Dodadi 10
10
O Nuhi ai ngofa-ngofaka de ai totoforauku manga ade-ade
1O nguihi ipahaika de o Nuhi ai ngofa-ngofaka o Seeme, de o Haama, de o Yafete, onangoo ahao manga ngofa-ngofaka yamake. Ho naa o Seeme, o Haama, de o Yafete manga totoforauku manga ade-ade ma titi hokokia yolape-lapeuku.
O Yafete ai totoforauku
2O Yafete ai ngofa-ngofakuku de ai totoforauku hokonaa manga romanga: o Gomere, o Magogo, o Madai, o Yawana, o Tubala, o Meseke, de o Tirasa.#10:2 Ho ona abe ahao ihikauku yomahitoomu-toomu de o roma-romangika naa yapake la manga dutu yomahiromanga, ona mata-mata gea to Yafete ai totoforauku.
3De o Yafete ai ngofaka o Gomere, to una ai ngofa-ngofaka o Ase-kenasa, o Rifata, de o Togarama. Ho o Gomere ai totoforauku naga utu abe yomahitoomu ma titi manga tofora o Ase-kenasa ai romanga ho yomahiromangika o Ase-kenasa ma nyawa. De hokogenangoli de o Gomere ai ngofa-ngofaka o Rifata de o Togarama ho ahao naga o nyawa abe yomahiromanga o Rifata ma nyawa de o Togarama ma nyawa. 4De hokogenangoo de o Yafete ai ngofaka o Yawana abe to unangoo ai totoforauku. Ona yomahitoomu o Yawana ai ngofa-ngofakuku manga roma-romangika hokonaa: naga yomahiromanga o Elisa ma nyawa, de utu o Tarasiisi ma nyawa, de o Kitimi ma nyawa, de utuoli o Dodanimi ma nyawa. 5De o Yafete ai totoforauku naga utu yomahikokabarihi o tonaka ma ngoeika abe naa yogogere o gahi ma date-datekoka. Ho naa ibooto ma titi o Yafete ai totoforauku abe o kiaka manga tonaka amomoi de to ona manga demo amomoi de manga fam de manga dutu homoi-homoi.
O Haama ai totoforauku
6De o Haama ai ngofa-ngofakuku de ai totoforauku hokonaa manga romanga: o Kusi, o Mesiiri, o Puutu, de o Kanani.#10:6 Ho ona abe ahao ihikauku yomahitoomu-toomu de o roma-romangika naa yapake la manga dutu yomahiromanga, ona mata-mata gea to Haama ai totoforauku.
7De o Haama ai ngofaka o Kusi, to una ai ngofa-ngofaka o Seba, o Hawila, o Sabata, de o Raema. Ho o Kusi ai totoforauku naga abe yomahitoomu-toomu manga tofora manga roma-romangika gea ho ahao naga o nyawa yomahiromanga o Seba ma nyawa, de o Hawila ma nyawa, de o Sabata ma nyawa, de o Raema ma nyawa. De o Raema gea naga to unangoo ai ngofaka yahinooto o Sieba de o Dedana abe ahao naga o nyawa yomahitoomu-toomu manga roma-romangika gea ho ahao naga o nyawa yomahiromanga o Sieba ma nyawa de o Dedana ma nyawa.
8De o Kusi ai ngofaka idodutu naga womatengo ai romanga o Nimoro de una duru wotomoroini hiadono o nyawa iwigorakiye ma titi wososawaro wahikaaturu o nyawa la hiadono manga ngoe ka idadi wapareta. 9De o Nimoro duru wososawaro wolimoro ho duru iwimagawe wolimoro hiadono Ma Jou wihioriki duru watotoma. Ho gea ma titi hiadono nako hoka naga womatengo duru wosawaro wotobalimo-limoro de o nyawa iwihigiriiri ato, “Unangoo gea duru watotoma o inomo imaketero hoka o Nimoroli abe Ma Jou o Yaweoo wihioriki.” 10De o Nimoro ai kokawaaha abe wahikoano duru ma dodihiraka, ona gea yogogere o Sineara ma tonakoka, angamoi genangoka wohititi abe wahikoano o nyawa-nyawaika. De ma tonakoka gea naga o kota abe ma romanga o Babele, de o Eraka, de o Akada, ho o nyawa abe yogogere o kota-kotaka gea mata-mata o Nimoro wahikoano. 11Genangoka de ahao ko manga ngoe o nyawa wahikoano abe woiki o Asuru ma tonakika de genangoka wohigoko o kota utuoli abe o Niniwe ma kota, de o Rehobo-Iri ma kota, de o Kalaha ma kota. 12De ahao o Niniwe de o Kalaha ma hidogoronaka wohigoko o kota moioli ma romanga o Resene, de ipaha de ahao o kota hange gea imakahumoka hiadono idadi hoka o kota moi dika abe duru kohaamoko.
13De o Haama ai ngofaka o Mesiiri wodadi to ona manga tofora idodutu abe yomahiromanga o Lidia ma nyawa, o Anamimi ma nyawa, o Lehabimi ma nyawa, o Nafatuhimi ma nyawa, 14o Patusimi ma nyawa, o Kasuluhimi ma nyawa, de o Kafatorimi ma nyawa. De o Kasuluhimi ma nyawaino ahao yoboaino o Filistina ma nyawa.
15De o Haama ai ngofaka o Kanani ahao to unangoo ai ngofaka o riaka o Sidono de ai ngofaka o dodoto o Hete. 16De o Kanani to una ai totoforauku gea ona abe yogogere manga kokingi-ngioka o Kanani ma tonakoka abe manga romanga o Yebusi ma nyawa, o Amori ma nyawa, o Giragasi ma nyawa, 17o Hewi ma nyawa, o Ariki ma nyawa, o Sini ma nyawa, 18o Arawadi ma nyawa, o Semari ma nyawa, de o Hamati ma nyawa. De ipaha o Kanani ma nyawa gea ahao yomahikabarihi ma gurutika. 19Ho ahao to ona manga tonaka utuohi ilamoko hiadono manga batingi dau o Sidonoka de ihikaiye o Gerariye hiadono o Gasaiye. De dai o gahioka manga tonaka ihikaiha hiadono o kota-kotaiha abe ma romanga o Sodomo, o Gomora, o Adima, de o Seboimi. De naga utu yogogere ma gurutikahi abe manga kota o Lasa.
20Ho naa ibooto ma titi o Haama ai totoforauku abe o kiaka manga tonaka amomoi de to ona manga demo amomoi de manga fam de manga dutu homoi-homoi.
O Seeme ai totoforauku
21De o Yafete ai riaka o Seeme unangoo naga ai ngofa-ngofakuku, de ai kuwewete womatengo ai romanga o Ebere. De o Ebere una gea wodadi o Ibarani ma nyawa mata-mataika manga tofora.#10:21 Abe yahiromanga o Ibarani ma nyawa ona gea o Isiraele ma nyawa de manga romanga moioli gea o Yahudi ma nyawa. Ho ma romanga hange naa ma titi o Seeme ai totoforauku abe ona gea o Abarahaama ai danongo o Yakubu ai totoforauku. Dodadi 25:26
22O Seeme ai ngofa-ngofakuku naga manga romanga hokonaa: o Elama, o Asuru, o Apa-kasada, o Luudu, de o Arama.
23De o Arama ai totoforauku gea ona abe ahao yomahitoomu-toomu ai ngofa-ngofakuku manga roma-romangika. Ho ona gea o Usu ma nyawa, o Huulu ma nyawa, o Getere ma nyawa, de o Maasa ma nyawa.
24De o Apa-kasada naga ai ngofaka womatengo ai romanga o Sela, de to Sela ai ngofaka o Ebere.
25De o Ebere naga ai ngofaka yahinooto, manga romanga o Pelege de o Yokatana. O Pelege ai romanga ma titi o regu, de iwihiromanga hokogea angamoi ma oraha una naga de o dunia ma nyawa yomaregu.
26-29De o Yokatana ai totoforauku gea ona abe ahao yomahitoomu-toomu o Yokatana ai ngofa-ngofakuku manga roma-romangika. Ho ahao naga abe yomahiromanga o Alamoda ma nyawa, o Selefe ma nyawa, o Hasara-Mawe ma nyawa, o Yeraha ma nyawa, o Hadorama ma nyawa, o Usala ma nyawa, o Dikala ma nyawa, o Obala ma nyawa, o Abimaele ma nyawa, o Sieba ma nyawa, o Ofiri ma nyawa, o Hawila ma nyawa, de o Yobaba ma nyawa. Ona mata-mata abe yapake o roma-romanga gea to Yokatana ai ngofa-ngofakuku. 30De to ona manga tonaka gea o Mesa ma kapongoka de imahikaiha o wange ma hiwariha hiadono o loku-lokuiha abe imahikitigino o Sefarino.
31Ho naa ibooto ma titi o Seeme ai totoforauku abe manga fam homoi-homoi de to ona manga demo amomoi, de o kiaka manga tonaka amomoi de manga dutu ma romanga homoi-homoiika.
32Hokogea o Nuhi ai ngofa-ngofaka manga totoforauku manga ade-ade abe hokokia yolape-lapeuku de yodadi o dutu-dutu. Ho o nguihi ma amoko gea ibooto de o dutu-dutuino gea ahao naga o nyawa yahikokabarihi o dunia ma amokika.
Currently Selected:
Dodadi 10: MJDD
Highlight
Copy
Compare
Share
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
