Maciu 8
8
Sa vakabula na vukavuka ko Jisu, kei na nona tamata na turaga ni valu, kei na tina ni wati i Petero, 1-17. Sa qai vakatakila vei iratou na nona tisaipeli nai valavala ni tamata sa muri koya, 18-22. Sa qai vunauca na wai, 23-27; a sa vakasavi ira na tevoro mai na tamata e le rua, 28-34.
1IA ni sa lako sobu mai na ulu-ni-vanua ko koya, era sa lewe vuqa sara sa muri koya.
2Ka raica, sa dua na tamata vukavuka sa lako mai ka cuva vua, ka kaya, Turaga, kevaka ko sa vinakata, ko sa vakasavasavataki au rawa. 3A sa dodoka na ligana ko Jisu, ka tarai koya, ka kaya, Au sa vinakata; mo savasava mai. A sa savasava vakasauri na nona vukavuka. 4A sa kaya vua ko Jisu, Raica, mo kakua ni tukuna vua e dua; ia mo laʼki vakarairaitaki iko ga vua na bete, ka vakacabora nai madrali sa vakarota ko Mosese, mei vakatakilakila vei ira.
5Ia ni sa curu ko koya ki Kaperinaumi, sa lako mai vua e dua na turaga ni valu, ka masuta, 6ka kaya, Turaga, sa davo mai neitou na noqu tamata sa tauvi-paralasi, a sa yaluma vakalevu sara. 7A sa kaya vua ko Jisu, Au na laʼki vakabulai koya. 8Sa qai vosa na turaga ni valu, ka kaya, Turaga, au sa sega ni yaga mo curu ki na noqu vale: mo cavuta walega na vosa, ena bula kina na noqu tamata: 9niʼu sa turaga lailai ga koi au, kaʼu sa lewa na tamatai valu e so: ia kaʼu sa kaya vua o qo, Mo lakani, a sa lakani; ka vei koya e dua tani, Mo lako mai, a sa lako mai; ka vei koya na noqu tamata, Mo kitaka o qori, a sa kitaka. 10Ia ni sa rogoca ko Jisu, sa kidacala, a sa kaya vei ira sa muri, Au sa kaya vakaidina vei kemudou, Au sa tawa kunea vei ira na Isireli e dua na vakabauta me vakaoqo na kena levu: 11au sa kaya talega vei kemudou, ni ra na lewe vuqa ena lako mai cake, mai ra talega; ka tiko sobu kei Eparaama, kei Aisake, kei Jekope, e na matanitu vakalomalagi: 12ia ko ira na gone ni matanitu era na biu ki na butobuto etautuba; era na dautagi kina, ka katia na batidra. 13Sa qai kaya vua na turaga ni valu ko Jisu, Mo lako ga; ia me vaka ko sa vakabauta, me yaco vei iko. A sa bula na nona tamata e na tiki-ni-siga ko ya.
14A sa lako ko Jisu ki na vale i Petero, a sa raica na tina ni watina, sa davo koto, ka tauvi-katakata. 15A sa tara na ligana ko koya, a sa takali vua na katakata: a sa tu cake ko koya, ka qaravi iratou.
16Ia ni sa yakavi mai, sa kau mai vei koya e lewe vuqa sa curumi ira na tevoro e so: a sa vakasavi ira na tevoro ko koya e na vosa, a sa vakabulai ira kecega sa tauvi-mate: 17o koya sa vakayacori kina na vosa sa tu kuna ko Isaia, na parofita, ka kaya, O koya ga sa laveta na noda malumalumu, ka colata na noda veimate.
18Ia ni sa raica ko Jisu ni ra sa lewe vuqa sara sa vakavolivoliti koya, sa kaya me ia na lako ki tai kadua.
19A sa dua na vu-ni-vola sa lako mai, ka kaya vua, Vakavuvuli, au na muri iko ki na veiyasana ko na lako kina. 20Sa qai kaya vua ko Jisu, Sa vaqara na fokise, a sa vakai-roro na manumanu ni lagi; ia na Luve ni tamata, sa sega vua na tikina me vakadavora kina na uluna. 21A sa dua tale na nona tisaipeli sa kaya vua, Turaga, laivi au meʼu lako mada ka buluti tamaqu. 22A sa kaya vua ko Jisu, Mo muri au; ka biuta na mate me ra buluta na nodra mate.
23Ia ni sa laʼki vodoka na waqa ko koya, eratou sa muri koya na nona tisaipeli. 24Ka raica, sa tubu na cava levu e na wai, a sa ubia na waqa na biau: a sa moce ko koya. 25Sa qai lako mai ko iratou na nona tisaipeli, ka vakayadrati koya, ka kaya, Turaga, vakabulai kedatou: edatou sa mate. 26A sa kaya ko koya vei iratou, Dou sa rere e na vuku ni cava, oi kemudou sa vakabauta vakalailai? Sa qai tu cake ko koya, ka vunauca na cagi kei na wai; a sa mara vu levu mai. 27A sa kidacala ko iratou na tamata, ka kaya, E vakaevei nai valavala ni tamata o qo, ni sa talairawarawa vua na cagi kei na wai!
28Ia ni sa udu ko koya ki tai kadua, ki na nodra vanua na kai Kerikesa, sa sota kaya e lewe rua sa curumi rau na tevoro e so, erau sa lako mai na veibulubulu, a rau sa yalocudrucudru sara, a sa sega kina na tamata sa lako rawa e na sala ko ya. 29Ka raica, era sa qoqolou, ka kaya, E vakaevei ko kedatou, i Jisu na luve ni Kalou? o sa lako beka mai kike me vakararawataki keimami ni sa sega ni yaco na kena gauna? 30A sa dua na qele ni vuaka le vuqa sa vakani, sa vakayawa vei ira. 31A ra sa masuti koya ko ira na tevoro, ka kaya, Kevaka ko sa vakasavi keimami, laiva me keimami curuma na qele ni vuaka. 32A sa kaya ko koya vei ira, Dou lako ga. A ra sa lako tani, ka ra sa curuma na qele ni vuaka; ka raica, sa cici sara na qele ni vuaka taucoko e na baba ki na wai, ka ra sa mate e na wai. 33Ia ko ira sa vakania, era sa dro, ka lako ki na koro, ka tukuna na ka kecega, kei na ka sa yaco vei rau ka curumi rau ko ira na tevoro. 34Ka raica, era sa lako yani kecega na lewe ni koro me ra veitata kei Jisu: ia ni ra sa raica, era sa masuta me lako tani yani e na nodra vanua.
Currently Selected:
Maciu 8: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
