Marika 5
5
Sa vakasavi ira na tevoro ko Jisu, a ra sa curuma na vuaka, 1-20. Sa vakabula na yalewa sa turidrabalavu, kei na gonealewa sa ciba, 21-43.
1A RATOU sa yaco ki tai kadua ni wai, ki na nodra vanua na kai Katara. 2Ia ni sa sobu mai na waqa ko koya, sa sota kaya sara mai na veibulubulu e dua na tamata, sa curumi koya e dua na yalo tawa-savasava; 3a sa dautiko e na veibulubulu ko koya; a sa sega e dua na tamata sa vesuka rawa, sa sega ga e na sinucodo: 4ni sa vauci vakavuqa e nai vesu kei na sinucodo, a sa drutilaka tani na sinucodo, a sa musulaka nai vesu: a sa sega e dua sa vakamanoataka rawa. 5A sa tiko vakadua, e na bogi kei na siga, e na veiulu-ni-vanua, kei na veibulubulu, a sa dauqoqolou, ka dautava na yagona e na veivatu.
6Ia ni sa raici Jisu ni sa vakayawa tu, sa cici yani ka cuva vua, 7a sa kaci e na domo levu, ka kaya, A cava vei kedaru, i Jisu na Luve ni Kalou cecere sara? au vakarota vei iko e na vuku ni Kalou, mo kakua ni vakararawataki au. 8Ni sa kaya oti vua ko koya, I yalo tawa-savasava, mo lako tani vua na tamata: 9sa tarogi koya talega, O cei na yacamu? A sa vosa ko koya, ka kaya, A yacaqu ko Vavakoso, ni keimami sa lewe vuqa. 10A sa masuti koya vakalevu ko koya, me kakua ni vakatalai ira tani e na vanua ko ya.
11A sa dua maikea na qele-ni-vuaka levu sa vakani, sa voleka ki na veiulu-ni-vanua. 12A ra sa masuti koya ko ira kecega na tevoro, ka kaya, Vakatalai keimami kivei ira na vuaka, me keimami curumi ira. 13A sa vakalaivi ira sara ko Jisu. A ra sa qai lako tani na yalo tawa-savasava, ka curumi irana vuaka: a ra sa cici sara na qele e na baba ki na wai, (era sa rua beka na udolu;) a ra sa ora e na wai. 14Ia ko ira sa vakani ira na vuaka era sa dro, ka laʼki tukuna e na koro kei na veiyasana kisau. A ra sa lako yani me raica na ka sa caka. 15A ra sa yaco vei Jisu, ka raici koya ka curuma ko ira na tevoro, o koya ka tu vua ko nai Vavakoso, ni sa tiko, ka vakaisulutaki, ka yalomatua: a ra sa rere. 16Ia ko ira era raica, era sa tukuna vei ira na ka sa yaco vua ka curuma ko ira na tevoro, vei ira talega na vuaka. 17A ra sa vakatekivu me masuti koya me lako tani e nodra vanua.
18Ia ni sa vodo ki na waqa ko koya, sa masuti koya ko koya ka curuma eliu ko ira na tevoro me mai tiko kaya. 19A sa sega ga vei Jisu, ka sa kaya vua, Mo lako ki na nomudou, vei iratou na wekamu, ka tukuna vei iratou na levu ni veika sa cakava vei iko ko na Turaga, ni sa lomani iko. 20A sa lako ka vakatekivu me tukuna mai Tikapoli na kena levu ni veika sa cakava vua ko Jisu: a ra sa kidacala kecega.
21Ia ni sa lako tale oti ko Jisu e na waqa ki tai kadua, era sa lewe vuqa sara sa soqoni vata vei koya: a sa tiko e na matasawa ko koya.
22Ka raica, sa lako mai e dua na turaga ni vale ni lotu, o Jairo na yacana; ia ni sa raici koya, sa bale ki na yavana, 23a sa masuta vakalevu, ka kaya, Na luvequ-yalewa sa lailai sa voleka sara ni mate: mo lako mai mo tabaki koya e na ligamu, me vakabulai kina; ena qai bula ko koya. 24A sa lako vata kaya ko koya, a ra sa lewe vuqa sara sa muri koya, ka drigita.
25A sa dua na yalewa, sa turidrabalavu ka yabaki tinikarua, 26a sa levu na ka sa vosota vei ira na vu-ni-wai era le vuqa, a sa volitaka kina na nonai yau kecega, a sa sega ni bula, ka levu cake tiko na nona mate, 27ni sa rogo vua ko Jisu, sa lako mai ki dakuna e na maliwa ni lewe vuqa, ka tara na nonai sulu. 28Ni sa kaya ko koya, Kevaka kaʼu na tara ga na nonai sulu, au na vakabulai. 29A sa tirimudu vakasauri nai davedave ni nona dra; a sa vakarogoca e yagona ni sa bula mai na mate ca ko ya. 30A sa kila sara ko Jisu e lomana ni sa lako tani vua na kaukauwa, a sa vuki e na maliwa ni lewe vuqa, ka kaya, O cei sa tara na noqui sulu? 31A sa kaya vua ko iratou na nona tisaipeli, O sa raica ni sa drigiti iko na lewe vuqa, ia ko sa taroga, O cei sa tarai au? 32Sa qai rai vakavolivolita, me kunei koya ka cakava na ka ko ya. 33A sa rere na yalewa, ka sautaninini, ni sa kila na ka sa caka vua, a sa lako mai ka bale sobu e matana, ka tukuna kecega vua na kena dina. 34A sa kaya vua ko koya, Na luvequ-yalewa, sa vakabulai iko na nomu vakabauta; mo lako e na vakacegu, ka mo bula mai na nomu mate ca.
35Ni sa vosa tiko ko koya, sa lako mai e so mai na turaga ni vale ni lotu, era kaya, Sa mate na luvemu-yalewa, o sa vakaoca tale nai Vakavuvuli e na vuku ni cava? 36Ia ni sa rogoca ko Jisu na vosa era sa kaya, sa qai kaya sara vua na turaga ni vale ni lotu, Kakua ni rere, vakadinata ga. 37A sa sega ni laiva e dua me muri koya, o iratou ga ko Petero, kei Jemesi, kei Joni na taci i Jemesi 38A sa yaco ko koya ki na vale ni turaga ni vale ni lotu, a sa raica na nodra tagiyaso, era sa tagi ka qoqolou vakalevu. 39Ia ni sa curu ko koya, sa kaya vei ira, Dou sa tagiyaso ka tagi e na vuku ni cava? sa sega ni ciba na gonealewa, sa moce ga. 40A ra sa dredrevaki koya. Ia ni sa vakatalai ira kece ki tautuba, sa kauti rau na tama ni gonealewa kei na tinana, kei iratou sa tiko vata kaya, ka curu ki na yasana sa davo kina na gonealewa. 41A sa taura na liga ni gonealewa ko koya, ka kaya vua, Talica kumi; a kenai balebale, Gonealewa, au sa kaya vei iko, tu cake mai. 42A sa tu cake sara na gonealewa, ka lako voli; a sa tinikarua na nona yabaki. A ra sa kidacala vakalevu sara. 43A sa vakarota matua vei ira ko koya, me kakua ni kila o qori e dua na tamata: a sa kaya me soli vua na gonealewa e so na kena.
Currently Selected:
Marika 5: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
