Ai Vola Vakaibalebale 1
1
A WASE I. —A kena yaga na vosa vakaibalebale, 1-6. Ai vakaro e so, 7-19. Sa kaci tiko ko Vuku, a sa daubeci ga, 20-33.
1A VOSA vakaibalebale i Solomoni na luve i Tevita, na tui Isireli;
2Me kila kina na vuku kei nai vakavuvuli; me kunea na vosa vakayalomatua; 3me vakasama nai vakavuvuli ni vuku, na yalododonu, na lewa, kei na cakacaka dodonu; 4me solia na yalomatua vei ira na yalowai, na vuku kei na lomakasa vua na cauravou. 5Ena vakarorogo na lomavuku, ka tubu cake kina na nona vuku; ia na tamata daukila ka, ena rawata nai vakavuvuli vuku: 6me kila na vosa vakaibalebale, kei na kenai vakamacala; na nodra vosa na vuku, kei na nodra vosa vakatautauvata.
7A REREVAKI Jiova na vu ni lomavuku: era sa cata na vuku kei nai vakavuvuli ko ira na lialia. 8Na luvequ, mo vakarorogo ki nai vakavuvuli i tamamu, ka kakua ni biuta na vunau i tinamu: 9ni nai uku talei ni ulumu o qori, kei nai taube kei na domomu.
10Na luvequ, kevaka sa dauveretaki iko ko ira nai valavala ca, mo bese ga. 11Kevaka era sa kaya, Tou mai lako, me tou koto lawaki mada, me ia na veivakamatei, tou laʼki koto lo me vakamatea walega na tawa cala: 12me tou tilomi ira bula me vaka nai bulubulu; ka taucoko, me vakai ira era lako sobu ki na davuke: 13tou na kunea nai yau talei kecega, tou na yauta ki na nodatou veivale me oso: 14me datoui votavota vata; me dua vata ga na nodatou taga ni lavo: 15na luvequ, mo kakua ni sala vata kei iratou; mo tarova na yavamu mai na nodratoui lakolako: 16ni sa cici ki na ca na yavadratou, a ratou sa kusarawa me vakadavea na dra. 17E dina ni sa tawa yaga me biri na dai e matana e dua na manumanu vakatabana. 18Ia eratou sa lawakitaki iratou vakai iratou ga me mate; eratou sa koto lo me ca kina ko iratou. 19Sa vakaoqo na nodrai valavala kecega era sa kocova nai yau; era sa vakamatei ira na kenai taukei.
20SA dau vunau maitautuba ko Vuku; sa tabalaka na domona e nai saqata: 21sa kaci e na tikina e dausoqoni kina na tamata, e nai saqata mai na matamata-ni-koro: e na loma ni koro sa cavuta na nona vosa, ka kaya, 22Oi kemudou na yalowai, me bogi vica na nomudou vinakata na yalowai? ka marau ko ira na dauveivakalialiai, e na nodra veivakalialiai, ka cata na vuku ko ira na sesewa? 23dou saumaki mai niʼu sa vunau: rai ca, kaʼu na sovaraka na Yaloqu vei kemudou, kaʼu na vakatakila na noqu vosa vei kemudou.
24E na vuku niʼu a kaci, ia dou a bese ga; au a dodoka yani na ligaqu, ka sega e nanuma; 25ia dou a vakatawayagataka kecega na noqui vakavuvuli, ka sega ni vinakata na noqu vunau: 26oi au talega kaʼu na dredrevaka na nomudou rarawa; kaʼu na vakalialia na nomudou rere ni sa yaco mai; 27ia ni sa yaco mai na nomudou rere me vaka na rusa, kei na nomudou ca me vaka na covulaca; ni sa yacovi kemudou na rarawa kei na i yaluma. 28Era na qai kaci mai vei au, ia kaʼu na sega ni rogo yani; era na qarai au taudonu, a ra na sega ni kunei au: 29e na vuku ni ra a cata na vuku, ka sega ni digitaka na rerevaki Jiova: 30era a bese ga ki na noqui vakavuvuli: era a beca na noqu vunau kecega. 31O koya era na kania kina na vua ni nodrai valavala, ka vakamamautaki e na nodra lewa. 32Ni sa nodra lesu tani na yalowai era na mate kina, kei na nodra sautu na lialia era na rusa kina. 33Ia ko koya sa vakarorogo vei au ena tiko vinaka, ka cegu ni rerevaka e dua na ka ca.
Currently Selected:
Ai Vola Vakaibalebale 1: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
