रोमि 2
2
परमेस्वरको निया
1इदोइभाअ्सिङ बोमिहेङ दुस लागाइका नेलाइ हासुङ हिलाउ बुङ हाइदोङ आल मान्थु। कालाउ नेलाइ जेदोङता बोमिहेङ दुस लागाइसुखेना इङकोङता ताइमिङ बुङ दुसि ठार्हाइन्हास्वाना। हाइदोनु नेलाइ बुङ इङकोङ काम पासुखेना।#मत्ति ७:१; लुका ६:३७ 2परमेस्वर बुङ इस्का काम पाका झाराङ द्याङगेलाइहेङ सत्तेको आरता दुसि ठार्हाइखे दोअ्का केलाइ गिन्हाखे। 3नेलाइ इस्का काम पाका द्याङगेलाइहेङ दुसि ठार्हाइसुखेना कालाउ ताइमिङ बुङ इङकोङ काम पासुखेना। हाइ परमेस्वर नेलाइहेङ दुसि ठार्हाइलाउ इङकोसो खाअ्लि दोस्वाना? 4माकुनुते परमेस्वरको माया, दाया रो धिरताहेङ हाइ नेलाइ बिथाको थानेसुखेना? वाको दायाहोइ नेलाइहेङ पास्ताइ पालि भोखे दोअ्तेङ हाइ नेलाइ मागिसुखेना?
5कालाउ नेलाइ ताइको कोन्धाङ थाङपातेङ परमेस्वरभारि घुरेलि माभोसुन्हा। इङकोभाअ्सिङ परमेस्वर चेरताम्पाका दिनाता निया पालि लोलाउ नेलाइ बारका दार निङस्वाना। 6हाइपानु परमेस्वर झाराङ द्याङगेलाइहेङ ओबालाइको पाका काम आन्सारको इनाम प्यावा।#ले ६२:१२; रेम्काआरति २४:१२ 7जाइ रेम्का काम पातेङ पारताप, मान रो हेअ्लाउ मामुअ्का जिबन भोखे एम्बालाइहेङ परमेस्वर हेअ्लाउ मामुअ्का जिबन प्यावा। 8कालाउ जाइ द्याङगेलाइ ताइमिहेङ खिनिङ माया पाखे, सत्तेहेङ मासाअ्खे रो आखेका कामगेलाइ पाखे पानु परमेस्वर इन्सिका द्याङगेलाइर्हुता ताइको दार रो चेर हुप्यावा। 9आखेका रो दुरजन काम पाका झाराङ द्याङगेलाइता लाम्फा यहुदिगेलाइहेङ रो इङकोन्हुअ्सो बोजात्यागेलाइहेङ तु: पिर जेनावा। 10कालाउ परमेस्वर रेम्का काम पाका झाराङहेङ लाम्फा यहुदिगेलाइहेङ इङकोन्हुअ्सो बोजात्यागेलाइहेङ आदर, मान रो सान्ति प्यावा। 11हाइदोनु परमेस्वर हासुहेङ बुङ पछेपात मापावा।#न्याम १०:१७
12परमेस्वर मोसासो यहुदिगेलाइहेङ पिका न्याम माकोसिङ जाइ पाप पाका हि, एम्बालाइ इङको न्याम माकोसिङ दोङ मुअ्तावा। जाइ मोसाको न्याम निङतेङ बुङ पाप पाखे पानु एम्बालाइको निया मोसाको न्याम आन्सार दोङ जेनावा। 13हाइदोनु न्याम हिङका द्याङगेलाइ परमेस्वरको आगाता धरमाति माठार्हाइन्हावा। कालाउ न्याम मानिका द्याङगेलाइ दोङ धरमाति ठार्हाइन्हावा। 14हाइपानु न्याम मान्थुका बोजात्याको द्याङगेलाइ न्याम आन्सारको काम पाखे पानु, इङको द्याङगेलाइदोफा न्याम मान्थुलाउ बुङ एम्बालाइ ताइको भाअ्सिङ ताइमिङ न्याम जेङखे। 15एम्बालाइको पाका कामहोइ ताइको मनता मोसाको न्याम हि दोअ्का काथा तिङपाखे। एम्बालाइको मन जेलाउसेलाउ ताइमिहेङ दुसिखे रो जेलाउसेलाउ रेम्का पाघा दोअ्खे। 16इदोइ गोताङ काथा इङको दिना जेनावा जेलाउ परमेस्वर काङको पारचार पाका रेम्काबानाल आन्सार इसु ख्रिस्टसो द्याङगेलाइको कोन्धाङता म्होअ्न्हाका काथाको निया पावा।
यहुदिगेलाइ रो न्याम
17एला नेलाइ ताइमिङ ताइमिङहेङ यहुदि दोअ्सुखेना रो न्यामता भर परेसुखेना। कालाउ परमेस्वरहेङ नाल्खा दोअ्तेङ तुजुक पासुखेना। 18परमेस्वर केलाइसो हाइ भोखे, केलाइहेङ था हि दोअ्तेङ धाक लागाइसुखेना। नेलाइ मोसाको न्यामसोङ धिरतेङ बाबारका काथा पासुखेना। 19कालाउ नेलाइ मनको कितिकितिकाहेङ थोङलि द्वाङ दोअ्तेङ धाक पिसुखेना रो कितिकितिकाता दामा मातिङकालाइको भाअ्सिङ ताइमिहेङ फाइसालाम्का फोम पासुखेना। 20नेलाइ आकिल मान्थुका द्याङगेलाइहेङ उचित काथा धिरपालि द्वाङ दोअ्सुखेना रो मागिकालाइहेङ बिद्या पिका केलाइदोङ दोअ्सुखेना। कालाउ परमेस्वरको न्याम केलाइदोफाङ हिनाङ गिलिगोइका काथा केलाइहेङ दोङ था हि दोअ्तेङ दाबि बुङ पासुखेना। 21एन्साजेङलाउ नेलाइ बोमिहेङ धिरपासुखेना कालाउ ताइमिचाहिँ हाइपालि मामानेसुखेना? नेलाइ खुलि माएल दोअ्तेङ धिरपासुखेना कालाउ ताइमिचाहिँ हाइपालि खुसुखेना? 22नेलाइ द्याङगेलाइहेङ कासबिरि मापासु दोअ्सुखेना कालाउ ताइमिचाहिँ हाइपालि कासबिरि पासुखेना? नेलाइ मुरतिहेङ दिगमिग पासुखेना कालाउ बोजात्याको थानगेलाइको टाका काउरि हाइपालि खुसुखेना? 23परमेस्वरको पिका मोसाको न्याम केलाइदोफा हि दोअ्तेङ नेलाइ तुजुक पासुखेना कालाउ इङको न्याम काल्हामतेङ परमेस्वरहेङ हाइपालि बादानामि पासुखेना? 24हाइदोनु धरमकिताबता इस्का लेखिका हि, “नेलाइ यहुदिगेलाइसो दोङ बोजात्यागेलाइता परमेस्वरको मिङको बादानामि जेङका हि।”#यासाइया ५२:५
25एदि नेलाइ न्याम मानिसुखेना पानुते न्याम आन्सार खाताना पालि रेम्काङ दोङ। कालाउ नेलाइ न्याम मासाअ्सुखेना पानुते खाताना मापाका द्याङगेलाइभाइपाङ जेङस्वाना। 26एदि खाताना मापाका द्याङगेलाइ मोसाको न्याम साअ्सुखेना पानु हाइ एम्बालाइ परमेस्वरको आगाता खाताना पाकाभाइपाङ माजेङहि कुनु? 27नेलाइ खाताना पाका यहुदिगेलाइ खाताना मापाका बोजात्यागेलाइसो दुसि ठार्हाइस्वाना। हाइदोनु नेलाइ लिखत मोसाको न्याम हिका रो खाताना पाका जेङतेङ बुङ न्यामहेङ मामानिसुखेना। कालाउ खाताना मापालाउ बुङ बोजात्यागेलाइ न्याम साअ्खे। 28हाइदोनु द्याङगेलाइहेङ तिङपालिकोभाअ्सिङ खिनिङ यहुदि न्याम पालन पाका इङको जातिङको यहुदि माको। एसापा दोङ तिङपालिकोभाअ्सिङ जिउता पाका खाताना बुङ जातिङको खाताना माको। 29लिअ्तासोङ यहुदि जेङनु खिनिङ इङकोहेङ यहुदि दोअ्लि द्वाङ। जातिङको खातानाचाहिँ जिउता जेङका काथा खिनिङ माको कालाउ कोन्धाङता पुनित हाङसाको पाका काथा। इस्का खाताना जेङका द्याङको बाखिन्का द्याङगेलाइसो माको कालाउ परमेस्वरसो जेङखे।#न्याम ३०:६
Currently Selected:
रोमि 2: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
