मरकुस 15
15
इसु पिलातसको आगाता
(मत्ति २७:१-२; ११-२६; लुका २३:१-५,१३-२५; युहन्ना १८:२८; १९:१६)
1र्हिमा जेङतेङसाङ मुल धामि, धरम मास्टरगेलाइ रो आगुवागेलाइ, महासभाको झाराङ सदसेगेलाइ सभा पातेङ इसुहेङ धेउतेङ चुमपुहि रो पिलातसकोता थुकापाहि। 2पिलातस इसुहेङ हिअ्हि, “हाइ ना यहुदिगेलाइको राजा हिना?” इसु दोअ्हि, “नादोङ दोअ्दोङखेना।” 3मुल धामिगेलाइ वासेहेङ हेन्जाङ काथाता दुसिहि। 4पिलातस आरोङ इसुहेङ एसा दोअ्तेङ हिअ्हि, “हाइ नाङकोदोसा हाइदोङ उतर मान्थु? खाङ, नाङको खिलापता एम्बालाइ हेथे काथागेलाइता दुसिदोङखे।” 5कालाउबुङ इसु आरोङ हाइदोङ जाबाफ मापिहि। इदोइ तिङतेङ पिलातस भारभुसाइहि।
6लाअ्पिका पारबाको पहर द्याङगेलाइ र्हेका एअ्मि काइदिहेङ एम्बालाइको भाअ्सिङ पिलातस लाअ्पिघाखे। 7इङको पहर बारब्बा मिङ हिका एअ्मि द्याङ थुनाता परिका हिघाहि। इङको बोमिदोफा मिलितेङ हलचलता द्याङ बुङ सेअ्का हिघाहि। 8कालाउ हेन्जाङ द्याङगेलाइ पिलातसकोता लोतेङ बो बाअ्सारभाइपाङ इदोइ बाअ्सार बुङ एअ्मि काइदि लाअ्पि दोअ्तेङ बिम्ति पालि तेङहि। 9पिलातस एसा दोअ्तेङ एम्बालाइहेङ हिअ्हि, “हाइ का नेलाइको भाअ्सिङ यहुदिगेलाइको राजाहेङ लाअ्प्याङका दोअ्का नेलाइ भोसुखेना?” 10हाइपानु मुल धामिगेलाइ डाहा पातेङ इसुहेङ वाकोता पिलि चुमाका हिघाहि दोअ्का काथा पिलातस गिका हिघाहि।
11कालाउबुङ मुल धामिगेलाइ द्याङगेलाइहेङ सुर्याइतेङ इसुहेङ माको, बारब्बाहेङ दोङ लाअ्पि दोअ्लि लागाइहि। 12पिलातस आरोङ एम्बालाइहेङ हिअ्हि, “एन्सानु जाइहेङ नेलाइ यहुदिगेलाइको राजा दोअ्सुखेना, वासेहेङ चाहिँ का हाइ पाङका कुनु?” 13एम्बालाइ आरोङ र्हिकाइतेङ दोअ्हि, “इङकोहेङ कुरुसता टाङगाइ।” 14पिलातस एम्बालाइहेङ दोअ्हि, “हाइपालि? वा हाइ कसुर पाका हि कुनु?” कालाउबुङ एम्बालाइ झन र्हिकाइतेङ दोअ्हि, “इङकोहेङ कुरुसता टाङगाइ।” 15हाइदोनु पिलातस द्याङगेलाइहेङ लेङचापालि भोघाखे। इदोङभाअ्सिङ वा बारब्बाहेङ दोङ लाअ्पिहि। इसुहेङ चाहिँ वा छरि लागाइतेङ कुरुसता टाङगाइलि जिम्मा लागाइहि।
पलटनगेलाइ इसुहेङ गिल्ला पाका
(मत्ति २७:२७-३१; युहन्ना १९:२-३)
16पलटनगेलाइ इसुहेङ रोमि सारकारको प्रेटोरियन#१५:१६ प्रेटोरियन रोमि पल्टनकोआडा (केन्द्र), जाइ न्हुअ्सो बाराहाकिमको हिका थामे बुङ जेङहि। ता चुमपुहि रो गोताङ पल्टनगेलाइहेङ जोम्पाहि। 17कालाउ एम्बालाइ इसुहेङ बेङगाना रङको धाबा लागाइपिहि रो वाको पुरिङता चुइगेलाइको ताज बान्हाइतेङ ताअ्पिहि। 18कालाउ “यहुदिगेलाइको राजाको जाय ज्याको” दोअ्तेङ एम्बालाइ वासेहेङ सेउपालि तेङहि। 19एम्बालाइ इसुको पुरिङता नालेहोइ दान्हाइतेङ वासेहेङ थोअ्हि रो तिर्हो थोतेङ वासेहेङ सेउपाहि। 20एसापा इसुहेङ बिजेत पाकान्हुअ्सो एम्बालाइ बेङगाना रङको धाबा होअ्पिहि रो वाको ताइकोङ धाबा लागाइपिहि। इङकोन्हुअ्सो एम्बालाइ इसुहेङ कुरुसता टाङगाइलि बाहार चुमपुहि।
इसुहेङ कुरुसता टाङगाइका
(मत्ति २७:३२-४४; लुका २३:२६-४३; युहन्ना १९:१७-२७)
21दामाता हानिकाताङ पालाउ आलेक्जेन्डर रो रुफसको आबा कुरेनि#१५:२१ कुरेनि माहेँ आफ्रिकाको एलोङ पुरको मिङ। ता हिका सिमोनहेङ देरासो लोकाताङपाका एम्बालाइ दुसुहि रो इसुको कुरुस फातेङ चुमपुलि वासेहेङ कर लागाइहि। 22इङकोन्हुअ्सो एम्बालाइ इसुहेङ गलगथा#१५:२२ गलगथा जाइको माने आरामिक राउता “पुरिङ” जेङखे, जाइहेङ “कलवरि” बुङ दोअ्घाखे। दोअ्का थामेता चुमपुहि। 23इन्ता थुकातेङ एम्बालाइ इसुहेङ मुरर#१५:२३ मुरर यहुदिगेलाइता सेअ्लि खाङका आपाराधिहेङ आङगुरको निघारता मिसालाइतेङ आम्पाका चलन हिघाहि। मिसालाइका आङगुरको निघार आम्लि पिहि। कालाउ वा इङको माआम्हि। 24इङकोन्हुअ्सो एम्बालाइ इसुहेङ काटि तातेङ कुरुसता टाङगाइहि। कालाउ हासु हिदोइ भाग निनाङ दोअ्तेङ इङको निधो पालि चिठा ह्वाअ्तेङ एम्बालाइ वाको धाबागेलाइ ताताइमिता बाखाराइहि।#ले २२:१८
25एम्बालाइ इसुहेङ कुरुसता टाङगाइलाउ र्हिमाको कुह्वा बजिका हिघाहि। 26वासेहेङ दुसिका चिथिता “यहुदिगेलाइको राजा” दोअ्तेङ लेखिका हिघाहि। 27इसुहेङ टाङगाइलाउ एम्बालाइ न्हेमि डाकुगेलाइहेङ बुङ वाको दाम्पाहा रो केपाहा कुरुसता टाङगाइहि। 28[धरमकिताबता लेखिका बचन एसापा पोङघाहि: “वा आपाराधिगेलाइदोफाङ गान्दिन्हाहि।”#यासाइया ५३:१२ ]#१५:२८इदोइ पद आधे पुरना स्रोत बाइबलता मान्थु।
29इङको दामा तेकालाइ ताइको पुरिङ हेङगालाइतेङ एसा दोअ्तेङ गिल्ला पातेङ दोअ्हि, “परमेस्वरको थान र्हाअ्तेङ सुम्निता बान्हाइका दोअ्का द्याङहेङ खाङसु।#ले २२:७; १०९:२५; मरकुस १४:५८; युहन्ना २:१९ 30कुरुससो खुअ्तेङ लोउ रो ताइमिहेङ बान्चिपा।” 31एन्साङपातेङ मुल धामिगेलाइ बुङ धरम मास्टरगेलाइदोफा एसा दोअ्तेङ ताताइमिता इसुहेङ गिल्ला पाहि, “या बोमिहेङ बान्चिपाहि, कालाउबुङ ताइमिहेङ चाहिँ बान्चिपालि माद्वाङ। 32या इस्राएलको राजा, ख्रिस्ट एला कुरुससो खुअ्तेङ ल्वाको, केलाइ इङको तिनाङ कालाउ खिनिङ खान्धुर पाङ।” इसुदोफाङ कुरुसता टाङगाइन्हाका डाकुगेलाइ बुङ वासेहेङ गिल्ला पाहि।
इसुको सिका
(मत्ति २७:४५-५६; लुका २३:४४-४९; युहन्ना १९:२८-३०)
33नितिमाको तेन्हे बजेसो सुम बजिथिकापा मुलुकको गोताङ थामेदोङ कितिकितिहि। 34सुम बजेगेलाइ एसा दोअ्तेङ इसु बारका गालापातेङ र्हिकाइहि, “इलोइ, इलोइ लामा सबखथनि#१५:३४ इलोइ, इलोइ लामा सबखथनि इदोइ आरामिक राउ।?” जाइको माने, “ओइ काङको परमेस्वर, ओइ काङको परमेस्वर, ना कासेहेङ हाइपालि लाअ्न्हा?”#ले २२:१ 35एसापा र्हिकाइका हिङतेङ इन्ता जाअ्तेङ हिकालाइता आधिमि दोअ्हि, “हिङसु, याते एलिया#१५:३५ एलिया इलोइ भाइका हिङखे, जाइको माने “काङको परमेस्वर” जेङखे।हेङ कि काइखे।” 36कालाउ एअ्मि धाअ्पुतेङ हानितेङ लाठिता चेन्थारा लुन्दाइतेङ चुमाहि रो इङको चेन्थारा लाठिको तुपाता खेअ्पातेङ दाअ्का आङगुरको निघारता चोभेरतेङ इसुको नुइता ताअ्तेङ दोअ्हि, “र्हुम्सु! एलिया लोतेङ यासेहेङ कुरुससो खुअ्पाङ बेअ्, खानाइने!”#ले ६९:२१ 37कालाउ इसु बारका गाला ओल्हिपातेङ सास लाअ्हि।
38इङकोङ पहर थानलिअ्ता टाङगाइन्हाका पारदा र्हुतासो लेताथिकापा न्हे टुकारा जेङतेङ थेअ्हि।#दामालाअ्का २६:३१-३३ 39इसु एसापा पारान लाअ्का तिङतेङ वाको भेरपा जाअ्का रोमि काप्तान दोअ्हि, “जातिङकोङ इदोइ द्याङते परमेस्वरकोङ चान कि हिघाहि।” 40इन्ता दुरेसोङ खाङतेङ हिका आधिमि बेबालाइ बुङ हिघाखे। एम्बालाइता मरियम मग्दलिनि, म्हुइकाचाहिँ याकुब, योसेफको आमाइ मरियम रो सलोमि हिघाखे।#लुका ८:२-३ 41इसु गालिलता हिलाउ, एबालाइ वासेहेङ पिताइघाखे रो वाको सेवा पाघाखे। इसुदोसा यरुसलेमता लोका बो हेन्जाङ बेबालाइ बुङ इन्ता हिघाखे।
इसुहेङ तोमता ताअ्का
(मत्ति २७:५७-६१; लुका २३:५०-५६; युहन्ना १९:३८-४२)
42इङको दिना, माइसाका दिनाको लाङ दिना हिघाहि रो बेल्हालि तोमका हिघाहि। 43बाराकचहरिको मान पालिगोइका सदसे आरिमाथियाको योसेफ, जाइ परमेस्वरको दामा खाङदोङघाखे, वा बलपातेङ पिलातसकोता हानितेङ इसुको सिका जिउ र्हेहि।
44इसु आन्चा दोङ सिहोइ दोअ्का हिङलाउ पिलातस भारभुसाइहि। कालाउ रोमि काप्तानहेङ ताइमिकोता काइतेङ वा सिहोइ ना सिन्हुपाङहि दोअ्तेङ हिअ्हि। 45वा सिलिदोहोइ दोअ्का काथा काप्तानसो गिकान्हुअ्सो पिलातस इसुको सिका जिउ योसेफहेङ चुमपुलि हुकुम पिहि। 46कालाउ योसेफ मखमलि धाबा चोल्हि रो इसुको सिका जिउ कुरुससो खुअ्पातेङ इङकोङ धाबाहोइ लुन्दाइहि, कालाउ उन्ठुइ खोपेतेङ बान्हाइतेङ ताअ्का तोमता ताअ्हि। इङकोन्हुअ्सो तोमको नुइ एलोङ उन्ठुइ चुमातेङ तुअ्पापिहि। 47मरियम मग्दलिनि रो योसेफको आमाइ मरियम इसुहेङ तोमता ताअ्का खाङदोङघाहि।
Currently Selected:
मरकुस 15: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
