Maciu 5
5
Sa vakatakila ko Jisu na ka e so sa kalougata kina na tamata, 1-12. Sa vakavulici ira na nona tamata me ra yaga, 13-16. Sa vakadinadinataka na vunau makawa, 17-20. Sa tukuna na kenai balebale dina na laba, 21-26; kei na dauyalewa, 27-32. Sa vakavulici ira na nona tamata me ra kakua ni bubului e na veivosaki, 33-37: me ra kakua ni veisau-saumitaka na ca, 38-42; ka me ra lomani ira na nodra meca, 43-48.
1IA ni sa raica na lewe vuqa ko koya, sa cabe ki na ulu-ni-vanua; ia ni sa tiko sobu, sa lako mai vei koya ko ira na nona tisaipeli: 2a sa dalaga na gusuna ko koya, ka vakavulici ira, ka kaya:
3Sa kalougata ko ira sa yalomalumalumu: ni sa nodra na matanitu vakalomalagi. 4Sa kalougata ko ira sa dautagi: ni ra na vakacegui. 5Sa kalougata ko ira sa yalomalua: ni ra na taukena na vanua. 6Sa kalougata ko ira sa viakania ka viagunuva nai valavala dodonu: ni ra na vakamamautaki. 7Sa kalougata ko ira e dauloloma: ni ra na lomani. 8Sa kalougata ko ira sa yalosavasava: ni ra na raica na Kalou. 9Sa kalougata ko ira sa dautataro: ni ra na vakatokai me luve ni Kalou. 10Sa kalougata ko ira era sa vakacacani e na vuku ni valavala dodonu: ni sa nodra na matanitu vakalomalagi. 11Dou sa kalougata, ni dou sa vakasewasewani, ka vakacacani, ka vosavakacacataki vakailasu e na ka kecega e ca, e na vukuqu: 12dou reki, ka marau vakalevu: ni sa levu na kenai sau vei kemudou mai lomalagi: ni sa vakaoqo na nodra vakacacani na parofita era sa bula eliu vei kemudou.
13Oi kemudou na masima kei vuravura; ia kevaka sa seavu mai na masima na kena tuituina, ena vakatuituinataki e na cava? sa qai sega ni yaga e na dua na ka, me biu ga ki tautuba, ka me buturaka sobu ko ira na tamata. 14Oi kemudou na rarama kei vuravura. Na koro sa tara toka e na ulu-ni-vanua sa tawa tabonaki rawa. 15Sa sega talega ni vakacaudrevi na cina, ka vakatikori e ruku ni vakarau ni sila, e na kenai tutu ga; a sa rarama vei ira kecega sa tiko e vale. 16Me caudre vakakina na nomudou rarama e na matadra na tamata, me ra raica na nomudoui valavala vinaka, ka vakarokorokotaka na Tamamudou sa tiko mai lomalagi.
17Dou kakua ni vakasama niʼu sa lako mai me vakaotia na vunau, se na nodrai vakavuvuli na parofita; au sa sega ni lako mai me vakaotia, me vakayacora ga. 18Niʼu sa kaya vakaidina vei kemudou, Ena takali mada ko lomalagi kei vuravura, ena sega ni takali mai na vunau e dua na mata-ni-vola lailai se dua na tikina lailai sara, ena yaco mada kecega. 19O koya o qo ena vakatokai kina me lailai sara e na matanitu vakalomalagi, ko koya yadua ena talaidredre ki na dua na vunau o qo sa lailai sara, ka vakavuvuli vakakina vei ira na tamata; ia ko koya ena vakabauta ka vakavuvulitaka, ena vakatokai me levu e na matanitu vakalomalagi. 20Niʼu sa kaya vei kemudou, Kevaka sa sega ni uasivi cake na nomudoui valavala dodonu vei ira na vu-ni-vola kei ira na Farisi, dou na sega sara ni curu ki na matanitu vakalomalagi.
21Dou sa rogoca ni sa kainaki vei ira eliu, Mo kakua ni laba; ia ko koya ena laba, ena cudruvi koya na mataveilewai: 22ia koi au, kaʼu sa kaya vei kemudou, O koya yadua sa cudru walega vua na wekana, ena cudruvi koya na mataveilewai: ia ko koya ena vosavakacacataka na wekana, ni-sa beitaka me ca, ena cudruvi koya na mataveilewai levu: ia ko koya ena vosavakacacataka ni sa beitaka me lialia, ena cudruvi e na eli sa waqa kina na buka.
23O koya, kevaka ko sa kauta na nomui madrali ki nai cabocabo-ni-soro, a sa nanuma maikina ni sa dua na ka sa beitaki iko kina na wekamu; 24biuta tu maikea na nomui madrali e na mata ni cabocabo-ni-soro, ka mo lako, mo drau veivinakati mada eliu kei na wekamu, mo qai lako mai ka vakacabora na nomui madrali. 25Kusarawa mo drau veivinakati kaya sa beitaki iko, ni drau sa lako vata kaya e na gau-ni-sala; de soli iko ko koya na dauveibitaki vua na dauveilewai, ka soli iko na dauveilewai vua nai talatala, o na qai biu ki na vale ni veivesu. 26Au sa kaya vakaidina vei iko, 0na sega sara ni lako maikina, o na sauma kece mada nai lavo.
27Dou sa rogoca ni sa kainaki vei ira eliu, Mo kakua ni dauyalewa: 28ia koi au, kaʼu sa kaya vei kemudou, O koya yadua ena raica na yalewa me dodomo kina, sa dauyalewa oti kaya e lomana. 29Ia kevaka sa vakacalai iko na matamu i matau, vecuka tani, ka biuta tani vei iko: ni sa yaga vei iko me yali laivi e dua na tikimu, ka me kakua ni biu ki eli na yagomu taucoko. 30Ia kevaka sa vakacalai iko na ligamu i matau, muduka tani, ka biuta tani vei iko: ni sa yaga vei iko me yali laivi e dua na tikimu, ka me kakua ni biu ki eli na yagomu taucoko.
31Sa kainaki talega, O koya sa biuta tani na watina, me solia vua nai vola ni veibiu: 32ia koi au, kaʼu sa kaya vei kemudou, O koya sa biuta na watina, ke sa sega ni dautagane, sa qisi koya me dautagane; ia ko koya erau sa veiwatini kaya sa biu, sa dauyalewa.
33Dou sa rogoca talega, ni sa kainaki vei ira eliu, Mo kakua ni bubului vakailasu, ka mo solia vua na Turaga na ka ko sa bubului kina: 34ia koi au, kaʼu sa kaya vei kemudou, Dou kakua sara ni bubului: kakua, ni cavuti lomalagi; ni sai tikotiko vakaturaga ni Kalou: 35kakua, ni cavuti vuravura; ni sai tutu-ni-yavana: kakua, ni cavuti Jerusalemi; ni sa koro ni Tui levu. 36Mo kakua ni bubului ni cavuta na ulumu; ni ko sa sega ni cakava rawa e dua na drauna me vulavula se loaloa. 37Ia me io, na io, me sega, na sega, na nomudou vosa: ia na ka sa levu cake, sa tubu e na ca.
38Dou sa rogoca ni sa kainaki, Mei sau ni mata na mata, ka mei sau ni bati na bati. 39Ia koi au, kaʼu sa kaya vei kemudou, Dou kakua ni veisausaumitaka na ca: ia kevaka e dua sa sabica na balumu i matau, golea talega vua nai kadua. 40Ia kevaka e dua sa via kauti iko vei ira na mataveilewai, ka kauta tani na nomui curucuru, laiva me kauta tani talega nai tutuvi. 41Ia kevaka e dua sa vakasaurarataki iko mo drau lako vata kaya e dua na maili, lako vata kaya na kenai karua. 42Solia vua sa mai kerekere vei iko, ia kakua ni vuki tani vua sa via kerea e dua na nomu ka me taura.
43Dou sa rogoca ni sa kainaki, Mo lomana na wekamu, ka cata na nomu meca: 44ia koi au, kaʼu sa kaya vei kemudou, Dou lomani ira na nomudou meca, vosa-vinaka vei ira sa rukaki kemudou, caka vinaka vei ira sa cati kemudou, ka masulaki ira sa vakalialiai kemudou, ka vakacacani kemudou; 45mo dou luvena na Tamamudou sa tiko mai lomalagi; ni sa vakacabe ko koya na nona mata-ni-siga vei ira na tamata ca kei ira na tamata vinaka, a sa vakatauca mai na uca vei ira na tamata yalododonu kei ira na tamata tawa yalododonu. 46Ia kevaka dou lomani ira sa lomani kemudou, a cava ena kemudoui sau? era sega li ni cakacaka vakaoqo ko ira sa kumuna nai vakacavacava? 47Ia kevaka dou veikidavaki duaduaga kei ira na wekamudou, a cava dou cakava me uasivi cake kina? era sega li ni cakacaka vakaoqo ko ira sa kumuna nai vakacavacava? 48O koya mo dou qai vinaka sara, me vaka sa vinaka sara na Tamamudou sa tiko mai lomalagi.
Currently Selected:
Maciu 5: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
