Meke 37
37
A tamata caka dodonu ena vinaka ga; ena ca na tamatai valavala ca.
A Meke i Tevita.
1KAKUA ni ko rarawa e na vukudra nai valavala ca, se vuvutaki ira na daucaka ca. 2Ni ra na selemusu kusarawa me vaka na co, me vaka na co karakarawa era na malai yani. 3Vakararavi vei Jiova, ka caka vinaka; o na qai tiko ga e na vanua, ka vakani e na ka vakaidina. 4Ia mo rekitaki Jiova; ena solia vei iko ko koya na gadreva ni yalomu. 5Laiva na nomu sala vei Jiova; vakararavi talega vua, ena vakayacora ko koya. 6Ia ena vakaraitaka ko koya na nomu yalododonu me vaka na rarama, kei na ka ko sa lewai kina me vaka na siga levu.
7Vakarorogo vei Jiova, ka namaki koya tiko: kakua ni vakararawataki iko e na vuku i koya sa yaco e nona sala, e na vuku ni tamata sa vakayacora nona nanuma ca. 8Kakua so ni cudru, biuta ga na daule-savi; kakua ni vakararawataki iko mo ia kina nai valavala ca. 9Ni na muduki tani na daucaka ca; ia ko ira sa dauna-maki Jiova, era na taukena na vanua. 10Me malua vakalailai, ena takali na tamata ca; io, ko na vakananuma na nona yasana, ia sa sega ga. 11Ia ko ira na yalomalumalumu era na taukena na vanua; ka daumarau tiko e na veivakacegui vakaidina.
12A tamata ca sa dauvereta na tamata dodonu, ka vakasequruquru vua e na batina. 13Ena dredrevaki koya na Turaga: ni sa raica ni sa toro mai na nona siga. 14Era sa ucuna nai seleiwau na tamata ca, ka yavia na nodra dakai, me ra vakabalei ira na dravudravua kei na luveniyali, ka vakamatei ira nai valavala dodonu. 15Ena suaka na utodra dina na nodrai seleiwau, ena musulaki talega na nodra dakai.
16Sa yaga vakalevu na ka lailai sa nona na tamata dodonu, ka yaga vakalailai nai yau sa nodra na tamata ca era le vuqa. 17Ni na musulaki na taba ni tamata ca: ia ko Jiova sa tokona na tamata dodonu.
18Sa kila tiko ko Jiova na nodra siga na yalododonu: ia na nodrai votavota ena sega ni oti rawa. 19Era na sega ni madua e na gauna ca: era na mamau e na gauna ni dausiga. 20Ni ra na rusa na tamata ca, ia ko ira na meca i Jiova era na vaka na uro ni lami: era na vakaseavutaki; me vaka na kubou era na seavu yani. 21Sa dausarava na tamata ca, ka sa sega ni kauta tale: ia na tamata dodonu sa yalololoma, ka daulomasoli. 22Ni ra na taukena na vanua ko ira sa vakalougatataki vua; ia ko ira sa vakarusai vua ena muduki tani.
23Sa lewa ko Jiova nai lakolako ni tamata vinaka: a sa rekitaka ko koya na nona sala. 24Kevaka sa bale, ena sega ni vakabalei vakadua; ni sa tauri koya cake ko Jiova e na ligana. 25Au a sa gone, kaʼu sa qai qase mai; ia kaʼu a sa sega ni raica na yalododonu sa biu laivi, se na nona kawa sa vosai kedra madrai. 26Sa yalololoma tiko ko koya, a sa dausoli tiko; a sa kalougata na nona kawa.
27Biuta laivi na ka ca, ka caka vinaka; ka tiko dei ga ka tawa mudu. 28Ni sa vinakata na ka dodonu ko Jiova, ka sa sega ni biuti ira na nona era yalosavasava; era sa maroroi ka tawa mudu: ia na nodra kawa na tamata ca ena muduki tani. 29Era na taukena na vanua na yalododonu, ka tiko kina ka tawa mudu.
30Sa vosataka na vuku na gusu i koya na yalododonu, a sa vosataka na ka dodonu na yamena. 31Sa tiko e lomana na vunau ni nona Kalou; ena sega ni tidara e dua nai cavucavu ni yavana. 32Sa dau-yadravi koya na yalododonu na tamata ca, a sa dauvakasaqara me vakamatea. 33Ena sega ni laiva ki na ligana ko Jiova, se vakacalai koya ni sa lewai. 34Namaki Jiova, ka muria nona sala, ena qai laveti iko cake mo tiko e na vanua: ni ra sa muduki tani na tamata ca, ko na raica.
35Au a raica e dua na tamata ca ni sa kaukauwa sara, a sa tete na tabana me vaka na kau sa tei e na kena qele dina. 36Ia ka sa qai lako tani tale, ka, raica, sa takali: ia kaʼu a vakasaqarai koya, a sa tawa kune. 37Vakasama na tamata yalododonu, ka raica na daucaka dodonu: ni na vakacegu na kenai oti na tamata ko ya. 38Ia ko ira na dautalaidredre era na vakarusai vata: a kedrai oti na tamata ca me ra muduki laivi. 39A ka maivei Jiova ni ra sa vakabulai na yalododonu: a nodra kaukauwa ko koya e na gauna rarawa. 40Ena vukei ira talega ko Jiova, ka vakabulai ira: ena vakabulai ira mai na tamata ca, ka maroroi ira, e na vuku ni ra sa vakararavi vua.
Currently Selected:
Meke 37: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
