Meke 31
31
A reki kei na masu ni tamata lotu dina.
Vua na Domo-ni-meke. A Meke i Tevita.
1I JIOVA, kaʼu sa vakararavi vei iko; kakua ni laivi au meʼu madua: vakabulai au e na nomu yalododonu. 2Vakala na daligamu vei au; mo vakabulai au kusarawa: mo noqu Uluvatu kaukauwa, na noqu vale ni tauba meʼu vakabulai kina. 3Ni ko sa noqu Uluvatu kei na noqu tauba; ia mo tuberi au, ka liutaki au, e na vuku ni yacamu. 4Kaliraki au mai na lawa era sa kitaka vuni vei au; ni ko sa noqu kaukauwa. 5Au sa solia na yaloqu ki na ligamu; o a vakabulai au, Jiova, na Kalou daudina. 6Au sa cati ira era sa nanuma na ka lasu wale; ia koi au, kaʼu sa vakararavi vei Jiova. 7Au na reki ka marau e na nomu yalololoma; ni ko sa nanuma na noqu rarawa; ko a kila na yaloqu e na veivakararawataki; 8ka sa sega ni sogolati au e na liga ni meca; ko sa vakatura na yavaqu e na vanua lalaga.
9Lomani au, Jiova, niʼu sa rarawa: sa rusa na mataqu e na tagi, io, na yaloqu kei na ketequ. 10Ni sa takali na noqu bula e na rarawa, kei na noqu yabaki e na vutugu; sa oti na noqu kaukauwa e na vuku ni noqu caka cala, a sa vuca na suiqu. 11Au sai rogo ca vei ira kece na noqu meca, ka vakalevu vei ira na kai noqu, a ra sa rerevaki au ko ira keitou sa veikilai: o ira era kunei au etautuba era sa dro tani vei au. 12Au sa guilecavi me vaka na mate sa tawa nanumi; kaʼu sa vaka na bilo sa kavoro. 13Niʼu sa rogoca na nodra vosa ca na lewe vuqa; sa vakavolivoliti au na rere; ni ra sa bosei au meʼu ca, era sa bukia na noqu mate.
14Ia kaʼu a vakararavi vei iko, Jiova; kaʼu a kaya, O iko ga na noqu Kalou. 15Sa tu e na ligamu na noqu gauna; vakabulai au mai na ligadra na noqu meca, maivei ira talega era sa vakacacani au. 16Me cilava na nomu tamata na matamu; vakabulai au e na vuku ni nomu loloma. 17I Jiova, kakua ni laivi au meʼu madua; niʼu sa masu vei iko: me ra madua na tamatai valavala ca, me ra galu ga e nai bulubulu. 18Me vagalui na tebenigusu daulasu; era sa vosalevu taka na tamata yalododonu e na viavialevu kei na veivakalialiai.
19A ka vakaidina na nomu loloma, ko sa maroroya me nodra era sa rerevaki iko; ko sa vakarauta me nodra era vakararavi vei iko e matadra na luve ni tamata! 20O na vunitaki ira e na yasana vuni e matamu, mai na nodra vere na tamata; o na vunitaki ira tiko e na nomu vale tabu mai na veileti ni yamedra. 21Me vakarokorokotaki ko Jiova: ni sa vakatakila vei au na nona loloma vakaidina e na koro kaukauwa. 22Ia koi au kaʼu a kaya niʼu sa kidroa, Kaʼu sa muduki tani mai na matamu: ia ko sa rogoca ga na domo ni noqu masu niʼu sa tagi vei iko.
23Dou lomani Jiova, koi kemudou kecega na nona tamata yalosavasava: ni sa maroroi ira ko Jiova era sa lomadina, a sa cudruvi ira vakalevu era daucakacaka va-qaciqacia. 24Dou gumatua, ena qai vakaukauwataka na yalomudou ko koya, oi kemudou kecega sa vakararavi vei Jiova.
Currently Selected:
Meke 31: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
