Fahendrena 3
3
1Eo an-tanan’Andriamanitra ny fanahin’ny olo-marina
ka tsy misy fijaliana hahatratra azy intsony.
2Hoatra ny maty izy eo imason’ireo adala
ary tahaka ny loza ny fialàny amin’izao fiainana izao;
3toa fahalevonana ny fanalavirany antsika,
kanjo ao amin’ny fiadanan’Andriamanitra izy.
4Na dia niharam-pahoriana#3.4 niharam-pahoriana: filazana mampahatsiaro ny nijalian’ny olo-marina nandritra ny fiainany tetỳ an-tany. Nefa araka ny hafa kosa dia mety ho ny fahafatesan’ny marina izay heverin’ny fahavalony ho famaizana ny marina. aza izy
eo imason’ny olombelona,
dia feno tsy fahafatesana kosa ny fanantenany.
5Maivana anefa ny fahoriany raha mitaha
amin’ny fahasambaram-be horaisiny#3.5 Ampit Rom 8.18; 2Kôr 4.17..
Nozahan’Andriamanitra toetra izy
ka hitany fa mendrika Azy;
6notsapainy toy ny volamena
atao amin’ny memy izy#3.6 Ampit 1Pt 1.7
ka sitrany toy ny sorona dorana manontolo
natolotra teo amin’ny alitara.
7Amin’ny fotoam-pitsaran’Andriamanitra,
dia hamirapiratra fatratra izy,
ary ho tahaka ny pitik’afo
hivoivoy amin’ny bozaka sy handoro azy.
8Ireo olo-marina ireo
no hitsara ny firenena#3.8 Ampit 1Kôr 6.2.
sy hitondra ny vahoaka;
ary hanjaka aminy mandrakizay ny Tompo.
9Izay mitoky amin’ny Tompo
dia hahafantatra fa azo antoka ny fikasany,
izay tsy mivadika aminy
no hitoetra eo anilany amim-pitiavana#3.9 izay tsy... amim-pitiavana: dkt hafa izay tia Azy marina no hitoetra eo anilany.
satria fahasoavana sy antra no an’ny voafidiny.
Ny anjaran’ny tsy mpivavaka
10Fa ny tsy mpivavaka kosa handray
ny famaizana sahaza ny fisainany,
noho izy nanivaiva ny olo-marina
sy nanalavitra ny Tompo.
11Fa loza no miandry izay manao tsinontsinona
ny Fahendrena sy ny fampianarany:
foana ny fanantenany,
tsy mahasoa ny fisasarany,
ary tsy ilaina akory ny asany;
12adala ny vadiny,
maditra ratsy ny zanany,
ary voaozona ny taranany.
Aleo fahamombana toy izay manan-janaka ratsy fanahy
13Fa sambatra ny vehivavy momba
izay tsisy pentina ny fitondrantenany
ary tsy mbola nanao firaisana voarara#3.13 momba: teo amin’i Israely fahizay, dia noheverina ho ozona sy zava-doza mihitsy izany. –firaisana voarara: ny tenenina amin’izany dia ny fijangajangana na fakàm-badin’olona na fanitsakitsaham-bady na ny fanambadiana olona tsy jiosy fa hafa firenena (jereo Deot 7.3).;
Fa hahazo ny valisoan’izany izy
amin’ny fitsaran’Andriamanitra ny olona.
14Sambatra koa ny lehilahy tsy miteraka
sady tsy mba nanao ratsy tamin’ny tanany
ary tsy nisain-dratsy hanohitra ny Tompo;
satria ny toetra mahatoky nasehony
dia hanomezana azy fanambinana manokana
ary hahazoany anjaram-pahafinaretana
ao amin’ny fonenan’ny Tompo#3.14 And 14: ampit Is 56.3-5..
15Fa ny ezaka ho amin’ny hatsaram-panahy
dia misy vokatra heni-boninahitra;
koa izay mifototra amin’ny Fahendrena
dia tsy mba hivaona toetra.
16Ireo zanaky ny fijangajangana kosa
dia tsy hivelatra araka ny tokony ho izy;
ary ho foana izay taranaka
avy amin’ny firaisana tsy ara-dalàna#3.16 firaisana tsy ara-dalàna: jereo and 13 sy ny naoty momba ny firaisana voarara. .
17Fa na dia ela velona aza izy ireny,
dia tsy horaharahain’ny olona;
ary ny fahanterany hatramin’ny farany
dia tsy mba hisy hajany akory.
18Ary raha malaky maty izy ireny,
dia tsy mba hanam-panantenana
na fiononana amin’ny andro fitsarana.
19Fa ny taranaka mpanao ratsy
dia mampalahelo ny fiafarany.
Dikanteny Iombonana Eto Madagasikara © Malagasy Bible Society, 2004.