साल्तेङ दिङगिल्का 2
2
पुनित हाङसा लोका
1पेन्तिकोस दोअ्का यहुदि पारबा जेङलाउ प्रभु इसुता खान्धुर पाका झाराङ द्याङगेलाइ एथामे जोम्का हिघाखे।#लेबि २३:१५-२१; न्याम १६:९-११ 2इङको पहर एकासि आकाससो बारका भेरमा चलिहि रो इङको भेरमाको गालाहोइ एम्बालाइ हिका साअ् दोङ पोङघाहि। 3कालाउ मेको देतोङगेलाइभाइका एम्बालाइकोता तिङन्हाहि। इङको मेको देतोङगेलाइ आसिआसि जेङतेङ इन्ता हिका झाराङ द्याङगेलाइता दुल्का एम्बालाइ तिङहि। 4कालाउ एम्बालाइ झाराङ पुनित हाङसाहोइ पोङघाहि रो पुनित हाङसाकोङ साघाउनिसो भेनेङ राउगेलाइता धुइलि तेङहि।
5इङको पहर यहुदिगेलाइ सुमिङको गोताङ सारभिसो लोतेङ यरुसलेमता हिघाखे। एम्बालाइ धरमाति हिघाखे रो परमेस्वरदोफा थिघाखे। 6कालाउ इदोइ जोग्रिका हिङतेङ चारपाहाङसो द्याङगेलाइ जोम्हि रो एम्बालाइ भारभुसाइहि। हाइपानु एम्बालाइ झाराङ ताताइको राउता धुइतेङहिका हिङहि। 7एम्बालाइ झाराङ भारभुसाइतेङ दोअ्लि तेङहि, “हाइ इदोइ धुइकालाइ झाराङ गालिलिगेलाइ माको कुनु? 8हेसापा एम्बालाइ झाराङ केलाइको ताइको आमाइराउता धुइका केलाइ हिङन्हाखे। 9केलाइ इता पारथिगेलाइ, मादिगेलाइ, एलामिगेलाइ रो मेसोपोटामियाको, यहुदियाको, कापाडोकियाको, पोन्टस रो एसियाता हिकालाइ हिन्हाहि। 10कालाउ फ्रिगिया, पामफिलिया, मिस्र रो कुरेनिता हिका लिबियाको हेथे माउजागेलाइ, रोमसो लोका यहुदि रो यहुदि मत मानिकालाइ न्हेमिङ हिन्हाहि। 11क्रेटता हिकालाइ रो आरबिगेलाइ बुङ हिन्हाहि, कालाउ केलाइ ताताइको राउता परमेस्वरको बारका कामगेलाइको बचन एम्बालाइसो हिङदोङन्हाखे।”
12एम्बालाइ झाराङ भारभुसाइतेङ एअ्मि भेनेङहेङ एसा दोअ्लि तेङहि, “याको माने हाइ?” 13कालाउबुङ आधिमिचाहिँ लेङपितेङ दोअ्हि, “एबालाइ हेन्जाङ निघार आम्तेङ म्हाका हि।”
पत्रुसको बानाल
14कालाउबुङ पत्रुस तेएअ्मि साल्तेङ दिङगिल्कालाइ दोफाङ जाअ्तेङ बारका गालाता एम्बालाइहेङ दोअ्हि, “यहुदियाता रो यरुसलेमता हिका झाराङ दादाओनेगेलाइ, नेलाइ इदोइ काथा रेम्फा हिङसु। 15हाइदोनु नेलाइ दोअ्का भाइपाङ एबालाइ म्हाका मान्थु, हाइपानु एला र्हिमाको कुह्वा खिनिङ बजेदोङखे। 16कालाउबुङ योएल परमेस्वर पाहासो धुइकासो दोअ्का काथा इदोइ:
17‘न्हुअ् दिनागेलाइता इस्का ज्याङ दोअ्तेङ परमेस्वर दोअ्खे,
का झाराङ द्याङगेलाइर्हुता काङको हाङसा हुप्याङका,
नेलाइको चानगेलाइ रो नेलाइको चामिन्दिगेलाइ आगमबानि दोअ्तावा,
नेलाइको वाजालाइ दरसन तिनावा,
नेलाइको वाराङखाराङगेलाइ सोपोन्दा तिनावा।
18का ताइ कामत्या र्हुता इङको दिनाता काङको हाङसा हुप्याङका,
एम्बालाइ परमेस्वर पाहासो धुइका धुयावा।
19र्हुता आकासता का भारभुसाइका काम
रो लेता सुमिङता चिनोगेलाइ तिङपावा,
जिसिकाङ: हिति, मे रो दुहाँको बादेल तिनावा।
20परमप्रभुको बारका पारतापको दिना लोका लाम्फा
बेला कितिकितिका रो तालि हितिभाइका इका जेनावा।
21कालाउ परमप्रभुको मिङ र्हुकावा,
इङको बानच्यावा।’#योएल २:२८-३२
22“इस्राएलिको द्याङगेलाइ, इदोइ काथा हिङसु, नासरतको इसु इस्का द्याङ हिघाहि, जाइहेङ परमेस्वर सरबङ हिका कामगेलाइ, भारभुसाइका कामगेलाइ रो चिनोगेलाइसो नेलाइको आगाता साबित पाहि। 23परमेस्वर निधो पाका उपाइआन्सार रिमनिङचाका इसुहेङ दुरजन द्याङगेलाइको खुरसो नेलाइ कुरुसता टाङगाइतेङ सेअ्सुन्हा।#मत्ति २७:३५; मरकुस १५:२४; लुका २३:३३; युहन्ना १९:१८
24“कालाउबुङ परमेस्वर वासेहेङ सिकासो सिन्हुपाहि। हाइदोनु सिका वासेहेङ गोर्हाइलि मादोहि।#मत्ति २८:५-६; मरकुस १६:६; लुका २४:५ 25राजा दाउद बुङ इसुको बारेता एसा दोअ्का हिघाखे:
‘का प्रभुहेङ दिनाङ काङकोङ आगाता तिङखा,
वा कादोफाङ हिखे, एन्साङ का माथिखा।
26इदोइभाअ्सिङ काङको कोन्धाङ लेङचाखे
रो काङको देतोङ बाखिन्काको ले लेखे।
काङको जिउ बुङ आसता सिन्हुतावा।
27हाइपानु ना कासेहेङ तोमता मालाअ्ध्याना,
ना ताइको पुनित द्याङहेङ सिलि रो जिउ आइलि माप्याना।
28ना कासेहेङ जिबनको दामा तिङपाका हिन्हा।’
का नाङकोदोफा हितेङ ओसाभारापाङ लेङचाङका।#ले १६:८-११
29“काङको दादाओनेगेलाइ, केलाइको खाल दाउदको बारेता का निधोपातेङ दोअ्लि द्वाङका, वा सिहि रो लिअ्न्हाहि, कालाउ नानिको दिनाथिकापा वाको तोम हिदोङ हि। 30दाउद एअ्मि परमेस्वर पाहासो धुइका हिनाङसिङ वा गिघाखे, परमेस्वर केरा चाका हिघाहि वाकोङ खालसो वाको गादिता एअ्मिहेङ योम्पावा।#ले १३२:११; २ सामुएल ७:१२-१३ 31लाम्फासोङ इदोइ तिङतेङ वा ख्रिस्टको सितेङ ल्होकाको बारेता दोअ्हि:
‘वा ना पातालता लाअ्धिन्हाहि,
ना वाको जिउदोङ आइहि।’
32“इदोङ इसु ख्रिस्टहेङ परमेस्वर सिकासो सिन्हुपाहि। इदोइ काथाको केलाइ झाराङ दासि हिनाहि। 33इदोङभाअ्सिङ परमेस्वर आबा इसुहेङ तोल्हेतेङ ताइको दाम्पाहा योम्पाहि रो ताइको केरा आन्सार वासेहेङ पुनित हाङसा पिहि। इङकोङ पुनित हाङसा प्रभु इसु एला केलाइहेङ पिका हि, जेदोङ काथा नेलाइ एला हिङतेङ रो तिङतेङ हिसुखेना। 34हाइपानु दाउद ते स्वरगता माताङहि, कालाउबुङ वा ताइमिङ दोअ्खे:
‘परमप्रभु काङको प्रभुहेङ दोअ्हि,
ना काङको दाम्पाहा योम।
35जेलाउथिकापा नाङको दुस्मनहेङ
नाङको खोकोइ ताअ्का माबान्हायाङका।’#ले ११०:१
36“इङकोङभाअ्सिङ इस्राएलको झाराङ द्याङगेलाइ इदोइ काथा ग्याको इसु, जाइहेङ नेलाइ कुरुसता टाङगाइसुन्हा, परमेस्वर वासेहेङ प्रभु रो छुटकारा पिका ख्रिस्ट बान्हाइहि।”
37इदोइ काथा हिङतेङ एम्बालाइको कोन्धाङ कानाङकाना जेङहि। कालाउ पत्रुस रो बो साल्तेङ दिङगिल्कालाइहेङ एम्बालाइ हिअ्हि, “ओइ दादाओनेगेलाइ, केलाइ हाइपालि?” 38पत्रुस एम्बालाइहेङ दोअ्हि, “पास्ताइसु रो नेलाइको पाप माफको भाअ्सिङ इसु ख्रिस्टको मिङता नेलाइ झाराङ चिभुअ्लि र्हुसु, कालाउ नेलाइ पुनित हाङसाको बर निङस्वाना। 39हाइपानु इदोइ केराचाहिँ नेलाइ, नेलाइको चानचामिन्दिको भाअ्सिङ रो दुरे दुरेता हिका झाराङको भाअ्सिङ, जाइजाइहेहेङ केलाइको प्रभु काइखे।”
40पत्रुस हेन्जाङ बो काथागेलाइसो एम्बालाइहेङ दासि पिहि रो एसा दोअ्तेङ आरति पिहि, “इदोइ दुरजन खालसो नेलाइ ताइमिङहेङ सिन्हुपासु।” 41कालाउ जाइजाइ पत्रुसको काथा साअ्हि एम्बालाइ चिभुअ्लि र्हुहि। इङकोङ दिना चिभुअ्लि र्हुकालाइ सुमहाजार झोको थपिन्हाहि। 42एम्बालाइ साल्तेङ दिङगिल्कालाइको बिद्या, सङगति, तोले पेङलि रो पारथानाता एअ् मन जेङतेङ लागितेङहिघाखे।
खान्धुरिगेलाइको सङगति
43साल्तेङ दिङगिल्कालाइ हेन्जाङ सरबङ हिका कामगेलाइ पातेङ चिन्होगेलाइ तिङपाघाहि। एन्साजेङलाउ द्याङगेलाइ परमेस्वरहेङ थिलि तेङहि। 44खान्धुर पाकालाइ झोको झाराङ एथानेङ हिघाखे। एम्बालाइको गोताङ आनेमानेगेलाइ माझाको जेङघाखे।#साल्तेङ दिङगिल्का ४:३२-३५ 45एम्बालाइ ताइको टाका काउरि मालमाता पिअ्तेङ गोइकालाइहेङ बाख्राइपिघाखे। 46एम्बालाइ एअ् मनको जेङतेङ थानता जोम्तेङ सङगति पाघाखे रो साअ्साअ्ता तोले पेङघाखे। एम्बालाइ लेङचातेङ पुनित कोन्धाङसो मिलितेङ प्रभुभतेर चाघाखे। 47एम्बालाइ दिनाङ परमेस्वरहेङ बाखिन्घाखे। बो द्याङगेलाइ बुङ एम्बालाइहेङ मोन्दाताघाखे। छुटकारा निङकालाइको साङख्या एम्बालाइको हुलता प्रभु दिनाङ बार्हेपापिहि।
Currently Selected:
साल्तेङ दिङगिल्का 2: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
