२ कोरीन्थी 8
8
1लौ पुःचोङ् हौचोङ्य “ओउः मासीदोनीयाहाङः मुओ ङ्हाम्ओलम्कायः परमेस्वर्इ दोह् हायःआकान्” त दाय्ह्सा एत ङीइ द्याह् तोनेःनाङ्स। ओउःमयःकायः परमेस्वर्इ आन योनःओ ल्हुङ् बयःआथास 2ओउःत झ्यान्ते ओउःमयःइ आन लीह्सीःओ बेलाहाङः ल्हुङ् चोङाय्तोलेः ओउःमयःकोः नाःतो नाःमालोपाय् आन साय्क्ओ ल्हुङ्इ अरुकायः बयःआकानी। 3माः रैस ओउःमयः नाःतो नाःमालो मान्ता खेःइतो लयः झाक्ती लयः खाय्जम्च्युक् बयःआकानी ओउःसै न्हाङ्तोलेः बयःआकानी बा। 4ओउः यहुदीयाहाङः मुओ ङ्हाम्ओलम्कायः लव्ह्ती बयःसाकायः “लौ इ पेओ काम् ङीइमा जाङ्ह्पाङःसु” त दाय्ह्ती ङीकः आन तेआकाय्। 5ओउःमयःइपाय् ङीइ ताःसामा ताःमालोच्युक्कायः बयःआकानी। ङ्हापाय् परमेस्वर्कायः म्रोताक्साकायः आन ग्याती ओउः झाक्ओपाय् जाङ्ह्ती ङीइ तोओ कुरामा ग्याती सायःआकानी। 6ओउःत झ्यान्ते नीङ्कोः साय्क्तो बयःसा काम् दप्ताक्सा थेङा “लौ ओउःमयःकःहाङः नाङ्इ ङ्हा जाङ्ह्खयःओ पैसा त्याक्सा काम्पाय् द्याह् दप्ती जाङ्ह्उ दा” त दाय्ह्ती तीतस्कायः तोती नीङ्कःताङ् ल्होक्नेःआलाङ्सु। 7नीङ्इपाय् पेओ काम्लम् आनतेः जाङ्ह्तेःनानी आनतेः ङ्हाम्तेःनानी आनतेः तोसा खाय्तेःनानी आन व्हाय्तोतेः चीःतेःनानी। नीङ् आन लव्ह्सा ग्यातेःनै ङीकायःपाय् आनतेः राप्तेःनेःनाःताङी। ओउःत खेःओ “द्याह् इ राप्ती बयःसा काम्कायःमा साय्क्ओ ल्हुङ्इ आन बयःनु दा” त दाय्ह्ती झाक्तीलेः तोनेःनाङ्स।
8एत तोओपाय् गानाक्ती तोओलेः खेःल। ओउः अरु मान्तालम् गुच्युक् साय्क्तोलेः बयःसा ग्यानै त नीङ्कायः छ्यानःनेःआलाङ्स। ओहाङःसै नीङ्इमा अरुलम्कायः गुच्युक् राप्ती बयःतेःनानी त ङाइ योसालेः खाय्नाङः ओउःत हायःसाकायः ह इतलेः तोनेःआलाङ्स। 9ङीकोः प्रभु येसु ख्रीस्लेः आन योनःओ ल्हुङ् खेःतो त चीःतेःनानी। ओउःपाय् ङ्हालेः आन नाःतो नाःओ खेःतो। नाःसापाय् नाःओलेः खेःतो नीङ्कायः नाःतो नाःताक्साकायः येसुपाय् ह्र्यात् स्याव्ताक्आकास।
10लौ ङाइ इतलेः तोनेःनाङ्स नीङ्इ तेह् जाङ्ह्खयःओ काम् द्याह् दप्ती खाय्सा खेःतो ओउः काम् जाङ्ह्साकायः नीङ्इ अरुसै ङ्हा जाङ्ह्खयःतेःआकानी। माः रैस अरुसै ङ्हा जाङ्ह्सा ग्याओ खेःतेःइतो 11ओउःत खेःओ नीङ् ङ्हाकोः लेखालेः ग्याती द्याह्मा दप्ती जाङ्ह्चाक्नु। गुच्युक्तेः खाय्तेःनानी ओउःच्युक्लेः बयःचाक्नु। 12नीङ् ग्याओ त खेःया नीङ्इ गुच्युक्तेः बयःसा खाय्तेःनानी ओउःच्युक्लेः परमेस्वर्इ म्रोती त्याक्आनौ। ओउःसै नाःतो बयःसा परल। 13अरुलम् लव्ह्साकायः नीङ्कायः ङाइ अरुसै चाक्ओ काम् जाङ्ह्ताक्नेःनाङ्सल 14सबै घार्तोलेः जाङ्ह्ताक्सा बोङःनाङः। ओहाङःसैको न्हाङ्तोलेः नाःओ बेलाहाङः नीङ्इ ओउः राह्बाङ्लम्कायः बयःसा स्याव्नाः लोने नीङ्मा राह्तेःनै त खेःया ओउःमयःइ लयः नाःतो नाःओसै नीङ्कायः बयःसा स्याव्नाः। ओउःत हायःओ सबैमयःकायः थाःतोलेःतेः स्याव्तेःनै। 15इत हायःतीलेः “क्युती त्युम्ह्ओ मान्तामा जुगाङ् नाःतो दोःइली नाःतो नाःमालो मान्तामा राह्इली” त आखरःहाङः लेखती मुनाः।
16नीङ्कायः लव्ह्साकायः परमेस्वर्इ तीतस्कायः ङीलो लेखा आन गेओ ल्हुङ् बयःआथै ओउःत झ्यान्ते ङीइ परमेस्वर्कायः आन “च्युता” त तोनाङःसु। 17ओउःपाय् नीङ्कःताङ् आल्साकायः आन ग्याती मुनाः ङीइ तोओकायः झुङ्आले खेःल लयःलेः झाक्ती ग्याओ लेःआः। 18ओउःकुस् ङीइ यात्चाक् अरु ङ्हाम्ओ हौखेकायः ल्होक्नाङःसु। ओउःपाय् ख्रीस्कोः पेओ समचार् थोल्ह्ती तोओ काम् जाङ्ह्ओपाय् “पेओ लेःआः” त सबै अरु ङ्हाम्ओलम्इ तय्ह्नाःथै। 19सबै ङ्हाम्ओलम्इ ओउःकायः तय्ह्आकानी त झ्यान्ते अरुइ बयःसा चीस् त्याक्लाङ् ङीकुस् वाह्साकायः छीङ्ह्आकानी। एत हायःतीलेः ङीइ परमेस्वर्कायः ताङ्ह्ताक्ती नीङ्कायः लव्ह्ती बयःसा ग्यानाङी त नीङ् सबैकायः छ्यानःनेःनाङ्सु। 20ओउःमयःइ साय्क्ओ बयःओ चीस् त्याक्ओहाङः ङीइ पेतो हायःसा बोङःआलाङःसु। ओहाङःसै अरु सुइमा ङीकायः पेमालो गाल्तुम्ती नोःसा खाय्नीली। 21प्रभुकोः मीक्हाङः ह ङी पेतो हायःसा बोङःओ खेःङीली सबै मान्ताकोः मीक्हाङःमा ङी पेतो हायःसा बोङःनाङःसु। 22फेरी ओउःनीस्कुस् यात्चाक् अरु ङीकोः ङ्हाम्ओ हौमा ल्होक्आलाङःसु। ओउःपाय् काम् जाङ्ह्साकायः आन गेओ त नाःतो पेन्ह्हाङः च्यवःती चीःआलाङःसु। द्याह् नीङ्कोः कुरा चीःआक्तीको ओउःपाय् नीङ्कायः लव्ह्सा न्हाङ्तोलेः गेनाः। 23तीतस् त तोओपाय् नीङ्कायः लव्ह्साकायः ङाकुस् काम् जाङ्ह्ओ मान्ता लेःआः। ओउःकुस् वाह्ओलम्पाय् ङ्हाम्ओलम्कोः कुरा तोसाकायःमा ख्रीस्कायः ताङ्ह्ताक्साकायःमा ल्होक्ओ मान्ता लेःआः इ। 24ओउःत झ्यान्ते ओउःमयः नीङ्कःताङ् पैसा त्याक्लाङ् वाङ्तोक्हाङः नीङ्इ अरुकायः आनलेः राप्तेःनानी त ओउःमयःकायःमा सबै ङ्हाम्ओलम्कायःमा छ्यानःसाकायः साय्क्तोलेः बयःनु दा। फेरी ओउःत हायःतीमा नीङ्कायःपाय् “ओउःमयः जुगाङ् ल्हुङ् साय्क्ओ लेःआः इ” त ङीइ सबैकायः ङाःती तोओ कुरापाय् “दोङ् कुरा लेःआः” तमा द्याह् छ्यानःनु दा।
Currently Selected:
२ कोरीन्थी 8: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
