2 Timôty 4
4
1Izao no anafatrafarako anao mafy eo anatrehan’Andriamanitra sy eo anatrehan’i Kristy Jesoa, Ilay hitsara ny velona sy ny maty, ary koa noho ny andro hisehoan’i Kristy sy hahatongavan’ny Fanjakàny: 2torio ny tenin’Andriamanitra, ka mazotoa amin’izany na handray azy ny olona na tsy handray, mandrese lahatra, mananara mafy, mampirisiha ombàn’ny fahari-po sy ny fahaiza-mampianatra hatrany. 3Eny, ho avy ny andro tsy hahazakan’ny olona intsony ny fampianarana tsy misy tomika; fa mpampianatra araka ny maha diavolana ny fony no havoriny ho azy sy hahalian-tsofina azy. 4Tsy hihaino ny fampianarana marim-pototra intsony ny olona fa hiala amin’izany ka hivily lalana ho amin’ny anganongano. 5Fa ianao kosa, aoka hahafehy tena amin’ny zavatra rehetra, zakao ny fijaliana, tontosao ny asa maha mpitory Vaovao Mahafaly anao, ataovy lavorary ny fanompoanao amin’Andriamanitra.
6Fa izaho moa dia efa halatsa-dra ho sorona araraka, efa mby akaiky ny fotoanandro hialako amin’izao fiainana izao. 7Ny ady tsara no efa vitako, tratrako ny tanjon’ny fihazakazahana, voatanako ny finoana#4.7 voatanako ny finoana: raisin’ny sasany hoe voatanako ny toky nomeko. . 8Ka ny miandry ahy izao dia ny satroboninahi-pandresena natokana ho an’izay manao ny marina. Ny Tompo, ilay mpitsara ara-drariny, dia hanome ahy izany satroboninahi-pandresena izany amin’ny andro fitsarana; ary tsy izaho ihany no homeny izany, fa izay rehetra miandry am-pitiavana ny hisehoany koa.
Hafatrafatra manokana
9Ataovy mihitsy izay hahatongavanao faingana atỳ amiko. 10Fa i Damasy efa nandao ahy, satria mankamamy an’izao fiainana ankehitriny izao izy ka lasa nankany Tesalônika. I Kresensa dia lasa any Galatia ary i Tito any Dalmatia#4.10 Damasy: jereo Kôl 4.14; Fm 24. –Tito: jereo 2 Kôr 8.23; Gal 2.3; Tit 1.4.. 11I Lioka no hany eto amiko. Alao i Marka ary ento miaraka aminao, fa afaka manampy ahy amin’ny raharaha izy#4.11 Lioka: jereo Kôl 4.14; Fm 24. –Marka: jereo Asa 12.12, 25; Kôl 4.10; Fm 24.. 12Nirahiko ho any Efeso i Tisiko#4.12 Tisiko: jereo Asa 20.4; Ef 6.21-22; Kôl 4.7-8.. 13Rehefa mankatỳ ianao, dia ento ilay akanjobe tavelako tao amin’i Karpo tany Trôasy; ento koa ireo bokiko, indrindra ireo boky hoditra#4.13 Trôasy: jereo Asa 20.6. –hoditra: hodi-biby, indrindra hoditr’omby na hoditr’osy, voavoatra manokana ho azo anoratana.. 14Raha i Aleksandra mpanefy varahina, dia betsaka ny ratsy nafitsony ahy; ny Tompo no hamely azy araka izay vitany#4.14 Aleksandra: jereo 1Tim 1.20. –ny Tompo...vitany: ampit Sal 62.12; Ohab 24.12; Rm 2.6.. 15Mitandrema koa ianao aminy, fa notoheriny mafy tokoa ny teninay.
16Fony aho nandaha-teny hiarovako tena tamin’ny voalohany, dia tsy nisy nomba ahy fa nandao ahy avokoa ny olona. Tsy hotanan’Andriamanitra ho hadisoany anie izany! 17Kanefa dia nijoro teo anilako ny Tompo ka nanome hery ahy mba hahatontosako soa aman-tsara ny fitorian-teny sady handrenesan’ireo rehetra hafa firenena izany; ary dia afaka teo am-bavan’ny liona aho. 18Hanafaka ahy amin’ny asa ratsy rehetra afitsoka ahy ny Tompo ka hampandroso ahy soa aman-tsara ao amin’ny Fanjakàny any an-danitra. Ho Azy anie ny voninahitra mandrakizay mandrakizay! Amen.
Fanaovam-beloma
19Veloma any amin’i Prisila sy i Akoilà, ary any amin’ny ankohonan’i Ônesifôro#4.19 I Prisila sy i Akoilà: jereo Asa 18.2. –Ônesifôro: jereo Asa 20.4; 21.29.. 20Nijanona any Kôrinto i Erasta; ary i Trôfimo dia navelako ao Mileto fa narary#4.20 Erasta: jereo Asa 19.22; Rm 16.23. Trôfimo: jereo Asa 20.4; 21.29.. 21Ataovy mihitsy izay hahatongavanao atỳ alohan’ny ririnina. Manao veloma anao i Eobola sy i Podensa, i Lino sy i Klaôdia ary ny havana rehetra iray finoana.
22Homba anao anie ny Tompo!
Homba anareo anie ny fahasoavan’Andriamanitra!
Currently Selected:
2 Timôty 4: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.