साल्तेङ दिङगिल्का 21
21
पावल यरुसलेम हानिका
1एफिससको मन्डलिको आगुवागेलाइदोफा बेदाङगि जेङतेङ केलाइ चिजाहाजता सोझाङ कोस दोअ्का टापु जेङतेङ जुम्निदिना रोडस टापुता थुकान्हाहि कालाउ इन्तासो पटारा पुरता थुकालिलोन्हाहि। 2इन्ता केलाइ फोनिके माउजाथिकापा हानिका चिजाहाज निङन्हाहि रो इन्ताङ धोल्तेङ हानिन्हाहि। 3केलाइ साइप्रस टापुको भेरपाङ जेङतेङ इङकोकोङ माहेँपाहासो सिरिया माउजाभारि हानिन्हाहि। टुरोस पुरता आनेमाने खुअ्पालि चिजाहाज रोकिन्हालाउ केलाइ बुङ खुअ्न्हाहि। 4कालाउ इन्ता हिका प्रभुको चात्यागेलाइहेङ दुसुलि हानिन्हाहि रो एअ् आथारथिकापा ओबालाइदोफाङ हिन्हाहि। पुनित हाङसासो आगुवाइ निङतेङ ओबालाइ पावलहेङ यरुसलेम मान्हेलि दोअ्हि। 5कालाउ एअ् आथार झोको हिकान्हुअ्सो केलाइ ओबालाइदोफा बेदाङगि र्हुतेङ हानिन्हाहि। इन्ताको प्रभुता खान्धुर पाका झाराङ दादाओने, बाइओने रो जामालाइसुदाङ केलाइहेङ पुरको बाहारथिकापाङ सिरपुलि लोहि। केलाइ झाराङ जाहादिको काम्बेता तिर्हो थोतेङ पारथाना पान्हाहि। 6इङकोन्हुअ्सो केलाइ बिदाबारि जेङतेङ चिजाहाजता धोलन्हाहि रो ओबालाइचाहिँ ताइको साअ्भारि घुरिहि।
7टुरोस पुरसो केलाइ टोलेमाइस पुरता थुकातेङ चिजाहाजसो खुअ्न्हाहि। केलाइ इन्ता हिका प्रभुको खान्धुर पाका दादाओनेगेलाइहेङ दुसुलि हानिन्हाहि रो एअ्नि एम्बालाइदोफाङ हिन्हाहि। 8जुम्निदिना इन्तासो बिदा जेङतेङ केलाइ काइसरिया पुरता थुकान्हाहि। इन्ता केलाइ रेम्काबानाल पारचार पाका फिलिपको साअ्ता हिन्हाहि। फिलिपचाहिँ साल्तेङ दिङगिल्कालाइहेङ सेवा पालिभाअ्सिङ साल्तेङ दिङगिल्का न्हिअ्मिता एअ्मि हिघाखे।#साल्तेङ दिङगिल्का ६:५; ८:५ 9वाको द्यामि बिहु माजेङका चामिन्दिगेलाइ हिघाखे। एम्बालाइकोता आगमबानि धुइलि बर हिघाहि।
10केलाइ आसा दिना फिलिपको साअ्ता हिलाउ यहुदिया माउजासो आगाबस मिङ हिका एअ्मि परमेस्वर पाहासो धुइका केलाइकोता लोहि।#साल्तेङ दिङगिल्का ११:२८ 11वा पावलको तेपाना चुमतेङ ताइको खुर रो खोकोइ धेउतेङ दोअ्हि, “पुनित हाङसा एसापा दोअ्खे, यरुसलेम हानिनु यहुदिगेलाइ इदोइ तेपानाको धनिहेङ एसाङपातेङ धेवावा रो बोजात्यागेलाइको खुरता जिम्मा प्यावा।” 12इदोइ काथा हिङतेङ केलाइ रो इन्ता हिका झाराङ द्याङ पावलहेङ यरुसलेम मान्हे दोअ्तेङ दोअ्हि। 13कालाउबुङ पावल दोअ्हि, “नेलाइ हाइपालि खारतेङ काङको मन तु:पापिसुखेना? का यरुसलेमता धेउन्हालि खिनिङ माको, कालाउबुङ प्रभु इसुको भाअ्सिङ सिलि बुङ त्यार हिघा।” 14पावलहेङ रोकिलि मादोलाउ केलाइ “प्रभुको इछा पुरा ज्याको” दोअ्तेङ सिपापा हिन्हाहि।
15इङकोन्हुअ्सो केलाइ ताइको आनेमानेगेलाइ त्यार पातेङ यरुसलेमभारि दामा लाअ्न्हाहि। 16काइसरियाको प्रभुता खान्धुर पाका आधे दादाओनेगेलाइ बुङ केलाइदोफाङ लोहि। एम्बालाइ केलाइहेङ साइप्रस टापुसो लोतेङहिका प्रभुको पुरना खान्धुरि मनासोनको साअ्ता बासा हिलि सिरपुहि।
पावल याकुबहेङ दुसुका
17केलाइ यरुसलेमता थुकालाउ इन्ताको मन्डलिको दादाओनेगेलाइ लेङचातेङ केलाइको स्वागत पाहि। 18जुम्निदिना पावल केलाइदोफा याकुबकोता हानिहि। इन्ता मन्डलिको झाराङ एल्डरगेलाइ जोम्तेङ हिघाखे। 19पावाल एम्बालाइहेङ दुसुहि रो वाको पाका गोताङ कामसो बोजात्याको माझाता परमेस्वर हिसिकाहिसिका कामगेलाइ पाहि, इङको गोताङ दोअ्पिहि। 20पावलको दोअ्का हिङतेङ ओबालाइ परमेस्वरको मिङ तोल्हेहि। इङकोन्हुअ्सो ओबालाइ पावलहेङ दोअ्हि, “इता बुङ हाजार यहुदिगेलाइ प्रभुता खान्धुरपातेङ मोसाको पिका न्यामहेङ एलाथिकापा बुङ मानिदोङखे। 21एला ‘मोसाको न्याम मानिलिमागोयाङ कालाउ जामालाइको खाताना पालि मागोयाङ रो यहुदि चलनता चलिलिमागोयाङ’ दोअ्तेङ बोजात्याको मुलुकता हिका गोताङ यहुदिगेलाइहेङ ना धिरपादोङखेना दोअ्का काथा ओबालाइ हिङका हि। 22एन्सानु एला केलाइ हाइ पाङ? एला पाक्का बुङ ना इता लोका हिना दोअ्तेङ एम्बालाइ हिनावा। 23इदोइभाअ्सिङ केलाइ जेदोङ दोअ्न्हाखे इङकोङ पा, इता एला केलाइदोफा म्हितुपाङ हितेङ सुदो जेङलि भाकेका द्यामि द्याङ केलाइदोफा हि।#गान्देका ६:१३-२१ 24एम्बालाइको भाकेका पहर दोहोइ, एला ना एम्बालाइहेङ चुमतेङ थानता हानितेङ सुदो जेङका कामता भाग र्हु। खारचागेलाइचाहिँ ना तिरिपि रो एम्बालाइको पुसिङ सिअ्लि लागाइ। एसापा ना न्याम मानिका तिङतेङ झाराङ नासेहेङ लागाइका दुस जातिङको माको दोअ्तेङ ग्यावा। 25कालाउबुङ खान्धुर पाका बोजात्यागेलाइहेङ चाहिँ ‘मुरतिहेङ चार्हाइका चिज, हिति, निरघा एम्तेङ सेअ्का गुपुसको बिहा रो कासबिरिसो खेङन्हातेङ हिसु’ दोअ्का निधोपातेङ केलाइ चिथि लेखितेङ पिगिलन्हाहोइ।”#साल्तेङ दिङगिल्का १५:२९
26जुम्निदिना पावल इङको द्यामि द्याङगेलाइहेङ थानता चुमतेङ एम्बालाइदोफाङ म्हितुपाङ हितेङ ताइमिहेङ बुङ सुदो पाहि। इङकोन्हुअ्सो वा द्यामिको भाअ्सिङ सुद्याइको भाकल हेअ्लाउ पुरा ज्याङ रो भोक चार्हाइका दिना हेअ्लाउ दोअ्तेङ धामिहेङ दोअ्लि थानलिअ्ता दुल्हि।
पावल थानता रिमनिङचाका
27भाकेका एआथार जेङलि तोम्का हिघाहि कालाउ एसिया माउजासो लोका यहुदिगेलाइ पावलहेङ थानता तिङहि। एम्बालाइ द्याङगेलाइहेङ तोल्हेहि रो पावलहेङ रिम्तेङ 28र्हिकाइतेङ दोअ्लि तेङहि, “लोसु, लोसु, इस्राएलि दादाओनेगेलाइ, केलाइहेङ साघाइसु! इदोङ द्याङ जेसोकोसोङ हानितेङ केलाइ इस्राएलिगेलाइको खिलापता धुइका, न्याम मामानेलि रो थानता पुजा बुङ मापालि दोअ्तेङ धिरपाका इदोइ। इदोइ खिनिङ माको, या बोजात्याको द्याङगेलाइहेङ थानता दुल्पातेङ इदोइ पुनित थामेहेङ बुङ आखेका बान्हाइपिका हि।” 29एम्बालाइ एफिसससो लोका त्रोफिमसहेङ पावलदोफाङ पुरता तिङका हिघाखे रो पावल वासेहेङ थानलिअ्ताङ चुमाहि दोअ्तेङ फोम पाका हिघाखे।#साल्तेङ दिङगिल्का २०:४
30इदोइ काथासो पुरभारि खाइला बाइला जेङहि रो द्याङगेलाइ चारबितिङसो इन्ता लोहि। एम्बालाइ पावलहेङ हेरपुतेङ थानलिअ्तासो बाहार ओल्हिपाहि कालाउ थानको फिनु गिअ्पिहि।
31एम्बालाइ पावलहेङ सेअ्लि तोम्का हिघाखे। इङको पहरदोङ गोताङ यरुसलेम पुरता हुल्दाङगा जेङदोङखे दोअ्का बानाल रोमि पलटनको हाकिमको न्हातोङता थुकाहि। 32वा ओदोङघरि पलटन रो काप्तानगेलाइ चुमतेङ धाअ्तेङ द्याङगेलाइको जोम्काभारि हानिहि। रोमि पलटनको हाकिमहेङ लोका तिङतेङ द्याङगेलाइ पावलहेङ दान्हाइलि लाअ्हि। 33रोमि पलटनको हाकिम पावलहेङ रिम्हि रो न्हेलोङ झिन्झिरिहोइ धेउलि लागाइहि कालाउ द्याङगेलाइहेङ हिअ्हि, “इदोइ हेताको द्याङ? या हाइ पाहि?” 34कालाउ जोम्तेङ हिका द्याङगेलाइ आधिमि एअ् थोक आधिमि भेनेङ थोक दोअ्तेङ र्हिकाइहि। एसापा रोमि पलटनको हाकिम झागाराको खास काथा गिलिङ मादोहि। एन्साजेङलाउ वा पावलहेङ पलटन हिका थामेता चुमपुलि हुकुम पिहि। 35पलटनगेलाइ पावलहेङ चुमपुतेङ हानिलाउ द्याङको चेपेरेचेअ्का ओबालाइहेङ पिताइतेङ हानिहि। पाइर्होसो र्हुता हानिलि तोम्लाउ द्याङगेलाइ पावलहेङ सेअ्लि भोहि। एन्साजेङलाउ द्याङगेलाइसो बान्चिपालि पलटनगेलाइ वासेहेङ फुतेङ चुमपुहि। 36इङको पहरथिकापा बुङ “वासेहेङ सेअ्लि गोयाङ!” दोअ्तेङ र्हिकाइतेङ द्याङगेलाइ पावलहेङ पिताइदोङघाखे।
पावल ताइको बारेता दोअ्का
37ब्यारेकलिअ्ता दुल्लि तोमलाउ पावल रोमि पलटनको हाकिमहेङ ग्रिक राउता दोअ्हि, “का नाङकोदोफा एलोङ बिम्ति पालि द्वाङका बे?” पलटनको हाकिम दोअ्हि, “ना ग्रिक राउ बुङ गिका हिना? 38हाइ ना इङकोङ मिस्रि माको, आसा बाअ्सार लाम्फा जाइ उल्का माचाइका द्याहाजार डाकुगेलाइहेङ झारता चुमपुका हिघाहि माको?” 39पावल दोअ्हि, “माको, काते किलिकिया माउजाको टारसस पुरता जोलोम जेङका यहुदि हिघा। का इङकोङ मिङ चलिका पुरको एअ्मि नागरिक हिघा। दाया पातेङ कासेहेङ इदोइ द्याङगेलाइको आगाता एलोङ काथा धुइलि पि।” 40रोमि पलटनको हाकिम हुकुम पिहि कालाउ पावल पाइर्होता जाअ्तेङ खुरको टिप्निहोइ द्याङगेलाइहेङ सिपापा हिलि दोअ्हि। द्याङगेलाइ सिपापा हिकान्हुअ्सो पावल हिब्रु राउता धुइलि तेङहि,
Currently Selected:
साल्तेङ दिङगिल्का 21: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
