प्रेरीत् 19
19
1आपोलस् त तोओखे कोरीन्थहाङः मुतोक्हाङः पावुल्खे उत्तर्ताङ् मुओ जील्लाहाङः वाह्दा वाह्दा लोन्ते एफेसस् त तोओ सहर्ताङ् दाह्आ। एफेसस् सहर्ताङ् दाह्आक्तीको पावुल्इ यात्नीस् येसुकायः ङ्हाम्ओ मान्तालम्कायः क्रुस्आकान्। 2क्रुस्आक्तीको “लौ प्रभु येसुकायः ङ्हाम्आक्तीको नीङ् परमेस्वर्कोः ग्वालामः दोःतेःनैया दोःतेःइलीया” त पावुल्इ दाय्ह्ती व्हत्आथास “दोङ्सीलेः इ परमेस्वर्कोः ग्वालामःकोः कुरा ङीइ गलमा सायःङुसुलु” त दाय्ह्ती ओउःमयः त्याङ्आकाय्। 3ओउःत त्याङ्आक्तीको “नीङ्कायः उया दोह् दोह् बाप्तीस्मा जाङ्ह्तेःआकाय्” त दाय्ह्तीताङः पावुल्इ फेरी व्हत्आथास “ङीइपाय् युहनाइ बयःओ बाप्तीस्मा त्याक्आलाङःसु” त ओउःमयः त्याङ्आकाय्। 4“युहना वाङ्तोक्हाङःपाय् ‘रेव्ओ काम् फेती परमेस्वर्कः द्यान्ह्सा’ कुरा तोती ओउःइ बाप्तीस्मा बयःआथास। युहनाइमा ‘ङाकोः लोने यात्चाक् ङासै ताङ्ह्तो येसु त तोओ वाङ्आनाः। ओउः येसुइ तोओ कुरा ङ्हाम्ती सायःनु दा’ त दाय्ह्तीमा युहनाइ स्यान्ओ खेःतो” त दाय्ह्ती पावुल्इ तोआथास। 5ओहाङःसैको इ कुरा सायःआक्तीको ओउः मान्तालम्कायः पावुल्इ प्रभु येसुकोः मय्ङ् पेह्ती बाप्तीस्मा जाङ्ह्आथास। 6बाप्तीस्मा जाङ्ह्आक्तीको ओउःमयःकोः तालाङ्हाङः पावुल्इ लयःकोः क्रुत् झाम्ह्आकान्। क्रुत् झाम्ह्तोक्हाङः ओउः मान्तालम् परमेस्वर्कोः ग्वालामः दोःआकाय्। दोःआक्तीको ओउःमयः थे थे भासालम् नोःमाआकाय् परमेस्वर्इ छ्यानःओ कुरा तोमाआकानी। 7ओउः परमेस्वर्कोः ग्वालामः तोहा दोःओलम्पाय् बारजनच्युक् खेःइतो।
8ओहाङःसैको सुम् महीनाच्युक्कायः सन्चर्बार् सन्चर्बार् दीन्हाङः पावुल्इ यहुदीलम्कोः थनःओ कीम्हाङः पोक्ती येसुकोः कुरामा परमेस्वर्कोः राजीकोः कुरामा पेतो स्यान्ती सबै ओहाङःकोः मान्तालम्कायः होम्ताक्ती तोथासतो 9यात्नीस् यहुदीलम्इ अल्ह्माःत झ्यान्ते येसुकोः कुरा ङ्हाम्माःत ओउःकायः रेव्तो तोआकानी। ओउःत हायःआक्तीको ओउः रेव्तो नोःओलम्कःसै वेङ्ती पावुल्इपाय् तीरानुस् त तोओकोः इस्कुल् कीम्ताङ् आल्ती ओउः ङ्हाम्ओलम्कायः वानःती ओहाङः दीन्का दीन् येसुकोः कुरा नोःकाय्आकाय्। 10ओउःतलेः नीस् बर्सच्युक्कायः ओउः आखया देस्कोः सबै मान्तालम् यहुदीलम्इमा अरु जात्लम्इमा प्रभु येसुकोः कुरा सायःआकानी।
11ओहाङःसैको ओहाङः स्यान्ती मुतोक्हाङः पावुल्कायः परमेस्वर्इ आन थे ग्याङ्ह्राय् जाङ्ह्ताक्आथै। 12ओउः बेलाहाङः पावुल्कोः आङ्सै आलःओ रुमाल्लम्मा अरु नाय्लम्मा जीक्ओ मान्ताकःहाङः वानःती गम्आक्तीको ओउः जीक्ओ मान्ता सेलः स्याव्माआ अरुलम्कायः ङायःओ लान्लम् ल्हेस्ती वाय्ओमा खेःतो। 13ओहाङःसैको यात्नीस् तोमःती वाह्ओ यहुदीकोः पान्देलम्इमा प्रभु येसुकोः मय्ङ् पेह्ती लान्लम्कायः ल्हेस्सा बोङःआकानी। “ङीइ पावुल्इ तोती स्यान्ओ येसुकोः मय्ङ्लेः पेह्ती तोनेःनाङ्सु” त दाय्ह्ती तोती लान्लम्कायः ल्हेस्ताक्ती बोङःआकानी। 14इत हायःओलम्कुस् यात्चाक् स्केवा त तोओ ताङ्ह्ओ पुरोहीत्कोः सात्पुःचोङ् चोःलम्मा खेःइतो। 15ओउःमयःइ लान्कायः एतलेः दाय्ह्ती तोतोक्हाङः ओउः लान्पाय् “येसुकायः तय्ह्नाङः पावुल्खेकायः तय्ह्नाङः नीङ्खेपाय् सुखेलोकायः ङाइ तय्ह्ङल बा” त दाय्ह्ती त्याङ्आ। 16त्याङ्आक्तीको ओउः लान्इ ङायःओ मान्ताइ ओउः सात् पुःचोङ्कायः ज्युह्र्ती ओउःमयःकायः ओउःच्युक् जोक्तो घान्ती झ्यान्ते ओउः सात् पुःचोङ्पाय् कीम्सै ग्ल्युङ्ह्ती वयःती सोह्लेः क्रव्आकाय्। 17ओहाङःसैको इ कुरा सबै एफेसस् सहर्हाङः मुओ यहुदीलम्इमा अरु जात्लम्इमा सायःआक्तीको ओउःमयः आन रैआकाय्। ओउः सहर्हाङः येसुकायः आन झाह्ती लुङ्ती तोआकानी। 18ओहाङःसैको नाःतो मान्तालम् येसुकोः कुरा पेतो ङ्हाम्ती ओउःमयःइ ङ्हा जाङ्ह्ओ ब्रःओमा रेव्तो हायःओमा घोलाङ् वाङ्आकाय् “लौ ङीइमा एतलेः रेव्तो काम् जाङ्ह्आलाङःसु द्याह् ओउः रेव्ओ काम् ङीइ फेनाङःसु” त दाय्ह्ती ओउःमयःइ घोती तोआकानी।
19एत तोतोक्हाङः ओउः ङ्हा पान्दे काम् जाङ्ह्ओलम्इमा छेह्ओ काम् जाङ्ह्ओलम्इमा लयःकोः काम् जाङ्ह्सा कीताप्लम्मा झ्याओ चीस्लम्मा सबै म्हेःहाङः तय्क्ती वाय्आकानी। ओउः म्हेःहाङः तय्क्ती वाय्ओ चीस्कोः मोल्लम् थेङ्ती पचास् हजार् चान्दी रुपीया खेःतो। 20एत हायःतीलेः न्हाङ्तोलेः नाःतो मान्तालम्इ प्रभु येसुकोः कुराकायः चीःमाआकानी ङ्हाम्माआकानी।
21ओहाङःसैको लोनेसै पावुल्पाय् “लौ मासीदोनीया आखया नीस् जील्लाताङ् ब्याह्ती वाह्आक्तीको ङा यरुसालेम्ताङ् आल्चाङः। यरुसालेम्ताङ् आल्आक्तीको ङा रोम् त तोओ रोमी देस्कोः सबैसै ताङ्ह्ओ सहर्कायः गत खेःयामा योलाङ् आल्सा खेःतो” त दाय्ह्ती पावुल् दाय्ह्आ। 22एत दाय्ह्आक्तीको तीमोथी एरास्तस् त तोओ ओउःकोः साथीनीस्खेकायः मासीदोनीयाताङ् ङ्हा ल्होक्आक्तीको पावुल्खे आखया जील्लाकोः एफेसस् सहर्हाङः मुधाङ्आ।
23ओहाङःसैको ओउःतोक् बेलाहाङः यात्नीस् मान्तालम् हुम्ती येसुकोः कुराकायः आन पेमालो नोःकाय्आकाय्। 24यात्चाक् देमेत्रीयस् त मय्ङ्ओ चान्दीकोः मुर्ती जाङ्ह्ओ मान्तालम्कायःमा अरु मुर्ती जाङ्ह्ओ मान्तालम्कायःमा हुन्द्यावःसाकायः गोत्ती हुम्ह्आथास। ओहाङःकोः मुर्ती जाङ्ह्ओलम् आर्तेमीस् त तोओ देबीकोः रुप् जाङ्ह्ती आन पैसा दोःआकाय्। 25ओउःत झ्यान्ते ओउःमयः हुम्आक्तीको “लौ साथीलम्य इ देबीकोः मुर्ती जाङ्ह्तीलेः ङीइ आन मुह्नाःतय्ही त नीङ्इ चीःतेःनानी। 26द्याह्पाय् दोह् दयःनाःतय्ही। इ पावुल् त तोओइ एफेसस्हाङः आले खेःल सबै इ देस्हाङःलेः ‘मान्ताइ लयः क्रुत्इ जाङ्ह्ओ द्यव्तालम्इमा देबीलम्इमा दोह् हायःसामा खाय्नीली’ त तोती स्यान्नौ ओउःइ तोओ कुरापाय् नाःतो मान्तालम्इ ङ्हाम्नानी इतलेः नीङ्इमा च्यवःती सायःती चीःतेःनानी बा। 27इहाङःकोः मान्तालम् द्यव्तालम्कायः झाह्ओ फेनानी त खेःया ङीकोः काम् भाङःती वाय्चाः फेरी ङीकोः ताङ्ह्ओ आर्तेमीस् देबीकायः लोन्ते मान्तालम्इ दोह्मा म्हर्इली। इ सबै ल्हाव्ह्दैबाङ्कोः मान्तालम्इ मनःओ देबीकायः एत फेती वाय्सा स्याव्नाः जुगु” त दाय्ह्ती देमेत्रीयस् त तोओइ ओउः हुम्ओ मान्तालम्कायः तोआथास। 28ओउःत तोओ सायःआक्तीको ओउः हुम्ओ मान्तालम् ल्हुङ् मल्ह्ती “ङीकोः एफेसस् सहर्कोः आर्तेमीस् देबी सबैसै ताङ्ह्तोलेः मुपाः” त दाय्ह्ती ओउःमयः सोतो गोःआकाय्। 29ओहाङःसैको ओउः सहर्हाङः ओउःमयः नाःतो हुम्काय्ती इःताङ् उःताङ् वाह्ती सोतो गोःती नाःतोलम् सहर्कोः सभा कीम्ताङ् दाह्आकाय्। सभा कीम्ताङ् आल्तोक् बेलाहाङः ओउः सहर्हाङः वाह्ओ मान्तालम्इपाय् पावुल्कुस् मासीदोनीया देस्सै वाङ्ओ गायुस्मा आरीस्तार्कस् त तोओनीस्कायःमा चुम्ती ओउः सभा कीम्ताङ् पोक्ती दाक्आथाच। 30ओउःत चीःआक्तीको सभाहाङः हुम्ओ मान्तालम्कःताङ् पावुल्मा तोलाङ् आल्सा म्हर्तो ओउः अरु ङ्हाम्ओ साथीलम्इ “खेःल है नाङ्कायः सात्तेःनाः आल्लाम्” त दाय्ह्ती ओउःकायः आल्सा ताक्थाल। 31फेरी यात्नीस् ओउः सहर्कोः ताङ्ह्ओ मान्तालम्हाङः पावुल्कोः साथीलम्मा खेःइतो ओउःमयःइमा “ओउः सभाहाङः हुम्ओ मान्तालम्कःताङ् पोक्तेःचाःनाः” त दाय्ह्ती कुरा ल्होक्आथै। 32ओहाङःसैको ओउः सभा कीम्हाङः हुम्ओ मान्तालम् आन ब्रःती “इ दोह्खेलो कुरा” त चीःमाःत आन गोःती क्योङ्ह्ती नोःकाय्आकाय्। 33-34ओउःमयः ब्रःती गोःती मुतोक्हाङः यात्चाक् सीकन्दर् त तोओकायः यहुदी मान्तालम्इ तोसाकायः चीङ्ताक्आथै। चीङ्आक्तीको यात्नीस् मान्तालम्इ “लौ एत नोःउ दा” त ओउःकायः तोआकानी। ओउःत झ्यान्ते सबै हुम्ओ मान्तालम्कायः सीकन्दर्इ ङैमाःत मुताक्ती लयःकायः तोसा बोङःउतो ओउः हुम्ओलम्इ “इपाय् यात्चाक् मुर्ती मानसा ग्यामालो यहुदी मान्ता लेःआः” त तय्ह्ती ओउःमयःइ न्हाङ्तोलेः ल्हुङ् मल्ह्तो स्याव्ती नीस् घन्ताच्युक्कायः “ङीकोः एफेसस् सहर्कोः आर्तेमीस् देबी सबैसै ताङ्ह्तो मुपाः” त ब्रक्तलेः सोतो गोःआकाय्।
35ओउःतलेः ओउःमयः आन गोःआकाय् ओहाङःसैको लोन्ते एफेसस् सहर्कोः ताङ्ह्ओ मान्ता वाङ्ती ओउःमयःकायः ङैमाःत मुताक्आथास। ओउःमयःकायः ङैमाःत मुताक्आक्तीको “अ नीङ् एफेसस् सहर्कोः मान्तालम्य ओउः फेल्बाङ्सै ग्लेःओ आर्तेमीस् माहादेबीकोः बाङ् ङीकोः एफेसस् सहर्कोः मन्दीर्हाङः गम्नाङःसु त सबै मान्तालम्इ चीःनानी। 36इ कुरा सुइमा चत्सा खाय्नीली ओउःत झ्यान्ते इतलेः ङैती ब्रःती वाह्सा परल। 37इ नीङ्इ वानःओ मान्तानीस्इ ङीकोः देबीकायः दोह्मा हायःथाल ओउःकोः थोक्लम् कुःथाल ओउःकायः दोह्मा पेमालो नोःथाल। 38लौ देमेत्रीयस्मा ओउःकोः साथीलम्इमा सुकायःमा मुत्ध जाङ्ह्सा बोङःनाःथास त खेःया ओउः कुरा सायःसा अदालात्हाङः आल्ती इ कुरा हाकीम्कःताङ् सायःताक्पानी। 39अरु कुराखेकायः ङीकोः दोङ् सभाहाङः हुम्ती वाङ्ओ मान्तालम्इ सायःसाकायः मुलेःनाः। 40तेन्लो लेखा गोःती वाह्ती हायःओ जुगाङ् स्याव्ल। नीङ्इ एत गोःती वाह्ओ त ङीकोः राजाइ सायःनौ त खेःया ङीकायः आन जान्चाःतय्ही। ओउःइ जान्नौ त खेःया ङीइ दोह्मा त्याङ्सा खाय्तय्ह्नीली” त दाय्ह्ती तोआथास। 41एत तोआक्तीको ओउः सहर्कोः ताङ्ह्ओ मान्ताइ सबैलम्कायः ल्होक्आथास।
Currently Selected:
प्रेरीत् 19: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
