Room 6

Krais tool aboloka toga ne kunol kuruv kweke abollunguuwo tonolbusuko imo'nodowado tovinokwono

1Toro te Gooti tool gamoro yasuwa'wino sugumaluko nekubweyodowodo tovino kuudo yaurowa'ji aro nodumwala'jo. “Gooti tool gamoro poowokalago tovida'ai yasuwa'wino sugumaluko pugai'aro guureji nekubwemovla'mwalono'moneyokwe nevu ma'no ma'no kuuno amjumovlavogawano,” nodumwala'jo. 2Nevu su toro madowa'ji kunol kuruv aro kuudo neya yaurogawano. Krais tool aboloka toga ne kunol kuruv kweke me'no abollunguuwo tonolbusuko imo'nodowadonogano. Toro imo'nodowado tonol ma'no ma'nodo tovuro dolago tomuuda'ai me'no birolo'nugolokwodowadonogano. Toro tovino tov nevu ma'no ma'nodo tov aki aiko te nomjumovla'mwala'jo.

3 # Gal. 2:20 Kevu aro kuudo me'no youroma'nodupudogaikikono. Nevu yiuwi'nokai Krais Jisasolluno kuudo uubweyodowado tonol kwollu me'no uuguro'mwonyodowadonogano. Aro to'busukokwono. A'mwo pwol wonyo kuuvolluno'ji toga wonyo tovi dolago tomuu kuula'dowo'jure toollu wonyo tov bu'duvoloma'dowodokwono. Su toro to'busuko kubalno Gooti tool nemi nekumaro'no Jisasollu tomuu yiunokuudo aulomonekumwallokaikono. Toro aulomonekumwalloka tonol Krais Jisasol aboloka toga ne kunol kuruv kweke abolowonogano. 4#Kls. 2:12Toro tonol Krais tooke bolowono buuso tovi amollusanekubweyoponogano. Krais tool buuso tovi wo'duke toollu gami ganumiyago tool gavnokweyolluro jurogudo kuunodo tokwe aiyo aiko te amodukavokaikono. Toro to'busuko kubalno Gooti tool Krais toollu tomuu aulomonekumwallokaikono. Toro aulomonekumwalloka tovida'ai nemi poowokalago tov aiyo aiko te imo'nodowadonogano. Toro tovino tov nemoro poowokalago ton aiyo me'no imo'nodowado tonolluro pasudo kun kuruv muuduko tomgu'aro yomjumovla'mwalanonogano.

Krais aiyo aiko te adukavoka to'busuko kubalno ne kunol kuruv aiyo imo'nodowado tovinokwono

5Nevu Krais aboloka toollu me'no uuguro'mwonyodowadonogano. Aki Krais aiyo aiko te adukavoka su toollu me'no uuguro'mwonyodowadonogano. Toro tonol gavubusuko aiyo aiko te nodukawanonogano. 6Aki Krais toollu i'noguropte tovi amovoromiyoguroptowosopo kuunodo toga Gooti tool nemoro kuudo uumdo kworai kuruv aval'no aromiyebuuropiyokaikono. Su toro aromiyebuuropiyoka tov aro tovinokwono. Gooti tool kuudo uumdo tooravuro jurogudo tovi modukwopiyo'no nevu ma'no ma'nodo tovi dolago tomuu ki'na'dowore tonollu bomollurolovonekumokalokwiyo'moneyokwe aromiyebuuropiyokaikono. 7Toro aromiyebuuropiyoka tovino tov aga aro kuudo youroma'dowadonogano. Nevu Krais tooke abolowo toga ma'no ma'nodo tovuro jurogudo tovida'ai me'no abirolo'nugolokwowonogano.

8Nevu Krais tooke abolowo su tonol aro kuudo uubweyodowadonogano. Krais toolluro aiyo aiko te adukavoka su tov ne kunolluda'aiyo'mokwono. Toro tonol kweke aiyo mujomwekovla'mwalanonogano. Su toro kuudo uubweyodowa 9aki aro tonyuno kuudo me'no youroma'dowadonogano. Krais bolo'no aiyo aiko te adukavoka su tool bolnodo tovuro jurogudo tovi yiunokuudo kuuwolovokaikono. Toro toolluno tov aki aiko te mabolonekono. 10Krais tool yiuno puga'no abolokaikono. Yiuno puga'no aboloka su tool ma'no ma'nodo tovuro jurogudo tovi me'no kuuwolovokaikono. Toro aboloka kwol kuruv aga'no'gwowi aiyo aiko te me'no dukavo'no Gooti tooke mujomwekovla'mdowodekono. 11Su toro to'busuko kubalno kev kugaikul kuruv aro kuudo neya jaurogaulo. Oo nevu ma'no ma'nodokwe tobuuronol Krais Jisaseke me'no abolowonoldeyo. Toro abolowo su tovi'aro nevu ma'no ma'nodo tovuro jurogudo tovida'ai me'no abirolo'nugolokwowonoldeyo. Toro tonol Jisasolbusuko me'no dukavowono Gooti tooke aiyo mujomwekovla'mdowadonoldeyo. Kevu su toro kuudo neya jaurogaulo.

12Kevu Gooti tooke aiyo me'no mujomwekovla'mdupudo togaikul ma'no ma'nodo tov kemi aki aiko te mido nomollekumwalmwalo'jo. Aki kemoro kwako akavida'ai kulako ton ma'no ma'no yo'moneyokwe winodopure tonyu muu'nyubusuko to'no yopi nuumjunmwalpiyo. 13Aki kemoro kulako tovida'ai suvlato togai ma'no ma'nodo tovuro womdokwe nuuwimo'numwalpiyo. Su tov aro tovinokwono. Sumdomgu kevu bolnodo tovi dolago tomuu mwalodupu me'no abollungopo togaikulbusuko sumo'nyajupogaikikono. Toro kugaikul kuruv aga'no'gwowi kevu aki aiko te duka'mdupu aiyo me'no imo'nodupudogaikikono. Toro togaikulluno tov Gooti toollu ilomoropiyapureyokwe kemi kulako tovida'ai suvlato togai sugudo to'no neya domjumovlavogaulo. 14Toro togaikullu ma'no ma'nodo tov kemi aki aiko te mido nomollekumwalmwalo'jo. Su tov aro tovinokwono. Kevu Moosesolluro loowo tonyu dolago tomuu mamwalmwakovo. Toro kugaikul kuruv Gooti toolluro yasuwa'wino sugumaluko ikubweyodowodo tovino'gwowi dolago tomuu aulomwakovo.

Nevu sugudo yo'moneyokwe tovi ki'nato womdokwe imo'numwalano tovinokwono

15Nevu muudu'nodo toga Moosesolluro loowo tovi dolago tomuu mwalodowore tonollu Gooti tool me'no abomollurolovonekumokalokwokanogano. Toro bomollurolovonekumokalokwino sumaiyokwe Gooti toolluro yasuwa'wino sugumaluko nekubweyodowodo tovi dolago tomuu me'no kuulomwalodowadonogano. Toro kuulomwalodowado tonolluno tov aga pweku aro nokwo dubinekudukono? “Oo nuu loowo tovi dolago tomuu mamwalodumdo tovino tov nuu ma'no ma'nodo ton nokwo mujumovla'mwalmonyugono.” Pweku su toro nokwo dubinekudukono? Awiyo. Nevu su tov ku'nono nodumwala'jo! 16Toro tonol aro kuudo neya yaurogawano. Nevu buro'nyo buro'nyorodeyo toorai kuumjuna'ji tov su tooro nemi mido mollonekumwalokwe nekullumo'nupinorogano. Su toro kuudo me'no yau'dowado tovino tov kevu pugaikul ma'no ma'nodo tovi kuumjunpi tov ma'no ma'nodo su tovuro mido mollomwalo tovi dolago tomuu kuulai'movopi ki'nato womdokwe wimo'nugovlapinogaikikono. Ma'no ma'no pasudo tovi ki'nato womdo kwipi tov nobolpinogaikikono. Toro kuvi kuruv kevu Gooti toolluro yogalo tovino'gwowi kaduko wiyopi kemi poowokalago tokwe kuudo kuubwepi togaikul Gooti tool gamoro sumdo tovi sugudo wimo'nyo'moneyokwe ilaiyo mollekumaronogaikikono. 17-18Toro te aga nevu Gooti toollu, “Nenoloo,” neya wuudogawano. Su tov aro tovinokwono. Muudu'nodo toga kevu ma'no ma'nodo tovuro ki'nato womdokwe kwimo'nyajupo kugaikul kuruv Gooti toolluro nebaikuuguudo tovi wuu'no'mno kemi poowokalago kuunodo tokwe kuudo me'no kuubweyopogaikikono. Toro kuubweyopo toga'no'gwowi me'no birolo'nugolokwo'mno nebaikuuguudo su tovi uumjunodupudogaikikono. Toro togaikul sugupasudo yo'moneyokwe tovuro ki'nato womdokwe me'no wimo'nodupudogaikikono.

19Kevu kwako akavida'ai togaikul kavlo tovino kuudo neya youromapino'moneyokwe nuu yovekurajo kuuguudo togai sodekubwasadokwono. Muudu'nodo toga kevu a'mwo ki'nato womdokwe tonbusuko sumo'nyajupogaikikono. Toro togaikul kaiya'nodo tokwe'aro kirovanyuvanyu tokwe'aro tovallu ki'nato womdokwe wimo'nodupu kemi suvlato togai womdo kwiyajupogaikikono. Toro kuvi kuruv aga'no'gwowi kevu Gooti toolluro ki'nato womdokwe tonbusuko me'no wimo'nodupudogaikikono. Toro togaikulluno tov gamoro sugupasudo tonyu momjumovlaiyo'moneyokwe kemoro yiuwi'nokai suvlato ton Gooti toollu neya duuwiyogaulo. Su toro kwipi tov Gooti gavnokwe toolluro sugupasudo to'no mujumovla'mwalpinogaikikono.

20Kevu kuudo neya jaullulo. Muudu'nodo toga kevu ma'no ma'nodo tovuro ki'nato womdo kwiyajupo toga sugudo yo'moneyokwe tovi womdo mwimovlaiyajupogaikikono. 21Aki ma'no ma'nodo tovi dolago tomuu amwallajupo toga ma'no ma'no judo'no judo'nodo tonyu mujeroungovla'mdupu wogulo'mo sajupogaikikono. Su toro tovida'ai sugudo pun abaiki'meyajukogaikuldukono? Awiyo, sugudo pun mabaiki'meyajuko kuvi kuruv yiuno bolnodo to'gwowi abaiki'meyajukokwono. 22Toro kugaikul kuruv aga'no'gwowi ma'no ma'nodo tovi dolago tomuuda'ai me'no birolo'nugolokwodupu Gooti toolluro dolago tomuu kuulomwalodupudogaikikono. Toro kuulomwalodupudo toga Gooti toolluro kwoloraiyo kuunodo wimo'nodupu gamoro ki'nato womdokwe wimo'nodupudogaikikono. Toro togaikulluno tov kemoro puu'do'gwapiyo toru ai'mopi toga Gooti tooke aiyo yiunokuudo mujomwekovla'mwalpinogaikikono. 23#Jn. 4:10; Ef. 2:8-9; 2Krn. 9:15Kevu kuudo neya jaullulo. A'mwo abolo ma'no ma'nodo tovi dolago tomuu mwalodupudo ton kemi mubiyo tov ma'dupudogano. Mubiyo su tov bolnodo tokwono. Toro kuvi kuruv nemi Aguto Krais Jisasolluro womdo sopiyoka tovida'ai Gooti toolno'gwowi aiyo yiunokuudo mujomwekovlaiyo'moneyokwe tov yiuno yasuwa'no nekullabodowodekono.

Currently Selected:

Room 6: SMB

Highlight

Copy

Compare