मरकुस 13
13
आखिरि दिनाको चिनोगेलाइ
(मत्ति २४:१-२४; लुका २१:५-१९)
1जेलाउ इसु थान्सो ओल्हिदोङघाहि कालाउ एअ्मि चात्या वासेहेङ दोअ्हि, “खाङ, मास्टर, हेथे बाबारका उन्ठुइगेलाइ रो हेथे सोबाइका साअ्गेलाइ।” 2कालाउ इसु इङकोहेङ दोअ्हि, “इदोइ नेलाइ तिङका साअ्गेलाइको एलोङ उन्ठुइर्हुता भेनेङ उन्ठुइ मालाअ्सिङ गोताङ र्हाअ्न्हावा।”
3कालाउ इसु थानको आगाता जाइतुन आरदाङता योम्तेङ हिलाउ पत्रुस, याकुब, युहन्ना रो आन्द्रियास लोतेङ वासेहेङ सिपापा हिअ्हि, 4“केलाइहेङ दोअ्, इदोइ गोताङ घाटानागेलाइ हेअ्लाउ ज्याङ? कालाउ इदोइ गोताङ काथा पोङघालि तोम्काहि दोअ्तेङ केलाइ हेसा गिलि?” 5इसु एम्बालाइहेङ दोअ्हि, “होस पातेङ हिसु, हासुङ नेलाइहेङ मायाजालता मावाङपाको। 6हेन्जाङ द्याङगेलाइ काङको मिङता ‘का वादोङ हिघा’ दोअ्तेङ ल्वावा रो एम्बालाइ हेन्जाहेङ मायाजालता वाङपावा। 7जेलाउ नेलाइ धुम रो धुमगेलाइको खाइला बाइला हिङस्वाना, कालाउबुङ माथिसु। इस्का घाटानागेलाइ दरकार हि। इदोइ गोताङ घाटाना जेङलि दोङ गोयाङ, कालाउबुङ इङको दोङ पहर दुनिया आखिरिचाहिँ माज्यावा। 8हाइदोनु जात्याको खिलापता जात्या रो सारभिको खिलापता सारभि जाअ्तावा। थामेथामेता भुइचालगेलाइ हानावा रो आनिकालगेलाइ जेनावा। इदोइ ते जामाल जेङलाउ बेबालाइहेङ जेङका तु:को लाङ खिनिङ।
9 “नेलाइ ताइको बारेता होस पातेङ हिसु। एम्बालाइ नेलाइहेङ कचहरिता चुमप्वावा। नेलाइ कचहरिसाअ्ता दान्हाइनिन्चास्वाना। कालाउ हाकिमगेलाइ रो राजागेलाइको आगाता काङको भाअ्सिङ एम्बालाइहेङ दासि पिलि नेलाइ जाअ्स्वाना। #
मत्ति १०:१७-२०; लुका १२:११-१२ 10इदोइ दुनिया मुअ्का खान्तेङ लाम्फा गोताङ जात्याको द्याङगेलाइहेङ रेम्काबानाल हिङपालिगोयाङ। 11जेलाउ द्याङगेलाइ नेलाइहेङ रिम्पुतेङ चुमपुलाउ, कालाउ हाइ धुयाङ दोअ्तेङ पिर मापासु। इङकोङ पहर धुइका नेलाइ माको कालाउबुङ पुनित हाङसा नेलाइसो धुयावा।
12 “इङको पहर द्याङगेलाइ ताइकोङ दादाओनेगेलाइहेङ सेअ्लि प्यावा। एन्साङपातेङ आबा चानचामिन्दिहेङ, चानचामिन्दि आबा आमाइको खिलापता ल्होकावा रो एम्बालाइहेङ सेअ्लि लागायावा। 13कालाउ काङको मिङको भाअ्सिङ नेलाइहेङ झाराङ खाङलि माकिअ्तावा, कालाउबुङ जाइ न्हुअ्थिकापा खान्धुरता ह्यावा इङकोको भालाइ ज्यावा।#मत्ति १०:२२
थिलिगोइका पहरको बारेता
(मत्ति २४:१५-२८; लुका २१:२०-२४)
14 “जेलाउ नेलाइ माजेङलि गोइका थामेता नेलाइ मुअ्पाका आखेका काथा तिङस्वाना (पर्हिकालाइ ग्याको), कालाउ यहुदियाता हिकालाइ लाखभारि खाअ्ताको।”#दानिएल ९:२७; ११:३१; १२:११; लुका २१:२०-२२ 15साअ् र्हुता हिकालाइ लेता खुअ्तेङ हाइदोङ आनेमाने ओल्हिपालि साअ्लिअ्ता मादुलाको।#लुका १७:३१ 16मिलिङता हिकालाइ ताइको गुअ्का नानिकोभाअ्सिङ साअ् माघुर्याको। 17इङको पहर गान्धितेअ्का रो दुदु आम्पाका आमाइगेलाइहेङ ते झन हिस्का बिजोक ज्यावा। 18इङको चुङदिनाता माज्याको दोअ्तेङ पारथाना पासु। 19हाइपानु इदोइ दिनागेलाइता इस्का आपत ल्वावा, परमेस्वरको पाका सिरजाइको लाम्फासो एलाथिकापा ना इस्का जेङका हि ना हेअ्लाउ ज्यावा।#दानिएल १२:१; पारकास ७:१४ 20परमेस्वर इदोइ दिना माघाटेपापिका हिनुते हिदिङ द्याङ माबान्चिधाङ, कालाउबुङ वा साल्तेङ दिङगिल्कालाइको भाअ्सिङ इङको दिना घाटेपाका हि। 21इङको पहर जाइ नेलाइहेङ “खाङसु, ‘ख्रिस्ट इता हि’, ‘इन्ता हि’ दोअ्नु नेलाइ खान्धुर मापासु। 22हाइदोनु ढाटाइका ख्रिस्ट रो ढाटाइका परमेस्वर पाहासो धुइकालाइ ल्वावा, कालाउ साल्तेङ दिङगिल्कालाइहेङ मायाजालता फासेपालि एम्बालाइ चिनो रो भारभुसाइका कामगेलाइ पावा। 23कालाउबुङ नेलाइचाहिँ होस पातेङ हिसु। खाङसु, का नेलाइहेङ गोताङ काथा लाम्फासोङ दोअ्पिकाङ हिघा।”
इसु आरोङ ल्वावा
(मत्ति २३:२९-३१; लुका २१:२५-२८)
24 “कालाउबुङ इङको दिनाता इङको आपतन्हुअ्सो बेला तु:को कितिकितितावा रो तालि ताइको फाइसालाम्का माप्यावा, #
यासाइया १३:१०; योएल २:१०,३१; ३:१५; पारकास ६:१२; इजकिएल ३२:७ 25फुरुगेलाइ आकाससो हुलावा रो आकासता हिका सरबङगेलाइ हेङगालाइन्हावा।#यासाइया ३४:४; पारकास ६:१३; योएल २:१० 26कालाउ इङको पहरता द्याङगेलाइ का द्याङको चानहेङ सरबङ रो पारतापदोसा बादेलता लोकाताङपाका तिनावा।#दानिएल ७:१३; पारकास १:७ 27कालाउ वा स्वरगदुतगेलाइहेङ दिङगिलावा रो सुमिङकको न्हुअ्थिकापा आकासको न्हुअ्थिकापा चारपाहाङसो ताइको साल्तेङ दिङगिल्कालाइहेङ जोम्पावा।”
दुमरिको सिङसो बिद्या
(मत्ति २४:३२-३५; लुका २१:२९-३३)
28इसु आरोङ दोअ्तेङ हानिहि, “दुमरिको सिङसो धिरसु, इङकोको दालेङ नोमका जेङतेङ ल्हाअ्बा दोरतेङसाङ भेमका पहर भेरपा लोहोइ दोअ्तेङ नेलाइ गिस्वाना। 29एसादोङ नेलाइ बुङ जेलाउ इदोइ घाटानागेलाइ जेङतेङहिका तिङलाउ, कालाउ वा भेरपा हि, फिनुता दोङ हि दोअ्का गिसु। 30जातिङको का नेलाइहेङ दोअ्खा, इदोइ गोताङ काथा जेङलि मादोपाधाउ इदोइ पुस्ता सितेङमान्हावा। 31स्वरग रो सुमिङ सितेङ हानावा, कालाउबुङ काङको केरा चाका हेअ्लाउ सितेङमान्हावा।
चालाक जेङतेङ हिसु
(मत्ति २४:३६-४४; लुका १२:३८,४०)
32 “कालाउबुङ इङको दिना रो इङको पहरको बारेता हासुङ मागिखे। ना स्वरगता हिका स्वरगदुत, ना चान दोङ गिखे। इदोइ काथा ते स्वरगता हिका परमेस्वर आबा खिनिङ गिखे। #
मत्ति २४:३६
33होस पातेङ हिसु, नाङघातेङ हिसु रो पारथाना पासु, हाइपानु इङको पहर हेअ्लाउ ल्वावा, नेलाइ मागिस्वाना। 34इदोइ ते मालिक ताइको कामत्यागेलाइहेङ साअ्को गोताङ काम जिम्मा पितेङ, कालाउ द्वारता हिकाहेङ नाङघातेङ हि दोअ्तेङ हुकुम पितेङ बोमुलुक हानिका भाइका।#लुका १२:३६-३८
35 “इदोइभाअ्सिङ नेलाइ बुङ नाङघातेङ हिसु, हाइपानु साअ्को मालिक दिलिमा, माकुनु आधा दिलिमा, माकुनु धाङगाइ ओलाउ, माकुनु र्हिमा, हेअ्लाउ ल्वाङ, इङको नेलाइ मागेस्वाना। 36माकुनु वा एकासि लोलाउ नेलाइहेङ निन्धातेङ हिका दुस्वावा। 37हाइ का नेलाइहेङ दोअ्का हिघा इङको का झाराङहेङ दोअ्खा, ‘नाङघातेङ हिसु।’”
Currently Selected:
मरकुस 13: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
