A Nonai Vola Na Dauvunau 5
5
Sa ca ni ia wale na cakacaka vua na Kalou, 1-7. A veivakasaurarataki kei nai yau sa vuna na ocaoca wale, 8-17. A loloma ga ni Kalou sa yaga kina na ka e solia ko koya, 18-20.
1MO raica vinaka na yavamu ni ko sa lako ki na vale ni Kalou, ia mo kusarawa me vakarorogo, mo berabera ga ni cabora nai soro vakai ira na lialia: ni ra sega ni nanuma ni ra sa caka ca. 2Me kakua ni kusarawa na gusumu, kakua talega ni vakariri na lomamu me cavuta na vosa e na mata ni Kalou: ni sa mai lomalagi na Kalou, ia ko iko e vuravura: o koya me lailai kina na nomu vosa: 3ni sa lako mai na tadra e na ogaoga levu; ia na domona na lialia sa kilai e na vosa e vuqa. 4Ni ko sa ia na vosavavakini vua na Kalou, mo kakua ni berabera ni vakayacora; ni sa sega ni vinakati ira sa lialia: mo vakayacora na ka ko sa vosavavakini kina. 5Sa vinaka mo kakua ni vosavavakini, ka ca ni ko vosavavakini ka tawa vakayacora. 6Mo kakua ni solia na gusumu me vakacala na lewemu; mo kakua talega ni kaya e matana na agilose, ni sa nomu vosa cala: me vakacudrui na Kalou vakacava e na vuku ni domomu, me vakarusa na cakacaka ni ligamu? 7Ni sa levu na tadra ka vuqa na vosa, sa vuqa talega na ka wale: ia mo rerevaka ga na Kalou.
8Kevaka ko sa kunea ni ra sa vakasaurarataki na dravudravua, ka sa kauti vakaukauwa tani na lewa kei na caka dodonu e na dua na qali, kakua ni ko kidacala kina: ni sa vakaraica tiko ko koya sa cecere vei ira sa cecere sara; ia sa tiko e sa cecere vei ira. 9Ia na vuata ni vanua sa nodra kece na tamata: ia na tui sa qaravi mai na veiwere.
10O koya sa lomana na siliva ena sega ni mamau e na siliva; sei koya sa lomana nai yau e na kenai kuri: o qo tale na ka walega. 11Ni sa levu mai na ka, era sa lewe levu mai era kania, ia ka cava na kena yaga vei ira na kenai taukei, ka me raica walega e na matadra? 12Sa kamikamica na nona moce na tamata daucakacaka, se lailai se levu na ka e kania: ia na nonai yau levu na vutuniyau sa sega ni laivi koya me moce. 13Sa dua na ka ca sara kaʼu sa kunea e ruku ni siga, ia nai yau sa maroroi me nodra na kenai taukei ka ra sa ca kina: 14a sa yali ga nai yau ko ya e na cakacaka ca: a sa sucu mai e dua na luvena, ka sa sega na ka me sa tu vua. 15Me vaka sa curu luvawale mai na kete i tinana, ena lesu me lako tale me vaka ni sa lako mai, ka sega na ka e kauta e sa cakacaka kina, sa sega ga na ka e kauta yani e ligana. 16Ia o qo talega na ka ca sara, ni sa vaka sara na nona lako mai, ena vaka dina kina na nona lako yani: ia ka cava na kena yaga vua ni sa cakacaka me nona na cagi? 17E na nona siga kece tale ka sa kana ga e na butobuto, ia na rarawa levu kei na cudru sa ia vata kei na kena mate.
18Raica, na ka kaʼu a kunea: ni sa yaga ka kilikili kaya na tamata me kana ka gunu, ka rekitaka na vinaka ni nona cakacaka kece e sa oga kina e ruku ni siga e na veisiga kece ni nona bula, a ya sa solia vua na Kalou: ni sa nonai votavota o qori. 19Ia na tamata yadua talega sa solia vua na Kalou nai yau kei na kamunaga, a sa solia vua me kana rawa kina, ka me taura na nonai votavota, ka rekitaka na nona cakacaka; o qo nai solisoli ni Kalou. 20Ni na sega ni nanuma vakalevu na siga ni nona bula; ni sa rogo mai na Kalou e na reki ni lomana.
Currently Selected:
A Nonai Vola Na Dauvunau 5: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
