रोमि 9
9
परमेस्वरको साल्का द्याङगेलाइ
1का ख्रिस्टता जातिङको धुइदोङखा, का ढाटाइनाङ मान्थुघा। काङको आकिलहोइ पुनित हाङसाता कासेहेङ दासि पिखे। 2काङको मोन्दाताका इस्राएलि दादाओने बाइओनेगेलाइको भाअ्सिङ काङको कोन्धाङता हेन्जा तु: रो पिर हि। 3का ख्रिस्टसो खेङन्हाका साराप निङतेङ काङको इस्राएलि दादाओने बाइओनेगेलाइ चाहिँ सिन्हुनु का लेङचाधाङका। एम्बालाइ सिन्हुताको दोअ्का काङको बारका इछा हि। 4एम्बालाइ इस्राएलको द्याङगेलाइ। जाइहेङ परमेस्वर ताइको जाहान बान्हाइलि साल्हि। वा ताइको पारताप एम्बालाइहेङ देखाल पाहि। एम्बालाइदोफा दोङ केरा चाहि रो न्याम बुङ पिहि। एम्बालाइहेङ ताइको चाकर बुङ पालि धिरपाहि रो वाको केरागेलाइ एम्बालाइ निङहि।#दामालाअ्का ४:२२ 5इस्राएलिगेलाइ ताइको मिङ चलिका आजुखालगेलाइको जाहान रो ख्रिस्ट ताइमिङ बुङ इदोङ जात्याता जोन्मिहि। वा ते झाराङर्हुता राज पाका परमेस्वरदोङ हि। वाको दिनाङ बाखिन्का जेङतेङह्याको। आमेन।
6हाइ परमेस्वर एम्बालाइहेङ पाका केरागेलाइ दोङ बिथाको जेङहि कुनु? माको। हाइपानु इस्राएलसो जोन्मिका दोअ्तेङसाङ झाराङ परमेस्वरको द्याङगेलाइ माजेङखे। कालाउ आब्राहामको गोताङ जाहानगेलाइ दोङ परमेस्वरको केरा चाका सान्तान माको। 7आब्राहामको जाहानगेलाइ झाराङ परमेस्वर केरा चाका जाहानगेलाइ माको। हाइदोनु परमेस्वरको बचनता दोअ्का भाइपाङ इसहाकसो जोलोम जेङकालाइ खिनिङ आब्राहामको जाहान जेनावा।#सिरजाइ २१:१२ 8याको माने, जिउसो जोन्मिकालाइ परमेस्वरको जाहान माको। कालाउ केरासो जोलोम जेङकालाइ दोङ आब्राहामको जाहान। 9हाइदोनु परमेस्वर आब्राहामदोफा इदोइ केरा चाका हिघाहि: “लोका बाअ्सार घुरितेङ लोलाउ नाङको बेअ् सारा एलोङ चान जेनावा।”#सिरजाइ १८:१०,१४
10इदोइ खिनिङ माको, रिबेका बुङ केलाइको खाल इसहाकसोङ जाउठ्या चानगेलाइ जोन्माइहि। 11कालाउ जाउठ्या जामालाइ जोलोम जेङकाखान्तेङ लाम्फासो दोङ एम्बालाइ हिदिङ रेम्का रो आखेका पाका लाम्फादोङ, कामसो माको कालाउ वाको काइकाआन्सार परमेस्वरको साल्काको उपाइ ठार्हायाको दोअ्तेङ 12परमेस्वर रिबेकाहेङ एसा दोअ्का हिघाहि, “ओनेको चाकर दादा पावा।”#सिरजाइ २५:२३ 13धरमकिताबता इस्का लेखिका हि, “का याकुबहेङ माया पाघा कालाउ एसाबहेङ दिगमिग पाघा।”#मलाकि १:२-३
14एन्सा जेङनु केलाइ हाइ दोअ्लि? हाइ परमेस्वर निया मापावा कुनु? कादापि माको! 15हाइपानु परमेस्वर मोसाहेङ दोअ्हि, “जाइहेङ का निगाहा पालि भोखा, इङकोहेङ निगाहा तिङपाखा। कालाउ जाइहेङ दायालि भोखा इङकोहेङ दायाखा।”#दामालाअ्का ३३:१९ 16इदोइभाअ्सिङ गोताङ काथा द्याङको इछा रो चेस्ताता भर मापाखे। कालाउ परमेस्वरको दायाता भर पाखे। 17धरमकिताबता एअ्मि मिस्र पुरको राजा फारोको बारेता इस्का लेखिका हि, “का नासेहेङ काङको सरबङ तिङपालि रो गोताङ दुनियाता काङको मिङ पारचार ज्याको दोअ्तेङ का नासेहेङ राजा बान्हाइघा।”#दामालाअ्का ९:१६ 18इदोइभाअ्सिङ परमेस्वर जाइहेङ दायालि भोखे, इङकोहेङ दायाखे। कालाउ वा जाइहेङ थाङका बान्हाइलि भोखे, इङकोहेङ थाङका बान्हाइखे।
कुम्हाल रो भोनोको भान्दा
19नेलाइता हासुङ कासेहेङ दोअ्लि दोस्वाना, “यदि परमेस्वर केलाइको पाका गोताङ काथागेलाइता आधिन पाखे पानु वा केलाइको पापगेलाइको भाअ्सिङ केलाइहेङ हाइपालि दुसिखे?” 20कालाउ द्याङ जेङतेङ परमेस्वरहेङ नुइ लागिका नेलाइ हासु? हाइ एलोङ भोनोको भान्दा कुम्हालहेङ “कासेहेङ हाइपालि इस्का बान्हाइन्हा” दोअ्तेङ हिअ्खे कुनु?#यासाइया २९:१६; ४५:९ 21कुम्हाल ताइमिको मोअ्का भोनोसो ताइको इछा आन्सार भान्दा बान्हाइखे। इङको मोअ्का भोनको धिकाउरिसो आधे भान्दा पारबाता चालाइका रो आधे भान्दा दिनाङ चालाइका बुङ बान्हाइलि द्वावा।#यरमिया १८:१-१०; २ तिमोथि २:२०-२१
22एन्साङपातेङ परमेस्वरदोफा चेर तिङपाका रो निया पाका खाबारा हि। कालाउ वा ताइको चेर तिङपालि रो मुअ्पालि गोइका द्याङगेलाइहेङ बुङ सहिका हि। 23परमेस्वर केलाइहेङ हेन्जाङ बारका सरबङ रो पारतापको काउरि तिङपालि भोहि। वा केलाइ दाया निङकालाइहेङ ताइकोङ बारका मानको भाअ्सिङ त्यार पाका हि। 24परमेस्वर केलाइ यहुदिहेङ खिनिङ माको बोजात्याहेङ बुङ काइका हि। कालाउ केलाइ वाको पारताप निङका इङकोङ द्याङगेलाइ। 25होसे परमेस्वर पाहासो धुइकाको किताबता इस्का लेखिका हि:
“एम्बालाइ काङको द्याङगेलाइ मान्थुघाहि,
एम्बालाइहेङ का ‘काङको राइति’ बान्हायाङका।
जाइहेङ का माया पाका मान्थुघाखा,
इङकोहेङ का ‘काङको मोन्दाताका’ दोअ्ताङका।”#होसे २:२३
26“कालाउ जेता ‘नेलाइ काङको राइति माको’
दोअ्तेङ नेलाइहेङ दोअ्का हिघाहि।
इन्ताङ एम्बालाइ ‘सिन्हुका परमेस्वरको जाहान’ दोअ्न्हावा।”#होसे १:१०
27कालाउ इस्राएलिगेलाइको बारेता यासाइया परमेस्वर पाहासो धुइका एसा दोअ्का हि,
“इस्राएलको सान्तानको साङख्या जाहादिको बाल्हा झोकोङ हेन्जाङ जेङलाउ बुङ
परमेस्वर आतुइसाहेङ खिनिङ बान्चिपावा।
28हाइदोनु परमप्रभु सुमिङता हिका द्याङगेलाइहेङ
मारफाङ दार पितेङ वाको काम दोपावा।”#यासाइया १०:२२-२३
29यासाइया परमेस्वर पाहासो धुइका एसा बुङ दोअ्का हि,
“परमप्रभु बारका सरबङ हिका हि,
परमप्रभु केलाइको भाअ्सिङ जाहान बान्चिपातेङ माताअ्का हिनुते
केलाइ सदोम रो गमोरा भाइकाङ मुअ्धाङ।”#यासाइया १:९
इस्राएलि द्याङगेलाइ खान्धुर मापाका
30काङको दोअ्का काथागेलाइ इदोइदोङ। बोजात्याको द्याङगेलाइचाहिँ मोसाको न्याममानिसिङ खान्धुरसो दोङ परमेस्वरको आगाता धरमाति ठार्हाइन्हाहि। 31कालाउ इस्राएलि द्याङगेलाइ न्याम मानितेङ परमेस्वरको आगाता धरमाति जेङलि हेन्जाङ चेस्ता पालाउ बुङ धरमाति जेङलि मादोहि। 32हाइपालि एम्बालाइ धरमाति जेङलि मादोहि कुनु? हाइदोनु एम्बालाइ खान्धुर मापासिङ धरमकरम खिनिङ पातेङ परमेस्वरको आगाता धरमाति जेङलि भोका हिघाखे। इदोइभाअ्सिङ एम्बालाइको भाअ्सिङ ख्रिस्टचाहिँ बोखेन्हाका उन्ठुइभाइपाङ जेङहि। 33इङको उन्ठुइको बारेता धरमकिताबता इस्का लेखिका हि:
“खाङसु, का सियोनता एलोङ उन्ठुइ ताअ्खा,
जाइता द्याङगेलाइ बोख्यावा,
एलोङ उन्ठुइ, जाइ एम्बालाइहेङ लोम्पावा,
कालाउ वाता खान्धुर पाका हासुङ लेदेरलि मागोयावा।”#यासाइया ८:१४; २८:१६
Currently Selected:
रोमि 9: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
