Jěnisis 19
19
1Ka injěl tě ibale ja pâ o Sâdam na kolo: ka Lât a diya o ubiyâ mua jâmbě j‘ ugomba mua Sâdam. Ka Lât a yěně bâ, ka mâ‐a ’muwa ka lata na bâ, ka mâ‐a balidě nyolo ’aju na boho bwaju o he.
2Ka mâ‐a vâ, na, Bapangiyi bamě, nandi ngakiyani, mbi hâhâlâkiděnd‘ inyěni, o ndabo ya uhayi muanyu, wa diyi bulu bwěhěpi, wa tuki beko beanyu, n‘ ubwa n‘ ubwa běngě o umwakeni, na ’la o njea ’nyu. Ka bâ‐ba vâ, na, Nyawě; ho ka diyate bulu bwěhěpi o uhěngě.
3Ka mâ‐a pinyilidě bâ nangudi mětě; ka bâ‐ba ’luwa o mâ‐a jadi, ka bâ‐ba ngiya o ndabo ’aju; ka mâ‐a hadě bâ isango, ka mâ‐a bekidě bâ pěmbě e ha ibě n‘ ilanda, ka bâ‐ba ja.
4Ndi, na bâ na tak‘ o nangiya, bamo ba mboka, bamo ba mboka tě Sâdam, ba lungaki ndabo sâta, n‘ utodu na uděmbě, bato běhěpi oviya hanganě jěhěpi,
5Ka bâ‐ba ndiya Lât, ka bâ‐ba vâ na ju, na, Bato ba ma viya o âvě‐o jadi na bulu těkabo ba l‘ ove? Pumakě hwě bâ, ho yowě bâ.
6Ka Lât a puma o ubiyâ o bâ‐ba jadi, ka mâ‐a diba jâmbě o mbuhw‘ ’aju,
7Ka mâ‐a vâ na bâ, na, Bana‐bina, mbi hâhâlâkiděnd‘ inyěni, na, o haki bobe nonaně.
8Umbwakiyateni, mbi ndi babajo babale ba ha yowěte momo; mbi pumaki ’nyi bâ, mbi hâhâlâkiděnd‘ inyěni, n‘ inyěni o ka haki bâni nyanga e jadi bwamu o mihâ manyu: nd‘ o hakeni bamo těkaba elombo; ikabojana ovaně nd‘ o bâ‐ba viyedi o ’dingihě ya unyuwa muamě.
9Ka bâ‐ba vâ, na, Timbaka. Ka bâ‐ba vâ, na, Elombo těkae a vakidi ka yěngidě, a vahakand‘ o diya ulenimehango. Nandi, ho ka hand‘ âvě bobe wa na bâ. Ka bâ‐ba pambalidě momo tě, Lât, na‐ngudi mětě, ba bě pyělě n‘ iweya ja jâmbě.
10Ndi ka bamo tě ba hambidě benâ beabu, ka bâ‐ba dula Lât o bâ‐ba jadi o ndabo, ka bâ‐ba diba jâmbě.
11Ka bâ‐ba bweya bato ba diyakidi o jâmbě ja ndabo na pâgu, n‘ uhâlě n‘ uněně: ka bâ‐ba vâhâmâ nyolo iduwa ja jâmbě.
12¶ Ka bamo tě ba vâ na Lât, na, O ngitě okava na mot‘ upâkwě, kabo bakiyo bâvě, na bana bâvě babamo na babajo, na uâvě a janidi o mboka, pumakě beâ o iboko těkavi;
13Kabojana ho ka jiliděndi iboko těkavi, ikabojana iyama jabu i kenindi sasě o boho bwa Jěhova; ka Jěhova a loma hwě ka jilidě viâ.
14Ka Lât a puma, ka mâ‐a kala na bakiyo baju ba bakě bana baju, na, Umwakani, wa věngěměni o iboko těkavi; ikabojana Jěhova a ka jilidi mboka těkaně. Ndi bakiyo baju ba yěněki mâ, ona moto a hakě ngiebo.
15¶ O buhwa bo yadi, ka benjěl bea hadividě Lât, na, Umwaka, na nâvě wa nângâ mwad‘ âvě, na bana bâvě ba bajo babale ba jad‘ okava; o banga wa hiniya na bobe bwa mboka těkaně.
16Ndi a haki yěngěyěngě, ka bamo tě ba bweya mâ, na mwad‘ ’aju, na bana baju ba bajo babale o benâ; Jěhova a yokiyi mâ ngěbě: ka bâ‐ba pumě mâ, ka bâ‐ba tědě mâ mboka dikango.
17¶ E diyakindi, o bâ‐ba běki bâ pumanango o bwebwe, ka Mâ‐a vâ, na, Kweyaka o pělě ya eměnâ ’âvě; o timbakě iběyi o mbuhwa, o diyake tepě o behanjiboka těkabe beěhěpi: kweyaka na ’la o ukodi, o banga wa hiniya.
18Ka Lât a vâ na bâ, na, A! hanga nonaně, upangiyi muamě.
19Umbwakiyate, nandi, uhayi muâvě u duwango ehekwě o mihâ mâvě, na nâvě o keniděndi ngěbě ’âvě, eâvě e di leviděngo ’mba o iyongě ja eměnâ ’amě: mba kweya o ukodi, o banga ebe ya bweya ’mba, n‘ umba mba wa.
20Umbwakiyate, mboka tě ekaně e ndi pyělě n‘ ikweya, na yâ e ndi ehâlě. A! bâbâkâ mbi kweyaka ovoně (e ’bě ehâlě?) vâkâna ilina jamě i diyendi.
21Ka Mâ‐a vâ na mâ, na, Yěněkěte, Mbi bâbângo âvě o pělě ya elombo těkae tepě, na Mba tâlângâně mboka těkaně, eâvě e di kalango.
22Hadivakiděnd‘ âvě, o kweya ovoně; ikabojana Mba haye elombo o t‘ o pâ ovoně. Ovaně nd‘ o mboka těně i tubakudwě na Zoar.
23¶ Joba i diyaki ja pumě o he, o Lât a pâkidi o Zoar.
24Jâ ndi ja Jěhova ja nâdě o Sâdam na Gomâra sulfěr na veya oviya Jěhova a jadi oba;
25Ka Mâ‐a tâlângâně mamboka těmaně na behanjiboka beěhěpi, na bato ba mamboka běhěpi, na be tombwakidi o he.
26¶ Ndi mwad‘ ’aju a tamwakiyindi o mbuhw‘ ’aju; ka mâ‐a ’luwa homba ya vianga.
27¶ Ka Ebreham a punda n‘ ubwa o iboko viaju vi těměkidi o boho bwa Jěhova:
28Ka mâ‐a ’mbuwa o pělě ya Sâdam na Gomâra, na o pělě ya ehe ya ehanjiboka yěhěpi: ka mâ‐a yěně, umbwakiyate, itutu vya ehe tě vi betaka oba ona itutu vya ebeke.
29¶ E diyakindi, o Anyambě a běkidi mamboka ma behanjiboka jiliděngo, ka Anyambě a yongidě Ebreham, ka Mâ‐a věngidě Lât o hanganě ya itâlângâně, o Mâ‐a tâlângânâkidě mamboka ma Lât ma diyakidi.
30¶ Ka Lât a věngěmě o Zoar, ka mâ‐a diya, na bana baju ba bajo babale na mâ, o ukodi; ikabojana a bangakind‘ o diya o Zoar: ka mâ‐a diya o budu na bana baju ba bajo babale.
31Ka wa utodu a vâ na wa nděmbě, na, Hangw‘ ’ahu a bě ndi utodu, na ho ’bě na moto o he wa ngiya na hwě itingidi via he yěhěpi:
32Vaka, ho mâtâkidě hangw‘ ’ahu ivě, na hwě‐hwa nangiya na ju, ovaně nd‘ o hwě‐ho ka tatě ibângâ oviya hangw‘ ’ahu a jadi.
33Ka bâ‐ba panga hangw‘ ’abu a mâtâkâ ivě na bulu těboně: ka wa utodu a ngiya, ka mâ‐a nangiya na hangwě; a‐u yowakě o mâ‐a nangakiyedi, na o mâ‐a umwakidi.
34Buhwa bwe, ka utodu a vâ na wa nděmbě, na, Umbwakiyate, mbi nangakiyi na paia na bulu bwa vaika: ho mâtâkidě mâ ivě na bulu těkabo tepě; na nâvě wa ’la ka nangiya na ju, ovaně nd‘ o hwě‐ho ka tatě ibângâ oviya hangw‘ ’ahu a jadi.
35Ka bâ‐ba panga hangw‘ ’abu a mâtâkâ ivě na bulu těboně tepě: ka wa nděmbě a ’muwa, ka mâ‐a nangiya na ju; a‐u yowakě o mâ‐a nangakiyedi, na o mâ‐a umwakidi.
36Kakana nd‘ o bana ba Lât ba bajo babale ba kahaki na hangw‘ ’abu.
37Ka utodu a ja mwa‐momo, ka mâ‐a vangidě mâ dina na Moab: mâ ndi hangwě ya ba‐Moab, na bwa buhwa těkabo.
38Ka wa nděmbě, a ja tepě mwa‐momo, ka mâ‐a vangidě mâ dina na Běn‐ami: mâ ndi hangwě ya ba‐Amân, na bwa buhwa těkabo.
Currently Selected:
Jěnisis 19: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
