Tôbita Sava lalana
Sava lalana
–Amin’ny lafiny maro, ny tantaran’i Tôbita sy i Tôbià zanany lahy, dia miendrika angano nipoitra teo anivon’ny sarambabem-bahoaka. Tantara mirakitra anatra mahasoa izy ity, ka maneho Israelita tia vavaka iray ankohonana, izay nentin’ny Asirianina ho babo tany Ninive, efa taloha kelin’ny fandravana an’i Samaria (taona 722 tal J.K.). Nisy loza nihatra tamin’izany ankohonana izany, kanefa notandrovin’i Tôbita sy ilay zanany lahy hatrany ireo fitsipiky ny lalàna jiosy. Ny fahefana mahagaga nananan’ny anjely Rafaela no nanampy azy mianaka tamin’ny fanatanterahana ny zava-kinasany; ka naka ny endrik’olona mpiray firenena aminy izany anjely izany, rehefa nirotsaka hanasoa azy.
Ny bokin’i Tôbita dia mikendry hampita fampianarana sy fampaherezana ho an’ireo Jiosy monina maningantsingana any am-pielezana, eo anivon’ny hafa firenena. Ampahatsiahiviny ny fitsipika izay tokony harahin’ny Israelita tia vavaka: fanajana ny ray aman-dreny, asa fiantrana, fivavahana, fanasoavana ny namana, fanambadiana mifanaraka amin’ny sitrapon’Andriamanitra. Rehefa miaina araka ireo foto-kevitra ireo ny olona anisan’ny vahoakan’Andriamanitra, dia hitahiry ny maha izy azy eo anivon’ny mpanompo sampy ary koa haharitra ho olona tia vavaka izay ampian’Andriamanitra hatrany.
Ny bokin’i Tôbita dia rijan-teny anankiroa no nampitana azy tamintsika: ny anankiray fohy dia saika ny sora-tanana firaketana grika rehetra no ahitana azy; ary ny anankiray lava kosa dia ao amin’ny sora-tanana firaketana atao hoe Sinaiticus no hany nitahirizana azy. Ity faharoa ity, izay toa akaikin’ilay sora-tanana firaketana tany am-piandohana kokoa, no narahina eto amin’ity dikanteny ity.
Ny tantaran’i Tôbià (rainy sy zanany, mitovy anarana) izay hita ao amin’ny Baiboly Katôlika 1938 (sy ny edisiona rehetra nanaraka azy mandraka izao) dia miainga avy amin’ny Volgata latinina, izay dikanteny nataon’i Jerôma (347-420) avy amina rijan-teny fototra aramianina. Somary vita maimaika ihany io dikanteny nataony io ka mahatonga fahasamihafana maro, raha miohatra amin’ity dikanteny ato amin’ny Baiboly DIEM ity: tsy avy amin’ny rijan-teny aramianina ihany ireny fahasamihafana ireny, fa avy amin’ny fanamboamboaran’i Jerôma ihany koa.
Currently Selected:
Tôbita Sava lalana: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.