Maciu 13
13
A vosa vakatautauvata ni tamata kaburaki sila, kei na kenai balebale, 1-23. A sila vinaka kei na sila ca, 24-30; kei na sore ni musita, 31, 32; kei na leveni, 33. Ai balebale ni sila vinaka kei na sila ca, 34-43. E vaka nai yau sa vuni tu na matanitu vakalomalagi, 44; e vaka na mata-ni-civa talei sara, 45, 46; e vaka na lawa ni yavi, 47-50. Sa tarabe e na vuku i Jisu ko ira na kai nona, 53-58.
1E NA siga ko ya sa lako tani e na vale ko Jisu, ka tiko sobu e matasawa. 2A sa lewe vuqa sara era sa soqoni vata vei koya, a sa vodoka kina na waqa ko koya, ka tiko sobu; a sa tu kecega e na matasawa na lewe vuqa. 3A sa vuqa na ka sa vosataka vei ira ko koya e na vosa vakatautauvata, ka kaya:
Raica, sa dua na daukaburaki sa laʼki kabukaburaki; 4ia ni sa kabukaburaki lako, sa lutu e so e na tutu ni sala, a sa lako mai na manumanu ni lagi ka kania. 5A sa lutu e so ki na vanua veivatu, sa sega ni levu kina na qele: a sa tubu cake vakasauri sara, ni sa sega ni vavaku na kena qele: 6ia ni sa cabe na siga, sa malai; ia ni sa sega na wakana, sa raqosa sara. 7A sa lutu e so ki na veiwa-vakavotona; a sa tubu cake na veiwa-vakavotona, ka vakaruguta. 8A sa lutu e so ki na vanua vinaka, a sa vuavuai vinaka, sa vuai drau e so, a sa onosagavulu e so, a sa tolusagavulu e so. 90 koya sa vakadaligana me rogoca, me mani rogoca sara.
10Sa qai lako mai ko iratou na tisaipeli, ka tarogi koya, O sa vosa tikoga vei ira e na vosa vakatautauvata e na vuku ni cava? 11Sa qai vosa ko koya, ka kaya vei iratou, Ni sa soli vei kemudou me kila na veika vuni ni matanitu vakalomalagi, ia ka sega ga ni soli vei ira. 12Ni sa dua na kei ke sa tu vua na tamata, ena qai soli vua ka na levu na nona; ia na tamata ke sa sega ni tu vua e dua na ka, ena qai kau tani mai vua na ka sa tu vua. 13O koya o qo kaʼu sa vosa kina vei ira e na vosa vakatautauvata: ni ra sa raica ka sega ni raica; a ra sa rogoca ka sega ni rogoca, ka lecava. 14Ia sa vakayacori kina vei ira na parofisai i Isaia, ka vaka, Dou na daurogoca tikogi, ka lecava tu; ia dou na dauraica tikogi, ka sega ni kunea; 15ni sa uro mai na lomadra na tamata o qo, a sa didivara na daligadra, a sa bobo na matadra; de dua na siga ena rai na matadra, ka rogo na daligadra, ka kila na lomadra, a ra saumaki mai, ia kaʼu na vakabulai ira. 16A sa kalougata na matamudou, ni dou sa raica, kei na daligamudou, ni dou sa rogoca. 17Niʼu sa kaya vakaidina vei kemudou, Era lewe vuqa na parofita kei na tamata yalododonu era a via raica na ka dou sa qai raica, a ra a sega ni raica; ka rogoca na ka dou sa qai rogoca, a ra a sega ni rogoca.
18O koya mo dou qai rogoca na vosa vakatautauvata ni daukabukaburaki: 19Ni sa dua e rogoca na vosa ni matanitu, ka lecava tiko, sa qai lako mai na vu-ni-ca, a sa kovea na ka sa kaburaki ki lomana. Sai koya o qo sa kaburaki e na tutu ni sala. 20Ia ko koya sa kaburaki e na vanua veivatu, sai koya o qo sa rogoca na vosa, a sa vakabauta vakasauri e na reki: 21ia ni sa sega na wakana e lomana, sa tu dede vakalailai ga: ia ni sa tubu na rarawa, se na veivakacacani e na vuku ni vosa, sa tarabe sara. 22Ia ko koya sa kaburaki e na veiwa-vakavotona, sai koya o qo sa rogoca na vosa: ia na lomaocaoca e na vuku ni vuravura o qo, kei nai yau e dauveivakaisini, sa vakaruguta na vosa, a sa sega kina ni vua. 23Ia ko koya sa kaburaki e na vanua vinaka, sai koya o qo sa rogoca na vosa, a sa kila na kenai balebale; a sa vua, ka vuai drau e so, sa onosagavulu e so, sa tolusagavulu e so.
24Sa dua tale na vosa vakatautauvata sa tukuna vei ira ko koya, ka kaya, Sa vakatauvatani na matanitu vakalomalagi kei na dua na tamata sa kaburaka na sila vinaka e na nona were; 25ia ni sa moce ko ira na tamata, sa lako mai na nona meca ka kaburaka vata na sila ca e na loma ni witi, a sa qai lako yani. 26Ia ni sa tubu mai na sila ka vua, sa qai rairai talega na sila ca. 27Sa qai lako mai vua na kenai taukei ko ira na nona tamata, ka kaya vua, O a sega, saka, li ni kaburaka na sila vinaka e na nomu were? sa qai kau maivei na sila ca? 28Sa qai kaya ko koya vei ira, A ka o qo sa kitaka e dua na meca. A ra sa kaya vua ko ira na tamata, O sa vinakata beka me keitou laʼki kumuna vata o qori? 29A sa kaya ko koya, Tei kakua mada, de dou cavuraka talega na witi ni dou kumuna vata na sila ca: 30laiva ga me rau tubu vata ruarua me tei cava mada, na yabaki: ia ni sa cava na yabaki kaʼu na kaya vei ira nai vakatau-ni-yabaki, Dou kumuna vata mada na sila ca, ka vauca e na veivau me visa: ia dou kumuna vata na witi ki na noqu lololo.
31Sa dua tale na vosa vakatautauvata sa tukuna vei ira ko koya, ka kaya, Sa tautauvata na matanitu vakalomalagi kei na dua na sore ni musita, a ya sa kauta e dua na tamata, ka tea e na nona were: 32ia ko ya sa lailai sobu e na sore ni kau kecega; ia ni sa tubu cake, sa levu cake e na kau lalai, a sa yaco me kau dina, a sa laʼki ro e na tabana na manumanu ni lagi.
33Sa dua tale na vosa vakatautauvata sa tukuna vei ira ko koya: Sa tautauvata na matanitu vakalomalagi kei na leveni, sa kauta e dua na yalewa, ka vunia e loma ni madrai droka e tolu nai vakarau, ka malua me vakalevenitaki kece mada ga.
34Na ka kecega o qo sa tukuna ko Jisu kivei ira na lewe vuqa e na vosa vakatautauvata; a sa sega ni vosa walega vei ira, sa vosavakatautauvata tikoga: 35o koya o qo sa vakayacori kina na vosa sa tukuna na parofita, ni sa kaya, Au na dalaga na gusuqu e na vosa vakatautauvata; au na tukuna e so na ka sa vuni tu mai na gauna sa caka kina ko vuravura.
36Sa qai talai ira yani na le vuqa ko Jisu, ka curu ki vale: a sa lako mai vua ko iratou na nona tisaipeli, ka kaya, Tukuna mai vei keitou na vosa vakatautauvata ni sila ca mai na were. 37A sa vosa ko koya, ka kaya vei iratou, O koya sa kaburaka na sila vinaka, ko ya na Luve ni tamata: 38ia na were ko vuravura; ia na sila vinaka ko irana gone ni matanitu; ia na sila ca ko ira na luvena na vu-ni-ca: 39ia na meca sa kaburaki ira ko na tevoro: ia na yabaki nai vakataotioti kei vuravura; ia nai vakatau-ni-yabaki ko ira na agilose. 40Ia me vaka ni sa kumuni vata na sila ca ka visa e na buka; ena vakakina e nai vakataotioti kei vuravura o qo: 41ena talai ira yani na nona agilose na Luve ni tamata, me ra soqona vata mai na nona matanitu na ka kecega sa dauveivakacalai, kei ira sa kitaka tiko na ka ca; 42ia era na biuti ira ki na lovo ni buka waqa; era na dautagi kina, ka katia na batidra. 43Era na qai serau na tamata yalododonu, me vaka na siga, e na matanitu i Tamadra. O koya sa vakadaligana me rogoca, me mani rogoca sara.
44Sa dua tale, sa tautauvata na matanitu vakalomalagi kei nai yau sa vuni tu e na dua na were: a sa dua na tamata sa kunea, ka sega ni tukuna, ia ni sa rekitaka, sa laʼki volitaka na ka kecega sa tu vua, a sa volia na were ko ya.
45Sa dua tale, sa tautauvata na matanitu vakalomalagi kei na tamata dauveivoli, sa vakasaqara e so na mata-ni-civa vinaka: 46ia ni sa kunea e dua na mata-ni-civa talei sara, sa lako ka volitaka na ka kecega sa tu vua, ka volia na ka ko ya.
47Sa dua tale, sa tautauvata na matanitu vakalomalagi kei na lawa-ni-yavi, sa viritaki ki wai, a sa vakasoqona vata e so mai na mataqali kecega; 48ia ni sa sinai, era sa yavia ki matasawa, a ra sa tiko sobu, ka tugana na kena vinaka ki nai su e so, ka biuta tani na kena ca. 49Ena vakakina e nai vakataotioti kei vuravura: era na lako mai na agilose, ka tawasei ira tani na yaloca maivei ira na yalododonu, 50ka biuti ira laivi tu ki na lovo ni buka waqa: era na dautagi kina, ka katia na batidra.
51Sa kaya ko Jisu vei iratou, Dou sa kila nai balebale ni ka kecega o qo? Eratou sa kaya vua, Io, Turaga. 52Sa qai kaya ko koya vei iratou, Ia na vu-ni-vola kecega sa vakatavulici e na ka ni matanitu vakalomalagi, sa tautauvata kei na tamata sa taukena e dua na vale, o koya sa kauta mai mai na nona lololo na veika vou kei na veika makawa talega.
53A sa yaco, ni sa vakaotia ko Jisu na vosa vakatautauvata kece o qo, sa lako tani maikea. 54Ia ni sa tadu ki na nona vanua, sa vakavulici ira ko koya e na nodra vale ni lotu, a ra sa kidacala kina, ka kaya, E rawata maivei ko koya o qo na vuku o qo, kei na caka-mana? 55sa sega li ni luve ni matai ko koya o qo? sa sega li ni yaca i tinana ko Meri? kei na tacina ko Jemesi, kei Josese, kei Saimoni, kei Juta? 56kei na ganena, eratou sa sega li ni tiko vata kece kei keda? sa qai rawata maivei ko koya o qo na ka kecega o qo? 57A ra sa tarabe e na vukuna. A sa kaya vei ira ko Jisu, Sa vakarokorokotaki na parofita e na veivanua tani, a sa sega ga e na nona vanua, se nona vale. 58Ia ka sega ni caka vakavuqa maikeri na caka-mana, e na vuku ni ra sa sega ni vakabauta.
Currently Selected:
Maciu 13: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
