Baròka 4
4
1Ny Fahendrena dia ao amin’ilay boky
mirakitra ny didin’Andriamanitra:
ny Fahendrena dia lalàna
izay maharitra mandrakizay.
Izay rehetra mifikitra aminy
dia hankany amin’ny fiainana;
fa izay mandao azy kosa
dia hankany amin’ny fahafatesana#4.1 Ampit 3.9; Sal 119.98; sir 24.23; Mt 5.18..
2Miverena, ry taranak’i Jakôba!
Mifikira amin’ny lalàna,
mizora ho amin’ny famirapiratana
eo anoloan’ny fahazavàny!
3Aza omena ho an’ny hafa ny voninahitrareo,
na ho an’ny firenen-kafa ny tombontsoanareo.
4Sambatra isika, ry vahoakan’i Israely
noho isika nampahafantarina
izay zavatra sitrak’Andriamanitra!
FAMPIONONANA HO AN’NY VAHOAKAN’ANDRIAMANITRA
Tokony hitafy herimpo indray ireo babo
5Mahereza, ry vahoakako
izay mitana ny anaran’i Israely!
6Namidy tamin’ny firenen-kafa ianareo,
nefa tsy handringanana anareo izany.
Fa ny nanoloran’Andriamanitra anareo
ho eo an-tanan’ny fahavalonareo
dia noho ianareo nihantsy ny fahatezerany.
7Demony#4.7 Demony na andriamani-tsiizy –And 7: ampit Deot 32.15-18; Sal 106.37; 1Kôr 10.20. no nanoloranareo sorona
fa tsy ilay Andriamanitra Mpahary anareo,
ka dia nampisafoaka Azy ianareo.
8Hadinonareo Andriamanitra mandrakizay
izay nanome hanina anareo;
ary nampalahelovinareo i Jerosalema
izay reny nitaiza anareo.
9Fa ny fahatezeran’Andriamanitra
dia efa hitan’i Jerosalema
nihatra taminareo, ka nampiteny azy hoe:
«Mihainoa ahy ianareo tanàna mpifanila amin’i Tsiôna,
fahoriana lehibe no nikapohan’Andriamanitra ahy#4.9 And 9-16: ampit Fit 1.;
10satria hitako ny fahababoana
nampiharin’Ilay Andriamanitra Mandrakizay,
tamin’ireo zanako lahy sy zanako vavy.
11Faly erỳ aho nitaiza azy ireny!
Kanjo tamin-dranomaso amam-pahoriana
no namelako azy handeha!
12Aoka tsy hisy olona hifaly
raha mahita ahy mpitondratena
sy nilaozan-janaka maro!
Indro aho tonga tsy misy mponina
noho ny fahadisoan’ny zanako
izay nihataka tamin’ny lalànan’Andriamanitra.
13Tsy niraharaha ny baikon’Andriamanitra izy,
tsy nizotra ny lalana voasoritry ny didiny,
ary tsy nanaraka ny sakeli-dalana
izay nanabeazany azy amin’ny fahamarinany.
14Ianareo tanàna mpifanila amin’i Tsiôna,
tongava hijery, tsarovy ny fahababoana
nampiharin’ilay Andriamanitra Mandrakizay
tamin’ireo zanako lahy sy zanako vavy.
15Firenena avy lavitra no nalefany hamely azy,
dia firenena tsy valahara sady hafahafa fiteny,
olona tsy mahalala manaja ny antitra
na mamindrafo amin’ny ankizy madinika#4.15 Ampit Deot 28.49-52..
16Satria nifaoka ireo zanakalahy
izay tsy foin’ny mpitondratena izy,
ary namela azy ho irery
voasaraka tamin-janakavavy.»
Mampahery ny zanany i Jerosalema
17Anaka, inona no azoko atao
mba hanampiana anareo?
18Ilay nahatonga izao loza izao taminareo
no hany afaka hamonjy anareo
teo an-tanan’ny fahavalonareo.
19Mandehàna, rankizy, mandehana!
Fa izaho tafajanona manirery eto.
20Nesoriko ny akanjo fitondrako
amin’ny androm-pifaliana
fa nanaovako ny fitafiana fisaonana#4.20 Jereo ny FTS amin’ny voambolana hoe MANDRIATRA FITAFIANA..
Hiantso vonjy amin’ilay Andriamanitra Mandrakizay aho
mandritra ny andro sisa hiainako.
21Mahereza, anaka, miantsoa an’Andriamanitra;
dia hamonjy anareo amin’ny famoretana
sy ny vahohon’ny fahavalo Izy!
22Izaho manko dia ilay Andriamanitra Mandrakizay
no iandrasako ny famonjena anareo.
Efa nampifaly ahy sahady Ilay Masina:
fantatro fa tsy ho ela intsony
dia ho tonga hamindrafo aminareo
Ilay Mandrakizay mpamonjy anareo.
23Tamim-pahoriana aman-dranomaso
no namelako anareo handeha!
Nefa Andriamanitra hamerina anareo
ho eo amiko mandrakizay
ao anatin’ny haravoana amam-pifaliana#4.23 Ampit Jer 31.12-13..
24Ankehitriny ireo tanàna mpifanila amin’i Tsiôna
dia mahita fa any am-pahababoana ianareo.
Nefa ho hitan’izy ireo tsy ho ela intsony
fa Ilay Mandrakizay Andriamanitrareo
dia ho tonga hamonjy anareo
amim-boninahitra lehibe sy mamirapiratra.
25Anaka, zakao am-paharetana
ny vokatry ny fahatezeran’Andriamanitra.
Manenjika anareo ny fahavalo;
nefa vetivety dia ho hitanareo lavo izy
ka hohitsahinareo amin’ny hatony#4.25 Jereo Jos 10.24; sal 18.39 sy nta..
26Ry zanako mankamamy ahy,
nandia làlan-tsarotra ianareo
satria nalain’ny fahavalo an-keriny
toy ny biby fiompy nangalarina.
27Mahereza, anaka, miantsoa an’Andriamanitra;
fa Izy nahatonga anareo ho babo
dia tsy afaka hanadino anareo.
28Ianareo ihany no nanan-kevitra
hanalavitra an’Andriamanitra.
Koa ezaka im-polo heny no ataovy izao
mba hiverenana aminy sy hikatsahana Azy;
29satria Izy nahatonga izao loza izao taminareo
no ho avy hamonjy anareo,
ka hampifaly mandrakizay anareo.
Tokony hahery fo indray i Jerosalema
30Mahereza, ry Jerosalema!
Andriamanitra Izay nanome anarana anao#4.30 nandray anao hanompo Azy: na niantso anao tamin’ny anaranao.
no ho avy hampionona anao.
31Hidiran-doza kosa ireo nanisy ratsy anao
ka nifaly tamin’ny fianjerànao
32Hidiran-doza ireo tanàna
izay nanandevo ny zanakao,
indrindra fa ilay tanàna#4.32 Filazana an-kolaka an’i Babilôna. Nefa ireo filazana an-kolaka ny Babilônianina raha ny marina dia mikendry ny zava-misy ny amin’ireo mpanjaka grika izay nampahory ny jiosy tamin’ny taonjato faha II tal. J.K..
izay nandray azy ho babo:
33araka izay nifaliany tamin’ny fianjerànao
sy nihobiany tamin’ny fahavoazanao
no hahalelovany koa amin’ny faharavàny;
34hoesoriko aminy ny reharehany
ho anisan’ny tanàna be mponina indrindra,
ary hiova ho fisaonana ny fianjonanjonany;
35satria Ilay Andriamanitra mandrakizay
dia handefa afo hamely azy
ka handrava azy maharitra,
ary ho fonenan’ny fanahy ratsy izy#4.35 Ampit Is 13.21 sy nta.
mandritra ny fotoana ela.
36Ry Jerosalema ô, mba mitodiha
any amin’ny fiposahan’ny masoandro
ary mitazàna manodidina anao,
dia ho hitanao ny hafaliana
entin’Andriamanitra aminao.
37Indreny tamy ireo zanakao
hitanao nandeha ho babo;
tonga avy any rehetra any ireo,
hatrany atsinanana ka hatrany andrefana,
nangonin’ny feon’ilay Andriamanitra masina,
ka ravo tokoa miatrika ny voninahiny#4.37 Ampit Is 43.5; 60.4-9..
Dikanteny Iombonana Eto Madagasikara © Malagasy Bible Society, 2004.