Mak 4

Jisasol a'mwo pulollosi womdokwe pwolluno yovekurajo sodubwasoka tovinokwono

(Matyuu 13:1-9; Luuk 8:4-8)

1 # Lk. 5:1-3 Toruda'ai Jisasol wonyo buugo tomuuno avlavokaikono. Toro plaino sumaiyokwe toga buugo tovuro wolo toru aki aiko te sodubwasajukekono. Kwolallo bwotonyo abi'bwo'nopo toga boot puruv wonyo tovi muunyu toru wo'duke tovi Jisasol ilomwalo'no sodubwasajukekono. Toro yodubwasoduke toga kwolallo ton wonyo buugo te wolo toru amwallajupogano. 2Toro mwalodopure toorai ibwaso'mo tool yovekurajo bwotonyago togai subwasajukekono. Toro tool akaro togai subwasajukekono.

Puruv aro kuudokaikono. 3“Kevu duu'nyulo. A'mwo pwol gami wit sulo ton pulolloso'mo tool gami womdo tomuuno avlavokaikono. 4Toro plaino sumaiyokwe novlollosoduke pun puuto tovi muunyu toru abwolorapogano. Toro abwolorapo tonyu dokato tooro bo'mno abomonopiyopogano. 5Aki pun kwako sulwomdokwe tomuu abwolorapogano. Kwako yiuno pwekwonodokwe tovino tov yere abilorouwiyapogano. 6Yere bilorouwiya'mno puluko nonaguto tovino tov kuujo adoka toga yere abuukuropiyopogano. 7Aki pun kwako aulewomdokwe tomuu abwolorapogano. Aulolo ton aguto gullo'mno abu'duvolomaropogano. Toro abu'dovolomaropo tovino tov sulo mai'nopogano. 8Aki pun kwako ilaiyo tovi abwolorapogano. Toro abwolorapo ton ilaiyo to'no gulluno sumaveyokwe sulo ai'nopogano. Toro ai'nopo ton pun 30-pela pun 60-pela pun 100-pela ai'nopogano.” Kuudokaikono. 9Aki aro kuudokaikono. “A'mwo pwol kuuguudo akavi youromallo'moneyokwe tool po'dogalo neya wuu'nono.” Kuudokaikono.

Jisasol yiuno yovekurajo togaino ibwaso'mo saullajuko tovinokwono

(Matyuu 13:10-17; Luuk 8:9-10)

10Toruda'ai Jisasol judo toolno mwaloduke toga gami 12-pela uumjunyokwe toorogai'aro a'mwo pworogai'aro tooro kweke amwaloporogano. Toro mwalno sumaveyokwe Jisasollu gamoro yovekurajo subwasajuko tonyuno kuudoganoporogano. 11Toro kuudoganopo tool aro kuudokaikono. “Aguto kig Gooti toolluro mido mollomwalodowodo tovino kavlo tov yiulo apuu'naso. Toro tovino nuu yodekubwasodumdo kavlo tov kevu me'no youroma'dupudorekikono. Toro kuvi kuruv a'mwo pworo kavlo tovino nyouromapiyokwe tooraino'gwowi yiuno yovekurajo to'no yodubwasodumdonyugono. 12Su tov aro tovinokwono.

“Toro tooro kuudo souragunyumo'nupi tov Gooti tool kemoro ma'no ma'nodo tovuro kirumwallo tovi nomodukwopiyonekono. Toro kworo kuruv aro yokwerogano. Wonyuno wonyuno yopi kworo kuruv kavlo tovino ku'nono miyouromapinorogano. Aki wuu'nyuno wuu'nyuno yopi kworo kuruv kavlo tovino ku'nono miyouromapinorogano. Toro tooraino tov Gooti tool kemoro ma'no ma'nodo tovuro kirumwallo tovi mamodukwopiyo'mo winyokwekono. Toro tooro kuudo nyouragunyumo'nupiyo.”

Su toro tovino'mo yovekurajo to'no yodubwasodumdonyugono.” Kuudokaikono.

Wit sulo tovino yovekurajo kuuguudo tovuro kavlo tovinokwono

(Matyuu 13:18-23; Luuk 8:11-15)

13Toro wuujuno sumaiyokwe aro kuudoganokaikono. “Kevu yovekurajo akavino kavlo tov kuudo jukiyouroma'mwakovo? Kuudo miyouromapi to'gwowi yovekurajo punyu kuudo adado youromapinorekuldeyo?” Kuudoganokaikono. 14Toro wuudoganyuno sumaiyokwe toga yovekurajo tovuro kavlo tovino aro kuudokaikono. “A'mwo pulollosi womdokwe tool Gooti toolluro yogalo tovi ibwasokwe toolbusukekono. 15Wit sulo ton puuto tovi muunyu toru abwolorapo ton a'mwo pworaino'busukogano. Kemi poowokalago tovi Gooti toolluro yogalo tov pulollosoduke tonyu Satanyol yere bodowo novlollosoduke tonyu bomodukwopiyodowodekono. 16Pworo wit sulo ton sulwomdo toru abwolorapo to'busukorogano. Toro tooro Gooti toolluro yogalo tovi yere wuu'nodupu ilaiyo yokwerogano. 17Toro kworo kuruv yogalo tov pulukomaiyo to'busuko kubalno kemi poowokalago te maula'duke tooro yogalo su to kuvida'ai tabunyuwuulo puruv abwo'ji toga yere wuugollu'mo'mdupudorogano. Yogalo su tov manyu toga mauluuwollokweyokwono. 18Aki pworo wit sulo ton aulewomdo tomuu abwolowoguroka to'busukorogano. Toro tooro Gooti toolluro yogalo tovi kuu'noporogano. 19Toro kuu'nopo kworo kuruv kwako akavida'ai kuto ivito tonyuno kuudo kwolallo yourukwapiyodupudo tokwe'aro nuugwiyo bwotonyo tov nemi yojolukuulovonekuma'dowodo tokwe'aro noonyumwonyu punyuno kwanyu sumdo kinuwiyodupudo togai'aro yiuwi'nokai kuudo su ton Gooti toolluro yogalo tovi bu'duvoloma'dupudogano. Toro tovida'ai jurogudo imo'nyo'mo tooro jurogudo ku'nono mimo'nopi sulo kun kuruv mai'nodupudorogano. 20Aki pworo wit sulo tov kwako ilaiyo tovi abwolowoguroka to'busukorogano. Toro tooro Gooti toolluro yogalo tov wuu'nodupu mallokwerogano. Toro ma'dupudo toga jurogudo gullopi Gooti toolluro womdo tovi amollupi toga sulo ki'nodupudorogano. Toro tooravuro sulo ai'nupi ton pworo 30-pela pworo 60-pela pworo 100-pela ki'nodupudorogano.”

Bakokwe gworeko tov yiulo tomuu mwoso'moneyokwe tovinokwono

(Luuk 8:16-18)

21 # Mt. 5:15; Lk. 11:33 Toruda'ai Jisasol yovekurajo puruv aro kuudokaikono. “Bakokwe gworeko tov mokaulodapu soospen tokwe bwososodupudo'mdukono? Oo aki noluuleyo te dolago tomuu wosodupudo'mdukono? Awiyo. Bakokwe gworeko tov noluuleyo te muunyu toru'no wosodupudokwono. 22#Mt. 10:26; Lk. 12:2Toro to'busuko kubalno yiuwi'nokai yiulo apuu'nasuko kugai'aro yiulo yogalo kugai'aro yiuwi'nokai ton kuu'maiyo toru'no bomollolupto'nosonogano.” 23Juno sumaiyokwe kuudokaikono. “A'mwo pwol kuuguudo akavi youromallo'moneyokwe tool po'dogalo neya wuu'nono.” Kuudokaikono.

24 # Mt. 7:2; Lk. 6:38 Toro wuujuno sumaiyokwe aro kuudokaikono. “Guu Gooti toolluro yogalo tovi wuu'no'bi toga kavlo tovino souroma'bi tookuji gumoro souroma'bi toru'aro Gooti toolluro nogujabiyo'mo tov avalo toru'aro yogubwasonekono. Aki pugai'aro nogujabwonekono. 25#Mt. 13:12, 25:29; Lk. 19:26Toro te a'mwo pwol moro yogalo tovuro kavlo tovino kuudo souromaro'ji tov Gooti tool a'mwo su toollu kuudo pugai'aro nuuwiyonekono. Toro kuvi kuruv a'mwo pwol moro yogalo tovi muu'nyubusuko yowo'ji kavlo tovino kuudo miyouromaro'ji toolluno'gwowi gamoro kuudo pwekwono uubweyodowo'jure su tobuurai Gooti tool nomodukwopiyonekono.”

Ikulwiyo gullodupudo tovino yovekurajo kuuguudokwono

26Aki toro wuujuno sumaiyokwe aro kuudokaikono. “Aguto kig Gooti toolluro mido mollomwalodowodo tov aro to'busukokwono. A'mwo pwol ikulwiyo ton kwako tovi pulollodukwopiyodowodo to'busukokwono. 27Toro pulollodukwopiyowo'ji toga kwako tovi bwolorawo'ji bilarowiyodupudogano. A'mwo avlollodukwopiyo'ji su tool surakuuto toga sa worowo'ji iruko toga dukavowo'ji yokwekono. Aki toro tool ikulwiyo ton bilarowiyodowo'jure tonyu mamollovo'dogallokwekono. Toro tool ikulwiyo su tonyuno, Oo su toro tomgu'aro dobilarowimwakovo, kuudo nonagutekono. 28Kwako gavnokwe tovi anakuuto tomuu rowiyodupudogano. Muudu'no sumdalo rowiyowo'ji kuuto uumwallowo'ji kuuto tovi anakuuto tomuuda'ai no tov ki'nonokwono. 29Su toro ai'no'ji toga a'mwo tool suwiyo tonyu wonowo'ji sallupe nodukwaiyo touke dovanyokwekono. Aguto kig Gooti toolluro mido mollomwalo tov su toro to'busukokwono.” Kuudokaikono.

Ikulwiyo mastet tovino yovekurajokwono

(Matyuu 13:31-32; Luuk 13:18-19)

30Toro juno sumaiyokwe aro kuudokaikono. “Aguto kig Gooti toolluro mido mollomwalodowodo tovino adadomgu'aro ikuduuwallumonyudeyo oo burowo'nyo yovekurajo tokwe ikudumonyudeyo?” 31Toro wuujuno sumaiyokwe aro kuudokaikono. “Aguto kig Gooti toolluro mido mollomwalodowodo tov iko mastet tovuro ikulwiyo tollubusukokwono. Iko su tovuro sulo tov yiuno kula'nyokwono. Yiuwi'nokai sulo kwako tovi buraudodupudo pun bwotonyogano. Toro kuvi kuruv sulo su to'gwowi kula'nyo kuunodokwono. 32Toro kuvi kuruv aburaudubi toga sulo tov bilawogurowo'ji bwotonyo gullonokwono. Yiuwi'nokai kemi womdo tomuu buraudodupudo tonyu uuwolowonokwono. Gamoro pilo tov bwotonyo bolomunugolokwonokwono. Toro tovi sulugumdo tovida'ai dokato tooro wolabopi ipilo su tovuro du'gurolo tomuu kemi ago ton modupinorogano. Toro tovinokwono.” Kuudokaikono.

Jisasol yiuno yovekurajo kuuguudo togaino sodubwasajuko tovinokwono

(Matyuu 13:34-35)

33Toro wuujuno sumaiyokwe Jisasol Gooti toolluro yogalo ibwaso'mo tool yovekurajo su toro togai subwasajukekono. Aki yovekurajo pugai'aro subwasajukekono. Kemi poowokalago tovi yowa'no youromallo'mo tomgu'aro togai subwasajukekono. 34Jisasol a'mwo abolo tonyu yiuno yovekurajo togai to'no sodubwasajukekono. Toro kwol kuruv gami uumjunyokwe tooro judo tomuu mwalodopure tooraino'gwowi yovekurajo tonyuro kavlo ton sodubwasajukekono.

Jisasol dole'manollo tokwe wonyo luwagu luwaguto tokwe tovallu aduumjukuroka tovinokwono

(Matyuu 8:23-27; Luuk 8:22-25)

35Iruko su tollugwojuro sulato toga Jisasol gami uumjunyokwe toorai aro kuudokaikono. “Buugo tovi igo'mguuno ilowano.” 36Toro wuujuno sumaiyokwe uumjunyokwe tooro a'mwo abolo tonyu kuugollu'movoporogano. Toro wuugollu'mo'mno sumaveyokwe Jisasol boot tovi kuuno ila'duke toollu igo'mguuno amokailaporogano. Aki boot pugai'aro kuumjunopogano. 37Wonyo buugo tovi toro pla'mdopure toga dole'manollo bwotonyo imo'no'no wonyo buugo tov luwagu luwaguto sokakwono. Toro yoduke tovida'ai wonyo tov boot tovi anakuuto tomuu kuula'no auloomwanokakwono. 38Toro kuuloomwanoduke toga Jisasol boot tovuro buulo aiyo'wo do'gwapiyo tomuu sa kwollajukekono. Gamoro mido tov ivito mido'aiko te muunyu toru woso'no sa kwollajukekono. Toro wo'duke toollu gamoro uumjunyokwe tooro judukuuro'mno aro kuudoporogano. “Ibwasokweyoloo, nemoro nobollo'mo yodowore tovi manekwonyu jadokuuno?” Kuudoporogano. 39Toro kuudopo tool dukavo'no dole'manollo tokwe wonyo tokwe tovallu aro amojurugolokaikono. “Kavo dooloroulo!” Toro te dole'manollo tov imwogapiyo'no wonyo buugo tov kaveno boroollo amjo'mawokakwono. 40Jisasol toro ino sumaiyokwe gami uumjunyokwe toorai aro kuudokaikono. “Kevu buro'nyo'mo luko jadokwovo? Gooti toolluno kuudo muubweyo jukiyadokwovo?” Kuudokaikono. 41Toro tooro luko bwotonyo ino sumaveyokwe aro ajunoporogano. “Awi, dole'manollo kurukwe wonyo kurukwe kaduko kwimwakulo akal adadomgu'aro kuunodo tooldukono?” Ajunoporogano.

Currently Selected:

Mak 4: SMB

Highlight

Copy