साल्तेङ दिङगिल्का 27
27
पावल रोमता हानिका
1फेस्तस निधो पाकान्हुअ्सो केलाइ इटालिया मुलुक हानिलि वा पावल रो बो काइदिगेलाइहेङ रोमि माहाराजाको पलटनको काप्तान युलियसको जिम्मा लागाइहि। 2केलाइ एड्रामिटेनोस पुरसो लोतेङ एसिया माउजाको हेन्जाङ घाटेगेलाइ जेङतेङ हानिलि तोम्का चिजाहाजता धोल्तेङ दामा लाअ्न्हाहि। माकेडोनिया माउजाता हिका थेसलोनिके पुरको आरिस्तारखस बुङ केलाइदोफाङ हिघाखे।
3जुम्निदिना केलाइ सिदोन पुरता थुकान्हाहि। इङको थामेता काप्तान युलियस पावलहेङ दायातेङ ताइको सानाइति भायागेलाइकोता हानितेङ दुसुलि रो गोइका झोको साघाइका र्हुलि माउका पिहि। 4इन्तासो केलाइको चिजाहाज आरोङ दामा लाअ्हि। कालाउ चिजाहाजको आगापाहासो भेरमा लोनाङसिङ केलाइ साइप्रस टापुको काम्बेसो भेरमा छलिन्हातेङ हानिलि गोइहि। 5किलिकिया रो पामफिलिया माउजाको काम्बेता हिका जाहादि पारातेङ केलाइ लुकिया माउजाता हिका माइरा पुरता थुकालिलोन्हाहि। 6इन्ता काप्तान युलियस आलेक्जेन्ड्रिया पुरसो इटालिया मुलुकता हानिका चिजाहाज निङहि रो वा केलाइहेङ इङकोङ चिजाहाजता धोल्लि लागाइहि।
7भेरमा आगापाहासो लोनाङसिङ केलाइ हेन्जाङ दिनाथिकापा आलल्होपा आगाइतेङ बोलधाकाङ क्निडस पुरको भेरपा थुकान्हाहि। इन्तासो भेरमा आगाइलि मापिनाङसिङ क्रेटको आर र्हुतेङ केलाइ सालमोनेको काम्बे जेङतेङ हानिन्हाहि। 8इन्तासो हेन्जाङ पिर निङचातेङ केलाइ लासिया पुरको भेरपा हिका रेम्का घाटेता थुकालिलोन्हाहि।
9इन्ता थुकालि हेन्जाङ पहर दोका हिघाहि। यहुदिगेलाइको म्हितुपाङ हिका बिसेस दिना बुङ दोका हिघाहि। चुङदिङता लोतेङहिका भेरमासो चिजाहाजहेङ आगाइलि थिलिगोइपा हिघाहि। एन्साजेङलाउ पावल ताइमिहेङ र्हुम्का द्याङगेलाइहेङ एसा दोअ्तेङ गावाइहि, 10“सानाइतिगेलाइ, एला केलाइ इतासो हानिनु ते चिजाहाज रो इता हिका आनेमाने खिनिङ माको, केलाइ बुङ मुअ्लि द्वाङ दोअ्का काथा का गिका हिघा।” 11कालाउ काप्तान युलियस पावलको दोअ्का खान्तेङ बुङ चिजाहाज चालाइका रो चिजाहाजको मालिकको दोअ्का काथा खिनिङ साअ्हि। 12चुङदिङता हिलि इङको घाटे रेम्का बुङ मान्थुघाहि। एन्साजेङलाउ हेन्जाङ द्याङगेलाइ चुङदिङता हिलि हिदि बुङ हालतसो इन्तासो हानितेङ फोनिक्स पुरता थुकालि भोघाखे। फोनिक्सचाहिँ क्रेटको एलोङ घाटे हिघाहि। जाइ माहेँ दिहेँ रो दाहेँ दिहेँ घुरिका हि।
जाहादिता दुमभेरमा लोका
13माहेँपाहासो आलल्होपा भेरमा लोलि तेङहि। झाराङ द्याङगेलाइ एला केलाइ हानिलि द्वाङ दोअ्का फोमपाहि। एम्बालाइ खेअ्पातेङ ताअ्का किहाम ओल्हिपाहि रो चिजाहाजहेङ क्रेट टापुको काम्बेपाहासो चुमपुहि। 14कालाउ एघुरिन्हुअ्सो इङको टापुपाहासो बारका दुमभेरमा फेअ्न्हातेङ लोहि। इङकोचाहिँ दाहेँनुहेँ दोअ्का दुमभेरमा हिघाहि। 15जेलाउ दुमभेरमा चिजाहाजहेङ थुम्हि, चिजाहाज दुमभेरमाको आगाता हाइदोङ पालि मादोन्हाहि। केलाइ चिजाहाजहेङ जेसो चुमपुखे चुमप्वाको दोअ्तेङ लाअ्पिन्हाहि। 16क्लाउडा दोअ्का म्हुइका टापुको माहेँपा थुकाकान्हुअ्सो टापु दुमभेरमाहेङ आसा घेपाइपिहि। इन्ता केलाइ चिजाहाजको न्हुअ्पाहा धेउका म्हुइका नाउहेङ बोलधाकाङ जोगाइलि दोन्हाहि। 17वासेहेङ हेरतेङ बोलधाकाङ चिजाहाजलिअ्ता ह्वाअ्कान्हुअ्सो चिजाहाज चालाइकालाइ चिजाहाजहेङ दिह्यामहोइ काकारपा धेउहि। एम्बालाइ चिजाहाज लिबियाको सिरकिट दोअ्का थामेको बाल्हाता भास्याङ बे दोअ्तेङ थिहि। एन्साजेङलाउ चिजाहाज चालाइकालाइ पाल हुल्पापिहि रो चिजाहाजहेङ भेरमाकोङ भरता लाअ्पिगिल्हि। 18इङको थिलिगोइका दुमभेरमा लोतेङ दोङ हिघाहि रो जुम्निदिना एम्बालाइ चिजाहाजता हिका आनेमानेगेलाइ जाहादिता थालपिगिल्हि। 19इतिनिदिना चिजाहाज चालाइलि गोइका आनेमानेगेलाइ ताइकोङ खुरहोइ जाहादिता थालगिल्हि। 20हेन्जा दिनाथिकापा केलाइ ना साने तिङन्हाहि ना फुरु दोङ तिङन्हाहि। दुमभेरमा लोकालोकाङ पानाङसिङ आखिरता सिन्हुताङ दोअ्का केलाइको आस बुङ राम्हि।
21एम्बालाइ उम माचाका हेन्जाङ दिना जेङका हिघाहि। कालाउ पावल एम्बालाइहेङ लोतेङ दोअ्हि, “सानाइतिनेगेलाइ, नेलाइ काङको साल्हा मानितेङ क्रेटसो चिजाहाज माचालाइनु ना इस्का पिर निङचाधाङ ना हिदिङ आनेमाने नास दोङ जेङधावा। 22कालाउ एला का बिम्ति पाखा: हारेस माचासु, नेलाइता हासुको बुङ जिउ मान्हावा, खालि चिजाहाज खिनिङ मुअ्तावा। 23का परमेस्वरको द्याङ हिघा रो वाकोङ सेवा पादोङखा। वाकोङ एअ्मि स्वरगको काथाचुमाका नानि न्हिसिङता काङको भेरपा लोतेङ 24कालाउ दोअ्हि, ‘ओइ पावल, माथि! ना रोमि बाराराजाको आगाता हानिलिङ गोयाना रो नाङकोङ भाअ्सिङ परमेस्वर नादोफा हानिका झाराङहेङ बान्चिपावा।’ 25इदोइभाअ्सिङ दादाओनेगेलाइ, नेलाइ हारेस माचासु, हाइदोनु परमेस्वरको दोअ्का इङको काथा पुरा ज्यावा दोअ्का का खान्धुर ताअ्का हिघा। 26एला केलाइ हिदिङ टापुको काम्बेता धिनिङचाङ।”
चिजाहाज धिन्हातेङ र्हाअ्न्हाहि
27केलाइको चिजाहाज एसापा दुमभेरमाको माझाता एड्रियास जाहादिता हेङगालाइन्हाका तेद्या दिना जेङलिदोका हिघाहि। आधान्हिसिङता चिजाहाज चालाइकालाइ हिदिङ थामेको एलोङ काम्बेता थुकालि तोमन्हाहोइ दोअ्तेङ फोमपाहि। 28एन्साजेङलाउ ओबालाइ चिको वाङखाराका दोङलि तेङहि। दोङलाउ न्हेकुरि मिटर झोको लेता हिघाहि। आसा ओसो थुकातेङ दोङलाउ एअ्कुरिते मिटर झोको हिघाहि। 29चि आतुइसा हिनाङसिङ ओबालाइ उन्ठुइता चिजाहाज धिन्हाङ बे दोअ्तेङ थिहि। इङकोभाअ्सिङ ओबालाइ न्हुअ्पाहाको द्यालोङ किहाम हुल्पातेङ चिजाहाजहेङ जाअ्पाहि रो झेनाको दोअ्तेङ पारथाना पालि तेङहि। 30कालाउ चिजाहाज चालाइकालाइ आगापाहाको किहाम हुल्पालि आल पातेङ आतुइका नाउहेङ चिजाहाजसो हुल्पातेङ खाअ्लि भोहि। 31कालाउबुङ पावल काप्तान रो पलटनगेलाइहेङ दोअ्हि, “इदोइ चिजाहाज चालाइकालाइ खाअ्नु केलाइ हासु बुङ माबान्चियाङ।” 32इदोइ काथा हिङतेङ पलटनगेलाइ चिजाहाजता धेउतेङ ताअ्का म्हुइका नाउहेङ दिह्याम चेतेङ झोपागिल्हि।
33झेङलितोम्का पहरता पावल इन्ता हिकालाइहेङ दोअ्हि, “चाकाचिज हाइदोङलाउ बुङ चालिगोयाङ हाइदोनु नेलाइ सुरतापातेङ माचासिङ हिका तेद्या दिना जेङलिदोहोइ। 34एला का नेलाइहेङ बिम्ति पाखा, बान्चिलिको भाअ्सिङ हाइ ना हाइ चालि दोङ गोयाङ। माथिसु, परमेस्वरको दोअ्का भाइपाङ हासुहेङ बुङ हाइदोङ माज्याङ।” 35इदोइ दोअ्तेङ पावल तोले र्हुहितेङ पेङहि कालाउ झाराङको आगाता परमेस्वरहेङ च्याबास पितेङ चालि तेङहि। 36इङकोन्हुअ्सो बोगेलाइ बुङ आट निङतेङ चाहि। 37इङको चिजाहाजता केलाइ जाम्मा न्हेसाइ सुमकुरितेतुमि हिघान्हाहि। 38झाराङ घाइपाङ चालिदोकान्हुसो चिजाहाजहेङ होम्पालि एम्बालाइ हिका झोको गोताङ गोहोम बुङ जाहादिता थालगिल्हि।
39झेङकान्हुअ्सो जाहादिको हिदिङ बाल्हा हिका काम्बे तिङहि। कालाउ चिजाहाज चालाइकालाइ इङको थामेहेङ नाल्लि मादोहि। काम्बेता सारेका बालाहिका रेम्का थामे तिङतेङ एम्बालाइ चिजाहाजहेङ चुमपुलि दोनु इन्सोङ चुमपुलि भोहि। 40एम्बालाइ किहामगेलाइता धेउका दिह्यामगेलाइ चेतेङ किहामगेलाइ जाहादिताङ लाअ्गिल्हि। इङकोन्हुअ्सो चिजाहाज चालाइका दाङसुला धेउतेङ ताअ्का दिह्यामगेलाइ बुङ खाइपिहि। कालाउ आगाको पालहेङ र्हुता तोल्हेपिहि रो भेरमा चिजाहाजहेङ चुमपुलाउ काम्बेभारि चालाइतेङ चुमपुहि। 41कालाउबुङ चिजाहाज बाल्हाको रासता धिन्हातेङ हानिलाउ आगाको भाग बाल्हाता खेअ्हि कालाउ चिजाहाजको न्हुअ्पाहाको भाग चिको छालहोइ र्हाअ्न्हालि तेङहि।
42एन्सालाउ काइदिगेलाइ नुइतेङ खाअ्ताङ दोअ्तेङ पलटनगेलाइ एम्बालाइ झाराङहेङ सेअ्लि बिचार पाहि। 43कालाउ काप्तान पावलहेङ सिन्हुपालि भोघाखे, एन्साजेङलाउ वा हासुहेङ बुङ सेअ्लि मापिहि। वा नुइलि दोकाझोको लाम्फादोङ नुइतेङ काम्बेता हानिसु 44रो बोमिचाहिँ चिजाहाजको फालागेलाइको टुकारागेलाइ चा:तेङ ओदोइपार पारासु दोअ्तेङ हुकुम पिहि। एसापा केलाइ झाराङ रेम्फाङ काम्बेता थुकान्हाहि।
Currently Selected:
साल्तेङ दिङगिल्का 27: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
