Ai Vola I Isaia, na Parofita 41
41
Sa tarotarogi ira na tamata na Kalou, e na vuku ni nona loloma ki nai vavakoso lewe ni soro, 1-7. Sa vakaukauwataki ira na Isireli e na nona vosa ni yalayala, 8-20. Sa ka tawa yaga na kalou lasu, 21-24. O Jiova ga sa ia na veivakabulai, 25-29.
1DOU vakadirorogo vei au, na veiyanuyanu; ia me ra vakaukauwataki tale na veimatanitu: me ra toro voleka mai; me ra qai vosa: me da mai ia vata na veilewalewai.
2O cei ka vakauqeti koya mai cake na tamata yalododonu, ka kacivi koya mai ki na yavana, ka solia na veimatanitu e matana, ka qisia me rawai ira na tui? o cei ka soli ira me vaka na kuvu-ni-soso ki na nonai seleiwau, ka vaka na vu-ni-sila e cagina ki na nona dakai? 3Sa vakasavi ira ko koya, sa lako vakavinaka voli yani; na sala, sa sega ni butuka e na yavana. 4O cei sa kitaka ka cakava o qori, ka kaciva na veitabatamata mailiu? Oi au ko Jiova, nai vakatekivu, ka sa bula tikoga kei ira sa muri sara; sai au ga o qo.
5Sa kunea o qori na veiyanuyanu, ka sa rere; sa sautaninini na veiyalayala kei vuravura; era sa toro voleka, ka lako mai. 6Era sa vukea yadua na kai nona; a ra sa kaya yadua vua na kai nona, Tou gumatua. 7A rau sa veivaqaqataki vakai rau na dauceuceu kei na matai ni koula, kei rau na dauvakayagovinakataka e nai tuki, kei na dautukia e na drata ni kaukamea, a rau sa veikainaki e na vuku ni drega, Sa drega vinaka o qo; a rau sa vakadeitaka e nai vako, me kakua ni yavala.
8Ia ko iko, Isireli, na noqu tamata; o iko Jekope kaʼu sa digitaka, na kawa i Eparaama na wekaqu; 9o iko kaʼu a kauta mai nai yalayala kei vuravura, ka kaciva mai na sausaukana, ka sa kaya vei iko, Sai iko na noqu tamata; kaʼu a digitaki iko, ka sega ni biuti iko: 10kakua ni ko rere; niʼu sa tiko kei iko: kakua ni ko gole tani; niʼu sa nomu Kalou: kaʼu na vakaukauwataki iko; io, kaʼu na vukei iko; io, kaʼu na tokoni iko e na ligaqu i matau e daudina. 11Raica, era na madua ka taqaya ko ira kecega era sa yaloca vei iko; era na vaka na ka wale; era na rusa ga ko ira era veileti kei iko: 12o na qarai ira, ka tawa kunei ira, era dauveicudruvi kei iko: era na vaka na ka wale, kei na ka sa sega, ko ira era veivala kei iko: 13ni sai au ko Jiova na nomu Kalou, kaʼu na taura na ligamu i matau, ka kaya vei iko, Mo kakua ni rere; kaʼu na vukei iko: 14kakua ni ko rere, Jekope na baca, kei kemudou na tamata na Isireli; kaʼu na vukei iko, sa kaya ko Jiova, kei na nomui Vakabula, na Yalosavasava nei Isireli. 15Raica, kaʼu na cakavi iko moi samu-yara e gata ka vou ka vakabatina; o na samuta na veiulu-ni-vanua, ka butuqaqia me matailalai, ia na veiulu-ni-koro ko na cakava me tautauvata kei na qa ni sila: 16o na iriva, ena cagina tani e na cagi, ena duibiubiuti e na covulaca: ia ko iko ko na marautaki Jiova, ko na vakacaucautaki Koya na Yalosavasava nei Isireli.
17Ni ra sa qara wai na malumalumu kei na dravudravua, ka sa sega; ni sa mamaca na yamedra e na viagunu; oi au ko Jiova, kaʼu na rogoci ira, oi au na nodra Kalou na Isireli, kau na sega ni vakalaivi ira: 18kaʼu na basia e na talasiga na uciwai, kei na mata-ni-wai o na veibuca; kaʼu na cakava na lekutu me drano, kei na vanua mamaca mei vurevure ni wai: 19kaʼu na tea e na talasiga na sitari, kei na qumu, kei na kavika vulavula, kei na olive; kaʼu na tea vata mai lekutu na nokonoko, kei na paini, kei na dakua: 20me ra raica, ka kunea, ka vakananuma, ka kila vata, ni sa cakava na ka o qo na liga i Jiova, ka sa vakatubura ko Koya na Yalosavasava nei Isireli.
21Dou tauca mai na nomudou ka e leti-taki, sa kaya ko Jiova; dou tukuni kemudou me matata mai, sa kaya na Tui Jekope. 22Me ra tukuna mada mai, ka vakatakila vei keda na ka ena yaco mai; na ka eliu, se vakaevei o qori, me ra tusanaka mai vei keda, me da vakananuma, ka kila na kenai tinitini; se na ka ena yaco maimuri, me ra vakatakila mai vei keda. 23Dou tukuna mai na ka ena yaco maimuri, me keitou kila ni dou sa kalou; io dou caka ka vinaka, se caka ka ca, me keitou kidacalataka, ka vakaraica vata. 24Raica, dou sa ka sa sega ga, ia na nomudou cakacaka sa ka sa sega walega; sa ka vakasisila ko koya sa digitaki kemudou.
25Au a vakauqeta e dua mai na mata ni tokalau, a sa lako mai; mai na vanua sa cadra kina na siga ena masuta na yacaqu ko koya: ia ena lako mai vei ira na tui me vaka ki na drega ni vale, ka vaka na dautuli kuro ni sa butuka na tete. 26O cei ka tukuna mai nai vakatekivu, me keimami kila? se na gauna eliu, me keimami kaya, Sa dina? io ka sa sega e sa vakatakila, sa sega talega e sa tukuna, sa sega talega e sa rogoca na nomudou vosa. 27Oi au ga ka kaya eliu ki Saioni, Raica, raici ira! ia kaʼu na solia ki Jerusalemi e dua sa kauta mai nai rogorogo vinaka! 28Niʼu a vakaraica, ka sa sega e dua na tamata; io vei ira o qo, ka sa sega e dua sa tusanaka mai; kaʼu na tarogi ira tale, a ra na vosa mai, se segai? 29Raica, era ka sa sega wale kecega; sa ka sa sega wale talega na nodra cakacaka; sa cagi ka ka lala walega na nodra matakau e vakawaicalataki.
Currently Selected:
Ai Vola I Isaia, na Parofita 41: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
