रोमि 4
4
आब्राहाम खान्धुरसो धरमाति जेङका
1एला केलाइको आजुखाल आब्राहामको बारेता काथा पाइने। वा परमेस्वरको आगाता हेसापा धरमाति जेङहि कुनु? 2एदि आब्राहाम कामसो धरमाति जेङका हिनु वासेहेङ तुजुक पाका थामे हिधावा। कालाउ परमेस्वरको आगाता वाकोदोफा तुजुक पाका थामे मान्थुघाहि। 3हाइदोनु धरमकिताबता इस्का लेखिका हि, “आब्राहाम परमेस्वरहेङ खान्धुर पाहि रो वाको पाका खान्धुरको भाअ्सिङ परमेस्वर वासेहेङ धरमाति ठार्हाइहि।”#सिरजाइ १५:६; गलाति ३:६ 4एला काम पाकालाइ जेदोङ जेला निङखे इङको दान माको, कालाउ इङको वाको निङका खाबारा। 5जाइ कामचाहिँ मापाखे, कालाउ आधरमातिहेङ धरमाति ठार्हाइका परमेस्वरता खान्धुर पाखे, इन्सिका द्याङहेङ परमेस्वर धरमाति ठार्हाइखे। 6राजा दाउद बुङ धरमाति कामसो माको कालाउ परमेस्वरसो धरमाति ठार्हाइन्हाका द्याङको बारेता एसा दोअ्खे:
7“इङको द्याङ सहसाम्पा निङका, जाइको पाप परमेस्वर माफ पापिका हि।
रो जाइको पापगेलाइ परमेस्वर माअ्पापिका हि।#ले ३२:१-२
8इङको द्याङ सहसाम्पा निङका, जाइको पापको हिसाब परमप्रभु मार्हुखे।”
9हाइ इदोइ सहसाम्पा खाताना पाकालाइको भाअ्सिङ खिनिङ बे? एन्सा माको, खाताना मापाकालाइको भाअ्सिङ बुङ। आब्राहामको भाअ्सिङ ते वाको खान्धुरदोङ धरमाति गान्दिन्हाका हिघाहि दोअ्तेङ केलाइ दोअ्न्हाखे। 10आब्राहाम हेअ्लाउ धरमाति ठार्हाइन्हाहि? खाताना पाका लाम्फा ना न्हुअ्सो? परमेस्वर वासेहेङ खाताना पाकाखान्तेङ लाम्फादोङ धरमाति ठार्हाइका हिघाहि। 11इङकोभाअ्सिङ खातानाचाहिँ वाको खान्धुरसो परमेस्वर धरमाति ठार्हाइका छाप हिघाहि। एसापा आब्राहाम खाताना मापाका कालाउ परमेस्वरहेङ खान्धुर खिनिङ पातेङ धरमाति ठार्हाइन्हाका बोजात्याको बुङ हाङसाको खाल जेङहि।#सिरजाइ १७:१० 12एसापा दोङ यहुदिगेलाइ खाताना पानाङसिङ खिनिङ माको, कालाउ एम्बालाइ बुङ आब्राहामको भाइपाङ खान्धुरता हिगिल्नाङ वा इङको यहुदिगेलाइको बुङ हाङसाको खाल।
खान्धुरसो परमेस्वरको केरा निङलि दोखे
13परमेस्वर आब्राहाम रो वाको खालगेलाइहेङ सुमिङको हाकवाला जेङलि केरा चाका हिघाहि। वा इदोइ केरा न्याम मानितेङ निङका माको, कालाउ परमेस्वरता खान्धुर पानाङसिङ निङका हि।#सिरजाइ १७:४-६; २२:१७-१८; गलाति ३:२९ 14एदि मोसाको न्याम मानिकालाइ खिनिङ हाकवाला जेङखे पानु, परमेस्वरता पाका केलाइको खान्धुर बिथाको जेनावा। कालाउ परमेस्वरको केरा बुङ बिथाको जेनावा।#गलाति ३:१८ 15हाइदोनु मोसाको न्याम मामानिका द्याङगेलाइहेङ परमेस्वर दार पिखे।
कालाउ जेता न्याम मान्थुखे इङकोहेङ साअ्का काथाङ मानथ्वावा। 16इङकोभाअ्सिङ द्याङगेलाइ परमेस्वरको केरा खान्धुरसो निङखे। इदोइचाहिँ परमेस्वर एन्साङ पिका हि। कालाउ वा इदोइ केरा आब्राहामको खान्धुरको खालको भाअ्सिङ जातिङको प्याङका दोअ्का हि। इदोइ केरा न्याम साअ्कालाइको भाअ्सिङ खिनिङ माको, आब्राहामको भाइका खान्धुर पाकालाइको भाअ्सिङ बुङ। हाइपानु आब्राहाम केलाइ झाराङको खाल।#गलाति ३:७ 17धरमकिताबता परमेस्वर आब्राहामहेङ एसा दोअ्का हि, “का नासेहेङ हेन्जाङ जात्यागेलाइको आबा बान्हाइका हिघा।” आब्राहाम परमेस्वरता खान्धुर पाहि, कालाउ परमेस्वरको आगाता वा झाराङको आजुखाल जेङहि। परमेस्वरता सिकालाइहेङ बुङ सिन्हुपाका रो जेङलिङ मादोका काथागेलाइ बुङ बान्हाइलि दोका सरबङ वाता हि।#सिरजाइ १७:५
18चानचामिन्दि जेङका आसदोङ मान्थुका पहर, “नाङको जाहान आकासको फुरु झोको हेन्जाङ जेनावा” दोअ्तेङ परमेस्वरको पिका केराता आब्राहाम आस रो खान्धुर पालि मालाअ्हि। कालाउ हेन्जाङ जात्याको खाल जेङहि।#सिरजाइ १५:५ 19आब्राहाम एअ्साइ बाअ्सार थुकालि तोम्का हिघाखे कालाउ इङकोहेङ ताइको वाराङ जेङका जिउ रो साराको कोखे बान्जि हिका गितेङ बुङ खान्धुरता कमजोर माजेङहि।#सिरजाइ १७:१७ 20आब्राहाम परमेस्वरको केरा चाका काथाता हेअ्लाउ साङखा मापाहि। कालाउ खान्धुरता बोल्याका जेङतेङ परमेस्वरहेङ बाखिन्हि। 21हाइदोनु ताइमिको पाका केरा परमेस्वर जातिङको पोङघापावा दोअ्का आब्राहामहेङ पाक्का गिका हिघाहि। 22इदोङ खान्धुरसो दोङ परमेस्वर आब्राहामहेङ धरमाति ठार्हाइहि। 23परमेस्वर आब्राहामहेङ धरमाति ठार्हाइहि दोअ्तेङ लेखिका काथा इङकोको भाअ्सिङ खिनिङ माको, 24कालाउ केलाइको भाअ्सिङ बुङ लेखिका। केलाइको प्रभु इसुहेङ सिकासो सिन्हुपाका परमेस्वरता केलाइ खान्धुर पान्हाखे पानु वा केलाइहेङ धरमाति ठार्हाइयावा। 25इसु केलाइको पापको भाअ्सिङ सेअ्न्हाहि रो केलाइहेङ धरमाति ठार्हाइलिको भाअ्सिङ परमेस्वर वासेहेङ आरोङ सिन्हुपाहि।#यासाइया ५३:४-५
Currently Selected:
रोमि 4: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
