Rasul 12

Peterus wenena aik pum bisik arye loplobuka biyukura, Yakobus dibuk yupu

1Atalak ara, amutuku weiknye deiyoknye, el si ara, Herodes, elce deiyok kibuk akarye, Yesus dib tenebik nang tonok-tonok ati, ikin ning sik nong deice deililamuk. 2Herodes arye#12:2 Herodes bira, Roma mutukunye ulamuk. Elda Roma mutuku deiyoknye birye, ‘Gubernur kipnamle’ tenen, erepdeibikba, elce Galilea tam ap, Perea tam ap nirya weik ninye deiyoknye ulamukce, atam nirya talyamuk. Tonda, lak len yupu nomor 29 dipdelulume. anang ati, ikin ning delilamuka ani, elce yin nang nyapdeibukura, sikce parang ya dobuka, Yohanes el du Yakobus obik 3Yakobus obikura, Yahudi yala nang eibikce, ‘Bita merekuka opmake’ tenen, kanye deibik. Yahudi yala nang, sik deiyok nang kanye deiamik ati ara, Gubernur Herodes arye el yin nang ati, “Peterus tapu kouplulume,” nyabuk. Ayupu nyabuk talak ara, sik Nena Kum Roti Kwalya#12:3 Nena kum roti kwalya ara, ani. – Yahudi yala ninye arye, sik apu yapu, Mesir mutuku batakuka, Kanaan mutuku binuyik talak ara, roti dabuka dibik bukni, lo kum ati, roti nena kum ning kum dongobik. Minopce bindobik atia. Ati, ‘Aning tuba tenepnamap’ tenen, kwalya kwalibuka, roti nena kum ning, tuba dabuka dinyake. Tonda, lak len yupu ara, nomor 30 dipdelulume. yulamik sum uk.

4Herodes arye yin nang ati nyapdeibukura, Peterus tapu koubuka, wenena aik dongobik. Dongobikura, kong dumbarye uk, ninye dum barye, dumbarye kibuka, yin nang arye, ‘Peterus bilyak’ tenen, kalikmekce dinmek. Herodes el tenebuk ning ara, ‘Peterus wenena aik dongopmanya ani, dobuka laka deipnyopura, amutuku ninye bulubuka yupu talibikirye, “Nun ninye opdeipsilyame,” nyapnamniak’ tenen, Peterus wenena aik dongobuk. Ara, sik Yahudi nang Kaplina ati Kwalina,#12:4 Kaplina ati Kwalina, tonda Paskah, tonda Pentakosta nyalamik ara, Yahudi yala ninye Mesir mutuku batakuka, Kanaan mutuku binuyik sumuk, Allah el malaikat arye, Mesir mutuku nang, sik mapu min yuma mapu nirya, oplobuk bukni, sik Yahudi yala ninye, sik aik wengna bisik, buplan dana-dana nirya, domba ining likipmek ning eibukce, sik min yuma mapu kum obuk. Tonda, lak len yupu ara, nomor 2 dipdelulume. akunum yupmakca bereklyopura, ‘Winipnamne,’ tenebuk.

5Ati, Herodes el yin talin nang arye, pia kalikmekce dinmekbuk, Peterus ara, wenena aik pum tuba aupmok. Sik dinmek bukni, sik Yesus diba tenebik nang arye, Peterus ati Allah pia tuba-tuba moronauk unmek.

6Peterus wenena aik pum tam mapmoka berekukura, ambusumto ara, Herodes arye, ‘Peterus el yupu nyapdeipnamane,’ tenebuk lukunyanuk mabuk. Kawat rantai tapu arye Peterus taruk kirikdongobuka, yin nang taruk dana-dana kirikdongobuka, Peterus noutamak mabukura, sik neika anyaik pum tamuk unmek. Tonda, yuk yin nang arye buplan dam kalikinmek.

7Peterus ap, sik neika mapmarik yin nang ap, mapmekbuk, Allah el im deice yupu lak lenanye, malaikat, talye karin arye awenena aik pum bisik kutukuka tikilyayukura, dirina weik ubuk. Allah el im deice yupu lak lenanye birye, Peterus el nong yanuka bolpipdongobukce bukibuk. Bukibukce Peterus ati nyabuk. “Minpola buklyame,” nyabukura, Peterus taruk nakup ak kawat rantai tapu kirikdongopmeka lopsakuk.

8Winibukura, Allah el im deice yupu lak lenanye malaikat birye, Peterus ati nyabuk. “An deiayatinga deipmince yan ongona ongoplyame,” nyabuk. Nyabukura, el nyapdeipmok touk Peterus arye winibuk. Winibukura, im deice lak lenanye malaikat birye tonap nyabuk. “An balye tam baju ongopdopmince, na menekuka banye bisikuk an aminyan dobolyanulyame,” nyabuk. 9Nyabukura, wenena aik pum bisik arye, Allah el im deice pil donanye, malaikat menekuka bayukura, Peterus aminyan dobolbiyukura, buru tam birik. Peterus buru tam biyuk bukni, ‘Dipkoprop bina do, kum do?’ tenepdayukce, ‘Kume lengdar deice aryuk buru bine,’ tenebukce, teniltonauk ubuk.

10Utenebukba, amalaikat ap, Peterus ap, sik birikak arye, aik pum bisik buplan ara, bitinye buplan dam ninye bitinye kalikmarik bukni, anang bisiprikce buru tam besi buplan dam birikura, el yuk arye paklobukura, buru tam birik. Aburu tam buplan bisiprikce, sik asik dolamik noutamak birikce, tonok bisik banmarik bukni, bisik noutamak arye Peterus abatakuka, Allah el im deice pil donanye tunim abukba, kum eibuk.

11Min Peterus walwal upmokbuk, Allah el im deice yupu lak lenanye tunim abukura, ‘E, dipkoprop buru tam bine,’ tenebuk. Ton tenebukce. ‘Winira na kele, Allah arye el im deice melinanye, im deice arye malaikat dopkwetepmanilba, Gubernur Herodes arye ‘Winipnamane,’ tenepmanu ning ap, tonda, ‘Sik Yahudi nang arye nati, winipnamabe,’ tenepnik ning ap, ambusum winipnamanungu bukni, arup akunum lyepnila ati, kum winipnamaniake,’ tenebuk. 12Anirya tenebukce, kanye deibuka yo nyabuk akarye dipkoprop tenebuka kel kibuk. Bikukce, ninye weik bulubuka Allah moronmekak Yohanes ara, Markus nyalamiknye ati, el lin Maria aik ara, Peterus anyaik dam biyuk.

13Anyaik dam biyukce, buru tam binuka tikukce, buplan lorum-lorum abukura, anyaik melina kil, el si ara, Rode elce, ‘Yatanye yanuka buplan lorum-lorum apmal do?’ tenen, aik pum arye tikuka dilbiyuk. 14Dilbiyukce, Peterus yupu kekebukura, ‘E ara, Peterus el uka,’ tenebukce kanye deibuk. Rode kanye deibuka ati, buplan kum kukukce, Peterus asukumuk batakuka adiparyuk Allah moronmekak laka nyalbiyukce, “Anango, Peterus buplan dam yanuka tikmale,” nyabuk.

15Nyabukura, awekmek nang arye tamubuka nyabik. “Anda nyapmalam ning ara, kum winipmanto ati ara, anda motona kil arye nyanmalam ani,” nyabik. Nyabik bukni, akil Rode arye, “Kume. Peterus dipkoprop buplan dam buru tam tikmale,” pia nyanmokbuk, sik anang arye nyabik. “Se ara, Peterus el yuk balul kanya#12:15 kanya – Sik Yahudi nang tonok-tonok arye utenelamik. ‘Nun dibina kum talak ara, nun ap, nun kanya ap, unyap bukni, nun kanya ara, yukak bitue. Akanya ara, yukak bilyeura, yuk nang arye elinyake,’ tenelamik. Utenelamika ati, ayupu nyabik. yanuka tikmala atia,” nyabik. 16Nyanmek talak ara, Peterus pia buplan lorum-lorum anmokbuk, sik anang arye mangkau kepmek bukni, aminyan ara, buplan kukulbiyik. Bublan kukuka bina dipdeyikura, Peterus atikmoka eibikopura, sik lukdayikce mambul kanye bobik.

17Winibikbuk, Peterus arye, ‘Yupu tunimapnamak’ tenen, taruk kunubuk. Taruk kunubuk akarye ayupu ton nyabuk. Wenena aik pum arye Allah arye Peterus lyepmok yupu nirya laka nyabuk. Aning laka nyabukce tonap, nyabuk. “Yakobus ap, nun du weit atonun unyap nang nirya ati, ayupu nirya laka nyalbilulume,” nyabukce anyaik batakuka yukak biyuk. 18Yukak binuka mapmoka berekukura, awenena aik yin nang kalikmek nang ara, ‘Peterus dan binmal do?’ tenen, malye kanye bobuka kwepdanen, biyikce elkirikinmek. Winibikura, “Peterus yata wiripmo do?” nyabuka asilanmek.

19Winibikbuk, Gubernur Herodes arye nyabukura, sikce Peterus ati pia elkirikinmeka ani, kum eibikura, Herodes arye akalikmek yin nang ati weika arye asipdeyuk. Herodes asipdeyukce yuk nang ati nyabuk. “Akalikmek yin talina nang ara, oipnululume,” nyabuk.#12:19 Wenen aik kalikna yin talin deiyo nang oplobik ning ara, deiyok ani. Atalak ara, sik Roma weik nang arye, ‘Nunce wenen aik pum dongobibyopura, yin talin nang arye, kaliknamak bukni, anang bindobicopura, sik pununa ati, sik kalikna nang dobuka opnamabe,’ tenelamikce, winilamik. Tonda, lak len yupu nomor 31 dipdelulume. Nyabuk akarye, Herodes Yudea tam batakuka, Kaisarea Mutuku binuka talak weik tonun ton ulamuk.

20Ara, Herodes minop arye Tirus mutuku ninye ap, Sidon mutuku ninye ap ati, yu weik ulamuka ati, atalak ara, sik anang, ‘Elce nun yupu kekepnamsil do?’ tenen, ninye tonok-tonok wibuka dopkwetebikura, el dam nyalyayik. Herodes el aik pum ning talyamuknye Bilastus,#12:20 Bilastus nyalamiknye bira, el yuke. Pilatus nyalamiknye bira, el yuke. Sik bitinye nang ati, ‘Tonoknye bukni, si bitinye nyalamiknye,’ tenena kume. amutuku nang arye sik tenelamik ning nirya, Pilatus dam laka nyabikura, kekebukce, el babye diba tenebuka ati, Herodes dam biyikce morobik. Herodes talyamuk mutuku noutamak arye sik dina dekelyangalamik ati, tekildana kum arye, ‘Teleb ubuka neika uptibye’ tenen, morobik. Sik din ning ara, Gubernur Herodes arye talyamuk mutuku noutamak aryuk doldolamika atia.

21Ati, Herodes arye wibuka deibuk sum arye, sik weik nang deiyok nang pia teleb baju ongolamik touk, Herodes abutum ongobuk akarye, el ninye yupu bokolinanye bulamukak deice bukukce, ninye weike bulubuka wekmek ak elce yupu nyabuk. 22Herodes arye yupu nyanmokbuk, sik akekenmek nang arye pia tuba-tuba, “Anye bira ninye atonye birye nyanmasil kuma. Allah atonye birye nyanmasile,” nyabuka weik arye nyanmek.

23Anang arye nyanmekbuk, Herodes arye, ‘Kume, na teleb unmana ara, na mikip deice aryuk unune,’ tenebukce, Allah si kum erebuka ati, adiparyuk im deice Allah melinanye birye malaikat arye Herodes ati, uk ning aribukura, kuluma weika arye el deiplyu potokukura, minopce dibuk.

24Gubernur Herodes dibuk bukni, yuk nang ton Allah yupu kekebikce tonap weik kipnin balamik. 25Antiokia mutuku ninye arye bulubuka deibik yo bok ara, Barnabas ap, Saulus ap arye, Yerusalem mutuku yanuka Allah diba tenelamik nang, sik deiyok nang areprikce, sikda tamubuka Antiokia mutuku uk birik. Sik binurika ati, kintiniprik talak ara, Yohanes, ara Markus#12:25 Markus – Yohanes ara, sikce el si ati, Yohanes nyalamik bukni, el si bitinye ati, Markus ton si silamik. Ati sikce anye biti, Yohanes Markus nyalamik. nyalamiknye ton neika ansinibuka biyik.

Currently Selected:

Rasul 12: EIPA

Highlight

Copy