युहन्ना 21
21
इसु न्हिअ् चात्यागेलाइकोता तिङका
1इङकोन्हुअ्सो इसु आरोङ चात्यागेलाइको आगाता गालिल माउजाको तिबेरियास#२१:१ तिबेरियास गालिल जाहादिहेङ तिबेरियास जाहादि बुङ दोअ्खे। जाहादिको काम्बेता तिङन्हाहि। 2एन्सालाउ सिमोन पत्रुस, दिदुमस दोअ्का थोमा, गालिलको काना पुरको नथानेल, जब्दियाको न्हेमि चानगेलाइ युहन्ना रो याकुब रो वाको चात्यागेलाइता बो न्हेमि एदोफाङ हिघाखे। 3कालाउ सिमोन पत्रुस एम्बालाइहेङ दोअ्हि, “का हाया माङलि हानिदोङखा।” एम्बालाइ सिमोन पत्रुसहेङ दोअ्हि, “केलाइ बुङ नादोफाङ हानाङ।” एम्बालाइ हानितेङ नाउता धोल्हि, कालाउबुङ इङको न्हिसिङ एम्बालाइ एलोङबुङ हाया मानिङहि।#लुका ५:५
4र्हिमा जेङलिङ तोम्लाउ इसु जाहादिको काम्बेता जाअ्तेङ हिघाहि। कालाउबुङ चात्यागेलाइ वा इसु दोङ हिघाहि दोअ्तेङ नाल्लि मादोहि। 5इसु एम्बालाइहेङ दोअ्हि, “सानाइतिगेलाइ, नेलाइ हेथे हाया माङसुन्हा?”
एम्बालाइ वासेहेङ दोअ्हि, “एलोङबुङ माङका मान्थुन्हाहि।”
6इसु एम्बालाइहेङ दोअ्हि, “एन्सानु जाले नाउको दाम्पाहा थालसु, कालाउ निङस्वाना।” कालाउ एम्बालाइ जाले थालहि रो हाया हेन्जा देनाङ एम्बालाइ जाले तान्हेलिङ मादोहि।#लुका ५:६
7इसुको माया पाका चात्या सिमोन पत्रुसहेङ दोअ्हि, “वा प्रभु कि हिनाउ” “वा प्रभु हिनाउ” दोअ्का हिङतेङ सिमोन पत्रुस ताइको गुअ्का धाबा केङखेनेता तेअ्तेङ चिता धासेहि। हाइपानु इङको ताइको लागाइका लोखोन लाम्फाङ होअ्का हिघाहखे। 8बो चात्यागेलाइ नाउता धोलतेङ हाया पोङघाका जाले तान्हेकाताङ लोहि। एम्बालाइ काम्बेसो हेन्जा दुरे माको, कालाउ एन्साङ साइ मिटर झोको दुरे हिघाखे। 9जेलाउ एम्बालाइ जाहादिको काम्बेता खुअ्हि, कालाउ एम्बालाइ मेको आङघ्रोता हाया ताअ्का रो तोले तिङहि।
10इसु एम्बालाइहेङ दोअ्हि, “नेलाइको एलाङखिनिङ रिम्का हायासो आतुइसा चुमासु।”
11कालाउ सिमोन पत्रुस नाउता धोल्तेङ एअ्साइ न्हेकुरिते सुमलोङ बाबारका हायाहोइ पोङघाका जाले तिकारता तान्हेतेङ चुमाहि, कालाउबुङ जाले माथेअ्हि। 12इसु एम्बालाइहेङ दोअ्हि, “लोतेङ चासु।” चात्यागेलाइ हासु बुङ “ना हासु हिन्हा?” दोअ्तेङ हिअ्लि हिमत मापाहि। हाइपानु एम्बालाइ वा प्रभु हि दोअ्तेङ नाल्लिदोका हिघाखे। 13इसु लोहि रो तोले चुम्तेङ एम्बालाइहेङ पिहि, कालाउ एन्साङपातेङ हाया बुङ पिहि। 14इसु सिकासो सिन्हुतेङ ल्होकान्हुअ्सो वा चात्यागेलाइकोता देखाल जेङका इदोइ सुमखे हिघाहि।
पत्रुसहेङ इसुको आखिरि हुकुम
15जेलाउ एम्बालाइ चालि दोहि, कालाउ इसु सिमोन पत्रुसहेङ दोअ्हि, “युहन्नाको चान सिमोन, हाइ ना कासेहेङ एबालाइखान्तेङ हेन्जा माया पाखेना?”
सिमोन पत्रुस वासेहेङ दोअ्हि, “प्रभु, ना गिखेना, का नासेहेङ माया पाखा।”
इसु इङकोहेङ दोअ्हि, “एन्सानु काङको भेरागेलाइहेङ चापा।”
16इसु आरोङ न्हेखे इङकोहेङ दोअ्हि, “युहन्नाको चान सिमोन, हाइ ना कासेहेङ माया पाखेना?”
सिमोन पत्रुस वासेहेङ दोअ्हि, “एइ प्रभु, ना गिखेना, का नासेहेङ माया पाखा।”
इसु इङकोहेङ दोअ्हि, “एन्सानु काङको भेरागेलाइहेङ घो।”
17इसु इङकोहेङ सुमखे दोअ्हि, “युहन्नाको चान सिमोन, हाइ ना कासेहेङ दायाखेना?”
पत्रुस मन तु:पाहि, हाइपानु वा सुमखे इङकोहेङ “हाइ ना कासेहेङ माया पाखेना?” दोअ्हि। इङको वासेहेङ दोअ्हि, “प्रभु ना गोताङ काथा गिखेना रो का नासेहेङ माया पाखा दोअ्तेङ बुङ ना ताइमिङ गिखेना।”
इसु इङकोहेङ दोअ्हि, “काङको भेरागेलाइहेङ चापा। 18जातिङको का नासेहेङ दोअ्खा, जेलाउ ना धाना हिघान्हा कालाउ ना ताइमिङ ताइको तेपाना ताइमिङ तेअ्घाना रो जेता इछा पाघाना इन्ता हानिघाना। कालाउबुङ जेलाउ ना वाराङ जेनाना, कालाउ ना ताइको खुर ह्याना, बोमि नाङको तेपाना तेअ्पावा रो ना जेता हानिलि माकिअ्खेना इन्ता चुम्पुन्हाना।” 19हिदोइ खाल्को सिकासो इङको परमेस्वरको पारताप पावा, इङकोको टिप्नि पातेङ इसु इदोइ दोअ्का हिघाहि। इदोइ दोअ्तेङ वा इङकोहेङ दोअ्हि, “कासेहेङ पिताइ।”
इसुको मोन्दाताका चात्या
20सिमोन पत्रुस घुरितेङ खाङलाउ इसुको माया पाका चात्याहेङ न्हुअ्न्हुअ् लोतेङहिका तिङहि। या दोङ दिलिमाको चाकाको पहरता इसुको तुम्ताता उन्धितेङ, “प्रभु, नासेहेङ रिम्पाका हासु?” दोअ्तेङ हिअ्का हिघाखे।#युहन्ना १३:३५ 21इङकोहेङ तिङतेङ सिमोन पत्रुस इसुहेङ हिअ्हि, “प्रभु, याको चाहिँ हाइ ज्याङ?”
22इसु सिमोन पत्रुसहेङ दोअ्हि, “का मालोपाधाउ इङको र्हुम्तेङह्याको दोअ्का काङको इछा हिलाउ बुङ नासेहेङ हाइ चारि जेङहि? ना कासेहेङ पिताइ।” 23इदोङभाअ्सिङ इङको चात्या मास्याङ दोअ्का काथा चात्यागेलाइको माझाता फाइलिहि। इसु इङको मास्याङ दोअ्का मान्थुघाहि, कालाउबुङ, “का मालोपाधाउ इङको र्हुम्तेङह्याको दोअ्का काङको इछा हिलाउ बुङ नासेहेङ हाइ चारि जेङहि?” दोअ्का हिघाहि।
24इदोइ इङको दोङ चात्या, जाइ इदोइ काथाको बारेता दासि पिदोङखे रो इदोइ काथा लेखिका हि, कालाउ केलाइ गिन्हाखे इङकोको दासि जातिङको हि।
आखिरि काथा
25इसु बो काम बुङ हेन्जाङ पाहि। इङकोता झाराङको बारेता लेखिहि पानु, कासेहेङ इस्का लागिखे, इङकोको बारेता लेखिका किताबगेलाइ दुनियाता बुङ माथेम्धावा।
Currently Selected:
युहन्ना 21: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
