Dodadi 35
35
O Yakubu wolio o Betelika
1De Ma Jou wihibehehongo o Yakubika wato, “Yakubu, ma oraha adonoka ngona nomaturuuru ma ngiika abe ma dihira nohiromanga o Betele de ma titi ngona nato to Ngohi ahi tau genangoka.#35:1 O ngi abe ma dihira o Yakubu wohiromanga o Betele abe ma titi Ma Jou ai tau angamoi wamake o buluhara Ma Jouino genangoka ma oraha woara o Mesopotamia ma tonakika abe ai pepe o Labana wogogere genangoka. O ade-ade naa hamake o Dodadi 28:10-22. De nako nomahiadonoka genangika de o huhuba ma ngi nodiai abe gea napake la nomahihuba Ngohiye. Ngohi naa Ma Jou abe ma dihira tomahimatoko ngonaika ma oraha ngona genangoka angamoi ani riaka o Esau nimodongo hiadono ngona noara.” Hokogea Ma Jou ai behehongo o Yakubika.
2-3Ho o Yakubu wahingahu onangika ai tauoka de ai nyawa mata-mataika wato, “Naa moi ahi demo kiani ngini mata-mata niatotoihene. Abe ma dihira ngohi ahi kangela ma goronaka de tomaniata de Ma Jou wohibaluhu. De itaana wohiniiki de wohiduhunu ngaro o kiaika dika toiki. De naa Ma Jou wohihibehehongoli la toiki o ngiika abe genangoka Una womahimatoko ngohino ho ma ngi gea tohiromanga Ma Jou ai Tau. Igoungu, ma dihira genangoka wohiduhunu ahi kangela ma goronaka. De genangoka ahao o huhuba ma ngi todiai de gea ena tatingakoka Ma Jouika la homahuba genangoka Unangiye. Ho ngone naa hoiki homahuba masara ko hoikuahi de kiani homahitebinohi. Ho ti ngini nia pangao abe naga nanga hidogoronaka kiani niakokiumoka de ngone homaohiki de homaturuuru nanga pakeanga abe ma titi hotebinoka Ma Jou ai himangoka. Ho gea mata-mata ibooto hodiai de ahao ka idadi hosobo hoiki o Betelika.” Hokogea o Yakubu wahigaro onangika.
4Ho ona mata-mata yakokile o pangao abe naga onangoka de ihidoaka o Yakubika de naga ihidoakoli manga ngaukuku mata-mata abe enangoo hoka o popangao ma kiahonanga. De ma kiahonanga gea mata-mata o Yakubu watoomuino de ahao wohibaiti o gota moi ma timiuku abe naga o Sikeme ma datekoka.
5De genangoka ona yosobo ma, ko moiua yaparangi. Abe ngaro o tonakoka gea naga ma kota ma ngoe masara o nyawa mata-mataika genangoka Ma Jou duru wahimodongo o Yakubika ho hiadono ko yamoroinua yaparangi. 6De ipaha yomahiadonika o Beteloka abe ma oraha gea o Kanani ma nyawa ka ihiromangohi ma tonaka gea o Luusu. 7De genangoka o Yakubu wodiai o huhuba ma ngi de ena gea wohiromanga, “Ma Jou ai Tauoka ai Huhuba ma Ngi” angamoi o Beteloka gea Ma Jou womahimatoko unangika ma oraha wimodongo o Esauika hiadono woara.
8De yogogere o Beteloka ko itedekanuahi de o ngo Debora mohonenge. De muna gea abe ma dodihiraino momipaliara o Yakubu ngoi meme, o ngo Ribeka, ma oraha ami etetekino. Masara ma oraha naa o ngo Debora duru imiperekioka ho mohonenge de imilungunu dau o tonaka ma dolaka o Betele ma timiuku abe naga o gota ma amoko genangoka. De ahao ma gota gea ihiromanga, “O Huha ma Gota ma Amoko,” la idadi o hohininga abe manga huha ma oraha imilungunu o gota gea ma timiuku.
9Masara ma oraha o ngo Debora ko mohonenguahi, abe ona ka de yomahiadonoka o Betelika, de Ma Jou womahimatokoli o Yakubika. Naa manga dekanoka yoikoka abe o Labana ai tonaka o Padana-Arama#35:9 Abe ma dihira ihiromanga o Harana ma tonaka, ika-ika ihiromangoli o Padana-Arama ma tonaka, de ahao ihiromangoli o Mesopotamia ma tonaka. Ho o tonaka moi dika de ma romanga hange. yanoa de ahao naa o Yakubu woboali o Betelino. De ma oraha gea ka de womahiadonoka de Ma Jou womahimatokoli unangika la wihiowa. 10Abe wihingahu unangika wato, “Ngona naa ani romanga o Yakubu masara naa taturuuruoka. Ho ani romanga ko o Yakubokaua angamoi tonihiromangoli o Isiraele. Ho naa de ka ihikaika o nyawa inifetongo o Isiraele.”#35:10 Nako ma romanga o Yakubu ma titi, “una abe wotobaribuutu o nyawaika,” de ma romanga o Isiraele ma titi, “wotobaribuutu Ma Jouika.”
11De Ma Jou wohigila-gila wotemo o Isiraelika wato, “Ngohi Ma Jou Tokokurutiye abe mata-mataika naga ahi kuahaka de naa tonihibehehongo la ngini nifaa-faatuku la o dunia niaomangoka de o nyawa. To Ngohi ahi mau la ngini abe nimahiromanga o Isiraele ma nyawa nidadi o dutu moi ma amoko o duniaka. De ahao ngona o Isiraele naga o dutu manga ngoeoli yomaboa de hiadono naga o kokoano abe yomaboa to ngona ani totoforaukuino. 12De o tonaka naa abe tahidoaka de ma behehongoka o Abarahaamika, de o Isakika, de naa tonihidoakoli ngonaika. Igoungu, idadi to ngona de ka hiadono idadi ani totoforauku manga tonaka.” 13Hokogea wihingahu o Isiraelika ibooto de ahao Ma Jou wolio dakuiye.
14De ma dingiioka gea abe Ma Jou wotemo o Yakubika, duru genangoka o Yakubu wohigoko o hakaru moi gea abe duru ma gurutu la idadi o hohininga ma liate. De ahao o angguru ma teongo wogopoa o hakaruku ibooto de o saitunu ma hofoko ma minyaoo wale de enangoli wogopoa o hakaru ma lokuku la wohitunguu ma hakaru gea watingakoka Ma Jouika. 15De ma ngi gea abe ma dihiraino Ma Jou witemo o Yakubika ho hiadono wohiromanga, “Ma Jou ai Tau,” abe nako to ona manga demo, “o Betele.”#35:15 Abe ma romanga o Betele ma titi, “o tau abe Ma Jou wapake.” Dodadi 28:19
O ngo Rahele de o Isaka yoborihonenge
16De o Beteloka gea yosobo masara o ngo Rahele de ami badangoka abe ami dodubuhoka. Manga dumutu o Efaraata masara ka manga gurutikahi de o ngo Rahele ami gahe adonoka momagerewoto de ami kangela ilamokoholi. 17De muna duru mokangela momagerewoto masara muna gea momiduhu-duhunu ahao momihingahu mato, “Rahele, ngaro ufa nahuha ani ngofaka ka o nauroli namakeoka.”
18Masara o ngo Rahele ka de momangakunu de mohonenge de ngade-ngade ami ngomaha itoaka de motemo mato, “Una naa duru o huha ma ngofaka ho kiani nihiromanga o Ben-oni.”#35:18 Nako to ona manga demo o romanga o Ben-oni ma titi, “o Huha ma ngofaka” de o Benyamini ma titi, “o ngofaka abe wotobadodiawo ahi nirakino.” Masara ai baba wato, “Koua, hokogenangua angamoi una ahao duru ahi datekoka ho tihiromanga, ‘Ahi Nirakoka.’” Ho de to ona manga demo o Yakubu wifetongo, “o Benyamini.”
19Ho gea o ngo Rahele mohonengoka de imilungunu o ngekomoka abe o nyawa yaniiki nako yoiki o Efaraatika, ma titi o Beteleheeme ma kotaika. 20De ami lungunu gea o Yakubu wohitunguu de o hakaru ma amo-amoko wohigokoiye de ma oraha naa ami lungunu ma dodunguu gea nagahi genangoka.
21De o ngo Rahele ka de imilungunu ibooto de yosobo de yoboa o ngi moiino ma romanga, “O Gogoana ma Ngi ma Gogurutiye”, abe nako to ona manga demo o Migal-Edere.#35:21 O gogoana ma ngi ma gurutiye gea o nyawa yodiai abe yafafo o hakaru duru kohagurutiye la ka idadi yodoaiye genangoka la yogoana manga aewani ma duduono. De o Yakubu womahidodogumu genangoka o gogoana ma ngi ma datekoka. 22De ma oraha yogogere genangoka o Rubene yomaidu de o ngo Bilaha, ai baba ngoi fekata momatengo o gilaongino. De naga o nyawa abe yahioriki manga howono de gea ma titi iwihingahu o Yakubika.
De o Yakubu ai ngofaka o nau-nauru yangimoi de yahinooto hokonaa: 23Ai ngofaka o riaka, abe o ngo Lea ami ngofaka o domoro, gea o Rubene de ai doo-dodoto abe ona manga meme ka moi o Simeono, de o Lewi, de o Yehuda, de o Isakara, de o Sebulono. 24De o ngo Rahele ami ngofaka o Yusupu de o Benyamini. 25De o ngo Rahele ami duduhunu o ngo Bilaha to munangino ami ngofaka o Daana de o Nafatali. 26De o ngo Lea ami duduhunu o ngo Sipa to muna ami ngofaka o Gaada de o Asere. Ma oraha o Yakubu ai ngofa-ngofaka mata-mata gea yomaboa una ka wogogerohi ma tonakoka abe ma dihira gea ihiromanga o Padana-Arama abe ihiromangoli o Mesopotamia ma tonaka.
27De ipaha o Yakubu womahiadonoka ai baba o Isaka ai tauika abe naga o Mameroka abe imahikitigino de o Kiriata-Aba abe ahao o nyawa ihiromangoli o Heborono. O Isaka ai gogere gea duru ai baba o Abarahaama ai dingiioka abe ma dekana una wogogere o Mameroka. 28De o Isaka ka ai dekanohi wowango o duniaka hiadono ai taongo o ratuhu moi de moritufange ai dekana. 29Hokogea duru o Isaka iwiperekioka de ahao ai ngomaha itoaka ho unangoo wohonenge ho wahidotoomuino ai totoforaka manga jiwa ma ngioka abe ona yododihiraika yohonenge. De o Isaka ai ngofaka o Esau de o Yakubu yomakuduhunu iwilungunu manga baba.
Currently Selected:
Dodadi 35: MJDD
Highlight
Copy
Compare
Share
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
