लुका 5
5
इसु लाम्फाको चात्यागेलाइहेङ काइका
(मत्ति ४:१८-२२; मरकुस १:१६-२०)
1एअ्नि इसु गनेसरेत दोअ्का चावान्दिको काम्बेता जाअ्तेङ हिघाहि। हेङसाङ द्याङगेलाइ परमेस्वरको बचन हिङलि गुल्सुमुल्सुपा लोहि।#मत्ति १३:१-२; मरकुस ३:९-१०; ४:१ 2इसु चावान्दिको काम्बेता न्हेलोङ नाउ तिङहि। जालेघाकालाइ नाउ लाअ्तेङ जाले झादोङघाहि। 3एलोङ नाउ सिमोनको हिघाहि। इसु इङकोङ नाउता धोलतेङ सिमोनहेङ नाउ काम्बेसो आसा ओसो चुमपुलि दोअ्हि। कालाउ योम्तेङ द्याङगेलाइहेङ धिरपालि तेङहि।
4धिरपालि दोतेङ इसु सिमोनहेङ दोअ्हि, “नाउ हेन्जा चि हिका थामेता चुमपुतेङ जाले थाल!” 5इदोइ हिङतेङ सिमोन इसुहेङ दोअ्हि, “मास्टर, केलाइ ते न्हिसिङ थिकापाङ जाले थाललाउबुङ एलोङबुङ हाया मादेहि। कालाउ ना दोअ्नाङसिङ का जाले थालाङका।”#युहन्ना २१:३ 6जाले थाललाउ हेथे हेन्जाङ हाया देतेङ एम्बालाइको जाले दोङ थेअ्लि तोम्हि।#युहन्ना २१:६ 7कालाउ एम्बालाइ भेनेङ नाउता हिका सानाइतिगेलाइहेङ साघाइलि भाअ्सिङ खुरको टिप्निहोइ काइहि। कालाउ एम्बालाइ लोतेङ हाया ओल्हिपालि तेङहि। हाया ओल्हिपाकाताङ पालाउ न्हेलोङ नाउताङ हाया पोङघातेङ नाउ दोङ दुबिलि तोम्हि।
8इदोइ तिङतेङ सिमोन पत्रुस इसुको खोकोइता सेउपातेङ दोअ्हि, “प्रभु, का पापि हिघा, कासो दुरे योम!” 9हाइदोनु इदोइझोको हेन्जा हाया देकाता सिमोन रो वाको सानाइतिगेलाइ बुङ भारभुसाइहि। 10सिमोनदोफा मिलितेङ काम पाका जब्दियाको चानगेलाइ याकुब रो युहन्ना बुङ भारभुसाइहि। कालाउ इसु सिमोनहेङ दोअ्हि, “माथि! एलासो ना हाया माको, द्याङगेलाइहेङ काङकोता चुमाका जेनाना।” 11इदोइ दोअ्का हिङतेङ एम्बालाइ नाउ काम्बेता तान्हितेङ चुमाहि कालाउ गोताङ आनेमाने लाअ्तेङ इसुहेङ पिताइहि।
इसु रोग्याल्होकाहेङ एल्पाहि
(मत्ति ८:१-४; मरकुस १:४०-४५)
12एअ्खे इसु एलोङ पुरता हिघाहि। इङको पुरता रोग्याल्होका एअ्मि द्याङ हिघाखे। इसुहेङ तिङतेङ इङको रोग्याल्होका द्याङ वाको खोकोइता सेउपातेङ एसापा बिम्ति पाहि, “प्रभु, ना मन पान्हा पानु कासेहेङ एल्पालि द्वाना।” 13इसु वाकोर्हुता खुर ताअ्तेङ दोअ्हि, “ना एल” दोअ्तेङ “का मन पाखा।” कालाउ इघुरिङताङ वाको रोग्याल्होका एल्हि। 14कालाउ इसु वासेहेङ हुकुम पितेङ दोअ्हि, “खाङ, इदोइ काथा हासुहेङ मादोअ्! कालाउबुङ धामिकोता हानितेङ ताइको जाच पापा। मोसाको हुकुम भाइपा भोक पितेङ झाराङहेङ ना एल्का दासि पि।”#लेबि १४:१-३२
15इङको दिनासो इसुको नावाइ झन चारचाराइहि। कालाउ हेन्जाङ द्याङगेलाइ वाको बिद्या हिङलि रो एल्लि लोहि। 16कालाउ वा निचालाका थामेगेलाइता हानितेङ पारथाना पाघाहि।
इसु गाइल्हिखोअ्काहेङ एल्पाहि
(मत्ति ९:१-८; मरकुस २:१-१२)
17एअ्नि इसु द्याङगेलाइहेङ धिरपादोङघाहि। आधिमि फरिसिगेलाइ, धरम मास्टरगेलाइ वाको भेरपा योम्तेङ हिघाखे। एम्बालाइचाहिँ गालिल, यहुदिया माउजासो गोताङ देराभारिसो कालाउ यरुसलेम पुरसो बुङ लोका हिघाखे। इसुदोफा रोगाइकालाइहेङ एल्पाका प्रभु परमेस्वरको सरबङ हिघाहि। 18द्याङगेलाइ एअ्मि गाइल्हिखोअ्काहेङ सिदाउदोफाङ फुतेङ चुमाहि। एम्बालाइ वासेहेङ इसुको आगाता चुमपुलि बल पाहि। 19कालाउ द्याङगेलाइ चेअ्सुमेअ्सुनाङ वाकोता चुमालि दामादोङ मानिङहि। एसापातेङ एम्बालाइ इङको गाइल्हिखोअ्काहेङ साअ्को चाल्हाता चुमपुहि। चाल्हा र्हाअ्तेङ इन्तासो गाइल्हिखोअ्काहेङ वाको सिदाउसुदाङ आलोल्होपा इसुको भेरपा खुअ्पाहि। 20द्याङगेलाइको खान्धुर तिङतेङ इसु इङको बिमारिहेङ दोअ्हि, “नाङको पाप माफ जेङहि।”
21इसुको दोअ्का इदोइ काथा हिङतेङ धरम मास्टर रो फरिसिगेलाइ ओबालाइसि ओबालाइता दोअ्लि तेङहि, “परमेस्वरहेङ बादानामि पाका या हासु? परमेस्वर खिनिङ पाप माफ पालि द्वावा।” 22एम्बालाइको मनको काथा गितेङ इसु दोअ्हि, “नेलाइ हाइपालि इस्का बिचार पासुखेना? 23इङको गाइल्हिखोअ्का द्याङहेङ ‘नाङको पाप माफ जेङहि’ दोअ्लि ना ‘ल्होतेङ हाने’ दोअ्लि हिदोइ रेम्का, ते दोअ्सु? 24कालाउ खाङ, इदोइ सुमिङता का द्याङको चानहेङ द्याङको पाप माफ पाका खाबारा हि दोअ्का काथाको दासि का नेलाइहेङ प्याङका।” कालाउ इसु इङको गाइल्हिखोअ्काहेङ दोअ्हि, “का नासेहेङ दोअ्खा, एला ल्हो कालाउ ताइको सिदाउ चुमतेङ सिता हाने।” 25इङको द्याङ उदोङघरि झाराङको आगाता ल्होहि कालाउ ताइको सिदाउ चुमतेङ परमेस्वरहेङ बाखिनकाताङ सिता हानिहि। 26एम्बालाइ झाराङ भारभुसाइतेङ परमेस्वरको इस्का सरबङ तिङतेङ थिहि। एम्बालाइ परमेस्वरहेङ बाखिनतेङ दोअ्हि, “नानि केलाइ ते हिसिका भारभुसाइका काथा तिङन्हाहि!”
इसु लेबिहेङ काइका
(मत्ति ९:९-१३; मरकुस २:१३-१७)
27इन्तासो हानिलाउ इसु लेबि मिङ हिका एअ्मि तिरो ल्होपाका द्याङहेङ लेबि थामेता योम्तेङ हिका तिङहि। इसु वासेहेङ दोअ्हि, “कासेहेङ पिताइ।” 28ओदोङघरि लेबि गोताङ आनेमाने लाअ्तेङ वासेहेङ पिताइहि।
29इङकोन्हुअ्सो लेबि इसुहेङ ताइको साअ्ता चालिको भाअ्सिङ काइपुहि। इन्ता लेबि रो आरोङ हेन्जाङ द्याङगेलाइ बुङ हिघाखे। 30फरिसि रो फरिसिको धरम मास्टरगेलाइ गनगन पातेङ इसुको चात्यागेलाइहेङ दोअ्हि, “नेलाइ हाइपालि तिरो ल्होपाकालाइ रो बो पापि द्याङगेलाइ दोफादोफाङ योम्तेङ चासुखेना?”#लुका १५:१-२ 31इसु एम्बालाइहेङ जाबाफ पिहि, “बोइद्या ते मारोगाइकालाइहेङ माको, रोगाइकालाइहेङ खिनिङ गोइखे! 32एन्साङपातेङ का धरमाति द्याङहेङ माको, पापि द्याङगेलाइको भाअ्सिङ पास्ताइसु दोअ्तेङ काइलि लोका हिघा।”
म्हितुपा हिका बारेता हिअ्का
(मत्ति ९:१४-१७; मरकुस २:१८-२२)
33हेथे द्याङगेलाइ इसुहेङ दोअ्हि, “युहन्नाको चात्यागेलाइ दिनाङ भाइपाङ म्हितुपाङ हिखे रो पारथाना पाखे। फरिसि द्याङगेलाइको चात्यागेलाइ बुङ एन्साङ पाखे। कालाउ नाङको चात्यागेलाइ चालिआम्लि खिनिङ पाखे।” 34इसु एम्बालाइहेङ दोअ्हि, “हाइ नेलाइ दारुवा हिपाधाउ बिहुको भतेरता लोका काल्ह्यागेलाइहेङ म्हितुपाङ ताअ्लि दोस्वाना? 35कालाउ इन्सिका दिनागेलाइ बुङ ल्वावा, जेलाउ दारुवा नेलाइसो रिम्तेङ चुमप्वावा कालाउ खिनिङ म्हितुपाङ हिका पहर ल्वावा।”
36इसु एम्बालाइहेङ आरोङ भेनेङ उदारन बुङ पिहि, “हासु बुङ नावा धाबा थेअ्तेङ पुरना धाबाता मातालाइखे। कालाउ तालाइलाउ नावा धाबा बुङ बिगिर्खे। एन्साङ नावा चेन्थारा पुरना चेन्थारादोफा मामिलिखे।”
37 “आरोङ हासु बुङ नोनो आङगुरको निघार पुरना धालेको जाबिता माताअ्तावा। एन्सा पातेङ ताअ्लाउ ते जाबि भोयावा रो गोताङ निघार बुङ होकावा। 38नोनो आङगुरको निघार नावा धालेको जाबिता खिनिङ ताअ्लिगोइखे। 39एन्साङ दोङ हासु बुङ पुर्हिका आङगुरको निघार आम्लि लाअ्तेङ नोनो आङगुरको निघार माआम्खे। हाइदोनु वा दोअ्खे, पुर्हिका निघार दोङ ताका हिखे।”
Currently Selected:
लुका 5: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
