A Cakacaka 19
19
Sa soli na Yalo Tabu vei ira e so sa lotu mai Efeso, 1-7. Sa tiko mai Efeso ko Paula ka dauvunau, ka cakava na ka-mana e vuqa, 8-12. E so na Jiu, a tamata vakatevoro, era sa vakatovolea me ra vakasava tani e dua na tevoro e na yaca i Jisu, a ra sa dredreta, a sa tubu kina na lotu, 13-20. Sa qai vakacacani ira na tamata lotu ko ira e so, 21-41.
1A SA yaco ni sa tiko mai Korinica ko Apolosi, sa lako ko Paula ki na yasana vaka kicake, ka yaco ki Efeso: a sa kunea e so sa lotu, 2a sa kaya vei iratou, Sa yaco vei kemudou na Yalo Tabu ni dou sa qai vakabauta, se segai? A ratou sa kaya vua, Keitou sa sega mada ni rogoca se sa yaco na Yalo Tabu, se segai. 3A sa kaya vei iratou ko koya, Dou sa papitaisotaki beka e na cava? A ratou sa kaya, E na papitaiso i Joni. 4Sa qai kaya ko Paula, E dina ya ka dauveipapitaisotaki ko Joni e na papitaiso ni veivutuni, ka kaya vei ira na tamata, me ra vakabauti koya ena muri koya mai, o koya o qo, ko Karisito Jisu. 5Ia ni ratou sa rogoca, eratou sa papitaisotaki e na yaca ni Turaga ko Jisu. 6Ia ni sa tabaki ira ko Paula e na ligana, sa yaco mai vei ira na Yalo Tabu; a ra sa vosataka na vosa ni veivanua tani, ka dauvakatavuvuli. 7O iratou kecega na tagane eratou sa tinikarua beka.
8A sa lako ko koya ki na vale ni lotu, a sa vosa doudou tikoga ka vula tolu, a sa vakavuvuli ka vakadinadinataka na veika ni matanitu ni Kalou. 9Ia ni ra sa vakalomaqataki e so, ka sega ni vakabauta, ka sa vosavakacacataka na lotu e na matadra na lewe vuqa, sa qai lako tani maivei ira ko koya, ka tawasei ira tani era sa lotu, a sa dauvakatavuvuli tiko e na veisiga e na vale ni wili vola nei Tirano. 10A sa kitaka vakakina ka oti e rua na yabaki; ia era sa rogoca kina na vosa ni Turaga ko Jisu ko ira kecega era sa tiko mai Esia, o ira na kai Jutia, kei ira talega na kai Kirisi. 11A sa kitaka ko na Kalou na ka-mana vakaidina e so e na liga i Paula: 12a ra sa kauta tani mai na yagona nai tavoi e so kei nai sulu e so vei ira era tauvi-mate, a sa takali kina na veimate, a sa lako tani maivei ira ko ira na yalo ca.
13Ia ka so na kai Jutia era sa dauveilakoyaki, ka dauia me vakasavi ira na tevoro, eratou sa qai kitaka me ratou cavuta na yaca ni Turaga ko Jisu vei ira ka curuma ko ira na yalo ca, a ratou sa kaya, Keitou sa vakatalai kemudou tani e na yaca i Jisu, o koya sa vunautaka ko Paula. 14A ratou sa lewe vitu na luve i Siva na kai Jutia, ka bete levu, eratou sa kitaka vakakina. 15Sa qai vosa na yalo ca, ka kaya, O Jisu kaʼu sa kila, o Paula talega kaʼu sa kila; ia ko cei koi kemudou? 16A sa rika vei iratou ko na tamata sa tiko vua ko na yalo ca, a sa rawai iratou, ka kaukauwa vei iratou, a ratou sa dro tani kina mai na vale ko ya, a ratou sa luvawale ka vuetaki. 17A sa kila na ka o qo ko ira kecega, na kai Jutia kei na kai Kirisi talega, era sa tiko mai Efeso; a sa lutu vei ira kecega na rere, a sa vakabekabei na yaca ni Turaga ko Jisu. 18A sa lewe vuqa vei ira sa vakabauta era sa lako mai, ka vakatusa, ka vakatakila na nodrai valavala. 19A sa lewe vuqa talega vei ira era daukitaka eliu nai lawaki e so, era sa soqona vata na nodrai vola, ka visa e na matadra kecega; a ra sa wilika vata na kedrai voli, a ra sa kunea ni sa limasagavulu na udolu nai lavo siliva. 20Sa tubu vakaukauwa vakaoqo na vosa ni Turaga, ka gumatua.
21Ia ni sa oti na veika o qo, sa nakita ko Paula e lomana, me lakovi Masitonia mada kei Akaia, ka qai lako ki Jerusalemi, a sa kaya, Ni kaʼu sa yaco oti kikea, e dodonu meʼu qai raici Roma talega. 22A sa qai talai rau ki Masitonia na lewe rua na nonai tokani, ko Timoci kei Irasito; a sa tiko vakadede vakalailai ko koya mai Esia.
23Ia e na gauna ko ya sa tubu vakalevu na ue e na vuku ni lotu. 24Ni sa dua na yacana ko Timitirio, a matai ni siliva, sa daucakava e na siliva nai vakatakarakara ni bure kalou nei Tiena, a sa vakalevutaka kina na nodrai yau na matai; 25ni sa kacivi ira vata, kei ira na tamata era sa daucakacaka vakakina, sa kaya ko koya, Oi kemudou na turaga, dou sa kila ni sa cakacaka o qo eda sa rawata kina na nodai yau. 26Ia dou sa qai raica ka rogoca, ni sa sega mai Efeso duaduaga, sa vo e lailai ga me oti ko Esia taucoko, era sa lewe vuqa sara kina sa rawata ko Paula o qo, ka saumaka tani, ni sa kaya, era sa sega ni kalou ko ira sa caka e na liga: 27ia sa voleka ni ca kina na noda cakacaka o qo, ka sega ni koya duaduaga o qo, sa voleka talega me vakawaletaki na bure i Tiena na kalouyalewa levu, ka vakaoti na kena levu, o koya sa soro vua ko Esia taucoko kei vuravura.
28Ia ni ra sa rogoca, era sa sinai e na cudru, a ra sa qoqolou, ka kaya, Sa levu ga ko Tiena sa nodra na kai Efeso. 29A sa sinai na koro taucoko e na ue; a ra sa tauri Keio vakaivalu kei Arisitariko, erau sa kai Masitonia, erau sa daulako kei Paula, a ra sa curu vakaukauwa vata ki na bure levu.
30Ia ni sa via curu ko Paula vei ira na tamata, era sa sega ni vakalaiva ko ira era sa lotu. 31O ira e so era sa turaga mai Esia, era sa nonai to, a ra sa talaki vua, a ra sa masuta me kakua ni doudou me curu ki na bure levu. 32A ra sa dui qoqolou: ni ra sa ue nai vavakoso lewe vuqa; a sa lewe levu vei ira era sega ni kila se cava era a soqo vata kina.
33Ia e so vei ira na lewe vuqa era sa vakaturi Alekisadro cake, ni sa cikevi koya ko ira na Jiu. A sa vakatabataba ko Alekisadro e na ligana, a sa via tusanaki koya vei ira na tamata. 34Ia ni ra sa kila e kai Jutia ko koya, sa sosoraki vata na domodra ka oti e rua na tiki-ni-siga, ka qoqolou vaka, Sa levu ga ko Tiena na nodra na kai Efeso.
35Ia ni sa tarovi ira oti na lewe vuqa ko na mata-ni-vanua sa daumaroroya nai vola ni koro, sa kaya, Oi kemudou na kai Efeso, o cei na tamata sa sega ni kila ni sa dausoro na lewe ni koro ko Efeso vua na kalouyalewa levu ko Tiena, kei na matakau sa lutu sobu maivei Jupiteri? 36E na vuku ni sa sega ni vakatitiqataki rawa na veika o qo, sa dodonu mo dou tiko malua, ka kua ni kitaka vakailoa e dua na ka: 37ni dou sa kauti ira mai na tamata o qo kike, era sa sega ni daubutako mai na vale ni soro, se vosavakacacataka na nomudou kalouyalewa. 38Ia kevaka sa via beitaka e dua ko Timitirio, kei ira na matai era sa nonai to, sa ia na veilewai, a sa so na turaga ni veilewai: me ra laʼki veileti. 39Ia kevaka sa dua tani na ka dou sa taroga, ena lewai e nai vavakoso e vaka na vunau. 40Ni na beitaki beka vei keda na ue, e na vuku ni ka sa yaco edaidai, ni sa sega e dua na ka e vuna eda na tusanaka rawa kina na soqoni vata o qo.
41Ia ni sa oti na nona vosa vakaoqo, sa qai vakatalai ira nai vavakoso.
Currently Selected:
A Cakacaka 19: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
