Ai Vola I Malakai Na Parofita 2
2
Sa vunauci ira vakaukauwa na bete e na vuku ni ra sa tawa muria na veiyalayalati ni Kalou kei ira, 1-10. Sei vunauci ira na lewe ni vanua e na vuku ni ra dauqaravi ira na kalou lasu, 11-13, ka ia na veibutakoci, 14-16, ka dau vosavakacacataki koya na Kalou, 17.
1IA sa kemudou mada, na bete, nai vakaro o qo. 2Kevaka dou sa bese ni vakarogoca, ia kevaka dou sa bese ni vakasara ki na lomamudou, mo dou vakarokorokotaka na yacaqu, sa kaya ko Jiova ni lewe vuqa, kaʼu na vakayacora sara na cudruvi ko ya vei kemudou, ka vakacacataka na ka dou sa vakalougatataki kina: io, kaʼu na dui vakacacataka na ka o qori, e na vuku ni dou sa tawa vakasara vi na lomamudou. 3Kaica, au na vunauca na sese vei kemudou, me kakua ni tokara, au na kureitaka talega na de-ni-manumanu ki na matamudou, io, na de-ni-manumanu ni nomudou solevu tabu; dou na kauti tani vata kaya talega. 4Dou na qai kila niʼu a tala nai vakaro o qo vei kemudou, me dei na noqu veiyalayalati kei Levi, sa kaya ko Jiova ni lewe vuqa.
5Sa ia kei koya na noqu veiyalayalatitaka na bula kei na veivinakati; ia kaʼu a solia vua e na vuku ni rere sa rerevaki au kina, ni sa taqaya sara talega e na mata ni yacaqu. 6Sa vunau daudina ka tiko e gusuna, ka dua na ka e cala sa sega ga ni kune e na tebenigusuna: e na veivinakati kei na yalododonu sa lako vata kei au ko koya, a ra lewe vuqa sa saumaka tani mai na nodra caka cala. 7Ia na gusudra na bete me sa maroroya ga na vuku, ia na vunau, me tarogi ga mai na gusuna: ni sai talatala i Jiova ni lewe vuqa ko koya.
8Ia koi kemudou, dou a lesu tani mai na sala; dou a vakatarabetaki ira na lewe vuqa e na vunau; dou a vakacacataka na veiyalayalati kei Levi, sa kaya ko Jiova ni lewe vuqa. 9Ia koi au talega, kaʼu a cakavi kemudou mo dou ka e beci ka kaisi vei ira na tamata kecega, me vaka ni dou a tawa vakabauta na noqu sala, ka sa kauta vakatani na vunau e na vuku ni mata ni tamata.
10SA dua bau vata na tamada kecega, se segai? sa dua bau ga na Kalou sa buli keda, se segai? eda sa dui cakacaka vakailasu vua na kai noda, ni da vakacacataka na veiyalayalati sa ia kei ira na noda qase, e na vuku ni cava?
11Sa ra cakacaka vakailasu na Juta, ia e dua na ka vakasisila sa caka e Isireli kei Jerusalemi; ni ra sa vakacacataka na Juta na ka e tabu me nei Jiova, na nona ka sa lomana ko koya, ka sa kauta na luvena na kalou tani me watina. 12Ena dui muduki ira tani ko Jiova na tamata ko ya era sa cakava na ka o qo, se ko koya na dauyadra se na daurogo, mai na veivale malo i Jekope, se ko koya sa cabora nai madrali vei Jiova ni lewe vuqa. 13Ia na ka o qo dou sa baki cakava vakarua, ka sa ubia nai cabocabo-ni-soro i Jiova e na wai ni mata, e na tagi, kei na tagi qoqolou, a sa sega kina ni goleva tiko nai madrali ko koya, se tara vakalomadonu mai na ligamudou.
14Ia dou sa kaya, E na vuku ni cava? E na vuku i Jiova ni sa vakadinadina vei kemudrau kei na watimu ni ko a cauravou, o koya ko sa cakacaka vakailasu kina, ia ka sa nomui tokani ko koya, kei na watimu ko a veiyalayalati kaya. 15Ia na lewe dua bauga sa cakava ko koya, se segai? ia ka tiko ga vua na vo ni yalo. Ia a cava e lewe dua bau kina? ni sa qara na kawa tabu. O koya o qo dou qarauna kina na yalomudou, ia vua ka watina na tamata ni sa cauravou, me kakua ni cakacaka vakailasu kina ko koya. 16Niʼu sa cata na tawase, sa kaya ko Jiova, na Kalou nei Isireli, kei na nona ubia na nonai sulu na tamata e nai valavala kaukauwa, sa kaya ko Jiova ni lewe vuqa: o koya o qo dou qarauna kina na yalomudou, mo dou kakua ni cakacaka vakailasu.
17DOU a vakaocataki Jiova e na nomudou vosa. Ia dou sa kaya, Keitou a vakaocataki koya li e na cava? Ni dou sa kaya, O ira kece era caka ca era sa vinaka e na mata i Jiova, sai ira talega e rekitaka ko koya; ke segai, Sa evei li na Kalou e lewa vakadodonu?
Currently Selected:
Ai Vola I Malakai Na Parofita 2: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
