Bena-Siràka 26
26
Hasambaran’ny lehilahy tsara tokantrano
(Jereo 26.13-18; 7.19; 36.26-30; Ohab 18.22; Gen 2.18)
1Sambatra ny vadin’ny vehivavy tsara fanahy,
ary hampitomboina roa heny ny andro iainany.
2Ny vehivavy mahery fo dia fifalian’ny vadiny,
ka hiadana ny lahy mandritra ny taona iainany.
3Anjara soa ny vehivavy tsara fanahy:
izany indrindra no anjara homena
an’ireo lehilahy manaja ny Tompo;
4na manankarena na mahantra ny lehilahy toy izany,
dia ho faly fo sy ho mirana endrika mandrakariva.
Tandremo ny vehivavy ratsy fanahy
5Misy zavatra telo mampanahy ny foko
fa misy zavatra fahefatra tena atahorako:
dia ny sahoan-dresaka aelin’ny mpiray tanàna
sy ny fivorivoriam-bahoaka ary ny fanendrikendrehana;
samy ratsy noho ny fahafatesana ireo rehetra ireo.
6Fa ny fahoriam-po tena mampiferinaina
dia ny mahita vehivavy mialona vehivavy hafa;
ka loza no afitsoky ny teniny
fa mitsabatsabaka amin’ny zava-drehetra#26.6 And 6a: samy vadina lehilahy anankiray izy roroa. –And 6b: ampit Jak 3.2-10..
7Ny vehivavy ratsy fanahy dia mitera-doza
tahaka ny ziogan’omby mihilangilana;
ary izay te hamolapolaka azy
dia tahaka ny misambotra maingoka.
8Ny vehivavy mpidoroka dia zava-mahatezitra tokoa,
fa tsy afaka hanafina ny tokony hahamenatra azy izy.
9Ny vehivavy mpijangajanga dia mora fantarina
amin’ny fijeriny sahisahy sy amin’ny hodimasony#26.9 Ny hodimasony manao pi-maso hafakely (jereo Ohab 6.25) na voaisy tentina manokana (jereo Jer 4.30; Ezek 23.40)..
10Raha misy zanakavavy maditra
dia hamafiso ny fiambenanao azy;
fa raha mahita anao manao tsirambina izy,
dia hanaram-po amin’ny filibana#26.10 And 10-12: ampit 42.9-11..
11Tandremo koa ny fijeriny tsy mahalala menatra;
ary aza gaga raha mamitaka anao izy.
12Toy ny ataon’ny mpivahiny mangetaheta misoka-bava
ka misotro amin’izay karazan-drano sendra azy,
toy izany koa no hipetrahan’ny vehivavy janga
eo anoloan’ny tsimaday rehetra
sy hanokafany ny fitoeran-jana-tsipîkany
amin’ny zana-tsipîka rehetra.
Fankalazana ny andefimandry mahafatra-po
(Jereo 26.1-4; Ohab 31.10-31; 14.1)
13Ny hasoan’ny vehivavy no hampifaly ny vadiny,
ary ny haitao ananany no hampahery tena azy.
14Ny vehivavy mahatam-bava dia fanomezan’ny Tompo,
sady tsy azo tombanam-bidy izy raha nobeazina tsara.
15Soa anampy soa ny vehivavy maotina,
ary tsy azo tombanana izy raha mahonon-tena#26.15 Ampit 1Tim 2.9-10..
16Tahaka ny masoandro misandratra
ho eny amin’ny habakabaka ambony eny
no isehoan’ny bikan’ny vehivavy soa
ao an-tranony voaravaka tsara.
17Tahaka ny jiro mirehitra
eo ambonin’ilay fitoeran-jiro masina#26.17 fitoeran-jiro masina: jereo Eks 25.31-39; 1 Mak 1.21; ampit Ton 5.15.
no isehoan’ny hatsaran-tarehy
eo ambonin’ny toe-batana mirindra.
18Tahaka ny andry volamena
eo ambonin’ny fototra volafotsy
no fijery ny ranjo tsara tefy
eo ambonin’ny faladia tomady#26.18 Misy stf manampy ny and 19-27 etoana: 19 Anaka, tahirizo ny fahasalamana nanananao faha-tanora ary aza atolotra ny olona vahiny ny herinao. 20 Mitadiava tany lonaka eny ambanivohitra hamafazam-boa ary aoka hatoky tena ianao fa olona tsara fototra! 21 Ny taranakao handimby anao dia hitombo ka hirehareha amin’ny razana nipoirany. 22 Ny vehivavy mpivarotena dia natao hororana, fa ny vehivavy manambady kosa hoheverina ho toy ny tilikambo mahafaty ho an’izay te hangalatra azy. 23 Ny vehivavy ratsy fitondrantena dia ny faikan-dehilahy no mendrika ho vadiny, fa ny vehivavy tsara toetra kosa dia lehilahy mpino ny Tompo no hanolorana azy. 24 Ny vehivavy tsy maotina dia miaina ao anatin’ny fahafaham-baràka, fa ny vehivavy tsara toetra kosa mahay manaja tena na eo anoloan’ny vadiny aza. 25 Ny vehivavy sahisahy loatra dia tsiratsiraina tahaka ny alikavavy, fa ny vehivavy maotina kosa dia mpino ny Tompo rahateo. 26 Heverin’ny besinimaro ho hendry ny vehivavy manaja vady, fa ny vehivavy mieboebo sady tsy manaja vady kosa dia ratsy fitondrantena. Sambatra ny lehilahy tsara tokantrano, fa ho ela velona bebe kokoa! 27 Tahaka ny trômpetra fanaingana hiady ny vehivavy mpikiakiaka sy basivava ka andosiran’ny besinimaro. Na iza na iza lehilahy miaina ao anatin’ny toe-javatra toy izany, dia voagejan’ny tabataban’ady hatrany. –And 20-21: ampit Sal 128.3..
Toe-javatra mahasosotra
28Misy zavatra roa mampalahelo ny foko,
ary anankiray fahatelo manetsika ny hatezerako:
dia ny mpanankarena nanjary ory
satria niharan’ny fahantrana;
ny olona mahira-tsaina kanefa tevatevaina;
ary indrindra ny miala amin’ny fahamarinana
mba hivarilavo amin’ny fahotana:
omanin’ny Tompo ho fatin’ny sabatra izy.
Ny fakampanahin’ny mpivarotra
29Sarotra ho an’ny mpandranto ny miaro tena tsy hanota;
ary tsy ialam-pahotana hatrany ny mpivarotra.
Dikanteny Iombonana Eto Madagasikara © Malagasy Bible Society, 2004.