Matius 4

Isa Mutuku Dongonye arye, ‘Yesus malye winiptue’ tenen, asipdeyuk yupu

(Markus 1:12-13; Lukas 4:1-13)

1Yohanes arye Yesus akunum mek dongobukopura, Allah El Dib Kanye arye, ‘Yesus ara ikin upliba, Allah el yupu uk kekepnamal do, Isa Mutuku Dongonye#4:1 Isa Mutuku Dongonye nyanyapnye bira, sik Yahudi yala ninye, sik yupu deice arye Setan nyalamik. Sik Yahudi yala ninye, sik yupu Ibrani yupu deice arye, Setan yupu deiyok ara, atau artinya ning ara, “Ninye Onanye, tonda Minina Yupu, tonda, Lululina Yupu Nyana Deiyoknye ulule,” nyalamik. Tonda, laka nyana yupu nomor 13 dindelelume. arye, nyaplye yupu kekepnamal do?’ tenen, Yesus el talima noutamak yupu nyapdeibukba, Yesus el asilena ati, ninye pia kum ulamik mutuku, pata mutuku noutamak biyuk. Amutuku noutamak ulamuk talak ara, Isa Mutuku Dongonye arye, ‘Yesus malye winiptue’ tenen, Yesus dam yanuka asipdeyuk. 2Yesus amutuku ulamuk talak ara, keting noutam ap, lukunyan ap nirya ara, like yupa tonok kebakoklomdikin ara, 40 malam malamuk. Amutuku ulamuk talak nirya ara, ‘Din kum dipnamne,’ tenebukce, din bulunguk ulamuka anya arye, like yupa tonok kebakoklomdikin, 40 sum akunum ubukura, el din pia patabuk. 3Din pia patabukopura, Isa Mutuku Dongonye arye, ‘Yesus piripdenun’ tenen, Yesus dam nyalyayuk. “Anda dipkoprop Allah, el Mi Koprop ulaminyopura, aubuk keil dopropmince, ‘Kwaning kiplyame,’ nyapminba, kwaning daliba, aning dobuka diptume,” nyabuk. 4Nyabuk bukni, Yesus arye tamubuka nyabuk. “Allah yupu buku sekeipsuka noutamak nyasilya ara, ani.

‘Ninye nirya kwaninguk dibikirye, kam pia kum unamake. Bukni, Allah arye el yupu nyasilye ning nirya kekebuka, dobolbalamikcopura, kam pia unamake. Din ning ara, mitik mambul bukni, weik mambul ning ara, Allah el yupu aupmala ati, din ninguk tenena kume. Allah yupu kekebuka dobolbana ara, weik mambule.’ (Ulangan 8:3)

“Minop talak sekamik Allah yupu nyapsine,” Yesus arye nyabuk.

5Nyabukopura, Isa Mutuku Dongonye arye, Yesus bobuka, Yerusalem mutuku Allah ati arelbalamikce, el si erelamik aik#4:5 aik - Allah ati arelbalamikce, el si erelamik aik ati, laka nyana yupu ara, laka nyana yupu nomor 15 dindelelume. aruma deice deibuk. 6Deibukce, ayupu nyabuk. “Allah yupu buku noutamak ara, ayupu nyabuka sekik.

‘An opkilyak ati, Allah el im deice pil don nang, malaikat nyapdeipliba, tukwak pia moubuka kalikmaka arye, tomobuka erelinamkiyake. Ara, ‘An yan kisok babye, keil yan dum dukuka opkilyak’ tenen, kalikuka melinamkiyake. Tomobuka erelinamkiyaka anya arye, ‘Mitik tonun arye ton oplyak’ tenen, anti kalikinamkiyake.’ (Mazmur 91:11-12)

Isa Mutuku Dongonye arye, ayupu nyabukba, ayupu ton nyabuk. “Ura, Mazmur yupu akunum nyapkina ara, ayupu ara, Allah yupu buku noutamak aupmala ati, anda Allah el Mi Koprop ulaminyopura, anyaik aruma deice arye, tukwak sakminyebuk, kum opkutue,” Isa Mutuku Dongonye arye, Yesus ati nyabuk.

7Nyabukura, Yesus arye tamubuka nyabuk. “Anyapmanilam ning ara, aupmal bukni, yuk Allah yupu sekamik ning ara, nyapnukine. Ara ani.

‘Anggun ni Allah arye, ‘Dipkoprop kalikuka melinamsil do, kum do?’ tenen, Allah ati winilden ning winina meme.’ (Ulangan 6:16)

Ayupu ara, Allah yupu noutamak ulula ati nyapkine,” Yesus arye nyabuk.

8Aminyan ara, Isa Mutuku Dongonye arye Yesus bobuka, weik mutuku konak bobiyukce, mutuku-mutuku nirya ap, weik deiyok nang talibuka unyak mutuku nirya ap, aubuk ning urasin teleb ning ap, sik dekna weik ning ap nirya, binuka, “Dipdelyame,” nyamokba, Yesus arye dinmok. Dinmokba, Isa Mutuku Dongonye arye Yesus ati, ayupu nyabuk. 9“Anda na si erebuka, na si erebuka kipniminyopura, elinmalam ning nirya, anti arepnukine,” nyabuk. 10Nyabukura, Yesus arye tamubuka nyabuk. “Kume, Allah yupu buku noutamak arye nyasulule.

‘Anggun Ni Kopropa Allah ara, el siuk erebuka talinamlulume. Anggun kanye ara, el deice anyuk delinamlulume. El piluk donamlulume.’ (Ulangan 6:13)

Ayupu ara, Allah yupu noutamak ulula ati nyapkine. Ati, Isa Mutuku Dongonye anda, na batakuka an yukak bilyame,” Yesus arye, Isa Mutuku Dongonye ati nyabuk. 11Nyabukopura, Isa Mutuku Dongonye biyukba, Allah el im deice pil don nang, malaikat-malaikat, Yesus dam yayikce, el patalamuk ning, aning nirya ara melilamik.

Yesus arye deiyok koubuka peterelamuk yupu

12Ura, yuk nang arye, “Raja Herodes arye, Yohanes tapu koubuka, ninye wenen aik dongopmale,” nyabikba, Yesus kekebukce, tamubuka Galilea mutuku yayuk. 13Galilea mutuku noutamak bukni, Nasaret mutuku batakuka, Kapernaum mutuku yanuka ulamuk. Kapernaum mutuku ara, Galilea mekwen dam asik domikak ulamuk. El ulamuk mutuku ara, minop arye Zebulon yala nang ap, Naftali yala nang ap, ulamik. 14Amutuku binuka ulamuka ara, Allah yupu laka nyalamuknye, nabi Yesaya nyalilamuk touk winipnamuka ati, binuka ulamuk. 15Yesaya arye sekeiamuk domon yupu ara, ani.#4:15 Yesaya nyabuk yupu – Yesaya arye, adomon yupu nyalamuak ara, Kapernaum mutuku ulamik ninye, Yesus winin ning kum kel kiyamik bukni, Yesus arye amutuku noutamak deiyok koubuka, peterebiyuka anya arye, amutuku ninye arye, Yesus eibika ati, ayupu nyalamuk.

‘Zebulon mutuku tam unyak ninye ap, Naftali mutuku tam unyak ninye ap, Yordan mek duman, ton Galilea mekwen dam umunye ninye, anggunda Yahudi yala kum ninye ap, Yahudi yala ninye ap, neika umunye ninye ati nyapne. 16Anggun kanye talima kunuknak atonun ulamak bukni, wini talak ara, weik dirina atonun ning akunum eipmake. Sik aunyak nang, talima kanye dipna atonun unyamukba, kunuknak atonun ulamak bukni, wini talak ara, weik dirina atonun ning eipmaka ati, bereklirye, keting deililamle touk unamake,’ Yesaya arye, domon yupu nyabuk. (Yesaya 9:1-2)

17Yesus arye, Nasaret mutuku batakuka, Galilea mutuku biyuk talak ara, aning ara, Allah yupu deiyok koubuka peterelamuk. El peterelamuk yupu ara, ani. “Anggun malye winimunye ning ap, kanye talima malye tenelulum ning ap, batakanamlulume. Ara, Allah arye ninye weike lyeplirye, sik talima talinamle talak akunum dam upmala atia,” nyalamuk.

Yesus arye, el ap neika balamik nang, wipdeiyamuk yupu

(Markus 1:16-20; Lukas 5:2-11; Yohanes 1:35-42)

18Ayupu nyapnin balamuk talak noutamak ara, Yesus arye Galilea mek lilkwa banmok. Banmokce, ninye bitinye, sik nang susukuk eibuk. Eibuk nang ara, Simon, ton el si ara, Peterus nyalamiknye ap, el weit kopropa Anderias ap, ‘Mek imbal dongobuka dopnanam’ tenen, mek pum aling atonun ning, mekin bal don ning, el si jala dolkwetenmarikbuk eibuk. Sik abitinye nang ara, mekin bal don nang anya arye, wenmarik. 19Sik wininmarikba, Yesus eibukopura, abitinye nang ati, nyabuk. “Anggunda, na melibuka dobolyanururume. Mekin bal dongobuka dolamrum touk, ninye bulubuka don nang kipdeipnamsine. Ara, ‘Allah lyeplirye, sik talima talinamle’ tenen, anggunce ninye weike bulubuka, na dam boyanamnurume,” nyabuk.

20Yesus arye nyabukopura, Simon ap, Anderias ap, sik bitinye nang ara, mekin bal dongobuka don ning, jala batakrikce, adiparyuk Yesus melibuka dobolbirik. 21Yesus ayupu nyabukce, amekwen lilkwauk banmoka ani, bitinye nang ton, Yakobus ap, el weit Yohanes ap, ara Zebedeus el mapu, sik mek lia yo deice arye, mekin bal dongobuka dolamrik ning, el si ara jaring, aning pum lipsisikuka winmarikbuk eibuk. 22Eibukopura, Yesus arye yukubukba, sik bitinye nang arye, sik ni Zebedeus ara, mek lia yo deice abukmokak, anyakauk batakuka, sik adiparyuk Yesus melibuka birik.

Yesus arye, uk din ninye kwetelamuk yupu

23Sik ap, Yesus ap, Galilea mutuku noutamak balamika ani, Yesus arye, sik Yahudi yala nang Allah yupu keken aik#4:23 Allah yupu peterena ap, kekena ap ati domik aik – Yahudi yala nang, sik Allah yupu peterna aik ara, nun mitik gereja atonun uamuk bukni, mitikto yuke. Ara, sikce hari Sabtu weklamikce, Allah el si erelamik. Tonda yuk-yuk sum ara, Allah yupu kekena ap, peterena ap, ninye wapdanopura sik yupu lipsisikuka bokoliana ati, anyaik weklamik. Bahasa Indonesia deice arye, ‘rumah ibada’ nyanyake. Anyaik lak len yupu ati, nomor 26 dipdelulume. wekuka, el yupu peterelamuk. El teleb yupu peterelamuka ara, Allah arye ninye lyeplirye, sik talima talinamle yupu, lak teleb yupu peterelamuk.

El peterelamuk talak nirya ara, sik amutuku ninye mitikuk dilamuk nang ap, minop danirye weik uk dilamuk nang ap, teleb ubuka kwetelamukba, aninye nirya teleb ulamik. 24Yesus arye, ninye kwetepra daulamuk bukni, yuk nang arye, el winilamuk ning laka nyalbalamikba, Siria mutuku tam ulamik nang nirya ara, Yesus winilamuk ning kekelamik. Aninye nirya kekelamika ati, uk yala-yala nirya pia weike dilamukba, kanye imun ulamuk ninye, weik arye bobukabikce, Yesus dam boyangalamik. Ara, minop arye, weik uk dilamuk ninye ap, isa arye sik talima wekuka talyamuk ninye ap, walwal arye kanye wangalamak ninye ap, sik taruk yan nirya sesal selamuk ninye ap, Yesus dam boyangalamikba, Yesus arye aninye nirya, teleb ubuka kwetelilamuk. 25Yesus elce winilamuk talak nirya ara, Galilea tam ulamik ninye ap, Yudea tam ulamik ninye ap, Yordan mek koubuka otam ulamik ninye ap, sik asik sepuluh arye dobuka ulamikce, amutuku si Dekapolis nyalamik mutuku ulamik ninye ap, Yerusalem mutuku ulamik ninye ap, weik arye Yesus melibuka balamik.

Currently Selected:

Matius 4: EIPA

Highlight

Copy

Compare