मत्ति 23
23
धरम मास्टर रो फरिसिगेलाइहेङ चेतानि
(मरकुस १२:३८-३९; लुका ११:४३,४६; २०:४५-४६)
1कालाउ इसु द्याङगेलाइहेङ रो ताइको चात्यागेलाइहेङ एसा दोअ्हि: 2“धरम मास्टर रो फरिसिगेलाइ मोसाको न्याम धिरपालि खाबारा निङका हि। 3इदोङभाअ्सिङ एम्बालाइको दोअ्का काथा पासु रो मानिसु। कालाउबुङ एम्बालाइ पाकाभाइपा चाहिँ मापासु, हाइपानु एम्बालाइ बिद्या ते पिखे, कालाउबुङ इङको आन्सार मापाखे। 4एम्बालाइ बोमिहेङचाहिँ धरम करमको ल्हिका बोकाना फुपाखे, कालाउबुङ ताइमिचाहिँ इङको बोकाना फुलिते माको आङगुलिहोइ बुङ मासाइखे। 5एम्बालाइ ताइको गोताङ काम द्याङगेलाइहेङ तिम्पालि भाअ्सिङ पाखे। एम्बालाइ न्यामको काथाहेङ बाबारका जन्तर बान्हाइतेङ लागाइखे रो धरमाति हिघा दोअ्तेङ तिङपालि ताइको धाबाता र्हिर्हिङका फुरकागेलाइ लागाइखे।#मत्ति ६:१; न्याम ६:८; गान्देका १५:३८ 6एम्बालाइ भतेरता आदरको थामे रो कचहरिसाअ्गेलाइता मुल थामेगेलाइता योम्लि मोन्दाताखे, 7बाजारगेलाइता सेउपाका भोखे रो द्याङगेलाइ मास्टर दोअ्का मोन्दाताखे।
8 “नेलाइहेङ हासुङ ‘मास्टर’ मादोअ्ताको, हाइपानु नेलाइको मास्टर एलोङ हि, नेलाइचाहिँ झाराङ दादाओने हिसुन्हा। 9नेलाइ सुमिङता हासुहेङ ताइको आबा मादोअ्सु, हाइपानु नेलाइको एलोङखिनिङ आबा हि जाइ स्वरगता हि। 10नेलाइहेङ हासुङ ‘मास्टर’ मादोअ्ताको, हाइपानु नेलाइको एलोङखिनिङ मास्टर हि जाइ ख्रिस्ट हि। 11नेलाइता जाइ झाराङखान्तेङ बारका हि, इङको नेलाइको सेवा पाका ज्यावा।#मत्ति २०:२६-२७; मरकुस ९:३५; १०:४३-४४; लुका २२:२६ 12जाइ ताइमिहेङ बारापावा, इङको झाराङखान्तेङ म्हुयावा रो जाइ ताइमिहेङ म्हुइपावा इङको झाराङखान्तेङ बारावा।#लुका १४:११; १८:१४
चिम्काटागेलाइको खिलापता चेतानि
(मरकुस १२:४०; लुका ११:३९-४२,४४,५२; २०:४७)
13 “धिकार धरम मास्टर रो फरिसिगेलाइ! नेलाइ चिम्काटा हिसुन्हा। हाइपानु नेलाइ स्वरगको सारभिको फिनु गिअ्का हिसुन्हा। नेलाइ ताइमि बुङ लिअ्ता मादुल्सुखेना रो लिअ्ता दुल्लि ना ताइमिङ दुल्सुखेना ना भोकालाइहेङ बुङ दुल्लि पिसुखेना।
14 [“धिकार नेलाइहेङ, धरम मास्टर रो फरिसिगेलाइ! नेलाइ चिम्काटा हिसुन्हा। हाइदोनु नेलाइ रान्दिगेलाइको साअ्द्वार घिङपिसुखेना रो ताइमिहेङ धरमाति तिङपालिकोभाअ्सिङ र्हिर्हिङका पारथाना पासुखेना। इदोइभाअ्सिङ बोखान्तेङ नेलाइ हेन्जा दार निङस्वाना।]
15 “धिकार नेलाइहेङ, धरम मास्टर रो फरिसिगेलाइ! नेलाइ चिम्काटा हिसुन्हा। हाइपानु नेलाइ बोमिहेङ ताइको धरमता चुमालि भाअ्सिङ जाहादि रो बोमुलुकगेलाइता घुराइगिल्सुखेना। इङको नेलाइको धरमता लोकान्हुअ्सो इङकोहेङ ताइमिखान्तेङ न्हेगुना नरकता हानिलि सोबाइका बान्हाइसुखेना।
16 “धिकार कान्हा आगुवागेलाइ! नेलाइ दोअ्सुखेना, ‘हासुङ थानको केरा चालाउ हाइदोङ माज्याङ, कालाउबुङ थानको सोनाको केरा चालाउ इङको केराहोइ धेउन्हावा।’ 17निरबुदि रो कान्हागेलाइ! नेलाइ हिदोइचाहिँ बारका दोअ्सुखेना? सोना ना सोनाहेङ पुनित पाका थानहेङ? 18आरोङ नेलाइ ‘थामे साइतेङ केरा चालाउ हाइदोङ माजेङखे, कालाउबुङ इन्ता चार्हाइका चिजहेङ साइतेङ केरा चालाउचाहिँ केरा लोङखे’ दोअ्तेङ धिरपासुखेना। 19कान्हागेलाइ! नेलाइ हिदोइचाहिँ बारका दोअ्सुखेना? चार्हाइका चिज ना चार्हाइका चिजहेङ पुनित पाका थामेहेङ? 20इदोइभाअ्सिङ थामेको केरा चाकालाइ थामेको रो इन्ता चार्हाइका गोताङ चिजको केरा चाखे। 21एन्साङपातेङ थानको मिङता केरा चाकाचाहिँ थान रो इङकोलिअ्ता हिकाको मिङता केरा चाखे। 22स्वरगको मिङता केरा चाकाचाहिँ परमेस्वरको गादि रो इदोइता हिकाको मिङता केरा चाखे।#यासाइया ६६:१; मत्ति ५:३४
23 “धिकार नेलाइहेङ, धरम मास्टर रो फरिसिगेलाइ! नेलाइ चिम्काटा हिसुन्हा। हाइपानु नेलाइ पुदिना, सोमपोइ रो जिराको ते भागको एअ् भाग पिसुखेना। कालाउबुङ निया पालि, दाया पालि रो खान्धुर पालि दोका न्यामको मुल काथागेलाइको चाहिँ नेलाइ वास्ताङ मापासुखेना। इङको बो काथाको दोसादोसाङ निया पालि, दाया पालि रो खान्धुर पालि दोका जेङलिगोयाङ। #
लेबि २७:३०
24कान्हा आगुवागेलाइ! नेलाइ भुसुनाहेङ साल्सुखेना, कालाउबुङ उटहेङ चाहिँ निअ्सुखेना।
25 “धिकार नेलाइ, धरम मास्टर रो फरिसिगेलाइ रो चिम्काटागेलाइ! हाइदोनु नेलाइ थालि रो बाति बाहार खिनिङ मान्झेसुखेना, कालाउबुङ लिअ्ता चाहिँ दिअ्का रो ताइमिहेङ खिनिङ फोमपातेङ चुमाका मारेम्का काथागेलाइहोइ पोङघापासुखेना। 26ओइ कान्हा फरिसिगेलाइ! लाम्फा थालि रो बातिको लिअ्तापाहा मान्झेसु, कालाउ बाहारपाहा बुङ मान्झेन्हावा।
27 “धिकार धरम मास्टर रो फरिसिगेलाइ! नेलाइ चिम्काटा हिसुन्हा। हाइपानु नेलाइ चुना लागाइका तोमभाइकाङ हिसुन्हा। इङको तोम बाहारपाहासो खाङलाउ ते रेम्का तिङखे, कालाउबुङ लिअ्तापाहा सितेङ आइका हारा रो आपुनित काथा खिनिङ हिका हिखे। #
साल्तेङ दिङगिल्का २३:३
28एसाङपातेङ बाहारसो खाङलाउ नेलाइ द्याङको आगाता धरमाति भाइपाङ तिङसुखेना, कालाउबुङ लिअ्ता चाहिँ नेलाइको मन कपट रो पापहोइ पोङघाका हि।
दोसिहेङ साजाइ
(लुका ११:४७-५१)
29 “धिकार धरम मास्टर रो फरिसिगेलाइ रो चिम्काटागेलाइ! हाइपानु नेलाइ परमेस्वर पाहासो धुइकालाइको भाअ्सिङ रेरेम्का तोमगेलाइ बान्हाइसुखेना रो परमेस्वरको हुकुमता लागितेङहिका पुनित जनगेलाइको तोमगेलाइ बुङ झिलिमिलि पासुखेना। 30कालाउ नेलाइ दोअ्सुखेना, ‘लाम्फा केलाइको आजुखालगेलाइ ते परमेस्वर पाहासो धुइकालाइहेङ सेअ्हि। कालाउबुङ केलाइ बुङ ओबालाइदोसा हिका हिनु केलाइचाहिँ इन्सिका काम पालि ओबालाइहेङ मासाघाइधाङ।’ 31एसा दोअ्तेङ नेलाइ ताइमिङ इङको परमेस्वर पाहासो धुइकालाइहेङ सेअ्काको खाल हिन्हाहि दोअ्का दासि नेलाइ ताइमिङ पिसुखेना। 32एला नेलाइको आजुखालगेलाइ थालेका पापको काम पोङघापासु।
33 “ओइ पुह्याँगेलाइ, बिसहिका पुह्याँको चानगेलाइ! नेलाइ हेसापा नरकको दारसो खाअ्स्वाना? #
मत्ति ३:७; १२:३४; लुका ३:७ 34इदोइभाअ्सिङ का नेलाइकोता परमेस्वर पाहासो धुइकालाइ, आकिल हिका द्याङगेलाइ रो धरम मास्टरगेलाइ दिङगिलाङका। एम्बालाइता हेअ्मिहेङ नेलाइ सेअ्स्वाना, आधिमिहेङ कुरुसता टाङगाइस्वाना, आधिमिहेङ ताइको कचहरिसाअ्गेलाइता द्वालि म्हेअ्स्वाना रो पुरकिअ्पाङ सान्ताइस्वाना। 35एसापा दुस मान्थुका हाबिलको हितिसो थानको थामेको माझाता सेअ्न्हाका बेरेक्याहको चान जकरियाको हितिथिकापाको गोताङ दुस नेलाइर्हुता पर्यावा।#सिरजाइ ४:८; २ इतिहास २४:२०-२१ 36जातिङको, का नेलाइहेङ दोअ्खा, इदोइ गोताङ काथाको दुस इदोइ खालको पुरिङर्हुता दोङ पर्यावा।
इसु यरुसलेमहेङ चेतानि पिका
(लुका १३:३४-३५)
37 “यरुसलेमको द्याङगेलाइ, यरुसलेमको द्याङगेलाइ! नेलाइ परमेस्वर पाहासो धुइकालाइहेङ सेअ्सुखेना कालाउ नेलाइकोता दिङगिल्कालाइहेङ उन्ठुइहोइ तोसुखेना। जेसापा कियाको भुन्दि ताइ किचानगेलाइहेङ जोम्पाका भाइपा, का नेलाइहेङ हेअ्खे जोम्पालि भोघा, कालाउबुङ नेलाइ माकिअ्सुन्हा। 38खाङ, नेलाइको साअ् उदादाङका जेनावा।#यरमिया २२:५ 39हाइदोनु का नेलाइहेङ दोअ्खा, ‘परमप्रभुको मिङता लोका हेथे सहसाम्पा निङकालाइ हिसुन्हा’ मादोअ्पाधाउ, नेलाइ कासेहेङ मातिङस्वाना।”#ले ११८:२६
Currently Selected:
मत्ति 23: DHIM
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
