A Cakacaka 11

Sa vunauci ko Petero e na vuku ni sa vakavulica e so era sa matanitu kisau; a sa tukuna kecega na vuna, 1-18. Sa tubu na lotu mai Feneisi, kei Kipiro, kei Anitioki, 19-21; a sa talai ko Parinapa me vakavulici ira, 22-26. Era sa solia na nodra ka-ni-loloma kivei ira na kai Jutia ko ira mai Anitioki, 27-30.

1A RA sa rogoca ko ira nai apositolo kei ira na veiwekani mai Jutia ni sa vakabauta na vosa ni Kalou ko ira talega era sa matanitu kisau. 2Ia ni sa lako cake mai ki Jerusalemi ko Petero, era sa veileti kaya ko ira sa cili, 3a ra sa kaya, O sa curu vei ira na tamata era sa sega ni cili, ka kana vata kei ira. 4A sa vakatekivu ko Petero, ka veivakadutaitaka e na vosa vei ira, ka kaya, 5Au a tiko e na koro ko Jopa ka masu: ia ni sa lutuki au na bibi, au a raica na raivotu, Sa dua na ka sa lako sobu mai, e vaka nai tutuvi levu, sa tukuci sobu mai lomalagi e na tutuna e va; a sa yaco sara kivei au: 6ia ni kaʼu sa vakaraica matua, ka vakananuma, au sa kunea kina na manumanu ni vanua e yavai va, kei na manumanu kila, kei na veika sa dauqasi voli, kei na manumanu ni lagi. 7Au sa qai rogoca e dua na vosa sa kaya vei au, Tu cake, Petero; mo vakamatea, ka kania. 8Au sa qai kaya, Kakua, Turaga: ni sa sega na ka tabu se na ka tawa-savasava sa curu ki na gusuqu e na dua na siga. 9A sa kaya tale vei au na vosa mai lomalagi, A ka sa vakasavasavataka ko na Kalou, mo kakua, ni vaka e tabu. 10A sa caka vakatolu na ka o qo: a sa qai yavi kece tale ki lomalagi. 11Ka raica, e tolu na tamata sa qai tadu ki na vale kaʼu sa tiko kina, a ratou sa talai mai Sisaria vei au. 12A sa kaya vei au na Yalo meʼu lako vata kei iratou, me kakua ni veileti na lomaqu. A keitou sa lako vata talega kei na veiwekani o qo e lewe ono, a keitou sa curu ki nona vale na tamata ko ya: 13a sa vakatakila vei keitou ko koya, ni ka raica na agilose e na nona vale, sa wavu tu, ka kaya vua, Tala e so na tamata ki Jopa, me lakovi Saimoni, a yacana talega ko Petero; 14o koya ena tukuna vei iko na vosa ko na bula kina, kei ira kecega na nomu lewe ni vale; 15Ia ni kaʼu sa vakatekivu me vosa, sa lutu vei ira na Yalo Tabu, me vaka vei keda e na kenai vakatekivu. 16Au sa qai nanuma na vosa ni Turaga, ni sa kaya, Sa dina ka veipapitaisotaki ko Joni e na wai; ia dou na papitaisotaki e na Yalo Tabu. 17Ia ni sa qai solia vei ira ko na Kalou nai solisoli me vaka vei keda, oi keda sa vakabauta na Turaga ko Jisu Karisito; o cei koi au, meʼu tarova rawa na Kalou? 18Ia ni ra sa rogoca na veika o qo, era sa vagagalu, a ra sa vakarokorokotaka na Kalou, ka kaya, Sa dina ni sa qai solia ko na Kalou vei ira talega na veimatanitu kisau na veivutuni me ra bula.

19IA ko ira sa dui veiseyaki e na veivakacacani sa tubu e na vuku i Sitifeni, era sa lako vaka ki Feneisi, kei Kipiro, kei Anitioki, a ra sa tukuna tabakidua na vosa vei ira ga na Jiu. 20A sa so vei ira era sa kai Kipiro kei Kirini, ni ra sa yaco ki Anitioki, era sa vosa vei ira ka vulagi mai na veimatanitu kisau, a ra sa vunautaka na Turaga ko Jisu, 21a sa tiko vata kei ira na liga ni Turaga: a ra sa lewe vuqa kina sa vakabauta, a ra sa saumaki mai ki na Turaga. 22Sa qai yaco na kedrai tukutuku ki na daligadra nai vavakoso lewe ni soro mai Jerusalemi: a ra sa talai Parinapa, me lako sara ki Anitioki: 23ia ni sa tadu ko koya, ka raica na loloma ni Kalou, sa reki kina, a sa vakarota vei ira kecega, me ra kabita na Turaga e na loma e gumatua. 24Ni sa tamata vinaka ko koya, a sa sinai e na Yalo Tabu kei na vakabauta: a sa lewe vuqa kina na tamata sa kuri ki na Turaga.

25Sa qai lako ko Parinapa ki Tarisu, me vakasaqarai Saula: 26ia ni sa kunea, sa kauta ki Anitioki. A sa dua dina na yabaki erau sa dausoqoni vata kina kei ira nai vavakoso lewe ni soro, ka ra sa lewe vuqa erau sa vakavulica. Ia mai Anitioki era sa vakatokai mada eliu kina ko ira sa lotu mei tokani i Karisito.

27Ia e na gauna ko ya sa lako mai na parofita e so mai Jerusalemi ki Anitioki. 28A sa tu cake e dua vei ira, ko Akapo na yacana, a sa tukuna, ni sa vuna ko na Yalo, ni na yaco emuri na dausiga levu e na vanua taucoko; a ka o qori sa yaco e na gauna sa tui kina ko Kilotiu Sisari. 29Ia era sa lewa ko ira sa lotu me ra solia yadua na nodra ka-ni-loloma, me vaka era sa dui rawata, vei ira na veiwekani era sa tiko mai Jutia: 30a ra sa kitaka vaka talega kina, ka vakatalai Parinapa kei Saula me rau kauta vei ira na qase.

Currently Selected:

A Cakacaka 11: FIJ1864

Highlight

Copy