रोमी 2
2
1लौ उया पुःचोङ् हौचोङ्य “ओउः मान्तालम् पेमालो” त दाय्ह्ती नीङ्इ ओउःमयःकायः ल्हुङ्हाङः गाल्तुम्ती नोःतेःनै यादो एत हायःओ त खेःया नीङ्इ लयःकायः गाल्तुम्तीतेः नोःनाःइसी दोह् हायःती दाय्ह्सा नीङ्इमा ओउः मान्तालो लेखालेः रेव्ओ काम्लम् जाङ्ह्तेःनानी। 2ओउः रेव्ओ काम् जाङ्ह्ओलम्कायः परमेस्वर्इ न्युम्ह्ताक्नाःथास आने ओउःत न्युम्ह्ताक्ओपाय् दोङ् पेलेःनाः त तय्ह्नाःतय्ह्नी। 3दोह् दोह् रेव्ओ काम्लम् नीङ्इ अरुकायः गाल्तुम्ती तोतेःनानी ओउः काम्लम्पाय् नीङ्इमा जाङ्ह्तेःनानी ओउःत झ्यान्ते परमेस्वर्इ बयःसा न्युम्ह्ताक्ओसै गत हायःती बेत्तेःचै। 4परमेस्वर्कोः काङ्ती जाङ्ह्ओ गलमा सावःमाःत योनःती योओपाय् “आह्रे लेःआः” ततेः ताःतेःनै यादो। ओउःकोः योनःती योओपाय् आह्रेलेः खेःल बा। नीङ्कायःपाय् “ङाकःताङ् ल्हुङ् द्यान्ह्ती वाङ्पै” त दाय्ह्ती परमेस्वर्इ आन ज्याङःतोकायःलेः योनःती योती ल्युङ्ह्तेःनै एत चीःतेःनानी र। 5चीःसापाय् चीःतेःनीतो नीङ् ल्हुङ् चाक्तो स्याव्ती ल्हुङ् द्यान्ह्सा ग्यामाःत झ्यान्ते परमेस्वर्इ तय्छनःती योसा दीन्हाङःपाय् नीङ्इ न्हाङ्तोलेः न्युम्ह्तेःनानी। ओउः दीन्हाङःपाय् परमेस्वर्इ जुगाङ् पेतो हायःओ छ्यानःती 6मान्तालम्कायः लःलयः जोक्कायः ओउःमयःकोः काम् जाङ्ह्झ्याङ्कोः बयःलेःनौ। 7सुसुखेइ गलकायःमा पेओ काम्लेः जाङ्ह्धै लयःकायः पेतोमा ताङ्ह्तो स्याव्साकायःमा गलमा द्योक्मालो जीङःकायःमा बोङःनानी ओउःमयःकायःलेः परमेस्वर्इ गलमा द्योक्मालो जीङः बयःआनाःथास। 8सुसु मान्तालम्खेइ लयःकोः ल्हुङ्हाङः झाक्ओ कुरा ह बोङःती दोङ् पेओ काम् ग्यामाःत रेव्ओ काम्लम् जाङ्ह्धै मुनै ओउःमयःकायः परमेस्वर्इ ल्हुङ् मल्ह्ती न्युम्ह्ताक्नाःथास। 9सबै रेव्तो जाङ्ह्ओलम्खेइ लीह्तो स्याव्ती न्युम्ह्नानी। ङ्हापाय् यहुदीलम् लोने यहुदी खेःमालोलम् सबैइ लीह्तो स्याव्ती न्युम्ह्नानी। 10सबै पेओ जाङ्ह्ओलम्खेकायः ङ्हापाय् यहुदीलम्कायः लोने यहुदी खेःमालोलम्कायः परमेस्वर्इ पेतो ताङ्ह्तो स्याव्ताक्ती आन ल्हुङ् धोमाय्ताक्नाःथास। 11दोह् हायःती दाय्ह्सा सबैकायःपाय् यहुदीलम्कायःमा यहुदी खेःमालोलम्कायःमा परमेस्वर्इ यातैज्योःलेः घार्ती योती जाङ्ह्नाःथास।
12यहुदी खेःमालोलम्लो लेखालेः सुसुखेइ परमेस्वर्इ बयःओ ऐन् चीःमाःत रेव्ओ काम् जाङ्ह्नानी ओउःपाय् ऐन् चीःमाःत सीती वाय्नै। सुसुखेइ यहुदीलम्लो लेखालेः ऐन् चीःती रेव्ओ काम् जाङ्ह्नानी ओउःकायःपाय् ऐन्कोः कुरा पेतोलेः जाङ्ह्ओया जाङ्ह्मालोया त तय्छनःती योनाःथास। 13ऐन्कोः कुरा सायःती ह मान्तापाय् परमेस्वर्कोः मीक्हाङः पेतो स्याव्सा खाय्नीली ऐन्कोः कुरा सायःती जुगाङ् ग्याती जाङ्ह्आक्तीको ह मान्ता पेतो स्याव्नै। 14यहुदी खेःमालोलम्इ ओउः ऐन्पाय् चीःनीली। ओउः ऐन्लेः चीःसापाय् चीःनीली गल खेःयाकायःमा ओउः ऐन्कोः कुरालम् ओउःमयःइ लयः झाक्ती जाङ्ह्नानी ओउः बेलाहाङः ओउःमयःइ ऐन् चीःओ मान्तालो लेखा मुनै। 15ओउःत झ्यान्ते ओउः ऐन्कोः कुरापाय् ओउःमयःकोः ल्हुङ्हाङः मुलेःनाः त सबैकायः छ्यानःओ लेःआः। फेरी ओउःमयःकोः ल्हुङ्इ “लौ नाङ्इ इत हायःओ स्याव्ल ओउःत हायःओ स्याव्ओ लेःआः” त गानाक्ती तोनाःथास। 16“लौ परमेस्वर्इ मान्तालम्कोः ल्हुङ्तुक् तय्छनःती योसा दीन्हाङः ओउःतलेः स्याव्नाः” त दाय्ह्ती ङाइ परमेस्वर्कोः पेओ नोःराय् थोल्ह्ती तोलेःनाङः।
17लौ नीङ्खेपाय् “ङी मान्तालम्पाय् यहुदीलेः खेःनाङी” ततेः तोतेःनाःस। “ङाइ परमेस्वर्कायः तय्ह्लेःनाङः ओउःकोः ऐन् जाङ्ह्ती पेतोलेः स्याव्नाङः” तमा दाय्ह्तीतेः ताःतेःनाःस। 18परमेस्वर्कोः ऐन् तय्ह्ती झ्यान्ते “इत हायःसाखे पेनाः ओउःत हायःसाखे पेल इत हायःसापाय् परमेस्वर्कायः म्रोताक्सा खाय्नाङः” त ङाःती तोतेःनाःस। 19“लौ परमेस्वर्कोः ल्याम् च्यवःसा खाय्मालोलम्कायः स्यालःनाङःसु ओउः ल्हुङ् च्याक्ओलम्कायः ल्हुङ् थोङ्ताक्नाङःसु। 20परमेस्वर्कोः ऐन्पाय् दोःती झ्यान्ते ङाइ सबै दोङ् पेओ कुरा चीःलेःनाङः ओउःत खेःओ चीःमालोलम्कायःमा हौलम्कायःमा ङाइलेः स्यान्सा खाय्नाङः” त दाय्ह्तीमा ङाःती ताःतेःनाःस। 21लौ उया अरुकायः स्यान्तेःनौ त खेःया दोह् हायःतीतेः लयःकायः स्यान्तेःसल। अरुकायः “लौ कुःलाम्” ततेः गानाक्ती तोतेःनौ अरुकोः थोक्लम् नाङ्इलेः कुःतेःनौ यादो। 22“अरुकोः बुधीकुस् वाह्सामा एनःसामा स्याव्ल” तमा गानाक्ती तोतेःनौ नाङ्इमा ओउःतलेः रेव्तो हायःतेःनौ यादो। मुर्तीकायः पुजा जाङ्ह्सा अह्र्तेःनाः नाङ्इ द्यव्ताकोः मन्दीर्कोः पैसा जेःतेःनौ यादो। 23“परमेस्वर्कोः ऐन्पाय् पेतोलेः चीःनाङः” ततेः दाय्ह्ती तोझुङ्तेःनै ओउः ऐन्कोः कुरा जाङ्ह्सा ग्यामाःत झ्यान्ते परमेस्वर्कायः मीतो च्यवःतेःनौ यादो। 24एतलेः परमेस्वर्कोः आखरःहाङः मुनाः “लौ नीङ् यहुदीलम्इ एतलेः हायःतेःआकानी त झ्यान्ते यहुदी खेःमालोलम्इ परमेस्वर्कायः ताङ्ह्ताक्माःत ओउःकायः पेमालो तोनानी” त दाय्ह्ओ लेखती मुनाः। 25परमेस्वर्कोः ऐन्कोः कुरा नाङ्इ जाङ्ह्तेःनौ त खेःया “ङापाय् यहुदी मान्ता” त छ्यानःसाकायः यहुदीलम्इ जवओ पुन् तात्सापाय् स्याव्लेःनाः। खेःल नाङ्इ ओउः ऐन्कोः कुरापाय् जाङ्ह्तेःल त खेःया ओउःत जवओ आह्रे लेःआः नाङ् पुन् तात्मालो यहुदी खेःमालो मान्तालो लेखा मुतेःनाः। 26ओहाङःसैको पुन् तात्ओ जवमालो यहुदी खेःमालो मान्ताखेइ परमेस्वर्कोः ऐन्कोः कुरा जाङ्ह्नानी त खेःया ओउःपाय् परमेस्वर्कोः मीक्हाङः यहुदी मान्तालो लेखा मुनाः माःर। 27ओउः पुन् तात्ओ जवमालो ऐन् जाङ्ह्ओ मान्तालम्इ नीङ् यहुदीलम्कायः गाल्तुम्ती तोतेःनै दोह् हायःती दाय्ह्सा परमेस्वर्कोः ऐन्कोः कुरा कीताप्हाङः दोःआक्तीकोमा पुन् तात्ओ जवआक्तीकोमा ओउः ऐन्कोः कुरा जाङ्ह्तेःनीली। 28दोङ् यहुदी मान्ता स्याव्साकायः लयःकोः आङ्हाङःलेः जवसा पुन् तात्ओ काम् जाङ्ह्सा खेःल 29ल्हुङ्हाङः परमेस्वर्कोः कुरा ग्याती जाङ्ह्सा खेःतो। फेरी मान्ताकोः ल्हुङ् ग्याताक्साकायः परमेस्वर्कोः ग्वालामःइ जाङ्ह्सा खेःओ काम् लेःआः। कीताप्हाङः लेखओ ऐन्इ जाङ्ह्सा काम्पाय् खेःल। ओहाङःसैको परमेस्वर्कोः कुरा ग्याती जाङ्ह्ओ मान्ताकायः अरु मान्ताइ खेःल परमेस्वर्इलेः पेतो लुङ्ती तोनाःथै।
Currently Selected:
रोमी 2: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
