेकी पर्गा सारगी मिओनलाङ गा लाङच्येते बात लाप्सुङ। थेमे थेरूकी अटालिया सिरसामा गाल्सुङ। 26थेरूकीचेन पानीजहाजला जेकीन सिरिये लुङबे एन्टिओखिया सारनापा ग्युरगीन गाल्सुङ। थेबा ङिबो गोमा गाङेपा गा लाङच्येते बात लोप डोजीन थे सारदु ओताते येशू ख्रीष्ट मिओनगीराङ परमेश्वरगी थेबाला दया खाला आशी तेरस्यीत सिन ताङा ओतान। थोक खाईन थेबा ङिबो खोपरोङगी खिता फाप्च्येते काम पूरो खाईन लोईन थेरू ग्युरगीन लेपा ओतान। 27थेपा लेप्नामेकी येशू ख्रीष्ट मि गाङेला जम्मा खाईन थेबा ङिबोकी परमेश्वरगी खोपरोङला चुक चुक खित च्युत्सुङा थेमे ज्येन ज्येन जातकी मिलाङ थेकी चुक खाईन येशूला विश्वास खित्च्येते मौका बिन्सुङा सिन गाङे बात लाःप्सुङ। 28थेमे काल्बासाक थेबा ङिबो थेबाताङ थेरूराङ देत्सुङ।
Currently Selected:
शक्ति काम 14: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
