Tôbita 1
1
1Izao no tantaran’i Tôbita, zanakalahin’i Tôbiela sy zafin’i Hananiela sy zafiafin’i Adoela ary zafin-dohalik’i Gabaela; samy avy amin’ny tarik’i Asiela izy ireo sady anisan’ny fokon’i Naftalỳ#1.1 Naftalỳ: jereo Jos 19.32 sy nta.. 2Nonina tao amin’ny zaratanin’i Naftalỳ any Galilea ampatrana i Tôbita, dia tao an-tanànan’i Tisbà, teo anelanelan’i Kedesa tao avaratra sy i Hatsôra tao andrefana ary i Fôgôra tao atsimo; avy tao Tisbà izy no nentina ho babo nankany Asiria tamin’ny andron’i Salmanatsara#1.2 I Salmanatsara V no lazaina eto ka izy io dia mpanjakan’i Asiria tamin’ny taona 726-722 tal J.K. Araka ny 2 Mp 15.29, dia ilay mpanjaka talohany, izany hoe i Tiglato-Pilesera, no nitondra ny mponin’i Naftalỳ ho babo tany Asiria. mpanjakan’io tany io.
Ny ela fitadidy teo amin’ny fiainan’i Tôbita
3Izaho Tôbita dia nizotra nitandro ny rariny sy nanao asa soa nandritra ny andro rehetra niainako; nahavita fiantrana betsaka aho tamin’ireo havako sy mpiray firenena amiko, izay voababo niaraka tamiko teto Ninive, tao amin’ny tanin’ny Asirianina. 4Fony aho tanora ka mbola nipetraka tao amin’ny faritra nisy ahy teo amin’ny tanin’i Israely, dia nisaraka manontolo tamin’ny taranak’i Davida sy tamin’i Jerosalema ny fokon’i Naftalỳ razambeko. Kanefa io Jerosalema io no tanàna voafidin’Andriamanitra teo anivon’ireo fokon’i Israely rehetra mba ho fanoloran’ny Israelita sorona. Tao no nanorenana sy nanokanana ny tempolin’Andriamanitra ho an’ny taranaka rehetra ho avy. 5Ny havako rehetra sy ny fokon’i Naftalỳ razambeko dia teny amin’ny tendrombohitr’i Galilea rehetra teny no nanolotra sorona tamin’ilay zanak’omby volamena izay tao Dana no nataon’i Jerobohama mpanjakan’i Israely. 6Izaho kosa matetika dia nandeha samirery tany Jerosalema tamin’ireo andro fety, araka izay voasoratra ho fitsipika raikitra ho an’i Israely manontolo. Nidodododo nankany Jerosalema aho nitondra ny voaloham-bokatra sy ny voalohan-teraky ny biby fiompiko ary ny volon’ondry tamin’ny fanetezana azy voalohany. 7Nomeko ny mpisorona taranak’i Aharôna izany mba hoentiny eo amin’ny alitara fisoronana. Nanefako fahafolon-karena koa ny vary, ny divay, ny ôliva, ny ampongabendanitra, ny aviavy ary ny voankazo hafa rehetra ka nomeko ny levita izay nanao fanompoana tao Jerosalema. Namidiko ny ampahafolony fanindroany tamin’ny fananako, araka ny fanao mandritra ny enina taona ao anatin’ny fito, ary nolanîko isan-taona tany Jerosalema ny vola azo. 8Ary ny ampahafolony fanintelony#1.8 Ny fanaovana ny fahafolon-karena karazany telo, voateny amin’ny and 6-8 eto, dia notakarina avy amin’ny fepetra raketin’ny Deot 14.22-29. tamin’ny fananako dia nomeko ny kamboty sy ny mpitondratena ary ny vahiny izay nanaraka ny fivavahana jiosy ka niara-nonina tamin’ny Israelita; isan-telo taona no nentiko sy nomeko azy izany ka niarahanay nihinana araka ny fitsipika voalazan’ny lalànan’i Mosesy momba izany sy araka ny fampianaran’i Debôrà renin’i Hananiela raibenay; ny raiko manko, nony maty, dia namela ahy ho kamboty. 9Ka rehefa tonga olon-dehibe aho, dia nanambady vehivavy anankiray anisan’ny taranaky ny razambenay; ary niteraka zazalahy taminy aho ka Tôbià no anarana niantsoako azy.
10Rehefa nentina ho babo taty Asiria aho, dia tonga tao Ninive. Tao amin’io tanàna io, ireo havako rehetra sy ireo mpiray tanindrazana amiko dia nihinana ny sakafon’ny mpanompo sampy; 11fa izaho kosa nitandrin-tena mba tsy hihinana ireny sakafo ireny. 12Ny aiko manontolo no nahatsiarovako an’ilay Andriamanitro, 13ka izany no nahatonga ahy hahazo fitia tamin’i Salmanatsara mpanjaka#1.13 Ampit Gen 39.4; 41.39-40; Dan 2.48.. Dia izaho no nampividianany ny zavatra rehetra nilainy; 14izaho no mpandeha tany Media#1.14 Media: tany ao atsinanan’i Asiria sy eo atsimon’ny Ranomasina Kaspienina. nividy entana ho azy mandra-pahafatiny. Koa, indray maka, dia nisy volafotsy telonjato kilao napetrako tamin’i Gabaela rahalahin’i Gabry. 15Rehefa maty i Salmanatsara mpanjaka, dia i Saneheriba#1.15 Saneheriba: ara-tantara, ny dimbin’i Salmanatsara V dia i Sargôna II (722-705 tal J.K.) izay nodimbiasan’i Saneheriba (704-681). zanany lahy no nandimby azy. Niova ho tsy azo antoka ireo lalan’i Media tamin’izay, ka tsy afaka nankany intsony aho.
16Tamin’ny andron’i Salmanatsara no efa nanome vola matetika an’ireo havako mpiray tanindrazana amiko aho. 17Nizarako ny mofoko ireo noana aho ary nomeko akanjo ireo tsy nitafy. Raha nisy fatin’olona anankiray mpiray firenena amiko natsipy tao ivelan’ny mandan’i Ninive ka sendra hitako, dia naleviko izany. 18Naleviko ihany koa ireo novonoin’i Saneheriba ho faty. Tany Jodea manko io mpanjaka io dia naniratsira an’ilay Andriamanitra mpanjakan’ny lanitra; ka ho famaizana azy no naneren’Andriamanitra azy hiala faingana tamin’io tany io. Saingy, rehefa tafaverina tao Ninive izy, dia nentanim-pahatezerana ka namono nahafaty Israelita maro. Dia izaho no nitondra an-tsokosoko ny fatin’ireo, ka nandevina azy. Nasain’i Saneheriba nokarohina ireny faty ireny, fa tsy nety hita. 19Nisy olona anankiray mponin’i Ninive nandeha nampandre ny mpanjaka fa izaho no nandevina ireo faty ireo, hany ka voatery niafina aho. Nony fantatro kosa fa nahalala ny momba ahy ny mpanjaka, ary nampitady ahy mba hovonoiny ho faty, dia natahotra aho ka nandositra. 20Norobaina avokoa ny fananako rehetra ka tsy nisy napetraka ho ahy fa nanatevenana ny tahirin’ny mpanjaka; i Hanà vadiko sy i Tôbià zanako lahy no hany tavela ho ahy. 21Tsy ampy efapolo andro taorian’izany, dia novonoin’ireo zanany roa lahy ho faty ny mpanjaka; avy eo izy roa lahy no nandositra tany amin’ny tendrombohitra Ararata#1.21 Jereo 2 Mp 19.37 sy nta.. Dia i Asaradiana, anankiray hafa tamin’ireo zanakalahin’i Saneheriba, no tonga mpanjaka nandimby azy. I Ahikara, zanakalahin’i Anaela rahalahiko, no nampiandraiketin’i Asaradôna ny fitondrana manontolo sy ny fitantanana ara-bola tao amin’ny fanjakany. 22Io Ahikara io no nitaky rariny momba ahy, ka afaka niverina tao Ninive aho. Nandritra ny nanjakan’i Asaradôna, manko dia i Ahikara no mpandroso divay#1.22a mpandroso divay: jereo Ne 1.11 sy nta. sy mpitana ny tombokasem#1.22b tombokase: jereo Apôk 5.1 sy nta.-panjakana ary lehiben’ny fitondram-panjakana mbamin’ny fitantanam-bola tao Asiria. Izy no mbola voatanan’i Asaradôna hanohy ny andraikiny. Ankoatra izany i Ahikara dia anisan’ny fianakaviako, satria zana-drahalahiko.
Currently Selected:
Tôbita 1: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.