1 Mpanjaka 2
2
Ny toromarika farany nomen’i Davida
1Rehefa nandindona an’i Davida ny andro hahafatesany, dia nandidy an’i Salômôna zanany lahy izy nanao hoe:
2–Efa ho faty araka ny lalan-kizoran’ny besinimaro aho; koa aoka ianao hahery sy hiseho ho tena lehilahy! 3Tandremo izay andidian’ny TOMPO Andriamanitrao hanarahanao ny sori-dalany ary hitandrovanao ny lalànany sy ny didiny amam-pitsipiny sy ny sàtany araka ny voasoratra ao amin’ny lalànan’i Mosesy; dia hahomby ianao amin’izay rehetra hataonao sy hokasainao. 4Ary hotanterahin’ny TOMPO ilay fampanantenana izay nambarany tamiko hoe: «Raha tandreman’ireo taranakao ny fitondrantenany ka amin’ny fony manontolo sy ny fanahiny manontolo no izorany eo anatrehako amim-pahitsiana, dia tsy ho diso zanakalahy handimby eo amin’ny sezafiandrianan’i Israely ianao.» 5Ankoatra izany, ianao koa mahalala ny ratsy rehetra nataon’i Jôaba zanakalahin’i Tseroià tamiko sy tamin’ny filohan’ny tafik’i Israely roa lahy, dia i Abinera zanakalahin’i Nera sy i Hamasà zanakalahin’i Jetera#2.5 Jereo 2 Sam 3.26-27; 20.9-10. izay samy novonoiny ho faty sady nalatsany ra toy ny amin’ny ady nefa tsy nisy ady akory; ka dia tompon’andraikitra feno izy ny amin’ny nafitsony. 6Koa araka ny fahendrenao no ataovy, ary aza avela ho tratra antitra amim-piadanana izy no hidina any amin’ny toeran’ny maty. 7Fa ireo zanakalahin’i Barzilay avy any Gilehada kosa dia asio soa ary aoka izy hihinana eo amin’ny latabatrao, satria tonga namonjy ahy#2.7 Jereo 2 Sam 17.27-29; 19.32-33. izy fony aho nandositra an’i Absalôma rahalahinao. 8Farany dia aza hadino i Simehỳ zanakalahin’i Gerà sady Benjaminita avy any Bahorima. Mafy loatra ny nanozonany ahy tamin’ny andro nankanesako tany Mahanaîma; nefa nidina nitsena ahy tao Jôrdàna izy, ka dia nianiana tamin’ny TOMPO aho fa tsy hamono azy ho faty amin’ny sabatra#2.8 Jereo 2 Sam 16.5-13; 19.16-24.. 9Koa ankehitriny, aza atao afa-maina izy, fa lehilahy hendry ianao ka mahafantatra izay tokony hanaovana azy; na dia efa antitra aza izy, dia amin’ny fandatsahan-dra no hampidinanao azy any amin’ny toeran’ny maty.
Maty i Davida ary i Salômôna no mandimby azy
(Jereo 1 Tan 29.26-28)
10Rehefa lasa nodimandry any amin’ny razany i Davida, dia nalevina tao an-tanànan’i Davida. 11Naharitra efapolo taona no nanjakàn’i Davida tamin’i Israely, ka fito taona tao Hebrôna ary telo amby telopolo taona tao Jerosalema#2.11 Jereo 2 Sam 5.1-5; 1 Tan 3.4.. 12I Salômôna no nipetraka teo amin’ny sezafiandrianan’i Davida rainy#2.12 I Salômôna dia nanomboka nanjaka tamin’ny taona 970 tal J.K. tany ho any. ary niorina tsara ny fahefàm-panjakany.
Ny nahafatesan’i Adônià
13Indray andro dia nankany amin’i Baty-Seba renin’i Salômôna i Adônià zanakalahin’i Hagita. Ary hoy ravehivavy taminy:
–Hitondra fihavanana va no ahatongavanao?
Ka novaliany hoe:
–Eny!
14Ary hoy koa izy:
–Misy teny kely holazaiko aminao.
Dia hoy ravehivavy:
–Lazao àry.
15Dia hoy izy:
–Fantatrao fa ahy ny fanjakana, ary i Israely iray manontolo no efa nitodika tamiko mba hampanjaka ahy; kanjo dia tafahodina ny fanjakana ka lasan’ny rahalahiko, satria izay no sitrapon’ny TOMPO. 16Zavatra tokana no mba angatahiko aminao ankehitriny, ka aoka re mba tsy holavinao.
Ary hoy ravehivavy taminy:
–Lazao àry.
17Dia hoy i Adônià:
–Miangavy anao re aho hiteny amin’i Salômôna mpanjaka, (fa tsy handà anao izy) mba hanomezany ahy an’i Abisaga avy any Sonema ho vadiko.
18Hoy i Baty-Seba:
–Eny àry fa dia hiteny momba anao amin’ny mpanjaka aho.
19Dia nankany amin’i Salômôna mpanjaka i Baty-Seba hiteny aminy momba an’i Adônià. Ary nitsangana nitsena an’i Baty-Seba ny mpanjaka sady niondrika teo anatrehany; dia niverina nipetraka teo amin’ny sezafiandrianany izy ary nasainy nasiana sezafiandrianana iray ho an-dreniny teo ankavanany. 20Ary hoy i Baty-Seba taminy:
–Misy zavatra kely iray angatahiko aminao, ka aoka mba tsy holavinao.
Ka novalian’ny mpanjaka hoe:
–Angataho izay tianao, ry neny, fa tsy handà izany aho.
21Dia hoy ravehivavy:
–Aoka homena an’i Adônià rahalahinao i Abisaga avy any Sonema mba ho vadiny.
22Fa hoy i Salômôna namaly an-dreniny:
–Nahoana ianao no mangataka an’i Abisaga avy any Sonema ho an’i Adônià? Angataho ho azy koa ny fanjakana satria izy no zokiko#2.22 Jereo 2 Sam 3.7 sy nta; 16.21-22.; dia ho azy izany sy ho an’i Abiatara mpisorona ary ho an’i Jôaba zanakalahin’i Tseroià?
23Dia nianiana tamin’ny TOMPO i Salômôna mpanjaka ka nanao hoe:
–Aoka hataon’Andriamanitra amiko ny famaizana faran’izay mafy raha tsy hataoko maty i Adônià noho izany teniny izany. 24Velona ny TOMPO Izay nampitoetra sy nametraka ahy teo amin’ny sezafiandrianan’i Davida raiko sady nampanantena ho ahy sy ny taranako ny fahefà-manjaka, koa mianiana aho fa tsy maintsy maty anio ihany i Adônià!
25Ary i Salômôna naniraka an’i Benaià zanakalahin’i Jôiadà mba hamely azy. Dia maty tokoa i Adônià.
Roahin’i Salômôna tao Jerosalema i Abiatara
26Hoy kosa ny mpanjaka tamin’i Abiatara mpisorona:
–Mankanesa any Hanatôta any amin’ny taninao, fa olona mendrika ho faty ianao; nefa tsy anio akory no hataoko maty ianao, satria efa mba nitondra ny Vatamasin’ny Tompo ANDRIANANAHARY ihany ianao tamin’ny andron’i Davida raiko sady niara-niaritra ny mafy rehetra nozakainy#2.26 Hanatôta: toerana tokony ho 4 km avaratra andrefan’i Jerosalema; tanindrazan’i Jeremià mpaminany (jereo Jer 1.1). –nitondra ny Vatamasin’...ianao: jereo 2 Sam 15.24-29. –ny mafy rehetra nozakainy: jereo 1 Sam 22.20-33..
27Ary naongan’i Salômôna tsy ho mpisoron’ny TOMPO intsony i Abiatara; ka dia tanteraka ny teny nolazain’ny TOMPO tao Silao ny amin’ny taranak’i Helỳ#2.27 Jereo 1 Sam 2.30-36..
Ny fahafatesan’i Jôaba
28Vao ren’i Jôaba ny nanjo an’i Adônià sy i Abiatara, dia nandositra nankao amin’ny Tranolain’ny TOMPO izy ka namikitra tamin’ny tandroky ny alitara fanaovan-tsorona#2.28 Jereo 1.50 sy nta.. I Jôaba manko niandany tamin’i Adônià, kanefa tsy nanaraka an’i Absalôma. 29Ary nisy olona nanambara ny vaovao tamin’i Salômôna ka nanao hoe:
–Nandositra ao amin’ny Tranolain’ny TOMPO i Jôaba ka mialokaloka eo akaikin’ny alitara.
Dia naniraka olona i Salômôna mba hamototra an’i Jôaba hoe:
–Nahoana ianao no nialokaloka eto akaikin’ny alitara?
Ka novalian’i Jôaba hoe:
–Natahotra anao aho ka nialokaloka eto akaikin’ny TOMPO#2.29 Dia naniraka... akaikin’ny Tompo: araka ny dkt tranainy grika izany; tsy hita ao amin’ny RM ireo andalan-teny ireo..
Dia nirahin’i Salômôna hankany i Benaià zanakalahin’i Jôiadà ka nilazany hoe:
–Andeha vonoy ho faty izy.
30Dia nankany amin’ny Tranolain’ny TOMPO i Benaià ka niteny tamin’i Jôaba hoe:
–Izao no lazain’ny mpanjaka: Mivoaha tao ianao!
Hoy kosa izy:
–Tsia, fa eto no hahafatesako.
Dia nankany amin’ny mpanjaka indray i Benaià nitondra ny valin-tenin’i Jôaba. 31Ary hoy ny mpanjaka taminy:
–Ataovy araka izay nolazainy; ka vonoy ho faty izy, dia aleveno mba ho voaesotrao amiko sy amin’ny taranaky ny raiko ny andraikitra amin’ny famonoan’i Jôaba ho faty ny olona anankiroa. 32Hataon’ny TOMPO manody an’i Jôaba anie izany, satria olona roa tsy manan-tsiny akory sady tsara fanahy noho izy no nasiany tamin’ny sabatra ka maty, dia i Abinera zanakalahin’i Nera sady filohan-tafik’i Israely sy i Hamasà zanakalahin’i Jetera sady filohan-tafik’i Joda, nefa i Davida raiko tsy mba nahafantatra izany. 33Eny, hanody tokoa amin’i Jôaba sy ny taranany mandrakizay izany; fa fiadanana mandrakizay avy amin’ny TOMPO kosa no ho amin’i Davida sy ny taranany mbamin’ny fianakaviany ary ny sezafiandrianany.
34Dia niverina niakatra tany amin’i Jôaba i Benaià zanakalahin’i Jôiadà ka namely sy nahafaty azy; ary dia nalevina tao amin’ny toeram-ponenany tany an-taniefitra izy. 35I Benaià zanakalahin’i Jôiadà no nasolon’ny mpanjaka azy ho filohan-tafika, ary i Tsadôka mpisorona kosa no nasolony an’i Abiatara.
Ny fahafatesan’i Simehỳ
36Nampiantso an’i Simehỳ ny mpanjaka, ka nanao taminy hoe:
–Manaova trano eto Jerosalema ka mitoera ao; ary aza miala ao mihitsy ianao. 37Fantaro tsara fa ho faty ianao amin’ny andro izay hialanao ao ka hitànao ny lohasahan-driaka Kidrôna; dia ho tompon’andraikitra samirery amin’ny hahafatesanao ianao.
38Ka hoy i Simehỳ tamin’ny mpanjaka:
–Tsara izany, ry andriamanjaka, fa araka izay nolazainao no hataoko.
Dia nitoetra ela tao Jerosalema i Simehỳ. 39Kanjo telo taona taorian’izany, dia nisy mpanompon’i Simehỳ roa lahy nandositra ho any amin’i Akisa zanakalahin’i Mahekà sady mpanjakan’i Gata#2.39 Gata: jereo 1 Sam 5.8 sy nta.. Rehefa nilazana i Simehỳ fa indreo any Gata ny mpanompony, 40dia nanisy lasely ny borikiny izy, ka niainga nankany Gata ho any amin’i Akisa haka ny mpanompony. Dia nitodi-doha niverina niaraka tamin’ny mpanompony i Simehỳ. 41Fa nisy nanambara tamin’i Salômôna ny nankanesan’i Simehỳ tany Gata sy ny niverenany indray tao Jerosalema. 42Koa nampiantso an’i Simehỳ ny mpanjaka, ka nanao taminy hoe:
–Tsy efa nampianiana anao tamin’ny TOMPO ve aho mba tsy hiala amin’ny tanàna? Ary tsy efa nampitandrina anao ve aho fa raha miala ao ianao, dia tsy maintsy ho faty? Dia hoy ianao namaly ahy tamin’izay hoe: «Tsara izany!» 43Koa nahoana ianao no tsy nitana ny fianianana natao tamin’ny TOMPO? Nahoana no tsy notandremanao ny didy izay nomeko anao?
44Ary hoy koa ny mpanjaka tamin’i Simehỳ:
–Fantatrao ny ratsy rehetra nataonao tamin’i Davida raiko; eny, tsaroan’ny fonao izany; ka dia hataon’ny TOMPO manody anao ny haratsianao. 45Izaho Salômôna mpanjaka kosa hotahina; ary ny sezafiandrianan’i Davida hampitoerina mandrakizay eo anatrehan’ny TOMPO#2.45 Jereo 2 Sam 7.13-16..
46Dia nanome baiko an’i Benaià zanakalahin’i Jôiadà ny mpanjaka; dia nivoaka ny trano izy io ka namely an’i Simehỳ ho faty.
Toy izany no nanamafisana ny fahefana maha mpanjaka teo an-tanan’i Salômôna.
Currently Selected:
1 Mpanjaka 2: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.