Kejadian 39

1Ura, Yusup el du yapu arye, Ismael yala ninye ati, Yusup dobuka arebikba, anang arye Yusup dobuka Mesir mutuku bobiyikce, Potipar binyak dekik. Ninye deiyoknye Mesir mutuku taleamuk Piraun, el yin talin nang sik deiyoknye bira, Potipar ulamuk. Ismael yala ninye arye Yusup dobuka boyayikba, Potipar birye dekukce taleamuk. 2Potipar birye Yusup taleamuk bukni, Allah el si Yahweh arye Yusup biti weika arye melilamukba, Yusup elce pil dolamuk ning ap, el winilamuk ning ap nirya ara, telebuk winilamuk. Tonda, elti, taleamuknye el aik pum dem ulamuk.

3Neika ulamrik bukni, Allah el si Yahweh arye Yusup biti weik arye melilamuk deice arye, el winilamuk ning nirya pia telebuk winilamukba, el taleamuknye Potipar birye aning nirya bikamuk ati, Yusup binyak kanye deiamuk. 4Kanye deibukce, Yusup erepdeibukba, Yusup bira Potipar el urdem pil donanye kum bukni, el pil dona deiyoknye ulamukce, sik neikak uk ulamrik. Winibuka ulamdikba, Potipar birye nyabuk. “Yusup, anda na talinun ning nirya ap, nati pil melininyak ninye nirya ap, na pil nirya ara an ning kipnamlame,” nyapdeibukba, winilamuk.

5Potipar birye, ‘Na ning nirya talibuka deiyoknye unamle’ tenen, Yusup erepdeibuk talak arye deiyok koubuka, aminyan talak noutamak nirya ara, Allah el si Yahweh arye Mesir ninye ning nirya pia weik arye teleb winipdeibukba, telebuk upra balamik. Deiyok ara, Allah arye Yusup biti kanye deiamuka ati, elce talibuka pil dolamuk ning nirya teleb kipdeyamuk. Ara, Potipar el aik pum uamuk ning ap, pil dolamuk ning ap, bai tam pil dolamuk ning ap, wa wilamuk ning ap nirya ara, Allah el si Yahweh arye pia teleb kipdeiamuk.

6Aning nirya pia telebuk winilamuka anya arye, Potipar birye utenelamuk. ‘Kume, na talinun ning ap, mambul pil ap nirya ara, Yusup el dem aryuk na pil deiyoknye ulirye talinamle. Elce nyaliliba, na pil don nang nirya arye kekena uk unamake,’ tenelamuk. Tenelamuka anya arye, Potipar bira, aning-aning nirya teleb ning nirya ara, pia kum tenelamuk. Talya kanye bobuka telebuk winilamukce, ‘Asum ara na yata teleb din ning wibuka dipnun do?’ tenen, aninguk tenebuka ulamuk. Yuk pil ton dona kume.

Ura, sik nirya winibuka urdemuk ulamik bukni, Yusup bira, urasin pia telebnye ulamuk. Tonda, el nong mikip weik ulamuk. Tonda el urasin teleb ulamuk. 7Winilamuka anya arye, Yusup el deiyoknye Potipar birye domuk kil arye, Yusup biti pia elilamukce, kanye delilamuka ati nyabuk. “Yusupo, na ap neika maptinimnye,” nyabuka morobuk. 8Nyabuka morobuk bukni, Yusup birye “Na kume, aning pia kum winipnaname,” nyabuka batakuk. Tonda nyabuk. “Na deiyoknye Potipar bira, el talilul ning nirya ara, narye el aik ulye ning nirya ara, ‘Yata wiriptinye do?’ tenen, mambul kanye bobuka, pia kum tenelule. Deiyok ara, ‘Kume, Yusup birye na ning nirya melibuka talinilyeba, aning nirya telebuk unamnile,’ tenenulule anya arye, talye kanye bobuka ulule.

9Anyaik noutam ara, weik nang ton aunyak bukni, nara sik deice tam uk, weik sisinanye unune. Na deiyoknye Potipar birye, aning-aning nirya arenulule. Tonok ning babye, kum batakakulul bukni, anda elce dopkuk kil anya arye, elcuk talikulule. Narye kume. Pia telebuk wininulule ati, yatato deiyok ati, anyapmanilam ning, pia malye ning winiptinya deice arye, Allah el si yaniptinye do? Kume, Allah ati malye kum winipnamne,” nyabuk.

10Yusup birye Potipar el kil ati, ayupu nyabuk bukni, asum-asum nirya ara, akil arye Yusup biti, ayupu uk pia nyabuka morolamukba, elce akil ati, “Kume, neika kum mapnamname,” nyabuk. “Tonda talye unak babye, tonokak uk neika kum unamname,” nyabuka, pia batakana uk ulamuk. 11Winilamuk bukni, tonok sum ara, ‘Na aik pum pil dopnun’ tenen, Yusup birye Potipar aik pum wekmok. El anyaik wekmok talak ara, sik aik pum pil melin ninye ton, kum unmek.

12Yusup bira, anyaik pum wekuka unmokba, akil arye el deice tam ongopmok baju talipdongobuka, “Winira an ap mapnuname,” nyabuka mikip asa arye nyabuk. Nyabuk bukni, Yusup birye, ‘Kume, pia kum winipnune’ tenen, el deice ongopmok baju kwiriplobuka, anyaik pum bisik arye bai tam bikbik abuka bindobuk. 13Bikbik abuka binmokba, akil arye Yusup el kwiriplopmok baju eibuka dobukopura, el aik pil don nang yukubuk.

14Bura tam sakuka bindobukopura, akil arye el aik melin nang yukupbukba, yayikopura, nyabuk. “Anggun ton dipdelulume. Yuk mutukunye, aIbraninye na akanye birye boyayukba, elce nun amutuku unyap ninye ati, malye kipdeipsilirye, auku tunamsile. Elda, ‘Na neika mapnunam’ tenen, na aik wekuka yanmanu bukni, weik arye ngalukmanue. 15Ngalukmanaba, kekepmanurye, ilil ububa, elongopmo baju ara anye tenena kum arye, talye luba kiplobuka bai tam bikbik abuka bindopmoe,” nyabuk.

16Nyabukce, Yusup kwiriplopmok baju bobuka akil el damuk deipmokbuk, aminyan talak el akanye Potipar tamubuka aik yayuk. 17Yayukura, akil arye el akanye biti ayupu nyabuk. “Kume, ance dekuka boyalumnye, Ibrani kamnye bira pia malye upnile. Elda, ‘Na talye neika mapnunam’ tenen, na aik wekuka dilongonu bukni, narye ngalukunuba binmale nyabuk. 18Bukni, narye, ‘Yuk nang arye melipniting’ tenen, weik arye ngalukmanuba, Yusup ongopmok deice tam baju batakuka bai tam bikbik abuka bindopmaue,” nyabuk.

19Akil arye el akanye Potipar biti, ayupu ton laka nyabukce, “Winira, an pil melinanye birye, winipmanil ning ara, biklyame,” nyabuka tilila yupu nyabukura, Potipar kekebukce, yu weik ubuk. 20Yu pia weik ubuka anya arye, Potipar birye Yusup bobuka, ninye wenena aik dongobuk. Ara, Mesir mutuku ninye deiyoknye Firaun birye, malye upne nang sik wenena ati dongolamuk aik dongobuk.

21Ninye wenena aik dongobuk bukni, Yusup anyaik pum bisik ulamuk talak nirya ara, Allah el si Yahweh arye Yusup biti bico tenelamukce, weik melilamukba, awenena aik deiyoknye birye Yusup biti kanye delilamuk. 22Yusup biti kanye delilamuka anya arye, awenena aik deiyoknye birye, ‘Yusup bira anyaik dongolamap nang nirya, sik deiyoknye unamle,’ tenebukce erepdeibukba, anyaik ulamik nang nirya ati, Yusup birye talibuka ulamuk.

23Allah el si Yahweh#39:23 Yahweh – Allah el si koproba ara, Yahweh ulule. Indonesia Alkitab noutam ara, Allah el si Yahweh ulul sukum ara, TUHAN sekenyake. Ayupu bikna ati ara, laka nyan yupu nomor 49 dipdelulume. arye Yusup biti weik arye melilamukba, el pil dolamuk ning nirya ap, el winilamuk ning nirya ap, telebuk winilamuka ati ara, awenen aik deiyoknye birye, teleb kanye bobukce, ‘Aning-aning nirya Yusup birye talinamla ara, teleb uka,’ tenelamuk.

Currently Selected:

Kejadian 39: EIPA

Highlight

Copy

Compare