A Cakacaka 17

Sa laʼki vunau mai Cesalonika ko Paula, a sa vakabauta ko ira e so, ka cudru e so, 1-9. Era sa vakatalai koya kei Seilasi ki Peria, a ra sa vakabauta kina na kai Peria e lewe vuqa, 10-15. Sa lako ki Aceni ko Paula ka vunau, a sa vakabauta ko ira e so, 16-34.

1IA ni ratou a lakovi Amifipoli kei Apolonia, eratou sa yaco ki Cesalonika, a sa tu kina e dua na nodra vale ni lotu na kai Jutia: 2a sa curu kina vei ira ko Paula, me vaka na nonai valavala, a sa tolu na siga ni vakacecegu sa vakavulici ira kina mai nai Vola, 3ni sa vakatakila ka vakadinadina, ni sa kilikili kei na Karisito me vosota na mate, ka tu cake tale mai na mate; sa vaka, Ni sai koya na Karisito, o Jisu o qo, o koya kaʼu sa vunautaka vei kemudou. 4A sa vakabauta ko ira e so, ka laʼki veitokani kei Paula kei Seilasi; kei ira e lewe vuqa na kai Kirisi era a lotu vaka-Jiu, kei ira na marama era sa sega ni lewe lailai.

5Sa qai vu vu ko ira na Jiu era sa tawa vakabauta, a ra sa kauta e so vei ira na kaisi ca, a ra sa vakasoqoni ira vata na lewe vuqa, ka vakidroataka na koro; a ra sa cici vakaivalu ki na vale i Jesoni, a ra sa vakatovolea me kauti iratou vei ira na lewe ni koro. 6Ia ni ra sa sega ni kunei iratou, era sa yarataki Jesoni kei ira na veiwekani e so vei ira na turaga ni koro, ka kaci, O iratou o qori eratou sa vukici vuravura me ca, eratou sa tadu talega mai kike; 7a sa kauti iratou ko Jesoni ki nona vale; a ra sa talaidredre ko ira kecega o qo ki na vunau i Sisari; a ra sa kaya ni sa dua tale na tui, o Jisu. 8A ra sa vakidroataki ira na lew e ni koro kei ira na kena turaga, ni ra sa rogoca na veika o qori. 9Ia ni ra sa vinakata na vosa ni yalayala i Jesoni kei ira na tani, era sa vakalaivi ira me ra lako.

10Ia ko ira na veiwekani era sa kusarawa me ra vakatalai Paula kei Seilasi ki Peria e na bogi; ia ni rau sa yaco kina, erau sa lako ki na nodra vale ni lotu na kai Jutia. 11A ra sa uasivi vei ira na kai Cesalonika ko ira o qo e na yalo vakaturaga, ni ra sa vakarogoca na vosa e na loma e vinakata sara, a ra sa dauvakasaqaqara e nai Vola e na veisiga, se sa vakakina na ka o qori, se segai. 12O koya ga o qo era sa lewe vuqa kina era sa vakabauta; kei ira talega na marama ni Kirisi, kei ira na tagane, era sa sega ni lewe lailai. 13Ia ni ra sa kila ko ira na Jiu mai Cesalonika ni sa vunautaka na vosa ni Kalou ko Paula mai Peria, era sa lako kina talega, ka vakayavalati ira na lewe vuqa. 14A ra sa kusarawa kina na veiwekani me ra vakatalai Paula yani me lako vaka ki na waitui: a rau sa tiko laivi ga maikea ko Seilasi kei Timoci. 15Ia ko ira sa vakaraici Paula era sa kauta ki Aceni: ia ni ra sa taura nai tatau vei Seilasi kei Timoci me rau lako kusarawa vua, era sa qai lako.

16Ia ni sa waraki rau tiko mai Aceni ko Paula, sa katakata vakalevu na lomana, ni sa raica sa sinai na koro e na veimatakau. 17O koya sa veileti kina ko koya kei ira na kai Jutia e na nodra vale ni lotu, kei ira talega era sa lotu vakai ira, kei ira talega era sa sota kaya e na rara ni veivoli e na veisiga. 18A ra sa qai veileti kaya, e so na nodra vuku nai tokani i Epikuro, kei ira na Sitoike. A ra sa kaya e so, A cava mada sa via kaya na kaisi dauvosa o qo? e so tani, O koya sa vaka e dua sa vakatakila mai e so na kalou vou: ni sa vunautaki Jisu vei ira ko koya, kei na tu cake tale mai. 19A ra sa qai kauta, ka tubera ki na vanua-cecere nei Arisi, ka kaya, Ena rawarawa beka me keimami kila se cava nai vakavuvuli vou o qo ko sa mai tukuna? 20ni ko sa kauta mai e so na veika e veivakidacalataki ki na daligaimami: keimami sa via kila kina, se cava nai balebale ni veika o qo. ( 21Ni sa sega na ka tani era sa daukitaka ko ira kecega na kai Aceni, kei ira na vulagi era sa tiko kina, a ya ga me ra veitukutukunitaka, se rogoca, e dua na ka vou.)

22Sa qai wavu tu ko Paula e na loma ni vanua-cecere nei Arisi, ka kaya, Oi kemudou na kai Aceni, au sa kunea e na ka kecega ni dou sa dausoro vakalevu. 23Io, niʼu sa lako voli, ka raica na veika dou sa soro kina, au sa kunea talega e dua nai cabocabo-ni-soro sa volai kina, VUA NA KALOU E TAWA KILAI. Ia ko koya dou sa soro kina ni dou sa tawa kila, au sa qai tukuna vei kemudou. 24A Kalou ka buli vuravura kei na ka kecega sa tu kina, sa Turaga ga ko koya mai lomalagi kei vuravura, a sa sega ni tiko e na veivale ni soro sa caka e na liga; 25a sa sega talega ni qaravi e na liga ni tamata, me vaka e bau yaga vua e dua na ka, ni sa solia ga ko koya vei keda kecega na bula, kei na cegu, kei na ka kecega; 26a sa buli ira, era sa dra vata, na lewe ni veivanua kecega, me ra tiko e na dela i vuravura taucoko, a sa lesia na veigauna ka digitaki eliu, kei nai yalayala ni nodra veiyasana; 27me ra vakasaqara na Turaga, de ra vakayayamo beka vua, ka kunea, ia sa sega ga ni yawa ko koya vei keda yadua; 28ni da sa bula vei koya, ka yavala, ka rawata mai vua na noda bula; me vaka talega sa veikainaka ko ira na nomudou dau-ni-vucu e so, Sa nona kawa talega koi keda. 29O qo, ni da sa kawa ni Kalou, e sega ni dodonu me da nanuma ni sa tautauvata ko na Kalou kei na koula, se na siliva, se na vatu, a ya sa ceuta na matai se na tamata vuku. 30Ia na gauna ni lialia sa vosota oti ko na Kalou; a sa vakarota e na gauna edaidai vei ira na tamata kecega e na veivanua kecega me ra veivutuni; 31ni sa lokuca ko koya na siga, ena lewai vuravura kina e na lewa vakadodonu, vei koya na tamata sa lesia ko koya; a sa vakadinadina vei ira na tamata kecega, e na nona vakaturi koya cake tale mai na mate.

32Ia ni ra sa rogoca na tu cake tale mai na mate, sa vakalialia ko ira e so; ka so sa kaya, Keitou na rogoci iko tale e na ka o qori. 33Sa qai lako tani yani e na kedra maliwa ko Paula. 34A sa kabiti koya e so na tamata, a ra sa vakabauta; e dua vei ira ko Tionisio mai na mataveilewai mai na vanua-cecere nei Arisi, kei na yalewa sa vakatokai ko Tamarisi, kei ira tale e so vatu kei rau.

Currently Selected:

A Cakacaka 17: FIJ1864

Highlight

Copy