Ai Vola I Isaia, na Parofita 24
24
Sa cudruva na vanua ko Jiova e na vuku ni nodrai valavala ca, 1-12. O ira sa vo, era vakasevi ki na veivanua, era na vakavinavinaka vua, 13-16. Ni sa cudruva na vanua ko Jiova ena vakalevulevuya na nona matanitu, 17-23.
1RAICA, sa sovadiva na vanua ko Jiova, sa vakatobocutaka, a sa dui vakasevi ira era tiko kina. 2Ia ena yaco vua na bete, me vaka vei ira na tamata; vua na turaga, me vaka vua na nona tamata; vua na marama, me vaka vua na nona vada; vua sa volitaka, me vaka vua sa volia; vua sa sarava, me vaka vua sa kerea; vua sa tawa vakaivolitaki, me vaka vua sa tawa vakaivolitaka. 3Ena sovadivi sara na vanua, ka vakacacani sara: ni sa cavuta na vosa o qo ko Jiova. 4Sa tagi na vanua, sa malai yani; sa ceguoca ko vuravura, sa malai yani; o ira na kai vuravura era turaga, era sa ceguoca mai. 5Sa vakadukadukalitaki talega ko vuravura e ruku ni lewena; ni ra sa talaidredre ki na vunau, era sa vakatanitaka nai lesilesi, era sa vakacataka na veiyalayalati tawa mudu. 6O koya o qo sa kani vuravura kina na cudru, a ra sa vakacalai ko ira sa tiko kina; o koya o qo sa vakamai kina na lewe i vuravura, ka ra lewe lailai na tamata sa vo. 7Sa tagi na waini vou, sa malumalumu na vaini, o ira na yalodaureki era sa vutugu. 8Sa cegu ni marautaki na lali, sa oti na kedra rorogo na daumamarau, sa cegu ni rekitaki na api. 9Ni ra meke era na sega ni ia vata kei na gunu waini; ena gaga na yaqona vei ira sa gunuva. 10Sa basuki sobu na koro sa lala: sa sogo tu na vale kecega, me sega e curu kina. 11Sa tagici na waini e nai saqata ni koro; sa dromu na rereki kecega, sa yali na marau ni vanua. 12Sa vo ga na rusa e loma ni koro, a sa basubasuki sara na matamata-ni-koro. 13Ia ena vakaoqo e loma i vuravura e na kedra maliwa na veimatanitu, ena vaka ni sa kurei na olive, ka vaka ni sa tomitomiki na vua ni vaini ni sa oti na vula i vaini. 14Era na tabalaka na domodra, era na ia na meke e na vuku ni ka vakaturaga i Jiova, era na kaikaila mai waitui. 15O koya o qo dou vakavinavinakataki Jiova kina mai cake, io na yaca i Jiova na Kalou nei Isireli, e na veiyanuyanu ni Wasawasa. 16Mai nai yalayala kei vuravura eda sa rogoca na meke, io na vakavinavinaka vua na yalododonu. Ia kaʼu a kaya, Ule koi au, ule koi au, au sa ca! era butako na daubutako; io, era butako vakalevu ko ira na daubutako. 17A rere, kei nai keli, kei nai cori, sa qai yacovi iko, na lewe ni vanua. 18Ia ena yaco, o koya sa na dro mai na domo ni rere ena lutu ki nai keli; o koya talega sa cabe cake mai nai keli ena coriti e nai cori; ni sa tadola nai sogo kei lomalagi, a sa yavala na yavu kei vuravura. 19Sa basubasuki ko vuravura; sa katela sara ko vuravura; sa vakayavalataki vakalevu ko vuravura. 20Sa yatayata ko vuravura me vaka na daumateni, a sa tautauwalili me vaka nai mocemoce lilili: ia sa bitaki koya na kena talaidredre; ena bale, ka sega ni tu cake tale. 21Ia ena yaco e na siga ko ya, ena qai cudruva ko Jiova nai vavakoso cecere sa tiko e na tikina cecere, kei ira na tui kei vuravura e dela i vuravura. 22A ra na vakasoqoni vata me vaka na bobula e nai keli, a ra na sogoti e na vale ni veivesu, ia ni sa oti na bogi e vuqa era na qai talevi. 23Ena qai taqaya na vula, ka madua na siga, ni na lewa ko Jiova ni lewe vuqa mai na ulu-ni-vanua ko Saioni, kei Jerusalemi, me vakarokorokotaki e na matadra na kena qase.
Currently Selected:
Ai Vola I Isaia, na Parofita 24: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
