Meke 35
35
Sa masulaki koya ko Tevita, ni sa levu na nona meca.
A Meke i Tevita.
1I JIOVA, mo veileti kei ira era sa veileti kei au; veivala kei ira era sa veivala kei au. 2Taura nai sasabai kei nai vakaruru, ka tu cake me vukei au. 3Ucuna na moto talega, ka vakalatia na nodra sala era sa vakacacani au; kaya mai ki na yaloqu, Oi au na nomui Vakabula. 4Me ra vakidroataki ka vakamaduataki era sa vakasaqara na yaloqu; me ra saumaki tani ka vakataqayataki era bosea na ka meʼu ca kina. 5Me ra vaka na qa-ni-sila sa cagina, me vakasavi ira talega na agilose i Jiova. 6Me butobuto ka tidara na nodra sala, me vakasavi ira talega na agilose i Jiova. 7Ni sa sega na vuna ni ra vunia na nodra lawa e nai keli me rawai au; era kelia meʼu mate wale kina.
8Me yaco vakidacala vua na rusa; ia me rawai koya ga na nona lawa sa vunia; me lutu ga ko koya ki na veivakarusai dina ko ya. 9Ia na yaloqu, ena marautaki Jiova; ena reki ga ni sa vakabulai au ko koya. 10Ena kaya talega na suiqu kecega, O cei sa vakataki iko, Jiova, ni ko sa vakabulai koya sa dravudravua mai vua sa qaqa vua, io, na dravudravua kei na luveniyali mai vua sa vakacacani koya? 11Era sa tu cake mai na dauveibeitaki vakailasu; era sa beitaka vei au na ka kaʼu sa sega ni kila. 12Era sa kitaka vei au na ka ca mei sau ni ka vinaka, a sa ca kina na yaloqu. 13Ia koi au, ni sa tauvi mate ko ira, kaʼu sa vakaisulu e nai sulu taqarotu: kaʼu sa vakamalumalumutaki au e na lolo; a sa suka mai ki na lomaserequ na noqu masu. 14Au ai valavala vua me vaka vua na wekaqu se na taciqu; kaʼu a lako roko niʼu sa bibi, me vaka e dua sa tagicaka na tinada. 15Ia ko ira, niʼu sa gera era sa reki, ka soqoni vata; io, ko ira na lokiloki era sa soqoni vata vakaca vei au, kaʼu a tawa kila ga; era sa dresulaki au ka tawa cegu: 16o ira vata kei na dauveivakasewasewani, era sa vakasequruquru vei au e na batidra.
17I Jiova, e vica vata na siga ko na vakaraica walega? Vakabula na yaloqu mai na nodra veivakarusai, na yaloqu sa duaduaga maivei ira na luve ni laioni. 18Au na vakamolimoli vei iko e nai soqosoqo levu; kaʼu na vakavinavinaka vei iko e na liwadra na lewe vuqa. 19Me ra kakua ni reki e na vukuqu ko ira na noqu meca daulasu; me ra kakua talega ni katariva ko ira era cati au walega. 20Ni ra sa sega ni vosaveivakacegui; ia kivei ira era tiko vinaka e na vanua, era veinanuyaka na vosa dauveivakaisini; 21a ra sa dalaga vakalevu e na gusudra vei au, a ra sa kaya, Ue, ue, sa kunea ko na matada!
22O sa kunea talega, Jiova, kakua ni ko galu tiko; Turaga, kakua ni yawa vei au. 23Mo yavala mai, ka yadra me lewai au, noqu Kalou kei na noqu Turaga, mo totaki au mai. 24Mo lewai au, Jiova na noqu Kalou, me vaka na nomu yalododonu; ia mo kakua ni laivi ira me ra rekitaki au. 25Me ra kakua ni kaya e lomadra, Ue, sa yalo i keitou o qo! me ra kakua ni kaya, Keitou sa tilomi koya sara! 26Me ra madua ka kidroa vata era sa rekitaka na noqu rarawa; me ra vakaisulu e na madua kei na veivakasewasewani era sa vakalevutaki ira vei au. 27Me ra kaila e na marau, ka reki, era sa domona meʼu vakadonui; io, me ra kaya tikoga, Me vakarokorokotaki ko Jiova, o koya sa vinakata me sautu na nona tamata. 28Ia na yamequ ena cavuta na nomu lewa dodonu kei na nomu vakavinavinaka e na siga kece ka bogi.
Currently Selected:
Meke 35: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
