साल्तेङ दिङगिल्का 14
14
पावल रो बारनाबास आइकोनियनता
1आइकोनियनता बुङ पावल रो बारनाबास एदोफाङ कचहरिसाअ्ता हानिहि। एम्बालाइ कचहरिसाअ्ता दुल्तेङ धुइलाउ इन्ता हिका हेन्जाङ यहुदि रो बोजात्याको द्याङगेलाइ खान्धुर पाहि। 2कालाउबुङ खान्धुर मापाका यहुदिगेलाइ चाहिँ बोजात्यागेलाइहेङ तोल्हेतेङ दादाओनेगेलाइको खिलाप ओबालाइको मन खाका बान्हाइपिहि। 3एन्साजेङलाउ बुङ पावल रो बारनाबास हेन्जाङ दिनाथिकापा इन्ताङ हि। एम्बालाइ माथिसिङ प्रभुको बारेता धुइहि। प्रभु एम्बालाइको खुरसो चिनोगेलाइ रो सरबङ हिका कामगेलाइ पापातेङ ताइको निगाहाको बचनको दासि पिहि। 4कालाउबुङ पुरको द्याङगेलाइ न्हे हुलता बाखाराइन्हाहि रो आधिमि यहुदिगेलाइभारि रो आधिमि साल्तेङ दिङगिल्कालाइभारि खेङन्हाहि। 5बोजात्याको रो यहुदिगेलाइ ओबालाइको हाकिमगेलाइदोफा मिलितेङ पावल रो बारनाबासहेङ सान्ताइका रो उन्ठुइ तोलि बल पाहि। 6पावल रो बारनाबास इदोइ काथा गितेङ खाअ्तेङ लुकोनिया माउजाता हिका लुस्त्रा रो डरबि पुरता हानिहि। 7इन्ता बुङ एम्बालाइ रेम्काबानाल पारचार पातेङ दोङ हि।
लुस्त्रा रो डरबिता
8लुस्त्रा पुरता एलोङ नेङगारा द्याङ हिघाहि। इङको जोलोमसोङ कुज्या जेङनासिङ हेअ्लाउ तेलि दोका मान्थुघाहि। 9पावल धुइका इङको हिङदोङघाहि। पावल बुङ वाको रुपता रेम्फा खाङहि। इङको द्याङ “का बुङ एल्लि द्वाङका” दोअ्तेङ खान्धुर पाखे दोअ्का पावल गिहि। 10पावल बारका गालाहोइ र्हिकाइतेङ दोअ्हि, “नाङको खोकोइको आरता सोझा जाअ्।” कालाउ इङको जुरुक्पा ल्होहि रो तेलि तेङहि।
11जेलाउ पावलको पाका इदोइ काम तिङहि, कालाउ एम्बालाइ लुकोनियाको राउता बारका गालाता एसा दोअ्हि, “दिरगेलाइ द्याङको रुपता केलाइकोता खुअ्तेङ लोहि।” 12एम्बालाइ बारनाबासहेङ जिउस दिर रो पावलहेङ हरमेस दिर दोअ्लि तेङहि, हाइपानु वाचाहिँ मुल धुइका हिघाखे।#१४:१२ जिउस ग्रिकगेलाइको मुल दिर रो हर्मेसचाहिँ बानाल चुमाका दोअ्घाखे। 13पुरको आगाभारि हिका जिउसको थानता धामि मुल फिनुगेलाइता पियागेलाइ रो ल्हेअ्को हारगेलाइ चुमातेङ इन्ताको द्याङगेलाइदोफा मिलितेङ भोक पिलि इछा पाहि।
14कालाउबुङ जेलाउ पावल रो बारनाबास इदोइ काथा हिङहि, कालाउ एम्बालाइ ताइको धाबा थेअ्तेङ एसा दोअ्तेङ र्हिकाइतेङ द्याङगेलाइको माझाता धाअ्तेङ हानिहि रो दोअ्हि, 15“माको, नेलाइ हाइपालि इस्का काम पासुखेना? केलाइ बुङ ते नेलाइभाइकाङ द्याङगेलाइ। नेलाइहेङ इदोइ बेकारको काथागेलाइसो सिन्हुका परमेस्वरभारि घुरिपालि रेम्काबानाल हिम्पान्हाखे। जेदोङ परमेस्वर स्वरग, सुमिङ, जाहादि रो इन्ता हिका गोताङ चिज सिरजाइहि।#दामालाअ्का २०:११; ले १४६:६ 16वा लाम्फा सिलिदोका खालता गोताङ जात्यागेलाइहेङ ताताइको रितबमोजिम पालि पिहि। 17वा हेअ्लाउ बुङ रेम्का रो हितको कामगेलाइ पालि लाअ्नाङ मान्थु। वा आकाससो वाइ लोपापितेङ ठिक पहरता उब्जनि पापिखे। हेन्जाङ चाकाचिज जुराइपितेङ द्याङगेलाइको कोन्धाङहेङ लेङचाकाहोइ पोङघापापिखे। एसापा परमेस्वरको कामगेलाइहोइ दोङ वाको दासि पिखे।” 18इदोइ काथा दोअ्तेङ पावल रो बारनाबास ताइमिगेलाइहेङ पिलि भोका भोग हेन्जाङ मुस्किलसो इङको द्याङगेलाइसो रोकिलि दोहि।
19कालाउबुङ पिसिदिया माउजाको एन्टिओखिया रो आइकोनियनसो आधे यहुदिगेलाइ इन्ता लोहि। एम्बालाइ द्याङको चेअ्सुहेङ उल्काइतेङ पावलहेङ उन्ठुइ तोहि रो सिहोइ वाला दोअ्तेङ वासेहेङ हेरपुतेङ पुरसो बाहार थालगिल्हि। 20कालाउबुङ जेलाउ चात्यागेलाइ पावलको कोरबितिङ जोम्लाउ वा ल्होहि रो पुरभारि दुल्हि। जुम्निदिना बारनाबासदोफा ओल्हितेङ डरबिता हानिहि।
पावल रो बारनाबास सिरियाको एन्टिओखियाता घुरिका
21पावल रो बारनाबास डरबि पुरता रेम्काबानाल हिम्पातेङ हेन्जा चात्या बान्हाइहि। एम्बालाइ लुस्त्रा, आइकोनियन रो एन्टिओखियाता घुरिहि। 22एम्बालाइ चात्यागेलाइको हाङसाहेङ बोल्याका बान्हाइतेङ ओबालाइहेङ खान्धुरता हितेङहिलि आरति पिहि। हेन्जाङ पिर सहितेङ केलाइ परमेस्वरको सारभिता दुल्लि गोयाङ दोअ्तेङ ओबालाइहेङ दोअ्हि। 23जेलाउ पावल रो बारनाबास ओबालाइको गोताङ मन्डलिता एल्डरगेलाइ साल्हि, कालाउ पारथाना रो म्हितुपाङ हितेङ ताइमिको खान्धुर पाका प्रभुको जिम्माता ओबालाइहेङ जिम्मापिहि।
24इङकोन्हुअ्सो पावल रो बारनाबास पिसिदियासो पामफिलियाता लोहि। 25परगाता बचन पारचार पातेङ एम्बालाइ आटालियाता हानिहि। 26कालाउ इन्तासो एम्बालाइ चिजाहाजता धोल्तेङ एन्टिओखियाता हानिहि। जेता एम्बालाइ पोङघापाका कामको भाअ्सिङ परमेस्वरको निगाहाता एम्बालाइहेङ पिका हिघाहि।
27जेलाउ एम्बालाइ एन्टिओखियाता थुकालिलोहि, कालाउ मन्डलिहेङ जोम्पाहि। कालाउ परमेस्वर एम्बालाइदोसा पाका गोताङ कामको बारेता दोअ्हि रो हेसापा वा बोजात्यागेलाइको भाअ्सिङ खान्धुरको फिनु हेपिहि इङको हिङपाहि। 28कालाउ एम्बालाइ इन्ता चात्यागेलाइदोफा हेन्जाङ दिना हि।
Currently Selected:
साल्तेङ दिङगिल्का 14: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
